Ян Кайг Анхдагч Элементийн шатанд орох тэр шөнө гивлүүр зүүсэн нэгэн эмэгтэй түүн рүү дайрсан билээ. Анх тэрээр уг эмэгтэйг өөрийг нь алах гэж байна гэж бодож байсан ч хамгийн эцсийн мөчид л огтхон ч тийм биш байсныг олж мэдсэн юм.

Тэр эмэгтэй зөвхөн түүнд дараагийн шатанд ороход нь туслахыг л хүссэн байв. Үгүй байсан бол тэр гивлүүр зүүсэн эмэгтэйн ямар ч цохилтыг хааж чадахгүй байх байлаа.

Тэр үед Ян Кай тэрхүү эмэгтэйг хэн болох талаар аль хэдийн сэжиглэж байсан бөгөөд одоо эцэст нь гивлүүрт эмэгтэйн хэн болохыг бүрэн баталгаажуулж чадлаа.

Үүнийг мэдмэгцээ түүний зүрх сэтгэл Номын эгч Шядаа талархах сэтгэлээр дүүрэв.

Харамсалтай нь, Мэн хөгшин Ян Кай, Шя Нин Чан хоёрын дундуур үсрэн орж ирж, тэдний нандин мөчийг тасалдууллаа. Тэгээд дэгдээхэйгээ өмгөөлөх эх тахиа шиг хайртай шавиа ардаа оруулан хамгаалав.

Ян Кай түүн рүү сэжиглэнгүй хараад, "Та хоёр бие биенээ таньдаг юм уу?" хэмээн асуулаа.

Мэн У Яа хмм гэж дуугараад бахархал, сүр жавхлангаар дүүрэн царайлан: "Энэ бол миний шавь!" гэлээ.

"Таны шавь аа?" Ян Кайн эрүү мултрах шахаж, огтхон ч итгэж ядсан байдалтайгаар Шя Нин Чан, Мэн У Яа хоёрын хооронд ээлжлэн харлаа.

Тэр хэзээ ч ингэж бодоогүй, үнэхээр хэзээ ч ингэж төсөөлж ч байсангүй. Нярав Мэн шиг ийм хариуцлагагүй хүн шавьтай байна гэж хэн санах билээ.

[Энэ арай санамсаргүй гарсан хүүхэд нь... үгүй ээ... тийм байх боломжгүй... тэр тэгж чадахгүй байх кхм... Тэгвэл, тэр зүгээр л түүнийг шавиа мэт аашилж байгаа хэрэг үү?]

"Та хоёр........бие биенээ таньдаг хэрэг үү?" Мэн У Яа хажуу тийш хяламхийгээд Ян Кайгаас асуув.

"Бид бие биенээ танихгүй ээ!" Шя Нин Чаны хариулт маш тодорхой бөгөөд эрс шийдэмгий байсан тул ямар ч маргах орон зай үлдээсэнгүй. Тэр ингэж хариулахын сацуу Мэн У Яагийн ард нуугдаж, гараа атган тулааны байрлал авав.

Ян Кай байдлыг ойлгоод хөхрөн, "Бид бие биенээ таньдаг гэж хэлж болохгүй ээ. Зүгээр л тэр шөнө Номын эгч надад нэг жижигхэн зүйл дээр тусалсан юм" гэлээ.

Мэн У Яа толгой дохив. Шя Нин Чан энэ талаар түүнд аль хэдийн хэлсэн бөгөөд тэр шөнийн хэрэг гараагүй бол тэр Ян Кайг ийм цэвэр Ян шинж чанартай Юань Чи-тэй гэдгийг мэдэхгүй байх байлаа.

"Нярав Мэн, Номын эгчид ямар зүйл дээр миний тусламж хэрэгтэй байгаа юм бэ? Та надад хэлж болох уу?" хэмээн тэр сониучхархуу харцаар асуулаа. Энэ нь Шя Нин Чантай холбоотой тул даалгавар нь юу ч байлаа гэсэн тэр татгалзахгүй байв.

Мэн У Яа хариулахын оронд хайртай шавь руугаа эргэж, "Түүгээр хийлгэхэд үнэхээр зүгээр биз дээ?" гэж лавлав.

