Хөл хөдөлгөөн ихтэй Хар Салхит худалдааны бүсээс гарсныхаа дараа, Ху Мэй Эрийн газарчилснаар тэр хоёр Хар Салхит ойн хойд зүгийг чиглэн алхлаа.

Ху Мэй Эр баяртай байгаа бололтой сэтгэл татам хос нүдэнд нь баяр баяслын оч гялалзах бөгөөд энэ нь түүний үл ялиг улайсан хацартай хоршин түүнийг улам ч дур булаам харагдуулж байв.

"Тэр өдрийн явдалд намайг уучлаарай!" гэж Ян Кай гэнэт уучлалт гуйв. Тэр өдөр түүний гаргасан үйлдэл үнэхээр хэрээс хэтэрсэн байсан бөгөөд одоо түүнээс тусламж гуйхаар ирсэн болохоор өөрийгөө бага зэрэг хоёр нүүртэй амьтан шиг мэдэрч байлаа.

Ху Мэй Эр уруулаа жимийж байгаад инээмсэглэв. "Зүгээр дээ. Бас чи намайг харааж зүхээгүй шүү дээ. Энэ хэдэн жилд би үүнээс ч дор үгс сонсож байсан ч одоо сайхан л амьдарч байгаа биз дээ?"

"Чи надад гомдоогүй хэрэг үү?" гэж Ян Кай гайхан асуув.

"Чамайг үзэн ядлаа гээд надад ямар ашигтай юм бэ?" гэж Ху Мэй Эр инээмсэглэлээ. "Үнэндээ би чамайг бага зэрэг үзэн ядаж байсан ч... чиний нэг үйлдэл чамайг үзэн ядах аргагүй болгосон юм."

"Ямар үйлдэл?"

"Хэ хэ, тэр өдөр Чэн Шао Фэн, Нү Тао хоёрыг гарч ирэхэд чи миний урдуур орж зогссон. Магадгүй тэр чинь өөрийн эрхгүй хийсэн үйлдэл байсан байх, гэхдээ сүүлийн хэдэн жилийн хугацаанд хэн нэгэн намайг бүх зүрх сэтгэлээсээ, чин сэтгэлээсээ хамгаалахыг хүссэн анхны тохиолдол нь тэр байсан юм."

"Би сайн санахгүй байгаа ч чи үнэхээр их зовлон үзжээ" гэж Ян Кай санаа алдав. Эрүүл саруул, сайн охин Цуст тулааны бүлгэмд авьяаслаг шавь нар олохын тулд зориуд өөрийн нэр төрийг сэвтүүлсэн шүү дээ. Хэдийгээр энэ арга нь үр дүнтэй байсан ч үүний цаана эцэг эхээ гэсэн асар их ачлал хүндэтгэл нуугдаж байсан юм.

хэ хэ... Ху Мэй Эр хөхрөн инээв. "Тэгтлээ хэцүү байгаагүй ээ. Жүжиглэж, баг өмсөх нь эмэгтэй хүний төрөлхийн авьяас гэдгийг чи мэддэггүй юм уу?"

"Хэ хэ, би өмнө нь эмэгтэй хүнтэй харилцаж үзээгүй ээ."

"Нээрээ юу?" Ху Мэй Эрийн нүд сэргээд ирэв.

"Мм. Тийм болохоор өнгөрсөн хэд хоногт та хоёр эгч дүүсийн гарт бүрэн гүйцэд тоглоом болж, үнэхээр ядарч гүйцлээ" гэж Ян Кай нухацтайгаар хэлэв.

Ху Мэй Эрийн нүдэнд уурын оч гялсхийснээ, "Чиний хэлсэн үг чинь арай л муухай байна шүү! Аз болоход миний эгч энд алга, эс бөгөөс чи түүнд лавтайяа зодуулж таарах байлаа!" гэлээ.

"Чиний эгч чинь..."

"Жинхэнэ Элементийн Хязгаарын нэгдүгээр шатны бясалгагч шүү!" гэж Ху Мэй Эр бахархалтайгаар хэлэв.

