Ли Юнь Тянь болон бусдын газар өвдөг сөгдөхийг харсан Вэй Жуаний царай улам бүр бардам болж ирлээ. Тэрээр чангаар хөхрөн инээж, тэднийг үргэлжлүүлэн доромжлон "Гэхдээ зүгээр л сөхөрч мөргөх нь та нарын чин сэтгэлийг харуулахгүй шүү дээ!" гэлээ.

Ли Юнь Тянь болон бусдын царай үнс мэт саарал болж, шүдээ зуугаад, уй гашуугаар дүүрэн хоолойгоор "Номын ах Вэй, та өршөөнгүй хандана уу" гэцгээв.

Вэй Жуань нүдээ нарийсгаж, түүний инээмсэглэл аажмаар алга болов. Ли Юнь Тянь болон бусад нь үнэхээр их зориг гаргасан нь түүний сэтгэлийг бага зэрэг хөдөлгөжээ.

"Вэй Жуань!" Сү Мү дотор нь буцлах цусаа тэвчин байж хашхираад, "Чи бид хоёрын хэн нэг нь л энэ хорвоод үлдэнэ!" гэлээ.

"Чи үнэхээр тууштай юм аа!" Вэй Жуань хоёр гараа атгаад, Сү Мүгийн хэвлий рүү хүчтэй цохив.

Чанга түс хийх чимээ гарч, Сү Мү амнаасаа цус нулимж, өвдөлтөө тэсвэрлэж чадалгүй ухаан алдлаа.

"Залуу эзэн Сү!" Түүний дагалдагчид хашхиралдав, учир нь тэд Вэй Жуанийг ийм олон хүний нүдэн дээр амлалтаасаа буцна чинээ төсөөлөөгүй юм.

"Нэгийг нь ч битгий үлдээ!" Вэй Жуань өөрийн хүмүүстээ хэрцгийгээр тушаав. Тэгээд тэр Сү Мүгийн дэргэд зогсоод, түүнийг яг л үхсэн нохой өшиглөж байгаа мэт хажуу тийш өшиглөж орхилоо.

Өмнө нь Ли Юнь Тянь болон бусадтай нүүр тулж байсан Өндөр Тэнгэр Асрын шавь нар ёжтойгоор инээж, тэдэн рүү ухасхийн халз тулаанд дуудлаа!

Ли Юнь Тянь тэргүүтэй шавь нар хилэгнэж, уураа хэрхэн гаргахаа мэдэхгүй байх яг тэр мөчид дайснууд нь өөрсдөө хаалга тогшоод ирсэн юм. Энэ халз тулаанаас татгалзах ямар нэг шалтгаан байсан гэж үү?

Энэ бол нээлттэй бөгөөд зэрлэг бүлэглэлийн зодоон байсан боловч хүн бүр өөрийн гэсэн тогтсон өрсөлдөгчтэй байв. Вэй Жуань хажуу талд нь зогсон ажиглаж, дооглонгоор "Хэн эсэргүүцэж байна, түүнийг үхтэл нь зод. Асуудал гаргахгүйн тулд шууд алчихсан ч болно шүү!" хэмээн хашхирч байлаа.

Тэр Сү Мүг дагасан хүмүүст маш хатуу сургамж өгч, буруу хүнээ дагавал ямар ирээдүй хүлээж байгааг тэдэнд харуулахыг хүсэж байгаа нь тодорхой байв.

Ян Кай Ли Юнь Тяньтай ойрхон зогсож байсан тул Вэй Жуаний доорх нэгэн шавь түүнийг бас онилсон байлаа. Тэр хүн Ян Кайн урдуур гүйн ирж, нэрээ хэлээд, Ян Кайн хариу үйлдэл үзүүлэхийг ч хүлээлгүйгээр дайрлаа.

Ян Кай аянга мэт хүчтэйгээр тэр хүний хэвлий рүү нь өшиглөхөд тэр даруй өвдөг сөгдөн унав.

(Орч: буруу хүнээрээ оролдлоо доо!!!)

Түүний бясалгалын түвшин дөнгөж Биеийг хатуужуулах 8-аас 9 дүгээр шатанд байсан бөгөөд сургуулийн дүрмийн дагуу түүнд Ян Кайг халз тулаанд дуудах шаардлагатай эрх ч байхгүй байсан тул энэ нь түүний азгүй л хэрэг байлаа. Гэхдээ тэр өөрөө зодуулахыг хүссэн болохоор өөрийгөө л буруутгах хэрэгтэй биз ээ.

Тулааны талбараар сүлжин бултсаар Ян Кай алхам алхмаар Сү Мү рүү очив.

Мм? Ян Кай рүү нүдээ нарийсган харсан Вэй Жуань түүнийг шинжин харахад нүдэнд нь сэжиглэсэн өнгө тодорлоо.

Сү Мүгийн дор хэдэн хүн байдаг, тэдний нэрс нь хэн болохыг Вэй Жуань мэдээж бүгдийг нь мэднэ. Гэвч Ян Кайтай тэр өмнө нь хэзээ ч уулзаж байгаагүй тул түүнийг хэн болохыг нь түрхэн зуурт мэдэж чадсангүй.

