Залуу шавь нарын хоорондох энэхүү өргөн цар хүрээтэй тулааны хөшиг маш хачирхалтайгаар хаагдлаа. Ямар ч тайлбаргүйгээр ийнхүү өндөрлөсөн нь олон хүнд ер бусын санагдаж байв.

Энэ удаагийн тулаанд олон хүн оролцсон бөгөөд Сахилгын танхимаас зуу гаруй шавь илгээж Сү Янийг бүсэлж зогсоохыг оролдсон нь түүний хүч чадлыг улам бүр баталсан хэрэг байлаа.

Үүнтэй зэрэгцэн энэ хэрэгт холбогдсон өөр нэг хүн болох Ян Кай олон шавь нарт танигдсан бөгөөд тэдний зарим нь энэ явдалд оролцсон хүмүүс, зарим нь Сү Яньтай тогтоосон түүний харилцаанд атаархсан хүмүүс байв. Ерөнхийдөө түүний талаар янз бүрийн цуу яриа хаа сайгүй тархаж эхэллээ.

Гэвч яг одоо, эдгээр цуу ярианы эзэн болох Ян Кай бөх гэгч нь унтаж байлаа.

Ойн шоронгоос гарсны дараа Ян Кай тэр даруй унтаад өгсөн юм. Сахилгын танхимын өнөөх таван шавьд бүлэглүүлэн зодуулах үед тэдний цохилт нь ноцтой биш байсан ч нэлээд хүнд байсан билээ. Хэрэв тухайн үеийн нөхцөл байдал тийм хурцадмал байгаагүй бол Ян Кай аль эрт ухаан алдан унах байв.

Нөхцөл байдал шийдэгдэж, зүрх сэтгэлд нь санаа зовох зүйлгүй болмогц хүн мэдээж хэрэг өөрийгөө үргэлжлүүлэн тогтоон барьж чадахаа байдаг шүү дээ.

Сэрэх үедээ Ян Кай өөрийгөө танихгүй орон дээр байгаагаа олж мэдэв. Хамаг бие нь өвдөж байсан ч тэрээр өрөөг тойруулан хараад өөрийгөө маш дэгжин хэрнээ энгийн, тавилга багатай, нэлээд тусгаарлагдмал газар байгаагаа анзаарлаа.

Энэ яг л Хар Салхит худалдааны гудамж дахь Сү Янийн байшин шиг санагдав.

Түүний арайхийн босох гэж оролдох үед гарсан чимээ гадаах хүмүүст сонсогдлоо. Удалгүй Сү Мү сэтгэл нь хөдөлсөн царайтайгаар хаалга түлхэн орж ирэв.

Ли Юнь Тянь болон бусад нь ч бас тэнд байсан бөгөөд Сү Мүг дотогш ороход тэд бүгд Ян Кай руу тайвширсан харцаар харав.

"Номын ах Ян, бие нь яаж байна даа?" гэж Сү Мү асуунгаа түүнийг түшихээр алхан очлоо.

"Би одоо зүгээр ээ." Ян Кай, Юань Чи-гээ ажиллуулж үзээд ноцтой асуудал байхгүйг, зүгээр л хэд хоног амрах хэрэгтэйгээ мэдлээ.

"Энэ удаад Номын ах та намайг аварсан, би, Сү Мү, танд талархаж байна" гэж Сү Мү бага зэрэг эвгүйрхэн хариулав.

"Уучлалт гуйх хэрэггүй ээ" гэж Ян Кай хариулаад, түүнийг зогсоохоор гараа өргөв.

"Өө нээрээ, манай гэр бүлийн хөгшин чөтгөр таныг эдгэрч, бясалгахад чинь туслах байх гээд эдгээр эмүүдийг өгүүллээ." Сү Мү арван лонх гаргаж ирээд орны хажуугийн ширээн дээр зэрэгцүүлэн тавив.

"Хоёрдугаар Настан уу?" Ян Кай гайхширан, "Энэ арай л их биш үү?" гэлээ.

"Их биш ээ, их биш. Энэ удаад та хүнд бэртэл авсан болохоор сайн амарч, эдгэрэх хэрэгтэй."

"Тэгвэл Номын дүү минь, Хоёрдугаар Настанд миний өмнөөс талархал илэрхийлээрэй."

"Талархах хэрэггүй дээ." Сү Мү гараараа далласнаа, түүний царайнд гэнэт уур хилэнгийн ул мөр тодров.

