43-р бүлэг

Харцага үдээс хойших тэнгэр өөд хөөрч, ямар нэг зүйл ойртож байгаа эсэхийг шалгахын тулд тосгоныг том хүрээгээр тойрон нисэхийн зэрэгцээ мананг далимдуулан хөдөлж болох ямар нэгэн зүйл байгаа эсэхийг ажиглав.

Өдрийн турш юу ч орхигдуулаагүй гэдэгтээ тэр бараг итгэлтэй байсан ч түүнээс нуугдах арга үргэлж байдаг. Нүхэндээ нуугдсан хулгана шиг тосгон дотор гарч ирэх мөчөө хүлээсэн мангасууд байж ч мэднэ.

Тэр тосгоныг тойрон мушгиа замаар ниссээр арван километрийн зайд хүрэх үедээ тэдний хүлээж байсан зүйлийг оллоо.

[Оллоо. Бөөн Гоблин тосгон руу явж байна. Тэд галаа унтраагаад хөдөлж эхэллээ. Би араас нь дагах уу?] гэж тэр асуулаа.

Карл хөмсгөө зангидлаа. Энэ бол оройдоо бэлдэхдээ төсөөлсөн хамгийн муу хувилбаруудын нэгтэй тун ойр байв.

[Тэднээс нүд салгалгүй ажигла, гэхдээ бидэн рүү ирж байгаа өөр зүйл байхгүйг бас шалга. Бид Гоблинуудын нэг бүлгийг дийлж магадгүй, харин Энгийн зэрэглэлийн мангасаас хүчтэй юм байвал асуудалд орно.] гэж тэр хариулав.

Карл Харцага өөрөөс нь аль зүгт, хэр хол байгааг ерөнхийд нь мэдэрч чаддаг тул Гоблинууд тосгонд хараахан ойртоогүй, тэднийг ирэхээс өмнө бага зэрэг хугацаа байгааг ойлгов. Гэхдээ жинхэнэ бэхлэлт барина гэж найдахаар хангалттай хугацаа байсангүй.

Хийх ёстой зүйл нь Академи руу залгаж, энэ бүхэн төлөвлөгөөний нэг хэсэг мөн эсэхийг баталгаажуулах байлаа. Багш нар тэднийг илгээхдээ тосгон эзгүй болсныг мэдэж байсан эсэх нь тодорхойгүй тул лавласан нь дээр. Гагцхүү Академийн утасны дугаарыг хаа нэгээс олох хэрэгтэй. Мэдээж дугаар нь нийтэд бүртгэлтэй байдаг бол шүү дээ.

Энгийн хүн Элитүүдтэй хүссэн үедээ шууд холбогддоггүй болохоор үүдний танхим дахь энэ компьютерээр хайсан ч дугаар нь амархан олдохгүй байж мэднэ. Гоблинууд тосгонд хүрэх хүртэл бараг нэг цаг байгаа тул Карл хагас цагийн дараа Данаг сэрээж, тулалдаан эхлэхээс өмнө нүүр гараа угааж, юм идэх боломж өгөхөөр шийдэв.

[Гоблинууд салж байна. Тэд тосгон даяар тархана, том бүлгээрээ явахгүй.] гэж Харцага тосгоны намхан хананд ойртож буй Гоблинуудын байдлыг чадах чинээгээрээ тайлбарлав.

[За. Мананд орж, бие биеэсээ салмагц нь ажилдаа орж болно. Зүгээр л бэртэж болохгүй. Би Данаг одоо сэрээе.] гэж Карл хариулав.

Тэр Шидтэнг зөөлөн сэгсэрч сэрээгээд үүдний танхимын арын амралтын өрөө рүү дохив.

"Тэнд ариун цэврийн өрөө байгаа. Тулаан эхлэхээс өмнө нүүр гараа угааж, юм уумаар байвал амжина." гэж тэр шивнэв.

"Бидэнд хэр хугацаа байна?"

Карл Харцагын тасралтгүй мэдээллийг сонсонгоо хугацааг аль болох тооцооллоо.

"Тосгонд яг орж ирэхэд тав орчим минут, энэ талд хүрэхэд арван тав, хорин минут байх. Одоо захын мананд орох гэж байна, хайж шинжих зуураа алхаагаа их удаашруулчихлаа."