Ян Кай юу ч болоогүй мэт тайван царайлж, Сү Мүгийн дэргэд чимээгүйхэн очив. Тэрээр гараа сунган Сү Мүгийн амьсгалыг шалгаж үзээд, Сү Мү зөвхөн ухаан алдсан болохыг мэдээд санаа нь амарлаа.

"Чи хэн бэ?" Вэй Жуань тийм ч таатай байсангүй. Сү Мү болон түүний хоорондын байдлыг мэдсээр байж, энэ хүн гарч ирээд Сү Мүгийн биеийн байдлыг шалгаж байгаа нь түүнийг огтхон ч тоохгүй байгааг илтгэж байлаа.

Босож зогсоод Ян Кай, Вэй Жуань руу тайвнаар харав.

"Энэ Эзэнтэн чамайг хэн бэ гэж асуулаа шүү." Вэй Жуань эрүүгээ өргөн, хатуу дуугаар хэлэв.

"Туршилтын шавь Ян Кай, надад сургамж хайрлана уу!" Ян Кай хоёр гараа атган Вэй Жуаньд хүндэтгэл үзүүлэв, учир нь энэ бол Өндөр Тэнгэр Асрын шавь нарын хоорондын халз тулааны ёс зүй байсан юм.

"Ян Кай?" Вэй Жуань гөлрөн харснаа хурдан ухаан орж, "Чи Шуургат асрын шавь нарыг ялсан нөгөө Ян Кай юм уу?" гэлээ.

"Би тийм гавьяа байгуулсан гэж хэлж зүрхлэхгүй ч, хэрэв энэ сургуульд Ян Кай гэдэг нэртэй өөр шавь байхгүй бол би л байж таарах нь дээ."

"Ямар инээдтэй юм бэ! Нэг муу өчүүхэн Туршилтын шавь энэ Эзэнтэнг халз тулаанд дуудаж зүрхэлдэг ээ! Чамд тийм эрх байгаа юм уу?" Вэй Жуань ёжлон инээв.

"Үндсэн сургуулийн дүрэмд шавь нарын бясалгалын түвшний зөрүү нь гурван шатаас хэтрэхгүй бол тэд халз тулалдаж болно гэж заасан байдаг!"

"Энэ Эзэнтэн Анхдагч Элементийн 3 дугаар шатанд байна, чи юунд найдсан юм бэ?" Вэй Жуань түүн рүү басамжилсан харцаар харав.

Туршилтын шавь гэдэг нь Анхдагч Элементийн шат руу хараахан нэвтрээгүй шавийг л хэлдэг. Тэр хараахан дараагийн хязгаарт нэвтрээгүйгээс хойш тэдний шатны зөрүү гурван шатаас аль хэдийн давсан байх нь мэдээж байлаа.

"Би ч бас Анхдагч Элементийн 3 дугаар шатанд байгаа!" Ян Кай хайхрамжгүйгээр хариулав.

Гайхан шуугилдах чимээ хаа сайгүй цуурайтлаа.

"Ийм зүйл байх боломжгүй. Ян Кай аль хэдийн Анхдагч Элементийн 3 дугаар шатанд хүрчихсэн гэж үү?"

"Түүнийг Биеийг хатуужуулах 3 дугаар шатанд хүрэхэд гурван жил зарцуулсан гэж ярьдаггүй байсан бил үү? Тэр буруу хэлчихэв үү? Эсвэл би буруу санаад байна уу?"

"Энэ хачирхалтай юм, Ян Кай саяхан надтай халз тулалдсан шүү дээ. Тэр үед тэр Биеийг хатуужуулах 8 дугаар шатанд байсан, тэгэхээр яаж сар хүрэхгүй хугацааны дотор ийм шатанд хүрч чаддаг байна аа?"

Янз бүрийн л асуултууд гарч байсан ч, үнэмших хүн цөөн байлаа.

Вэй Жуань ч мөн адил Ян Кайг сэжиглэж, түүнийг худлаа хэлж байгаа эсэхэд эргэлзэж байв. Хэрэв тэр Анхдагч Элементийн шатанд хүрсэн юм бол яагаад одоо хүртэл Туршилтын шавь хэвээрээ байгаа юм бэ?

Гэвч түүний мэдэхгүй зүйл нь Ян Кай дөнгөж өнгөрсөн шөнө л энэ хязгаарт нэвтэрсэн гэдэг явдал байв. Түүгээр ч барахгүй тэрээр Биеийг хатуужуулах 9 дүгээр шатнаас шууд Анхдагч Элементийн 3 дугаар шат руу дэвшсэн юм.

"Одоо надад чамайг халз тулаанд дуудах эрх байгаа биз дээ?" Ян Кай нүдээ нарийсган асуухад, түүний нүдэнд ямар нэгэн муу зүйл зөгнөсөн оч гялалзана.

