Тэргүүн Шя Нин Чангийн ухаалаг, мэдрэмжтэй байдлыг хараад өөрийн эрхгүй инээмсэглэж, "Мэн У Яа ийм томоотой сайн шавьтай болсон нь үнэхээр азтай хэрэг шүү" гэлээ.

Өөрийн хоёр шавиа дурсан санахдаа Тэргүүн дотроо нууцхан санаа алдав.

Шя Нин Чан түүний өнгөрсөн амьдралыг маш сайн мэдэх тул түүний гунигтай царайг хараад хэрхэн тайвшруулахаа мэдсэнгүй. Тэр зөвхөн чимээгүйхэн зогсохоос өөр зүйл хийж чадсангүй.

Тэргүүн нэг ч үг хэлэлгүй гараа тэнгэр өөд өргөөд, Ян Кайн зүг рүү түлхэв. Тэр мөчид Шя Нин Чанд тэр хавийн тэнгэр, газар хоёр хуваагдчих шиг л санагдсан бөгөөд асар том үл үзэгдэх алга тэр бүсийг бусдын нүднээс халхлан хамгаалж байх шиг санагдлаа.

"Энэ хүүгийн дараагийн шат руу дэвших үйл явц нэлээд их шуугиан тарих бололтой, тиймээс эхлээд үүнийг нуусан нь дээр байх. Бусдын анхаарлыг татахаас зайлсхийхийн тулд шүү дээ" хэмээн Тэргүүн тайлбарлаж эхлэв.

Шя Нин Чан төөрөлдөж орхилоо. Жилийн турш хүмүүст барагтай бол харагддаггүй энэ Тэргүүн яагаад Ян Кайд ингэж их анхаарал хандуулна вэ? Хэдийгээр тэр гайхаж байсан ч, асууж зүрхэлсэнгүй.

Нэг хөгшин, нэг залуу хоёр хүн зуун метрийн зайд зогсон Ян Кайн байдлыг ажиглан харсаар байлаа.

Биеийг хатуужуулах шатанд буй Ян Кайн биед орсон Юань Чи түүний биеийн инч бүрд тархав. Хэдийгээр Анхдагч Элементийн хэлбэлзэл мэдрэгдэхгүй байсан ч, арван метрийн радиус дотор Ян Кайг төвөө болгон хүчтэй салхи эргэлдэж байх нь тодхон харагдах бөгөөд түүний эргэн тойронд үүссэн шуугиан үнэхээр бага биш байлаа.

[Энэ чинь ердөө л Анхдагч Элементийн шат руу дэвшиж байгаа хэрэг шүү дээ. Яаж ийм байж болох вэ?] Шя Нин Чан үүнийг үнэхээр ойлгосонгүй.

Цаг хугацаа өнгөрөхийн хэрээр Ян Кайн биед бөмбөр дэлдэх мэт чимээ аажмаар гарч эхлэв. Эргэн тойрон дахь асар их хэмжээний Юань Чи түүн рүү цутган орж байсан тул түүний бие яг л агаараар дүүрч буй бөмбөлөг шиг тэлж байгаа мэт санагдана.

Шя Нин Чан түүнд нууцхан санаа зовж байх яг тэр мөчид түүний бие буцаад хэвийн байдалдаа орлоо. Тэргүүний босгосон хаалт дотор байсан ч тэрээр өнөөх ёрын Юань Чи-гийн хэлбэлзлийг мэдэрч чадаж байв.

Үүнээс ч илүү гайхмаар зүйл нь тэрхүү асар их хэмжээний Юань Чи-г Ян Кай бүхэлд нь өөртөө шингээж авсан байлаа. Тэгтэл санаанд оромгүйгээр Хориотой Луугийн хавцлаас шатам халуун, улаан өнгөтэй энергийн урсгал оргилон гарч ирэв.

Энэхүү энергийн урсгалууд нь яг л улаан тууз шиг Хориотой Луугийн хавцлын ёроолоос дээшлэн, Ян Кайн нүх сүвээр дамжин түүний бие рүү орж байлаа.

[Ян шинжтэй Чи!] хэмээн Шя Нин Чан ухаарав. Ян Кайн өмнө нь шингээж авсан энерги нь Юань Чи байсан бол энэ удаад ''Ян'' Юань Чи байлаа. Хэдийгээр үүнийг Юань Чи гэж үзэж болох ч, энэ нь зөвхөн ганцхан шинж чанартай энерги байсан юм.

Энэхүү Ян Юань Чи-г Ян Кай бүрэн шингээж авсны дараа сая нэг үймээн шуугиан намжлаа.

"Муугүй шүү." Тэргүүн хөнгөхөн инээмсэглэж, хуруугаа няслан босгосон хаалтаа буулгав. Нүд ирмэхийн зуурт түүний дүрс алга болж, зөвхөн дуу хоолой нь л Шя Нин Чангийн чихэнд, "Миний өмнөөс багшийнхаа бие лагшинг асуугаарай" хэмээн үлдлээ.