"Хүчирхэг юмаа!" хэмээн тэрбээр магтлаа.

Сү Янь Жинхэнэ Элементийн Хязгаарын гуравдугаар шатанд байсан бол Ху Мэй Эрийн эгч Сү Яниас бага зэрэг сул дорой ч, тэгтлээ их ялгаатай байсангүй.

Ху Мэй Эр эгчийнхээ тухай дурсах төдийдөө л Ян Кайн хэлсэн үгийг дахин санаж, толгойгоо гэдийлгэн тасралтгүй хөхөрч эхлэв. Энэхүү үйлдлүүдийнхээ дунд тэр инээхээ огт зогсоосонгүй.

Ян Кай чимээгүйхэн байрандаа зогсон, түүнийг тайвширч, амьсгаагаа дарахыг хүлээлээ.

Нэлээд удаан инээсний эцэст Ху Мэй Эр арайхийн амьсгаагаа дараад түүн рүү нүүр дүүрэн инээмсэглэн эргэж харав. "Чамайг их зоригтой юм гэдгийг би харж байна. Өмнө нь миний эгчтэй тэгж ярих зүрхтэй эр хүн хэзээ ч байгаагүй. Түүний тэр газар... нэг нь нөгөөгөөсөө том гэдэг нь үнэн юм уу?"

"Өмссөн хувцаснаас нь болоод тэгж харагдсан байж магадгүй ээ, тийм болохоор чи дараа нь түүнд санаа зовох хэрэггүй гэж хэлж өгөөрэй за юу?" Ян Кай зөөлөн инээв.

"Тэгвэл минийх ямар байна? Үнэхээр тэгшхэн байна уу?" гэж Ху Мэй Эр хацар нь улайсан хэдий ч зоригтойгоор асуув.

"Тэгшхэн байгаад зогсохгүй, маш зөөлнөөр товойж, маш бөөрөнхий зөв хэлбэртэй юм байна." Ян Кай толгой дохиод, "Чиний бие галбир үнэхээр гайхалтай болохоор өөрийгөө битгий доош нь хийгээрэй." гэлээ.

Тэр мөчид Ху Мэй Эрт энэ бүхэн тэсвэрлэхэд бага зэрэг хэцүү санагдлаа. Ямар ч далд зорилгогүй энэхүү илэн далангүй магтаал нь түүний сүүлийн үед сонссон хамгийн сайхан үгс байв.

Яг тэр үед тэрээр дотроо баярлан дэвхцэж байлаа.

"Бид хүрэх газартаа очиход дахиад хэр удах вэ?" Ян Кай энэ сэдвийг цааш үргэлжлүүлэн ярихыг хүссэнгүй, тиймээс өөр зүйл асуулаа.

"Дахиад нэг цаг орчим алхана, хэдий тэр газар нь Хар Салхит ойн нэг хэсэгт тооцогддог ч, ойн гүн рүү илүү ойрхон байдаг юм" гэж Ху Мэй Эр тайлбарлав. "Тэнд манай Цуст тулааны бүлгэмийн хэдэн жилийн өмнө нээж илрүүлсэн уурхайн судал байдаг юм. Бид түүнийг хамгаалж, хүдэр олборлуулахаар хүмүүс илгээсэн. Тэндээс гарч байгаа хүдэрнүүд их өвөрмөц."

"Юугаараа өвөрмөц гэж?" хэмээн Ян Кай асуув.

"Тэнд зөвхөн хоёр төрлийн шинж чанартай чулуунууд л байдаг. Нэг нь чиний сая худалдаж авсан Гэрэлт Ян чулуу, нөгөөх нь Гэрэлт Инь чулуу. Хэрэв өвөрмөц гэж хэлвэл тэгтлээ өвөрмөц биш боловч энэ хоёр чулуу бие биеэ харилцан дарангуйлдаг. Тиймээс тэд нэг дороос цуг гарч ирж байгаа нь үнэхээр нууцлаг явдал юм."

