Алдартай алхимич мастерууд хүртэл Шя Нин Чаных шиг ийм чадвартай ойртож ч чадахгүй биз ээ.

"Номын эгч ээ, танд ямар онцгой бие байгаа юм бэ?" гэж Ян Кай асуув.

Мэн Вү Я хариуд нь: "Ариун Сүнслэг Эмийн Бие!" гэлээ.

"Эм найруулахад ашиглагддаг гэсэн үг үү?"

"Муугүй шүү." Мэн Вү Я толгой дохин, "Ийм бие махбодь маш ховор байдаг юм. Ариун Сүнслэг Эмийн Биетэй хүмүүс ямар ч гаж нөлөө, сөрөг үр дагаваргүйгээр эм боловсруулж чаддаг.

Бүх эмийн бэлдмэлийн гуравны нэгд нь хор байдгийг чи мэдэх л байх, эдгээр нь бясалгагчийн хүчийг нэмэгдүүлдэг ч, өгөх ашиг тус нь хязгаартай байдаг.

Харин Ариун Сүнслэг Эмийн Биеэр дамжуулан хийсэн эмийн хувьд, энэ бие нь өөрөө эмийн хорыг бүрэн цэвэршүүлж устгаж чаддаг юм.

Одоогоор чиний Номын эгч ердөө тавхан жил бясалгасан бөгөөд өнөөдөр 'Салалт ба Нэгдлийн хязгаарт' хүрээд байна. Хэрэв би түүний чадварыг зориудаар дарж бариагүй байсан бол, тэр хэдийнэ 'Жинхэнэ Элементийн Хязгаарт' хүрэх байсан гэдэгт би итгэлтэй байна."

Ян Кай маш их гайхав. Ердөө таван жилийн хугацаанд тэрээр хэдийнэ Салалт ба Нэгдлийн хязгаарт хүртэл бясалгажээ.

(Орч: салалт ба нэгдлийн хязгаарын шат нь жинхэнэ Элементийн Хязгаарын шатны өмнөх түвшин бөгөөд анхдагч элементийн шатны дараагийн шат юм)

Шэ Хун Чэн бас л энэ шатанд байгаа, гэхдээ түүнд хэдэн жил шаардагдсан билээ? Арваад жил болсон байх ёстой. Түүгээр ч зогсохгүй, Номын эгч үүнийг хүчээ даруулсан байдалтайгаар хийсэн гэхээр, хэрвээ тэгж дараагүй байсан бол тэр Сү Яниас ч илүү хүчирхэг байх байсан биш үү?

Ян Кай өмнөө байгаа хүнтэй харьцуулахад өөрийнх нь авьяас чадвар өчүүхэн санагдаж, үхтлээ ичив.

[Би бол зүгээр л газар дээрээс тэнгэр өөд саравчлан ширтэх төдийхөн л нэгэн байж дээ].

Энэ хүн бол бүхэл бүтэн Өндөр Тэнгэр Асрын тэргүүн суут ухаантан байлаа!

Гэхдээ Шя Нин Чан ийм хурдацтай өсөлттэй байгаа нь түүний хэрэглэсэн асар их хэмжээний бясалгалын эмнүүдийн тус дэмийг мартаж болохгүй юм.

Мэн Вү Я үргэлжлүүлэн: "Ариун Сүнслэг Эмийн Биед зөвхөн энэ давуу тал байгаад зогсохгүй, хэрэв үүнийг тохирох тулааны техниктэй хослуулан бясалгавал, энерги л байх юм бол тэнгэр доорх юуг ч эм болгон боловсруулж чаддаг. Агаарт байгаа "Чи"-г л жишээ болгоод үзье, миний шавь л хүсэх юм бол түүнийг ч гэсэн эмийн үрэл болгон боловсруулж чадна" гэлээ.

Энерги л агуулж байвал, тэнгэр доорх юуг ч эм болгон боловсруулж болно гэнэ ээ! Тэнгэр газрын энергийг ч боловсруулж болж байхад, Гурван Нарны Жимсний тухай яриад ч хэрэг алга.