"Ойлголоо!" Шя Нин Чан хүндэтгэлтэйгээр хариулсныхаа дараа Ян Кайн дараагийн шат руугаа дэвшсэн үр дүнг шалгахаар явав.

Ганцхан хараад л Шя Нин Чан мэл гайхаж хоцров.

[Анхдагч Элементийн 2 дугаар шат!]

Тэр үнэндээ өөрийгөө буруу мэдэрчихлээ гэж бодоод, дахин шалгаж үзээд Ян Кай үнэхээр тэр шатанд хүрсэн гэдгийг батлав.

Түүний энэ удаагийн дэвшилт нь зөвхөн дээд хязгаар руу нэвтрээд зогсохгүй, түүний доторх жижиг шатыг хүртэл давсан байлаа. Тэр зүүдлээд байгаа юм биш биз?

Шя Нин Чангийн өөрийнх нь биеийн бүтэц онцгой бөгөөд маш нарийн нямбай бясалгаж, бэлтгэл сургуулилт хийдэг байсан хэдий ч, шат ахих үедээ шууд хоёр шат алгасан дэвшиж байгаагүй юм. Тиймээс өнөөдөр Ян Кай түүний нүдэн дээр ийм амжилтад хүрч байгааг хараад тэр яаж цочирдохгүй байх билээ дээ?

Түүнийг алмайран ширтэж байх яг тэр үед, завилж суусан Ян Кай гэнэтхэн өөртөө: "Өө, ийм учиртай байж!" хэмээн гүвтнэлээ.

Ингэж хэлмэгцээ түүний биеэс гарах Байгалийн энергийн хэлбэлзэл улам нягтарч, тэрээр Анхдагч Элементийн 3 дугаар шат руу нэвтрэн дэвшлээ!

"Мангас!" Шя Нин Чан ямар хариу үйлдэл үзүүлэхээ мэдсэнгүй, түүний өөртөө итгэх итгэлд дахин нэг удаа хүчтэй цохилт ирэх шиг болов.

Байрандаа хэсэг зогсоод, Ян Кайн хүч дахин нэмэгдэхгүй нь гэдгийг баталгаажуулсны дараа сая нэг Шя Нин Чан уртаар санаа алдан тайвшраад, гунигтайхнаар буцаж явлаа.

Ян Кай Хориотой Луугийн хавцлын дэргэд бүтэн шөнийн турш суусан ч Жинхэнэ Ян нууц урлагаа огт бясалгасангүй, харин шат ахих үедээ олж авсан ухаарлаа сайтар тунгаан бодохыг хичээж байв.

Шат ахих үеэр Ян Кайн биед хоёр өөр төрлийн энерги орж ирсэн. Нэг нь энгийн Юань Чи бөгөөд энэ нь түүний Дантианд шингээгүй юм. Энэ энерги өөрийн биеэ хатуужуулахад зарцуулагдсан хэсгээс бусад нь бүгд түүний ясанд шингэсэн байлаа.

Хоёр дахь төрөл нь Хориотой Луугийн хавцлаас гарч ирсэн Ян Юань Чи бөгөөд энэ нь бүрэн түүнийх болсон байв. Энэхүү энерги нь таван дусал Ян шингэн болон нягтарч, Дантиан дотор нь тайван оршиж байлаа. Бүтэн шөнийн турш эргэцүүлэн бодсоны эцэст Ян Кай эцэст нь бүдэг бадагхан ч гэлээ учир шалтгааныг нь ойлгож авлаа.

Алтан Араг Яс нь түүнийг бэртэх эсвэл өвдөлт мэдрэх үед үүнийг мэдэрч, тамир тэнхээг нь нөхөн сэргээдэг байсан ч энэхүү сэргээлтэд энерги шаардагдах нь тодорхой бөгөөд энерги нь уг чанараараа хоосон зүйлээс бий болохгүй учраас Юань Чи-г шингээж авч байгаа нь ойлгоход тийм ч хэцүү зүйл биш байлаа.

Энэ удаад түүнд шингэсэн Юань Чи нь дараа түүнд тамир тэнхээний сэргээлт хэрэгтэй болох үед буцаж өгөгдөх болно. Энэ нь Алтан Араг Ясны гүн гүнзгий ашиг тусын нэг бөгөөд тулааны үеэр шаардлагатай үед түүний тамир тэнхээг нөхөж чаддагийн шалтгаан нь байв.

Ян Кай өөрийгөө Жинхэнэ Ян нууц урлагийг бясалгаж байгаа болохоор зөвхөн Ян төрлийн Чи-г л өөртөө шингээх боломжтой гэж бодож байсан юм. Гэвч одоо харвал, энэхүү таамаглал үнэн эсэхийг туршиж баталгаажуулах хэрэгтэй бололтой.

