"Түүний Жинхэнэ Юань Чи-гээ хянах чадвар тийм хэмжээнд хүрсэн гэж би хэлээгүй ээ, гэхдээ Номын ах дүүс минь, Тулааны урлаг бас үүнийг боломжтой болгодог гэдгийг та нар мартчихаа юу?" хэмээн Сү Шүань Ү хүйтнээр хэлэв.

"Боломжгүй. Хэдийгээр тэр тийм онцгой Тулааны урлаг ашигласан байлаа ч, дөнгөж Анхдагч Элементийн 3 дугаар шатанд байгаа бясалгагч Хатгамалт Үүлэн Торон Хуягийг эвдэж яавч чадахгүй" гэж Вэй Ши Тун толгойгоо тасралтгүй сэгсрэнгээ хариулав.

"Энэ хорвоод боломжгүй зүйл гэж байдаггүй юм. Харин миний Номын ах дүүс та нар сүүлийн хэдэн жил эрх мэдэл булаалдаад дэндүү завгүй байснаасаа болоод цаг үетэйгээ хөл нийлүүлэн алхаж чадахаа байсан бололтой дог оо!"

Энэ үгс сонсоход нэлээд таагүй байсан тул Вэй Ши Тунгийн царай тэр даруй хүйтэрч, "Хоёрдугаар аа, чи үнэхээр тэр Ян Кайг хамгаална гэж зүтгээд байгаа хэрэг үү?" хэмээн ширүүлэв.

"Тэгсэн ч яадаг юм!" Сү Шүань Ү огцом босож ирээд, "Энэ удаагийн хэрэг бол, энгийнээр хэлбэл, залуу үеийнхний хоорондох л халз тулаан шүү дээ, гэтэл та нар үүнийг ийм том сүр дуулиан болгохоор зөрүүдэлж байна. Нэгэнт та нар ингэж зүтгэж байгаагаас хойш, би ч бас та нарын энэ эцэс төгсгөлгүй хуйвалдаан дунд нь орж тоглоё.

Та нар Үндсэн сургуулийн дүрмийг зөрчсөн гэдгээр нь Ян Кай, Вэй Жуань хоёуланг нь, хэнийг нь ч өршөөлгүйгээр шийтгэ. Эсвэл энэ асуудлыг ингээд шийдэгдсэнд тооцож, хэн ч цаашид үүнийг дахиж сөхөхгүй байх хэрэгтэй."

"Тэгж яавч болохгүй!" Вэй Ши Тун энэ саналыг шууд л няцааж, "Хэрэв чиний хэлснээр болсон бол, Ян Кай үнэхээр Хатгамалт Үүлэн Торон Хуягийг эвдэхийн тулд зэвсэг ашигласан болж таарна. Ийм залуу насан дээрээ ийм хэрцгий байгаа юм чинь, ирээдүйд тэр гарцаагүй буруу зам руу орох болно. Манай Өндөр Тэнгэр Асарт ийм хүн байж таарахгүй!" хэмээн зандрав.

"Тэр дөнгөж Анхдагч Элементийн шатанд явж байна, түүнийг ирээдүйд буруу замд орох эсэхийг та яаж мэдэж байгаа юм бэ? Арай Том ах ирээдүйг зөгнөдөг болчихоо юу?"

"Хоёрдугаар ах аа……." Дөрөвдүгээр Настан Жоу Фэйг ямар нэг зүйл хэлэх гэтэл Сү Шүань Ү уур хилэнгээр дүүрэн бархирч түүнийг тасаллаа. Тэрээр Жоу Фэйгийн хамар руу хуруугаараа чичэн, "Дөрөвдүгээр дүү, Тэргүүн тусгаарлагдахаар явахаас өмнө чамайг Сахилгын танхимыг хариуцаж үлдээсэн.

Гэтэл өнгөрсөн хэдэн жилд Сахилгын танхим юу хийснийг хараад үз дээ? Шударга, хараат бус гэнэ ээ, хэзээ тэд тийм байсан юм бэ? Хэрэв Сахилгын танхим зөвхөн шавь нарыг дарамталж, эрх мэдлийн тэмцэлд л оролцож чаддаг юм бол чи ямар хэрэгтэй юм бэ? Маргааш би Тэргүүн дээр очиж, чамайг Сахилгын танхимын үүргээс чинь чөлөөлөхийг гуйх болно! Ямар гээчийн жүжиг вэ!" хэмээн хараалаа.

Дөрөвдүгээр Настан нүд нь татвалзтал хилэгнэн дотроо хараасан ч, түүний хэлсэн үгний юуг нь ч няцааж чадахгүй байсан тул зөвхөн дотроо давчдахаас өөр зүйл хийж чадсангүй.