Энэ удаад Сү Шүань Ү , Ян Кайд үнэхээр муухай хандсан гэж бодсон тул түүнд ийм их Үхэшгүй эм бэлэглэсэн хэрэг байлаа. Хэрэв Нярав Мэн цаг тухайд нь ирж Тэргүүний тушаалыг сонсгоогүй бол тэр Ян Кайг золиослох хэрэгтэй болох байв. Сү Мү энэ асуудлыг хэрхэн шийдвэрлэсэнд маш их уурлаж байсан бөгөөд Ян Кайд ийм олон эм өгөхийг онцгойлон хүссэн юм.

"Номын эгч Сү Янь яасан бэ?" Ян Кай толгойгоо эргүүлэн асуув.

Сү Мүгийн царай хачирхалтай болж хувирлаа, тэр аль хэдийн Ли Юнь Тянь болон бусдаас Ян Кайн хийсэн гавьяаных нь талаар сонссон байв. Тэрээр айх, хүндлэх мэдрэмжийг зэрэг мэдэрч байлаа, учир нь бага наснаасаа хойш Сү Янь түүнд эгч шиг гэхээсээ илүү өөрийнх нь ээж шиг л санагддаг байсан юм. Сү Янийн өмнө тэр хэзээ ч гүнзгий амьсгаа авч ч зүрхэлдэггүй байлаа.

Гэтэл энэ Номын ах Ян руу харахад, түүний зориг хязгааргүй том юм! Тэр үнэхээр олон хүний нүдэн дээр эгчийнх нь гараас хөтөлж, тийм зоригтой үгс хэлж зүрхэлсэн шүү дээ.

Тэгээд дараа нь эгч нь юу ч хийгээгүй! Юу ч хийгээгүйгээр барахгүй, түүнийг өөрийнхөө гэрт амрахаар хүртэл зохицуулсан байна. Энэ үйлдэл үнэхээр төсөөлөхийн аргагүй зүйл байлаа!

Ян Кайг ухаангүй байсан өнгөрсөн хоёр өдрийн турш Сү Мү тархиа гашилгасан ч ямар нэгэн боломжийн тайлбар олж чадсангүй.

[Яагаад? Тэр яагаад ингэв?]

"Аах! Номын ах Ян!" Сү Мү гүнзгий амьсгаа аваад Ян Кайн мөрөн дээр алгадлаа. Хэсэг хугацааны дараа тэрээр хэлэх үгээ сайтар бодож байгаад эцэст нь ам нээж, "Бурхан минь! Эрт дээр үеэс л 'Үзэсгэлэнтэй цэцэг хортой байдаг' гэдэг шиг гоо сайхан бүсгүйчүүд голдуу гай тотгор дагуулж, хэрцгий авирладаг гэдэг дээ. Номын ах Ян, та нүдээ сайн нээж, болгоомжтой байх хэрэгтэй шүү."

(орч: Эгчийгээ хэрцгий гэдгийг шууд бусаар хэлж байна даа.)

Ян Кай цочирдсон бөгөөд хэсэг хугацааны дараа л арайхийн инээв. Сү Мү түүнийг буруугаар ойлгосныг тэр мэдсэн ч яаж тайлбарлахаа мэдсэнгүй, тиймээс шуудхан "Тэр хаана байгаа юм бэ?" гэж асуулаа.

Энэ удаад түүнийг эгзэгтэй мөчид ирж аварсны л ачаар тэр зүгээр өнгөрсөн, үгүй бол модон байшин доторх Сахилгын танхимын шавь нарыг алахын тулд Ян шингэнээ ашиглах хэрэгтэй болох байлаа. Гэхдээ тэдгээр шавь нартай нүүр тулах үед тэрээр шаардлагатай үхлийн цохилтуудыг үнэхээр гүйцэтгэж чадна гэдэгтээ итгэлгүй байсан юм. Ямар ч байсан тэр замаар алхсан бол ухрах ямар ч гарц үлдэхгүй байх байлаа.

"Тэр таныг энд төвхнүүлснийхээ дараа Хар Салхит худалдааны гудамжнаас явсан" гэж Сү Мү хариулав.

"Номын эгч явахдаа ямар нэгэн зүйл хэлсэн үү?" Ян Кай бага зэрэг сэжиглэнгүй байв. Уг нь бол түүний гаргасан үйлдэл арай л хэтэрсэн байсан тул Сү Янийг түүнтэй ярилцахыг хүснэ гэж тэр бодож байсан юм.

"Юу ч үгүй. Юу ч хэлээгүй..." Сү Мү аажмаар толгой сэгсрэн хариулав.

Ян Кай дотроо түүнийг нууцхан биширлээ.