Хэрэв тэр үнэхээр Ян шинж чанартай бус энергийг ч өөртөө шингээж чаддаг юм бол түүний бясалгалын хурд өмнөхөөсөө ч илүү хурдан болох байлаа.

Энэ нь Ян Кайг бага зэрэг баярлуулав. Хэдийгээр Жинхэнэ Ян нууц урлаг хүчирхэг ч гэсэн өөрийн гэсэн хязгаарлалттай байсан. Гэвч хэрвээ түүний таамаг зөв бол тэр цаашид тохиромжтой бясалгалын орчин хайж санаа зовох шаардлагагүй болох юм.

Ян Кай урт гэгч нь амьсгаа гаргаад хөл дээрээ бослоо. Хамаг анхаарлаа төвлөрүүлэн тэр үнэхээр дараагийн хязгаарт нэвтэрч, Анхдагч Элементийн 3 дугаар шатанд хүрсэн гэдгээ мэдрэв.

Өнгөрсөн шөнө биед нь орж ирсэн тэрхүү хоёр энергийн хэмжээг эргэн санахад Ян Кайн сэтгэл амарч тайвширлаа.

Дотоод Юань Чи нь тогтворжиж, Анхдагч Элементийн шатанд хүрснээр, хэдийгээр түүний Юань Чи-гийн хэмжээ бага байсан ч энэхүү дэвшилт нь мэдээж хэрэг ердийнхөөс огт өөр байсан юм.

Бие доторх Юань Чи нь түүний тэнгэрийн мөчлөгийг амжилттайгаар нэмэгдүүлж, тэнгэр газрын гүүрийг нь холбож өгснөөр Жинхэнэ Ян нууц урлагийн ажиллах хурдыг нэмэгдүүлсэн байлаа.

Энэхүү шатанд хүрсний дараа бясалгал тодорхой хэмжээгээр илүү хялбар болсныг дурдах ч хэрэггүй биз ээ. Гэхдээ мэдээж хэрэг, үүний урьдчилсан нөхцөл нь тохиромжтой бясалгалын орчин байх шаардлагатай байлаа.

Хориотой Луугийн хавцлаас буцах замд Ян Кайд зөвхөн баяр баясгалан л мэдрэгдэж байлаа. Бясалгалын шинэ хязгаарт хүрснээр түүний ертөнцийг үзэх үзэл бага зэрэг өөрчлөгдөж, улмаар түүний нүд ч илүү цэлмэг болсон мэт санагдана.

Тэрээр тавин тохойн радиус дотор хүний амьсгалахыг ч мэдэрч чадахуйц болсон байв.

Түүнийг модон овоохой руугаа алхаж явах үед гэнэт танил шаналсан орилоон сонсогдов. Алхаагаа зогсоон Ян Кай чих тавин чагнасан боловч өөрийн эрхгүй инээдээ барьж дийлсэнгүй.

Сү Мү яаж байгаад дахиад хэн нэгэнд зодуулчихдаг байна аа?

Гэхдээ энэ чинь сургуулийн газар нутаг дотор шүү дээ. Тиймээс хэрэв тэр хэн нэгэнд зодуулж байгаа бол магадгүй халз тулаанаас л болсон хэрэг байх. Хэрэв тэр бусадтай эн тэнцэж чадахгүй байгаа бол өөрөөсөө өөр хэнийг ч буруутгах аргагүй юм.

Юу ч болсон бай, Ян Кай очиж юу болж байгааг харахаар шийдэв.

Өндөр Тэнгэр Асрын дотор хүмүүс халз тулалдаж эхлэх л юм бол ямар ч газар тулааны талбар болж хувирах боломжтой байдаг. Сү Мүгийн зодуулж байсан газар Ян Кайгаас үнэндээ тийм ч хол биш байсан тул хэсэгхэн алхахад л хүрчихээр байв.

Тэнд нэлээд олон хүн цугларч үзэж байсан бөгөөд Ян Кай нүд гүйлгэн хараад хоёр үндсэн бүлэг хүмүүс байгааг тодхон анзаарлаа. Түүний зогсож байсан газраас арван тохой орчмын зайд танил болсон Ли Юнь Тянь, Жао Ху болон тэдний бусад дагалдагчид байв. Гэвч тэд өөдөөс нь харах хүмүүстэй сөргөлдөн зогсохдоо царай нь уур хилэнгээр дүүрсэн байлаа.

[Нэг л биш ээ...] Үүнийг хараад Ян Кай хөмсгөө зангидлаа. Сургуулийн шавь нарын хоорондын халз тулаанд хэн нь ч ялж, хэн нь ч ялагдсан бай ийм хэмжээнд хүртлээ хурцдах учиргүй байв. Ли Юнь Тянь болон бусад нь ямар нэгэн шударга бус зүйлд маш ихээр дургүйцэж, яг л бүлэглэл хоорондын зодоон эхлүүлэхийг хүсэж байгаа мэт харагдаж байлаа.