45-р бүлэг

Нүдгүй харцтай, нулимстай цусаар уйлсан маскотууд "Хөөе, өөрөө хэн нэгнийг алж эхэл" хэмээн шаардсан тэрхүү цөхрөлтэй нөхцөлд худал үгс миний амнаас аяндаа л урсчихлаа.

"Тийм ээ. Сайн бодоод үз л дээ."

Цонх дээр галзуурсан мэт бужигналдах маскотуудыг харахгүй гэж хичээх зуураа би 'Яг одоо л нэг гайхалтай санаа олчихлоо' гэсэн царайг гаргав.

[Энэхүү Харанхуй биднийг нэг баг болгон холбосон. Гэхдээ багийн гишүүнээ санаа дуугаар устгах нь үнэхээр зөв юм гэж үү?]

Уг нь бол яахав дээ, боло л доо.

[Багийн гишүүд хоорондоо бага зэрэг зай барихад л энэ Харанхуй биднийг боомилоод эхэлдэг. Тэгтэл хэн нэгнийг алчихвал яах вэ?]

Шударгаар хэлэхэд, цогцсыг чирээд л яваад байж болно шүү дээ.

Гэхдээ тийм юм хийлээ гээд... Хулчгар зүрх минь үүнийг тэсвэрлэж чадахгүй л болов уу. Эцэс сүүлд нь намайг ямар нэгэн 'албан ёсны тамлагч мангас'-аар томилоод л, үхэхэд хамгийн тохиромжтой газраа очоод хэвтэх байх...

Эрвээхэй багны цаадах нүд нарийсав.

"Хэрэв хэн нэгнийг алахгүй бол ямар нэгэн ял шийтгэл ирэхгүй гэж үү?"

"Би хэрэв хэн нэгнийг алчихвал бүгдээрээ устгагдаж болзошгүй гэдгийг л хэлж байна."

"Энэ хоёр магадлал хоёулаа байгаа юм чинь, амьд үлдэх магадлалаа хадгалж үлдэх нь илүү ухаалаг сонголт гэж би бодсон юм."

Нөгөө хүн маань бага зэрэг эргэлзэх шиг боллоо.

Би шүлсээ залгиад үгээ үргэлжлүүлэв.

"Мэдээжийн хэрэг, эцсийн шийдвэрийг Дэд менежер та л гаргана шүү дээ..."

"Тийм шүү! Хэрэв чи намайг алчихвал яах вэ? Чи ч бас үхнэ биз дээ? Чи ч бас үхэхийг хүсэхгүй байгаа биз дээ, энэ галзуу амьтан чинь! Болиоч..."

Би судлаачийн хүзүүний араас хатуу цохиод авлаа.

Тэр газар дээрээ ухаан алдан унав.

[Тоглоом аль хэдийнэ хувилчихсан байхад чи яагаад өөрийнхөө үхлийг ингэтлээ улайран хүсээд байна аа?]

Оффис дээр байхдаа ингэж бодолгүйгээр мөрийтэй тоглоом тоглож бай гайхах зүйл алга байна!

Y-багийн шинэков урьд хожид байгаагүйгээрээ цонхийсон царайтай зогсож байх бөгөөд хориг тавигдсаны дараа судлаачийн мөчнөөс тавив.

Бүх үйл явдлыг чимээгүйхэн харж зогссон A-багийн дээд тушаалтан эцэст нь ам нээлээ.

"Энэ шийдвэртээ битгий харамсаарай."

A-багийн ахлах хүн цаашид юу ч хэлсэнгүй. Миний нэр хүнд нэлээд унасан бололтой.

Гэхдээ одоо энэ тийм ч чухал биш байлаа.

Хамгийн гол нь бид энэ аюултай мөчийг эсэн мэнд даван туулж чадсан явдал байв.

Бие биенээ хайр найргүй дайрахаа болихтой зэрэгцэн "Үх" гэх утгагүй шивнээ ч намжлаа.

Галт тэрэгний гэрэл анивчин унтрах зуур,

"Тэд... тэд алга болчихлоо...!"

Цонхыг тойрон хүрээлж байсан маскотууд ул мөргүй алга болжээ.

Зөвхөн цусны толбо л үлдэв.

Гэхдээ зөвхөн маскотууд алга болсонгүй.

Жолооч маскот ч алга байлаа.

Цоглог паркийн хөгжим ч дуугүй болжээ.

Буухыг сануулсан хөгжилтэй зарлал ч сонсогдсонгүй.

Галт тэргээ гараараа түлхэн гаргаж ирэхэд, дуу чимээ, гэрэл байхгүй хачин хоосон орчин биднийг угтав.

[...Бид яг л далайн уурхайд гишгэчих шиг л боллоо.]

Би [Хөгжилтэй тоглоомын паркийн хэрэглэгчийн гарын авлага]-аас нэгэн хэсгийг санан дурсав.

========================

Хөгжилтэй тоглоомын паркийн хэрэглэгчийн гарын авлага (#64-р судалгааны тэмдэглэл хүртэл хүчинтэй)

4- Тоглоомын паркийн бүс бүрийг сэдвийнх нь дагуу өнгөөр ялгасан байгаа! Хамгийн анх нүдээ нээсэн газар чинь танай багийн харьяалагдах бүс юм!