"Тэр чинь үнэхээр хачирхалтай юм." Ян Кайн сонирхол бага зэрэг татагдав.

Гэрэлт Ян чулуу нь Ян шинж чанартай энерги агуулдаг байхад Гэрэлт Инь чулуу нь Инь шинж чанартай энерги агуулдаг ба тэдгээр нь эсрэг тэсрэг шинж чанарууд байв. Энгийн нөхцөлд тэдгээр нь хэзээ ч хамтдаа бүрэлдэн тогтох учиргүй юм.

(Орч: ян шинж чанар-гал , инь шинж чанар-мөс)

"Сургуулийн Настангууд хүртэл тэр уурхайн судлыг нэг л биш байна гэж боддог хэдий ч олон жил судалсны эцэст ямар ч хэвийн бус зүйл олж чадаагүй л байна. Гэсэн хэдий ч энэ уурхайгаас бид чамгүй их мөнгө олсон шүү." Ху Мэй Эр Ян Кайг хөндлөнгийн хүн шиг үздэггүй бололтой, бодсон бүхнээ л шууд хэлж байлаа.

"Энэ бол танай Цуст тулааны бүлгэмийн аз завшаан байна шүү дээ!" гэж Ян Кай инээв.

Ху Мэй Эр "Мм" гэж хариулаад гэнэтхэн хэсэг зуур чимээгүй болсноо дахин ам нээж, "Үнэндээ өнөөдөр чи намайг хайж ирсэн нь үнэхээр тохиолдол байлаа. Хэрэв үүнээс хойш өөр өдөр ирсэн бол чи намайг магадгүй олж чадахгүй байсан. Тийм болохоор энэ чиний аз байх шүү." гэлээ.

"Чи хаашаа явах гэж байгаа юм?" Ян Кай түүний үгний цаадах утгыг ойлгов.

"Би хаашаа ч явахгүй ээ." Ху Мэй Эр толгой сэгсрээд, тайлбарлах зуураа Ян Кайн царайны хувирлыг нууцаар ажиглан: "Сүүлд чиний хэлсэн үгний дараа, би сүүлийн хэдэн жилд хийсэн үйлдлүүд минь зөв биш байж гэдгийг гэнэт ухаарсан.

Тэрхүү заль мэхтэй аргуудыг ашиглан татсан авьяастангууд Цуст тулааны бүлгэмийг бус, зөвхөн намайг л сонирхдог юм байна! Би тэдэнд жинхэнэ хүссэн зүйлийг нь өгч чадахгүйгээс хойш, тэд мэдээж сургуулийн төлөө хамаг байдгаараа хичээхгүй шүү дээ. Тийм учраас би өөрийгөө тусгаарлаж, бэлтгэл сургуулилт хийн улам хүчирхэгжихээр шийдсэн. Ингэснээр би эгч шигээ аавынхаа ачаанаас хуваалцаж чадах болно!" гэв.

"Чи үүнийг ухаарч чадсан нь маш сайн хэрэг." Ян Кай сайшаан толгой дохив.

Ху Мэй Эр түүний хариултад урам хугарснаар барахгүй, анхнаасаа дуусах хүртэл Ян Кайн царай нэг их өөрчлөгдөөгүйг анзаарав. Түүний хэлсэн үг Ян Кайн сэтгэл хөдлөлд ямар ч өөрчлөлт авчирсангүй.

Зүрх нь бага зэрэг хөндүүрлэх шиг болоход Ху Мэй Эрт цааш үргэлжлүүлж ярих сэтгэл төрсөнгүй, зөвхөн урд нь газарчлан алхлаа.

Түүнийг дуугарахгүй байсан тул Ян Кай ч мэдээж хэрэг юм ярих сэдэв хайсангүй. Дахин нэг цаг алхсаны эцэст тэд Цуст тулааны бүлгэмийн уурхайн бүсэд хүрэлцэн ирлээ.