"Хоёрдугаар дүү, хэрвээ би Ян Кайг Өндөр Тэнгэр Асраас хөөх дээрээ бат зогсвол яах вэ?" гэж Вэй Ши Тун хүйтэн царайлан асуув.

"Зүрхэлдэг л юм бол тэгээд үзээрэй!" Сү Шүань Ү ухарсангүй.

"Ойлголоо, тэгвэл бид Тэргүүний тогтоосон дүрмийг дагаж, санал хураалтаар шийдье. Хэрвээ Их Настангийн санал ялвал Хоёрдугаар дүү чамд ямар нэгэн эсэргүүцэл байхгүй биз дээ?"

"Хэ хэ, гар өргөж санал хураах гэнэ ээ?" Сү Шүань Ү чангаар хөхрөөд, "Том ах аа, та намайг, Сү Шүань Ү-г үнэхээр усан тэнэг гэж бодоогүй биз дээ? Гар өргөж санал хураах гэнэ ээ, үүний чинь ямар нэг хэрэг байгаа юм уу?"

"Энэ нь ч болохгүй, тэр нь ч болохгүй. Тэгээд чамд юу нь таалагдах гээд байгаа юм бэ? Чи бүр Тэргүүний дүрмийг ч тоож үзэхгүй байгаа хэрэг үү?" Энэхүү маргааны явцад Вэй Ши Тун ч бас хилэгнэж эхэллээ.

Настангуудын танхим дотор бараг л тэсрэх нь үү гэлтэй уур хилэнгийн утаа суунаглаж байлаа.

"Тайвширцгаа. Бүгдээрээ тайвширч нааш ирээд нэг аяга цай ууцгаа. Хүн бүр уураа дарцгаая." Одоог хүртэл юу ч дуугараагүй байсан Гуравдугаар Настан эцэст нь нэг юм хөндлөнгөөс оролцож, тэднийг бодлогогүй үйлдэл хийхгүй байхыг зөвлөв.

Гуравдугаар Настан зөөлөн зантай бөгөөд хэдийгээр Хоёрдугаар Настангийн талд зогсдог ч аливаа маргаанд огт хөндлөнгөөс оролцдоггүй байв. Түүний нэр нь хүртэл "Хө Бэй Шүй" (Нэг аяга ус уу) буюу түүний байнга хэлдэг хэлцтэйгээ яг ижилхэн байсныг дурдах ч хэрэггүй биз!

Настангуудын дунд ямар нэгэн маргаан үүсэх бүрд тэр үргэлж ингэж зуучлахыг оролддог байв. Зүгээр л үр дүн тийм ч их гардаггүй байлаа.

"Би уухгүй ээ!" Их Настан болон Хоёрдугаар Настан хоёулаа нэгэн зэрэг бархирч, бие бие рүүгээ зэвүүцэн харж, буулт хийхээс татгалзлаа.

Гуравдугаар Настан аргагүйдэн цайгаа ганцаараа үргэлжлүүлэн уухаас өөр аргагүй болов.

Настангуудыг маргалдаж шуугиан дэгдээж байх үед хаалганы гаднаас нэгэн хүний хоолой гарав. "Энэ шавьд Настангуудад мэдэгдэх чухал мэдээлэл байна!"

Дөрөвдүгээр Настангийн хөмсөг тэр даруй зангирч, хурдхан "Ороод ир!" хэмээн ширүүлэв.

Настангуудыг хэлэлцээр хийж байх үед шавь нар тэдэнд саад болохоор зүрхэлдэггүй байв. Нэгэнт хэн нэгэн саад болохоор ирсэн тул энэ нь гарцаагүй Өндөр Тэнгэр Асартай холбоотой чухал хэрэг байж таарах байлаа.

Үүнийг мэдсэн Настангууд түр зуур маргаанаа зогсооцгоов.

Тэр шавийг орж ирэхэд Дөрөвдүгээр Настан Жоу Фэй "Юу болоо вэ?" хэмээн асуулаа.

"Настангуудад илтгэе, хэн нэгэн Өндөр Тэнгэр Асрын Ойн шорон руу хүчээр дайран орж, асуудал үүсгэсэн Ян Кай, Ли Юнь Тянь болон бусдыг аварсан байна..."

"Юу гэнэ ээ?" Дөрөвдүгээр Настан тэр даруй огцом босож ирсэн бөгөөд бусад Настангууд ч мөн адил цочирдлоо.

"Ойн шорон руу дайран орж тэднийг аврах ийм их зоригтой хүн нь хэн юм бэ?"