[Энэ Номын эгчид тэр бүхэн үнэхээр нөлөөлөөгүй бололтой! Өөрийнх нь нэр хүнд, цэвэр ариун байдалд нь халдсан хэрэг байхад, тэр бүр тэрхүү ээдрээтэй байдал, үнэн бодит байдлын талаар тайлбарлахыг ч хүссэнгүй шүү дээ!]

Хэлэх үгээ хэлснийхээ дараа Сү Мү яваад өгөв.

Орон дээр хэвтэхдээ Ян Кай энэ талаар цааш гүнзгий бодсонгүй, учир нь нэгэнт зүйлс ийм байдалд хүрсэн тул илүү их бодоод ч нэмэргүй байлаа. Сайн хэрэг нь Сү Мү тэдгээр Үхэшгүй эмүүдийг авчирсан тул одоо тэр өөрийнхөө онолыг зөв эсэхийг үнэхээр туршиж үзэх боломжтой боллоо.

Эдгээр эмүүдийн хагас нь эдгээх зориулалттай, үлдсэн хагас нь бясалгалын зориулалттай байв. Нийлүүлээд бодвол тэдний үнэ цэнэ багагүй байлаа.

Ян Кай эхлээд хэдэн эдгээх эм ууж, дараа нь Жинхэнэ Ян нууц урлагаа ажиллуулж эхлэв. Энэ нь эмүүдийг уусгахад тусалж, түүний биед гарч буй өөрчлөлтүүдийг мэдрэх боломжийг олголоо.

Хэлэх ч шаардлагагүй, эдгээр эдгээх эмүүдийн үр дүн үнэхээр сайн байв. Тэр эмнүүд судсаар нь хэрхэн гүйж байгааг мэдрэх бөгөөд удалгүй бэртэл авсан хэсэг рүү нь тааламжтай мэдрэмж урсан очиж, өвдөлт нь намжиж эхэллээ.

Гэхдээ Ян Кай түүний шархыг эдгээж, судсанд нь нэвтрэхээс гадна энергийн тодорхой хэсэг нь түүний яс руу орж байгааг мэдэрч чадаж байв.

Үүнийг мэдэрсэн Ян Кайн хөмсөг өргөгдөж, сэжиглэж байсан зүйлээ баталгаажуулав.

Таамаглалаа баталгаажуулмагцаа Ян Кай бүтэн өдрийг бүх төрлийн эмийг идэж өнгөрүүллээ.

Эцсийн үр дүн нь тодорхой болов, түүний Алтан Араг яс үнэхээр бусад төрлийн энергийг шингээж чаддаг бөгөөд зөвхөн Ян төрлийн энергийг шингээхээр хязгаарлагддаггүй байлаа!

Түүнийг Анхдагч Элементийн шатанд орохоос хамаагүй өмнө тэрээр энэхүү таамаглалыг дэвшүүлсэн байсан ч үүнийгээ батлах ямар ч аргагүй байсан юм.

Жинхэнэ Ян нууц урлаг бол Ян энергийг эцэс төгсгөлгүй шингээх боломжийг олгодог тусгай бөгөөд хүчирхэг чадвар мөн байсан бөгөөд тулаанд ашиглах үед устгах хүч нь асар их байв. Гэхдээ энэ чадварт нэг том дутагдал байсан нь бясалгалын нөхцөл нь хэтэрхий хатуу байсан явдал юм.

Бясалгахын тулд заавал Ян төрлийн орчинд байх шаардлагатай байлаа.

Уг нь тэр орчин тойрноосоо хамааралтай болно гэж санаа зовж байсан ч одоо Алтан Араг ясных нь давамгай хүч байгаа цагт үүнд санаа зовох шаардлагагүй болжээ.

Ян энергитэй үед тэрээр Жинхэнэ Ян нууц урлагаар бясалгах бөгөөд хэрэв тийм энерги байхгүй бол энэ нь хамаагүй байв, учир нь түүний Алтан Араг яс ямар ч төрлийн энергийг голохгүй хүлээн авах болно.

Хоёр сонголт хоёулаа байгаа тул тэр Ян энерги байхгүй үед бясалгал нь саатаж хоцорно гэж санаа зовох шаардлагагүй боллоо.

Энэ энергийг Алтан Араг яс нь шингээж авах бөгөөд дараа нь тулалдах үед араг яс нь энергийг нь буцааж өгөн хүчийг нь нэмэгдүүлэх боломж олгох юм.

Ян Кайд Алтан Араг яс болон Жинхэнэ Ян нууц урлаг хоёрын хооронд үгээр илэрхийлэшгүй ямар нэгэн холбоо байгаа мэт бүдэг бадаг мэдрэмж төрж байв. Гэхдээ тэр холбоо нь яг юу болохыг тэр сайн ойлгохгүй байлаа.