Шя Нин Чаны булбарай чихний омгууд гэнэт улайж, харцаа доошлуулахад түүний урт сормуус нь чичирхийлж байгааг харж болохоор байлаа. Хэсэг нэлээд хугацаа өнгөрсний дараа л тэр арайхийн толгой дохив.

Түүний ингэж аашлахыг хараад Мэн У Яа өөрийн эрхгүй бухимдангуй санаа алдсанаа, "Боллоо, боллоо, боллоо. Цаг бага байгаа учраас, тэр л байг" гэв.

Хажууд нь зогсож байсан Ян Кай ганц ч үг хэлэлгүйгээр үйл явдлыг ажиглаж байв.

Хэдэн минутын дараа Мэн У Яа гэнэт маш ноцтой өнгөөр ярьж эхэллээ. "Ян Кай, энэ хорвоо дээр жирийн хүмүүсээс огт өөр байдаг хүмүүс бий гэдгийг чи мэдэх ёстой. Энэ хүмүүс энгийн хүмүүсийн төсөөлж ч чадашгүй чадвар, авьяас билгийг эзэмшсэн байдаг."

Ян Кай түүн рүү гөлрөн харснаа, аяархнаар, "Нярав Мэн, та онцгой бие махбодтой хүмүүсийн талаар ярьж байна уу?" хэмээн хариулав.

"Яг тийм" хэмээн тэр толгой дохингоо хариулж, "Эдгээр хүмүүсийг тэнгэр ивээсэн байдаг бөгөөд тэд бол тэнгэрийн хүүхдүүд юм. Зарим нь бясалгалын хувьд гоц авьяастай байдаг бол, зарим нь бусдаас илүү хурдан эдгэрдэг, харин бусад зарим нь тулаанд илүү тохиромжтой бие махбодтой байдаг.

Онцгой бие махбодууд маш олон төрөл хэлбэрээр оршдог боловч, тэр хэн ч байсан хамаагүй, онцгой бие махбодтой л бол тэд бусдын атаархлыг үргэлж төрүүлдэг. Зүгээр л, ийм онцгой бие махбодтой хүмүүс үнэхээр ховор; сая хүн дундаас нэгийг ч олохгүй байж мэднэ. Бяцхан Ян Кай, чи өнөөдөр онцгой бие махбодтой хүнийг харах хувьтай байсан учраас маш азтай байна шүү."

Ян Кай цочирдсондоо одоог хүртэл Мэн У Яагийн ард нуугдаж байсан Шя Нин Чан руу хяламхийн хараад, "тэгэхээр ... Номын эгч Шя чинь..." гэлээ.

Хэ хэ... Мэн У Яагийн царай бардамналаар дүүрч, зүрхнийхээ угаас маш хангалуун инээмсэглээд, толгой дохиж "Тийм ээ. Нин Чан бол жирийн хүмүүсээс өөр" хэмээн хариулав.

Ян Кайн зүрх хүчтэй цохилж байв. Энэхүү жижигхэн бас амархан ичдэг Номын эгчийг онцгой бие махбодтой хүн гэж тэрээр мянган удаа бодоод ч төсөөлөхгүй байлаа.

"Номын эгчийн онцлог нь юу юм бэ?" гэж Ян Кай өөрийн эрхгүй сониуч зандаа хөтлөгдөн асуув.

Мэн У Яа хариулалгүй, харин гүн бодолд автан өөртөө бувтнаснаа, эцэст нь "Энэ модон дээрх жимснүүд дөнгөж сая боловсорч гүйцсэн байна, тийм болохоор хайртай шавь минь, эдгээрийг эм болгон боловсруулчих" гэлээ.

"За." Шя Нин Чан Гурван Нарны Жимсний мод руу алхан очиж, мөчрөөс нь дөнгөж боловсорсон жимснүүдийг хөнгөхөн тасалж авав.

Ян Кай юу ч асуусангүй, тэр удахгүй бүх асуултынхаа хариуг авна гэдгээ мэдэрч байв.

"Шавь минь, өөрийнхөө хүч чадлаас жаахныг ч болов түүнд харуул" гэж Мэн У Яа хөхөрлөө.