Өндөр Тэнгэр Асрын өнөөх шавь хариулахаас зүрхшээж, зөвхөн толгойгоо өргөн хулчгар байдалтайгаар ширтэж байв.

Сү Шүань Ү-гийн зүрх хүчтэй цохилж, түүнд гэнэт ямар нэгэн муу ёр мэдрэгдлээ.

Энэ бүхнээс Их Настан юу болсныг гадарлаж, тэр даруй тайвшран шавьд хандан, "Чи хэл" хэмээн тушаав.

"Тэр бол... Тэр бол Сү Янь, Номын эгч Сү байна!"

Эдгээр үгс хэлэгдмэгц Их Настангийн инээмсэглэл улам бүр тодров. Үүнээс ч чухал нь, Дөрөвдүгээр болон Тавдугаар Настан хүртэл Сү Шүань Ү рүү хачирхалтайгаар харах зуур, Гуравдугаар Настан цайгаа үргэлжлүүлэн уусаар байлаа.

Сү Шүань Ү-гийн царай тасралтгүй хувирч, шүдээ хавирахыг ч зогсоож чадахгүй болтлоо хилэгнэн "Чи сайн харсан биз? Ойн шорон руу дайран орсон хүн үнэхээр Сү Янь байсан юм уу?" хэмээн зандрав.

Тэрхүү Сахилгын шавь айсандаа дагжин чичирч, тэр даруй "Энэ шавь өдрийн гэрэл мэт маш тод харсан. Би Номын эгч Сү Янийн нэр хүндийг сайн мэднэ, хэрэв Хоёрдугаар Настан надад итгэхгүй бол та өөрийн биеэр очиж харж болно шүү дээ!" хэмээн хариулав.

"Хэрэггүй ээ." Сү Шүань Ү гараараа даллаад, Тэнгэрлэг мэдрэхүйгээ илгээлээ. Хэсэгхэн хугацааны дараа түүний мэдрэхүй Ойн шоронд хүрч, мөс мэт хүйтэн жаврыг олж мэдрэв. Ийм төрлийн хүйтнийг Өндөр Тэнгэр Асарт Сү Яниас өөр хэн ч эзэмшээгүй байлаа.

Энэ охин нөхцөл байдал ямар ноцтой болохыг үнэхээр мэдсэнгүй, дэндүү бодлогогүй юм!

"Хоёрдугаар дүү, чи энэ байдлыг юу гэж үзэж байна?" Их Настан цайны аягаа барьсан чигтээ түүнийг биедээ буцаж орохыг хүлээх зуураа нүүр дүүрэн инээмсэглэлтэйгээр асуув. Тэр асуухдаа тайван бөгөөд огтхон ч цочирдсон шинжгүй байлаа.

Яг тэр мөчид Их Настан нэлээд тайван байв.

Хэрвээ хоёр тал бие биедээ буулт хийхгүй байсан бол, энэ үйл явдал нь нэг талыг ялуулах түлхүүр болох байлаа.

Ойн шорон гэдэг чинь ямар газар билээ! Энэ бол Өндөр Тэнгэр Асарт хэрэг төвөг тарьсан шавь нарыг хорьдог газар шүү дээ! Ян Кай ямар ч буруу зүйл хийгээгүй байсан ч хамаагүй, хэрэв тэр тэнд хоригдсон л бол зохих шийдвэр гартал эндээс гарч явах боломжгүй байв.

Гэтэл одоо бүр ч сайхан зүйл боллоо, Сү Янь тэр газар руу дайран орж, түүнийг хүчээр авч явахыг оролдож дээ. Гэнэтийн шийдвэр гаргасных нь үр дүнд тэрээр Өндөр Тэнгэр Асрын маш том дүрмийг зөрччихөв!

Хэрэв үүнийг зохих ёсоор шийдвэрлэхгүй бол Сү Янь хүртэл шийтгэл амсах шаардлагатай болно!

Вэй Ши Тун, Сү Шүань Ү-г яавч Сү Янийг энэ хэрэгт орооцолдохыг зөвшөөрөхгүй гэдгийг мэдэж байлаа. Нэгэнт байдал ийм болсон тул тэрээр нэг алхам ухарч, Их Настанд буулт хийж нүүр өгөх ёстой болов. Гэхдээ мэдээж хэрэг, энэ нь Ян Кайг Их Настангаар шийтгүүлэхийг зөвшөөрсөн нөхцөлд л хэрэгжих байв!