Ян Кай бүрэн сэргэж, ухаан орох үедээ тэр нэлээд сайн цочирдлоо.

Тэр анзааралгүйгээр таван шил эм ууж дуусгасан бөгөөд шил тус бүрд арван эм байсан гэхээр тэр тавин эм идчихсэн хэрэг байв. Тэдгээр эмнүүд тийм ч өндөр чанартай биш байсан ч хэрвээ жирийн нэг хүн ийм их эм уусан бол бие нь тэсвэрлэж чадахгүй байх байлаа.

Гэсэн хэдий ч тэр цоо эрүүл байсан бөгөөд түүний бэртэл ч нэлээд сайн эдгэрсэн байв.

Харанхуй дунд түүний нүдэнд сониуч гэрэл гялсхийн үзэгдэв. Үлдсэн долоогоос найман төрлийн янз бүрийн эмнүүд рүүгээ хараад түүнд нэгэн галзуу санаа орж ирлээ.

Энэ санаа нэгэнт төрсөн тул тэр үүнийг дарж чадсангүй.

Сайтар бодсоны эцэст Ян Кай эцэст нь аз туршихаар шийдэв!

Тэр нэг лонхыг авч онгойлгоод, эдгээх эм үү эсвэл бясалгалын эм үү гэдгийг нь ч үл харгалзан доторх бүх эмийг амандаа хийв. Тэгээд өөр нэг лонхыг авч бас л амандаа хийлээ.

Бүх лонх хоосорсоны дараа Ян Кай хайхрамжгүйгээр амныхаа дотор талыг долоов.

Хэрэв жирийн нэг хүн энэ дүр зургийг харсан бол өмдөндөө шээх байлаа! Хэдийгээр эдгээр эмүүд хортой биш ч гэсэн яг л шош идэж байгаа юм шиг идэж яавч болохгүй шүү дээ.

Бүх төрлийн эм дотроо бага зэрэг хор агуулдаг гэдгийг мэдэх хэрэгтэй бөгөөд ямар ч төрлийн эм байсан үргэлж хэрэглэх тодорхой хязгаар байдаг. Хэрэв энэ хязгаараас давбал эрүүл мэнд, бясалгал, тэр байтугай суурь хүчинд хүртэл хор хөнөөл учруулах болно.

Гэтэл тэрхүү богино хугацаанд Ян Кай долоо, найман төрлийн янз бүрийн эмнүүдийг залгичихсан байв.

Уруулаа долоогоод Ян Кай төрөл бүрийн сул эмийн энергиүд хоорондоо мөргөлдсөнөөс болж ходоод нь томорч, дэлбэрэх гэж байгаа мэт мэдэрлээ. Хэсэг хугацааны дараа төрөл бүрийн энергиүд нэгдэн асар аймшигтай энерги болон хувирав.

Ян Кай үүнд бэлэн байсан тул тэр даруй Жинхэнэ Ян нууц урлагаа идэвхжүүлж эхэллээ.

Тэрхүү энерги нь яг л хавхнаас мултарсан үерийн луу шиг ходоодонд нь эргэлдэж байлаа. Энэ нь Ян Кайг зөөлнөөр гиншихэд хүргэсэн бөгөөд хэвлийн хэсэг нь урагдаж байгаа мэт санагдана.

Жинхэнэ Ян нууц урлагийн эргэлдэх хурд тийм ч ихээр хурдсаагүй ч, ямар нэгэн татах хүч үүссэн мэт байв. Долоо, найман төрлийн эмээс хувирсан энергиүд нь татах хүчийг агуулж байсан тул түүний судсууд руу аажмаар уусан орох боломжийг олгож байлаа.

Ян Кай өчүүхэн төдий ч тайвширч зүрхлэхгүй өөрийн биеийн байдлыг анхааралтай ажиглаж байв.

Энэхүү үерийн луу мэт энерги түүний судсанд догшин ширүүнээр хөдөлж байсан бөгөөд түүний Юань Чи-тэй огт нийцэхгүй байлаа. Хэдийгээр хоёр энерги хоорондоо холилдсон ч хэзээ ч бүрэн уусан нэгдэхгүй байв.

Үүгээр ч зогсохгүй, түүний судсан дахь хоёр энергийн урсах зам нь тэс өөр байлаа.

Жинхэнэ Юань нууц урлаг цагийн зүүний дагуу урсаж байхад, асар их эмийн энерги цагийн зүүний эсрэг урсаж байв.