Тэр нь Хар Салхит ойн яг төв хэсэгт байрлаж байв. Ойролцоогоор арван хавтгай дөрвөлжин километр талбай нь Цуст тулааны бүлгэмийн уурхайн хэмжээ байлаа. Эргэн тойронд шавь нарыг амрах боломжоор хангах үүднээс хэдэн байшин барьжээ.

Уурхайн судал нь газар доор байсан тул Ян Кай, Ху Мэй Эр хоёрыг ирэхэд тэдэнд олон хүн харагдсангүй, харин газар доорх руу хөтөлсөн хэд хэдэн том нүхнүүд л харагдаж байлаа.

Ойролцоогоор зуугаад метрийн алсаас эхлэн Ян Кайн хэвлийн хэсэг дэх Ян-ийн Эх Үүсвэрээс сулхан хариу үйлдэл мэдрэгдэж байв; энэ нь газар доорх Гэрэлт Ян чулуунуудын үзүүлж буй нөлөө байлаа. Түүний хүч чадал өсөхийн хэрээр Ян энергийг мэдрэх талбай нь илүү том болсон ч, тийм ч ихээр нэмэгдээгүй байв.

Тэр хоёрыг уурхайн бүс руу орохыг харсан Цуст тулааны бүлгэмийн нэгэн шавь тэднийг анзаарав. Тэгтэл гэнэт тэнгэрээс нэгэн хөгшин хүн бууж ирээд Ян Кай, Ху Мэй Эр хоёрын өмнө газардав. Тэрээр гараа атган мэндчилээд, "Залуу авхай!" гэлээ.

"Лун өвөө." Ху Мэй Эр дотноор дуудаад, Ян Кайг танилцуулахаар татав. "Энэ бол манай сургуулийн дэд тэргүүн, Лун өвөө буюу Лун Зай Тянь."

Ян Кай яаран хүндэтгэл үзүүлэв. "Мэндчилж байна, Настан Лун."

Лун Зай Тянь Ян Кайг жигшсэн нүдээр харсан бөгөөд түүнд огт тоосонгүй. Мөнх амьдралд дэвших хязгаар бүхий бясалгалын түвшин болон Цуст тулааны бүлгэмийн Дэд тэргүүний байр суурьтай хүнд Ян Кайн өчүүхэн нүүр царайг тоож үзэх ямар нэгэн шаардлага байсан гэж үү?

Тэгээд ч эмэгтэй хүнээр хөтлүүлж яваа жаалыг ярих ч хэрэг байна уу! Лун Зай Тянь Ян Кай шиг хүмүүсийг ялангуяа бүр ч их үл тоомсорлодог байсан бөгөөд хэрэв Ху Мэй Эрийн нүүр царайг хараагүй бол Ян Кайг хэдийнээ алгадаад алчихсан байх байв.

"Залуу авхай, та яагаад уурхайн бүсэд ирсэн юм бэ?" Лун Зай Тянь урт цагаан сахлаа илбэнгээ түүнээс эелдгээр асуув. "Эндхийн газар заваан бас халуун болохоор таны ирэх газар биш ээ. Хурдан буцсан нь дээр, эс бөгөөс аав тань үүнийг мэдвэл намайг загнана шүү дээ."

"Тэгэхгүй ээ. Аав таныг загнах зүрхгүй байх, учир нь та бол сургуулийн хамгийн хүчирхэг гурав дахь Настан шүү дээ, үнэндээ тэр таныг л хүндэлдэг." Ху Мэй Эр эрхэлсэн хүүхдийн дүрд тоглоход, Лун Зай Тянь маш ихээр баярлав.

"Лун өвөө, миний энэ найз эндхийн зарим шавь нараас хэдэн зүйл худалдаж авахыг хүссэн юм. Бид танд төвөг удаад, дотогш орж тэднийг хайхыг зөвшөөрөхгүй юу?" гэж Ху Мэй Эр шуудхан асуулаа.

(Орч: Лун Зай Тяний нэрний утга нь шууд утгаараа "Тэнгэр дэх Луу" гэсэн үг.)