Ирээдүйд энэ Номын эгч Шя бүхэл дэлхийн хамгийн шилдэг алхимийн мастер болно гэдгийг Ян Кай харж байлаа. Ийм бие бялдартай төрнө гэдэг бол хэн ч түүний чадвартай өрсөлдөж чадахгүй гэсэн үг байв.

"Энэ удаад, тэр дараагийн хязгаарт нэвтрэн орохын тулд бие дотроо нэгэн зүйлийг боловсруулж бүрэлдүүлэх хэрэгтэй байгаа юм. Гагцхүү энэ зүйлийг л тэр өөрөө ганцаараа хийх боломжгүй байгаа юм."

"Тийм болохоор танд миний тусламж хэрэгтэй болсон хэрэг үү?" гэж Ян Кай асуув.

Мэн Вү Я толгой дохилоо.

"Ямар зүйл юм бэ?"

"Есөн Инь Шүүдэрийн Талст. Энэ зүйл нь Жинхэнэ Элементийн Хязгаарт байгаа хүмүүст маш их тустай байдаг. Хэрвээ тэр үүнийг боловсруулан биедээ бүрэлдүүлж чадвал, цаашдын бясалгалд нь ямар нэгэн саад бэрхшээл учрахаас сэргийлэхэд туслах юм."

Салалт ба Нэгдлийн хязгаараас Жинхэнэ Элементийн Хязгаар руу орохын тулд бясалгагч өөрийн Юань Чи-гээ хавьгүй илүү цэвэр, хүчирхэг Жинхэнэ Чи болгон хувиргах шаардлагатай болдог.

Энэ бол бүх бясалгагчдын туулах ёстой үйл явц бөгөөд хэрэв энэ явцад ямар нэгэн үнэт эрдэнэс ашиглавал, хувирч үүссэн Жинхэнэ Чи нь энгийн үеийнхээс хамаагүй хүчирхэг болдог.

Энэхүү Есөн Инь Шүүдэрийн Талст нь яг тийм үнэт эрдэнэсүүдийн нэг төдийгүй, магадгүй хамгийн шилдэг эрдэнэсүүдийн нэг нь гарцаагүй мөн байлаа.

"Есөн Инь Шүүдэрийн Талст бол байгалийн сүнслэг мөн чанар бөгөөд түүнийг олж авах нь маш хэцүү. Хэрвээ тохиромжгүй хүмүүс үүнийг ашиглах гэвэл, тэр дороо хайлж алга болдог.

Зөвхөн "Ян" Чи бясалгасан хүмүүс л тэдгээрийг хянаж чадна. Түүгээр ч зогсохгүй, тэдний "Ян" Юань Чи-гийн цэвэр байдал нь тодорхой түвшинд хүрсэн байх шаардлагатай. Тийм учраас бидэнд чиний тусламж хэрэгтэй байгаа юм."

"Би яг юу хийх хэрэгтэй юм бэ?" хэмээн Ян Кай асуулаа.

Гэнэт Мэн Вү Я тэвчээр алдан, "Чи яагаад ингээд олон юм асуугаад байгаа юм, цаг нь болохоор өөрөө мэдэх болно!" гэлээ.

Ян Кай хамраа маажин, өвгөн Мэн яагаад ингэтлээ уурласныг гайхан бодов.

"Тэр зүйл хаана байгаа юм? Бид хэзээ түүнийг авахаар явах вэ?"

"Хар Салхит ууланд бий. Тэнд жаахан Есөн Инь цугларсан байгаа. Долоодугаар сарын 7-нд л Есөн Инь-ий Чи жинхэнэ утгаараа цугларч бүрддэг бөгөөд тэр үед л Инь Чи-г нь гаргаж авах боломжтой болно."

"Тэгвэл нэг их цаг үлдээгүй юм байна." Ян Кай тооцоолон бодсоноо; Долоодугаар сарын 7-н хүртэл ердөө арван өдөр үлдсэн байв. Хэрэв Хар Салхит уулс руу орох хэрэгтэй бол замд ч бас тодорхой хугацаа зарцуулах нь мэдээж.