Ян Кайн бие гэнэт тодорч, гэнэт бараантаж, тэгснээ хормын дотор час улаан болон хувирав. Арьс нь өнгөө өөрчилсний дараа судас бүрд нь мянга мянган шавж мөлхөж байгаа мэт мэдрэмж төрнө.

"Түүний биеэс бөмбөр дэлдэх мэт чимээ тасралтгүй гарах бөгөөд энэ бүхнийг хөндлөнгөөс харсан хэн ч байсан айсандаа хөшиж орхих байлаа."

Цаг хугацаа өнгөрөхийн хэрээр тэрхүү асар их энерги аажмаар алга болж, дусал дуслаар, бага багаар яс руу нь шингэж эхлэв. Алтан Араг яс яг л өлсгөлөн араатан мэт болж, хальж буй энергийг шунахайран залгилж байлаа.

Энэхүү тэсвэрлэшгүй өвдөлтийн дунд Ян Кайн мэдрэхүй оргилдоо хүрэв. Яг л түүний бие дотор хос нүд ургасан мэт санагдана. Энэ нь түүнд Жинхэнэ Ян нууц урлагийн холилдох явцыг харж, эмх замбараагүй эмийн энерги хэрхэн ширхэг ширхгээрээ уусч байгааг харах боломжийг олгож байлаа.

Тэр бүдэг бадаг ямар нэгэн зүйлийг ухаарав!

Ян Кай өмнөх тулаануудынхаа тухай, цус хэрхэн хаа сайгүй үсэрч, хэрхэн өвдөж байсан тухай, мөн цус урсгасан тулааны сэтгэл зүйн талаараа бодлоо. Өвдөлт мэдрэх болгондоо, түүний гуйвшгүй хүсэл зоригтой зэрэгцэн өөрийнх нь хүч өрсөлдөгчөө ялах хэмжээнд хүртэл хурдацтайгаар өсдөг байсныг санав.

Ялангуяа хоёр өдрийн өмнө Ойн шоронгийн гадаах модон байшинд Сахилгын танхимын таван шавийн эсрэг хийсэн тулаан түүний оюун санаанд тодхон үлджээ. Тэдний бясалгалын түвшин түүнээс хамаагүй өндөр байсан шүү дээ.

Цус нь дахин буцлахтай зэрэгцэн, түүний яснаас дулаахан бөгөөд танил мэдрэмж төрж, Алтан Араг ясанд шингэсэн байсан энерги буцаж ирэн түүний хүчийг түр зуур нэмэгдүүлэв.

Энэ хангалттай биш байлаа! Ян Кай өөрт нь ямар нэгэн зүйл дутагдаад байгааг мэдэрсэн бөгөөд тэр хэсэг байхгүй бол тэр хэзээ ч Алтан Араг ясны нууцыг бүрэн ойлгож чадахгүй байв.

Түүнд дахин нэг жинхэнэ тулаан хэрэгтэй байлаа!

Үүнийг ухаарсан Ян Кай орноосоо үсрэн буув. Ширүүн амьсгаадан хаалгыг түлхэн онгойлгож эргэн тойрноо хараад, шууд л өөдөөс харсан байшин руу очиж өшиглөн онгойлгов.

Ян Кай саяхан хөдөлгөөн сонссон тул Сү Мүг тэр өрөөнд байгаа гэж таамагласан юм. Тэр сайн тулалдах хүн хайж байсан бөгөөд тэр хүн нь Сү Мү байлаа.

Хаалгыг онгойлгомогц Ян Кайн нүд нэгэн цэвэрхэн, тунгалаг нуруун дээр тусав. Халз тулаанд дуудах гэж байсан үгээ тэр буцаагаад залгихаас өөр аргагүй болов.

Сарны гэрэлд, цонхны тавцангийн дэргэд үнэхээр үзэсгэлэнтэй, зүрхний догдлуулам дүр зураг үзэгдэж байлаа.

Цөцгий шиг цагаан арьстай, мөс шиг чанга булчингууд нь түүний нурууны хотойсон байдалтай төгс зохицсон эмэгтэй хүн байв. Түүний хөдөлгөөн Ян Кайн нүдийг соронздон татаж, тэр энэхүү үзэсгэлэнт дүр зургаас өчүүхэн ч харцаа салгаж чадсангүй.

Энэ дүр зураг үнэхээр хүнийг гүнд нь хүртэл догдлуулахаар байлаа; Ян Кайн махан биеийн гурван хүсэл бараг л гадагшаа нисэх шахав.

Энэ өрөөнд үнэхээр хүн байсан ч тэр нь Ян Кайн төсөөлсөн шиг Сү Мү байсангүй, харин Сү Янь байлаа!