Бүсээ хүндэл. Бүс бол юу юунаас илүү чухал. Өнгийг нь хар, маскотуудыг бүү уурлуул, маскотууд бол тухайн бүсийн хувьд бүх зүйл нь юм.

========================

Энэ дүрэм ямар нэгэн шалтгаанаар л оршин тогтнодог байж таарна...

Хэрэв та тоглоомын паркийн өнгөт бүсэд маскотыг уурлуулбал, та тэр бүсэд хэдийнэ "зочин" бус болно гэсэн үг.

Эцэс сүүлд нь та үхлийн аюултай нуугдаж тоглох тоглоомын нэгэн оролцогч болон хувирах болно.

Гэхдээ цөмийн товчлуур дээр дарснаас л лав дээр дээ.

[Маскотуудын шаардлага шат ахих тусам улам л хүндэрдэг.]

Тэд ихэвчлэн маш энгийн зүйл гуйж эхэлдэг.

Ямар нэгэн юм идүүлэх, юм зөөлгөх, эсвэл дулаахан тэврэлт өгөхийг хүсэх жишээтэй.

[Гэвч эхнээсээ л хүн алж устгахыг шаардахыг яана?]

Тэгвэл дараагийн тоглоом руу очих үедээ бид аль хэдийнэ үхсэн байвал таарна.

Тэмдэглэлд үлдсэн нэг жишээ гэхэд л маскотууд "Өөрийнхөө давргаар бөмбөлөг хий" гэх мэт галзуу зүйл шаардсан байдаг.

Тэр үед маскотуудын нөлөөллийг эсэргүүцэхэд дэндүү оройтсон байх болно.

Тийм үед үхэх нь дээр санагдаж магадгүй юм.

Энэхүү аймшгийн түүхэн ертөнцөд үхлээс ч дор хувь тавилан байнга л тохиолддог.

Бас одоо ч гэсэн зугтах зам бий.

Хэрэв бид улаан туулай буюу Шидэт туулайн бүсээс зугтаж, өөр маскотын бүс рүү орох юм бол энэхүү уур амьсгал сарниж арилах болно.

Би харанхуй гарцны хажууханд хайж байсан зүйлээ эцэст нь олж харлаа.

"Тэнд нэг юм байна."

Энэ л энэ тоглоомонд суухыг хүссэн гол шалтгаан минь байв.

[Фантазиландын өнгөт газрын зураг!]

Энэ тоглоомыг дуусгасны дараа төгсгөлийн гарцны ойролцоо маскот бүрийн эзэмшдэг бүсийг харуулсан газрын зураг байдаг юм.

Би өөртөө шивнэн хурдан очив.

"Газрын зураг. Энэ бидэнд хэрэг болж магадгүй."

Эхэндээ энэ нь зүгээр л дотоод засал чимэглэл мэт харагддаг. Тоглоомын танилцуулгад дурдсан шиг Фантазиландыг нүдээр харуулах зорилготой юм шиг.

Гэвч түүний агуулсан мэдээлэл үнэлж баршгүй чухал билээ.

"Та нар энэ тоглоомын сэдвийг санаж байна уу?"

"За, эм... Энэ тоглоомын паркийн газар нутгийн төлөө маскотууд хоорондоо тэмцэж байсан тухай..."

"Энэ газрын зураг дээр бусад маскотуудын эзэмшдэг бүсүүд заагдсан байх ёстой."

Ингэснээр бид өөр өнгөт бүс рүү хүрэх хамгийн дөт замыг олж харах боломжтой болно.

"Бидэнд уурлачихсан байгаа мангасаас зугтаж байхад? Бас үүнийг авч явах гээд байна уу?"

A-багийн дэд менежер миний үүрсэн судлаач руу эрүүгээрээ заав.

Түүнийг алах талаар дахин сануулахаас нь өмнө би хурдан хариуллаа.

"Газрын зургийг шалгамагц л Талбайн судалгааны 1-р багийн Дэд менежерийг сэрээчихнэ ээ, тэгэхээр тэр өөрөө алхаж чадна."

Гуйя, миний нүдэн дээр түүнийг задлаад хаячихгүй л бол...

Ямар нэгэн төлөвлөгөө гарч ирэх нь Y-багийн шинэковын царайнд бага ч гэсэн итгэл найдвар төрүүлэв.

Миний царай ч бас адилхан байсан биз.

[Гуйж байна, энэ ойрхон байгаасай.]

Би гүнзгий амьсгаа аваад газрын зураг руу ойртон очиж шалгалаа...

Би газрын зургийг дахин харав.

Гэвч дүр зураг огт өөрчлөгдөөгүй байв.

[Фантазиландын өнгөт газрын зураг]

Паркийн бүхэл бүтэн дүрслэл.

[Шидэт туулайн бүс][Шидэт туулайн бүс]

Тэмдэг болгонд Шидэт туулайн царай сийлэгджээ.

[Шидэт туулайн Фантазиланд]

Бидний зугтаж очих ёстой газар гэж...