Одоо бодоод үзвэл, энэ таван Настангийн хэн нь ч Ян Кайтай ямар ч холбоогүй хүмүүс байлаа. Өнөөдрийг хүртэл тэдний дэгдээсэн энэ том шуугиан нь ердөө л өөрсдийн хувийн ашиг сонирхлын төлөө, Өндөр Тэнгэр Асрын удирдлагын төлөөх тэмцэл л байсан юм.

Одоо Их Настан энэ тулаанд ялна гэдгээ мэдэрч байв.

Хэрэв энэ явдал бусдад тархвал, бүх шавь нар түүний фракцыг Өндөр Тэнгэр Асрын жинхэнэ шийдвэр гаргагч бүлэглэл гэж бодох болно. Тэгээд тэдний зорилго биелэх байлаа.

Сү Шүань Ү-гийн царай үнс мэт саарал болж, хэсэг хугацаанд дотроо тэмцэлдсэний эцэст хорссон өнгөөр, "Том ах хэрхэн шийдэхийг хүсэж байна, түүгээрээ л бол доо!" хэмээн ширүүллээ.

Сү Шүань Ү аргагүйдэн буулт хийсэн тул түүнд цаашид тэдэнтэй маргалдах сонирхол яаж байх билээ? Сү Янийг шийтгэлээс аврахын тулд Ян Кай золиослогдох ёстой боллоо.

Уул нь байвал мод нь олдоно гэдэг шүү дээ (Амьд сэрүүн байвал арга нь олдоно). Ирээдүйд өшөөгөө авах боломж үргэлж гарах л болно!

"Хөгшин чөтгөр өө!" Сү Мү эдгээр үгсийг сонсмогцоо нүдээ томруулж, Сү Шүань Ү рүү итгэж ядсан байдалтай харав.

"Чи намайг юу гэнэ ээ?" Сү Шүань Ү яг л үе тэнгийнхэнтэйгээ ярьж байгаа мэт хилэгнэн уурлалаа.

"Ааваа! Та ингэж болохгүй шүү дээ!" Сү Мү тэр даруй үгээ засав.

"Энэ асуудалд чамд ямар нэгэн зүйл хэлэх эрх байхгүй!" Сү Шүань Ү түүн рүү ширүүнээр муухай харав.

"Номын ах Ян миний амийг аварсан, та түүнийг зүгээр орхиж болохгүй шүү дээ! Хэрвээ та түүнд санаа тавихгүй бол, энэ нь их ачлалгүй хэрэг болно!"

"Дуугүй бай!" Энэ их ярианаас болж Сү Шүань Ү-гийн царай час улаан болсон бөгөөд хэдийгээр тэр зуу дахин дурамжхан байсан ч нэгэнт ийм байдалд орсон байхад тэр юу хийж чадах билээ?

Сү Мү яг л шавж шиг дэргэд нь үглэж байсан тул Сү Шүань Ү гараа даллав, үүний дараахан Сү Мү хөшөө мэт хөшиж, зөвхөн сонсохоос өөр хөдлөх, ярих ямар ч боломжгүй болов.

"Гэртээ харьсан хойноо би чамтай тооцоо бодно доо!" Сү Шүань Ү-гийн хамраас уур хилэнгийн халуун амьсгал савсаж байв.

"Хэ хэ!" Их Настан сэтгэл хангалуунаар хөхрөн инээгээд, "Хоёрдугаар дүүд ямар нэгэн эсэргүүцэл байхгүйгээс хойш, энэ асуудлыг ингээд шийдэцгээе" гэлээ.

Үгээ дуусгаад тэр одоог хүртэл тэнд зогсож байсан шавь руу харав. "Энэхүү тушаалыг буулга. Сорилтын шавь Ян Кай Үндсэн сургуулийн дүрмийг удаа дараа зөрчиж, хэрцгий догшин үйлдэл гаргасан тул Сахилгын танхим түүнийг баривчилж, Тэргүүн эргэж ирэн шийтгэлийг нь шийдтэл Ойн шоронд хорих болно. Сү Янийн тухайд... Тэр залуу бас мунхаг байгаа дээр нь энэ нь түүний анхны алдаа байсан тул бид үүнийг нэг их ноцтойгоор хүлээж авахгүй ээ. Номын ах дүүс минь, та нар үүнийг юу гэж бодож байна?"

Бусад Настангуудад яаж эсэргүүцэл байх билээ дээ?

"Тэгвэл одоо яв!" Гараараа даллахтай зэрэгцэн тушаалын пайз Сахилгын танхимын шавийн гарт нисэн очив.