"Тиймээс, хэрвээ чамд хийх ажил байхгүй бол, одоохон яаравчлан хөдөлдөг юм билүү. Үгүй бол бид үүнийг дахиад бүтэн нэг жил хүлээх хэрэгтэй болно" гэж Мэн Вү Я нухацтай хэлэв.

"Би хэзээ ч хөдлөхөд бэлэн" хэмээн Ян Кай инээмсэглэв.

"Тэгвэл хоёр өдрийн дараа Хувь нэмрийн танхимд ирж надтай уулзаарай, надад бэлдэх хэдэн зүйл байна" гэж Мэн Вү Я дулаахнаар хариуллаа.

"Ойлголоо, тэгвэл хоёр өдрийн дараа уулзъя."

Өдрийг товлосноор, тэд хоёр өдрийн дараа Хувь нэмрийн танхимд уулзаж хөдлөхөөр болоод салав.

Ян Кайн холдон одох нурууг харан Мэн Вү Я хөнгөн санаа алдсанд түүний царай эвгүйрхсэн мэт жигтэй харагдаж байв. Түүнийг юу бодож байгааг таахын аргагүй бөгөөд нэлээд удсаны эцэст тэр дуугарч: "Шавь минь, чи үүнийг үнэхээр хийхийг хүсэж байгаадаа итгэлтэй байна уу?" гэлээ.

Шя Нин Чаны хувцас салхинд дэрвэж, тэрээр толгой дохин тиймээ гэв.

Мэн Вү Я үргэлжлүүлэн: "Хэрвээ чи Есөн Инь Шүүдэрийн Талстыг боловсруулж чадахгүйд хүрсэн ч гэсэн, чи дараагийн шат руу дэвшиж л болно. Гагцхүү чиний ирээдүйн хүч чадал бага зэрэг сул байх болно шүү дээ."

Шя Нин Чан хөнгөхөн инээмсэглэж: "Гэхдээ, би багшдаа тусалъя гэж бодож байгаа бол, илүү цэвэр Жинхэнэ Юань Чи-тэй байвал дээр биш гэж үү? Багш аа, та намайг аварч, өсгөж хүмүүжүүлсэн болохоор энэ шавь тань танд туслахыг хүсэж байна."

"Гэхдээ... Хай... чи дахиад нэг сайн бодоод үзвэл яасан юм бэ?"

Тэдний аяллыг хоёр өдөр хойшлуулсан жинхэнэ шалтгаан нь Мэн Вү Я , Шя Нин Чаныг дахин нэг бодож үзээсэй гэж хүссэнийх байлаа.

Шя Нин Чан улайж: "Зүгээр дээ, би үнэхээр түүнд дургүй биш шүү дээ" хэмээн хариулав.

Мэн Вү Я бүхнийг ойлгож буй мэт санаа алдаад: "Тэр золиг үнэхээр үүнийг далимдуулан ашиг хонжоо олох нь дээ..." гэлээ.

Ян Кайн тоомжиргүй, хайхрамжгүй байдлыг бодоход л Мэн Вү Я-гийн дургүй нь хүрч, шүд нь загатнаж байлаа.

'Тэр зүгээр л бусдад тус хүргэхээр явах гэж байгаагаа мэдэж байгаа ч, өөрийг чинь хэр зэрэг ашиглаж, далимдуулах гэж байгааг огтхон ч мэдэхгүй юм даа шавь минь' гэж тэр дотроо бухимдана.

Ямар ч байсан, тэдний хооронд ямар нэгэн оч үсэрч хэрхэвч болохгүй! Эцсийн эцэст, энэ жижигхэн газар бол түүний шавийн үлдэж суурьших газар биш байлаа. Мэн Вү Я ингэж бодон сэтгэл нь түгшиж, дотор нь эвгүйрч байв.