"Хэрэв чи үнэхээр ийм түвшний бясалгалын шатанд байгаа бол чамд намайг халз тулаанд дуудах бүрэн эрх байгаа." Вэй Жуань толгой дохиод хорлонтойгоор инээн, "Хэрэв чи үхлээс айхгүй байгаа бол шүү дээ!" гэлээ.

Ян Кай хайхрамжгүй инээв. "Чи ч бас үхлээс айхгүй байгаа гэж найдаж байна!"

"Чиний ам чинь их том байна шүү!" Вэй Жуань өөрийгөө хамгаалалтын эдлэл өмссөн хэвээр байгаагаа бодон уурлаж байв. Тэр байтугай Анхдагч Элементийн шатны бясалгагч дотор хэн ч байсан түүний хамгаалалтыг нэвтэлж чадахгүй; энэ нь түүнийг бараг л ялагдашгүй болгож байсан юм. Дөнгөж Анхдагч Элементийн 3 дугаар шатанд байж яаж түүнийг ялж чадна гэж?

"Хүрээд ир. Шалгах үүднээс чамд намайг нэг цохихыг зөвшөөрье!" Вэй Жуань бардамнал, уураар дүүрэн Ян Кай руу гараа даллав.

Ян Кай найрсаг хандана гэж үү? Урагш ухасхийн тэрээр Вэй Жуаний цээж рүү шууд л нэг цохилт илгээлээ.

Буцлам халуун Ян Юань Чи дэлбэрэв. Вэй Жуань гэмтээгүйгээр барахгүй, Ян Кайн бие нь чичирч хэд хэдэн алхам ухарлаа. Толгойгоо гудайлган харахад түүний гар улайсан байх бөгөөд тэрээр өөрийнхөө Юань Чи-д гэмтсэн нь тодорхой байв.

"Хэхэ! Чи өөрийгөө хэт өндрөөр үнэлчихэж!" Вэй Жуань энэ үр дүнд маш их бахархаж байсан ч, Ян Кайн нүд улаан өнгөтэй болсныг анзаармагцаа царай нь хувьсхийв. Ян Кайн биеэс ширүүн буцлам халуун Юань Чи-гийн хэлбэлзэл мэдрэгдэж эхэллээ.

Түүний нүдэнд ухрах эсвэл айх хүсэл өчүүхэн ч байсангүй, харин ч зүйрлэхийн аргагүй догдлол дүүрэн байв. Түүний нүд яг л олзоо харж буй аймшигт араатны нүд шиг байсан бөгөөд өчүүхэн төдий хөдөлгөөн хийхэд л түүн рүү дайрахад бэлэн байлаа.

Ямар ч анхааруулгагүйгээр Вэй Жуань хөдөлж эхэлсэн ч Ян Кай хэдийнээ түүн рүү дайрсан байв. Түүний Дантиан дотор нэг дусал Ян шингэн алга болж, хуруунд нь гарч ирлээ. Түүний энгийн нэгэн бодлоор л энэ нь царцааны далавч шиг нимгэн, цус шиг улаан өнгөтэй илд болон хувирав.

Ян Кай, Вэй Жуань хоёр гар зөрүүлэхтэй зэрэгцэн цус шиг улаан гэрлийн туяа гялсхийж, зүсэж огтлох чимээ дагалдан гарлаа.

Вэй Жуаний хэвлий нь гэнэтхэн хүйтэрч орхихыг л тэр мэдрэв. Доошоо хартал түүний зүрх нь амаар нь гарах шахам болж, "Миний Хатгамалт Үүлэн Торон Хуяг!" хэмээн чангаар хашхирлаа.

Энэхүү Хатгамалт Үүлэн Торон Хуяг нь Дунд шатны Энгийн Зэрэглэлийн эрдэнэс байлаа. Хэдийгээр зэрэглэл нь тийм ч өндөр биш ч, түүний түвшний хүнд маш их тохиромжтой байсан юм. Их Настан үүнийг хаанаас олж авсныг тэр мэдээгүй ч, түүнд өгсөн байсан юм.

Тэр үед Их Настан энгийн үед Анхдагч Элементийн шатны бясалгагч асар их хүчтэй хөнөөлт зэвсэг ашиглахгүй л бол энэ хамгаалалтын эдлэлийн хамгаалалтыг нэвтэлж чадахгүй гэдгийг маш тодорхой хэлж байсан билээ.

Гэтэл одоо түүний маш их итгэж байсан энэ эрдэнэсийг дөнгөж Анхдагч Элементийн 3 дугаар шатанд байгаа нэгэн шавь халз тулааны үеэр зүсээд хаячихав.

[Тэр сая ямар тулааны зэвсэг ашиглав аа! Тэр улаан илд нууц зэвсэг байсан юм уу? Мөн түүний зэрэглэл нь Хатгамалт Үүлэн Торон Хуягаас өндөр байх ёстой юу? Боломжгүй юм! Боломжгүй! Гэхдээ хэрэв тийм биш байсан бол ийм зүйл тохиолдох байсан гэж үү?]