Дана арын өрөө рүү ороод хэдхэн минутын дараа гар бүрдээ нэг өдрийн хоолны хайрцаг барьсаар гарч ирэв.

"Одоохондоо муудаагүй байна. Ядаж үнэр нь тэгж байна. Амралтын өрөөний хөргөгчинд байсан юм. Хэний ч хоол байсан биднийг уучлах байлгүй."

"Академийн утасны дугаарыг мэдэх үү, эсвэл яаж олохыг нь? Энэ бүхэн төлөвлөгөөний нэг хэсэг мөн эсэхийг лавлаад залгасан нь дээр байх." гэж Карл үлдэгдэл спагеттитай сав, хоёр сэндвичийг дуусгаад хэлэв. Үүнийг авчирсан хүн үнэхээр их хооллодог бололтой.

"Хайж үзэж болно, гэхдээ нийтэд байдаг дугаар мөн эсэхийг мэдэхгүй. Ямар нэг зүйл ойртвол надад хэлээрэй." гэж Дана зөвшөөрөв.

Тэр Академийн холбоо барих мэдээллийг хайхаар компьютерт суухад Карл нөгөө ширээн дээрх дэлгэцээр барилгын гаднах хэсгийг ажиглав. Хяналтын камер цөөхөн ч барилгыг тойруулан байрлуулсан бөгөөд орц дээр нэмэлт нэг камер байлаа.

"Хүлээгээрэй, бид бусад хаалгыг шалгахаа мартчихаж. Надад нэг минут өг, хажуугийн хаалгануудын аль нэг нь түгжээгүй үлдээгүй эсэхийг шалгая." гэж Карл баазаа хамгаалахад чухал нэг алхмыг орхисноо ойлгон шивнэв.

Гадагш гардаг өөр ганцхан хаалга байлаа. Үүдний танхимын арын галын гарц. Гэвч Карл тийшээ очоод тэр хаалга түгжээгүй төдийгүй түгжих боломжгүйг ойлгов. Харин түүнд хэдэн хэрэгсэл байсан болохоор хаалгыг бэхэлж хаах боломж байлаа.

Тэр урд хэсэг рүү буцаж, авто засварын газраас авсан ачаа бэхлэх нэг саваа болон урт гинжийг авчрав. Савааг хонгилын хоёр ханыг тулган хөндлөн байрлуулж, гинжийг савааг тойруулан ороогоод хаалганы бариулаар сүвлэж болох байв. Гинжний хоёр үзүүрийн дэгээ нь байранд нь тогтооно, харин бариул нь бүдүүн төмөр галын хаалгыг нэвт боолтоор бэхэлсэн тул хангалттай бат бөх харагдав.

Карл Гоблин яг хэр хүчтэйг мэдэхгүй ч ганцаараа төдийгүй туслахтай байсан ч тэр хаалгыг татаж онгойлгож чадахгүй гэдэгт эргэлзсэнгүй.

Савааг хонгилын хоёр хананд зөв байрлуулахын тулд хэд хэдэн удаа оролдсон ч гинжийг чангалж дуусмагц хаалга маш бат бөх боллоо. Ингээд ар талаас нь ямар нэг зүйл сэм орж ирэх вий гэж хэт санаа зовох шаардлагагүй болов.

[Тэд мананд орлоо. Одоо Гоблинуудыг устгаж эхэлнэ.] гэж Харцага мэдээлэв.

"Тэд тосгонд орчихлоо. Харцага ажилдаа орж байна, гэхдээ энэ талд хүрэх хүртэл бага зэрэг хугацаа бий. Замдаа байшингуудыг тонох гэж оролдох байх, тиймээс бидэнд хүрэхэд нэлээд удна." гэж Карл шивнэв.

[Бүгд зогсохгүй байна. Нэлээд олон нь манан дундуур тосгоны гүн рүү гүйж байна. Удахгүй та хоёрын ойролцоо хүрч магадгүй. Би тагнах уу, агнах уу?] гэж Харцага асуулаа.

"Тэд нэг нэгээр нь системтэй хайхгүй байна, тосгон даяар тарж, энэ зүг рүү ирж байна. Бэлэн бай."

[Бидний ойролцоо ямар нэг зүйл ирвэл урьдчилж мэдэгдээрэй. Гэхдээ боломжтой хэмжээгээрээ агна.]