Ян Кай , Сү Янийн модон байшин руу буцсангүй, харин олон өдөр очоогүй өөрийн тусгаарлагдсан модон овоохой руугаа буцлаа. Энд ирэлгүй нэлээд удсан хэдий ч овоохой өмнөх шигээ цэвэр цэмцгэр байв. Нэг ч тоосны ширхэг харагдсангүй. Түүний овоохойг хэн ингэж цэвэрлэж байсан юм бол гэж тэр гайхан бодлоо.

Нярав Мэн маш бүрхэг ярьсан хэдий ч Ян Кай хаашаа явах, юу хийх хэрэгтэй болох талаарх ерөнхий мэдээллийг ойлгож авсан байлаа.

Тэр газар Есөн Инь цуглардаг газар учраас, "Инь" Чи нь маш өтгөн байх болно. Харин түүний "Ян" Чи бол "Инь" Чи-г төгс дарах хүч тул тийм ч их санаа зовох зүйл байсангүй.

Гагцхүү түүний одоогийн бясалгалын түвшин хэтэрхий доогуур байсан тул урт хугацаанд үргэлжлэх тулаанд хэт их хохирол амсахгүйн тулд бага зэрэг Ян шингэн нөөцлөх хэрэгтэй байв.

Аз болоход, Номын эгч Шя нь түүний бүх Гурван Нарны Жимсийг эм болгон найруулж өгсөн бөгөөд энэ нь Ян шингэний дуслуудыг нь нөхөх маш сайн нөөц болов.

Гурван Нарны Жимсний дөрвөн мод, мод бүрд гурван жимс ургасан тул нийт арван хоёр тод улаан эм болсон байв. Эм бүр нь түүнд гурван дусал Ян шингэн бүрэлдүүлэх боломж олгосон тул, тэр нийтдээ гучин зургаан Ян дуслыг өтгөрүүлж чадлаа.

Эдгээр дуслууд нь тулаанд ашиглагдсан ч бай, эсвэл "Инь" Чи-гээс хамгаалахад хэрэглэгдсэн ч бай, маш их хэрэгтэй байх болно. Эдгээр нь түүний амьд үлдэхэд найдах гол зүйлс нь байлаа.

Бүтэн өдрийг зарцуулан байж, Ян Кай эцэст нь арван хоёр эмийг бүгдийг нь боловсруулж, Ян шингэний дуслуудыг өтгөрүүлэн гаргаж авч чадав.

Тэр дуслуудаа өтгөрүүлэхдээ гучин зургаан дусал гаргаад зогсохгүй, нэмэлтээр дөрвөн дуслыг гаргаж чадсан тул нийт дөчин дусалтай болов. Дантиандаа аль хэдийнэ байсан дуслуудтайгаа нийлүүлбэл, тэр нэлээд их нөөцтэй болсон байлаа.

Энэ удаад, тэр эцэст нь тодорхой давуу талтай боллоо.

Ян шингэний бүх дусал болон эмнүүдийг боловсруулж дуусах үед, Ян Кай өөрийгөө Анхдагч Элементийн дөрөвдүгээр шатанд орсныгоо мэдэрлээ.

Энэхүү дэвшилт нь үнэхээр хэтэрхий гэнэтийн байсан бөгөөд ямар ч урьдчилсан шинж тэмдэггүйгээр болсон ч, шат ахих явц нь яг л ус урсах мэт маш зөөлөн хэвийн болж, түүнд онцгойлж мэдрэгдэх зүйл алга байлаа.

Ян Кай энэ талаар эргэцүүлж бодоод, энэ нь магадгүй сүүлийн хэдэн өдөр түүний идсэн асар их хэмжээний бясалгалын эмнүүд болон түүний араас залгаж идсэн арван хоёр Ян эмүүдтэй холбоотой байх гэсэн дүгнэлтэд хүрчээ. Энэ их хэмжээний энерги цугларч, түүнийг шат ахихад хүргэсэн нь боломжгүй зүйл огтхон ч биш байлаа.