Настангийн тушаал, энэ пайзыг харах нь тухайн хүнийг өөрийг нь харсантай ижил утгатай байлаа! Энэхүү тушаалын пайзны хүчээр Сү Янь цаашид бодлогогүй үйлдэл гаргаж зүрхлэхгүй нь лавтай.

"Мэдлээ!" Сахилгын танхимын өнөөх шавь тушаалыг хүлээж аваад хурдхан гадагш гарлаа.

Хэсэгхэн хугацааны дараа, урд хаалганы зүгээс цус царцам аймшигтай чарлаан сонсогдож, хэн нэгэн газар унах чимээ гарав. Настангуудын царай эрс өөрчлөгдөж, юу болсныг мэдэхээр босож ирэх үед нэгэн хүний хоолой сонсогдлоо.

"Настангууд эрх мэдлээ хэтрүүлэн ашиглаж байх шив дээ." Хоолой цуурайтахын сацуу, сийрэг цагаан үстэй, бүдүүн хөгшин эр дотогш орж ирлээ. Түүнийг дотогш орох үед тэрээр дөнгөж саяхан гарсан шавийг гартаа өргөн барьсан байсан ч тэр шавь хэдийнээ ухаан алдсан байв. Тэр байтугай Настангууд хүртэл энэ хөгшин эрийн сүрд дарагджээ.

Тэр хүн өвдөг сөгдөн суух Вэй Жуань, Сү Мү хоёрын зүг алхан очоод, нэг хөлөө өргөн Вэй Жуанийг хажуу тийш өшиглөж, "Холдож үз! Миний замыг битгий хаагаад бай!" хэмээн зандрав.

Вэй Жуаний бие арагш нисэн унахдаа өрөвдөлтэйгөөр гиншиж байлаа.

Настангуудын танхимд таван Настангийн царай бүгд тасралтгүй хувирч, Вэй Ши Тун нүдээ онийлгон тэр хүнд хандан, "Нярав Мэн?" хэмээн дуу алдав.

Дөнгөж сая ирсэн хүн нь Хувь нэмрийн танхимын Мэн У Яа мөн байлаа!

"Энэ хүний талаар таван Настан хүртэл юу ч мэддэггүй бөгөөд гарал үүсэл нь тэдэнд оньсого мэт учир битүүлэг байлаа."

Арваад жилийн өмнө энэ хүн Өндөр Тэнгэр Асарт гэнэт л гарч ирсэн. Тэд түүнийг Тэргүүнтэй ямар харилцаатай болохыг мэдээгүй ч, тэр цагаас хойш тэрээр Өндөр Тэнгэр Асарт суурьшиж, Хувь нэмрийн танхимыг хариуцах болсон юм. Тэд Тэргүүнээс түүний талаар олон удаа асууж лавлахыг оролдсон ч, үргэлж ямар ч хариу авч чадалгүй төөрөлдөж хоцордог байв.

Гэхдээ таван Настан бүгд энэ хүнийг жинхэнэ тулааны мастер гэдгийг мэдэж байлаа! Мөн түүнийг Тэргүүнээс нь дутахгүй хүчтэй гэдгийг ч мэддэг байв.

Аз болоход, энэ хүнд ямар ч зорилго байсангүй бөгөөд зөвхөн Хувь нэмрийн танхимдаа л өдрийг өнгөрөөж, өөрийн байр сууриа мэддэг байв. Үүнээс болоод тэд түүнд нэг их анхаарал хандуулдаггүй байлаа.

Гэтэл өнөөдөр тэр урилгагүйгээр энэ газарт хүрч ирэв.

Вэй Ши Тунд энэхүү Нярав Мэнтэй нүүр тулах үед мэдрэгдэх дарамт нь асрын Тэргүүнтэйгээ нүүр тулахад мэдрэгддэг байснаас ч илүү хүчтэй байгаа мэт бүдэг бадаг мэдрэмж төрлөө.

Вэй Ши Тун инээмсэглэлийнхээ дундуур "Нярав Мэн та ямар хэргээр манай Настангуудын танхимд хүрэлцэн ирээ вэ гэдгийг асууж болох уу?" гэлээ.

Мэн У Яа хариулсангүй, тэр зөвхөн инээмсэглээд Сү Шүань Ү рүү харав. Харин Сү Шүань Ү төөрөлдсөн хэвээр, түүний нүүрэн дээр цэцэг ургачихсан юм болов уу, эс бөгөөс яагаад түүн рүү ингэж хараад байгаа юм бол гэж бодож байлаа.

"Та өөрийнхөө гаргасан шийдвэрийг зөв гэж бодож байна уу?" хэмээн Мэн У Яа гэнэт асуулаа.

"Юу?" Сү Шүань Ү гөлрөн хоцров.