Шя Нин Чан толгой дохиод Ян Кайн өмнө алхан ирлээ. Тэр цагаан хаш шиг гарынхаа алган дээр өнөөх жимснүүдийг байрлууллаа.

"Номын дүү, анхааралтай хараарай" гэж Шя Нин Чан аяархан захиад өөрийнхөө Юань Чи-г идэвхжүүлэв.

Ян Кай маш ихээр цочирдлоо. Учир нь түүнийг Юань Чи-гээ идэвхжүүлэхтэй зэрэгцэн жимснүүдийн дотроос улаан өнгөөр гэрэлтэх энерги савсан гарч ирэхийг тэр харсан юм.

Жимсэн доторх Ян энерги тэсрэн гарч ирлээ. Ян Кай Жинхэнэ Ян нууц урлагийг бясалгадаг байсан тул Ян энергид туйлын мэдрэг байв. Яг одоо тэр Гурван Нарны Жимс доторх энерги маш догшин ширүүнээр гадагш тэсрэн гарч байгааг маш тод мэдэрч байлаа.

[Яаж?]

Жимснээс гарсан энерги Шя Нин Чаны өмнө цугларч эхлэв. Жимснээс бүх энергийг соруулж авсны дараа тэдгээр нь дотроо өчүүхэн ч Ян Чи-гүй болон шалчийж, улмаар салхинд хийсэн замхарч алга болохыг Ян Кай харж байлаа. Энэ бүх үйл явц ердөө арван амьсгаа авах төдий хугацаанд л өрнөсөн юм.

Шя Нин Чан дахин хөдөллөө; тэр нэг гараараа гаргаж авсан энергийг барих зуураа нөгөө гараараа агаарт ямар нь үл мэдэгдэх хөдөлгөөнүүдийг хийж байв.

Тэгтэл Хориотой луугийн хавцал дотроос "Ян" Чи яг л нэг цул урсгал мэт түүн рүү чиглэн ирэв. Шя Нин Чан гарынхаа нэгхэн хөдөлгөөнөөр тэрхүү Чи-г шүүрч аваад, жимснээс гаргаж авсан өнөөх нягтаршсан улаан өнгийн энерги дээр нэмлээ.

Цаг хугацаа өнгөрөхийн хэрээр түүний шүүрч авах хурд улам бүр түргэсэж, атга дүүрэн "Ян" шинжтэй Чи болгон алган дахь жимсний улаан энергитэй уусан нэгдэж байлаа.

Гэвч илүү их энерги нэмэгдэх тусам, хуримтлагдсан энерги томорч тэлэхийн оронд, харин ч хэмжээ нь улам жижгэрч байв.

Гэхдээ тэрхүү энергийн бөмбөлөг доторх хүч улам бүр хүчирхэгжиж байлаа.

Хэдэн минутын дараа Шя Нин Чан Хориотой луугийн хавцлаас Ян шинжтэй Чи шүүрч авахаа эцэст нь зогсоож, хоёр гараараа өнөөх энергийн бөмбөлгийг шахаж эхлэв.

Түүний хоёр гар хурдан гэгч нь нийлсэн бөгөөд гараа дахин нээх үед, түүний алган дээр гурван ширхэг тод улаан эм бий болсон байв. Эмнүүд маш гөлгөр, дугуй хэлбэртэй бөгөөд нүд булаам гялбаа цацруулахын дээр эмийн судлууд нь хүртэл маш тод харагдаж байлаа.

Үүнийг харсан Ян Кай ямар ч хариу үйлдэл үзүүлж чадалгүй маш удаан гөлрөн зогсоход хүрлээ!

Дөнгөж сая өрнөсөн энэ явдлыг оргил түвшний техник ашигласан гэхээс өөрөөр тайлбарлах ямар ч аргагүй байв.

Тэр мөчид л Ян Кай Номын эгч нь өнөөх лонхтой эмийг яаж гаргаж авсныг ухаарлаа. Тэр тэдгээрийг яг л ийм аргаар боловсруулсан байжээ!

Гэхдээ, энэ арай л хэтэрхий хялбар, энгийн биш гэж үү? Эмийн мастерууд угаасаа маш ховор байдаг бөгөөд эмийг амжилттай боловсруулахын зэрэгцээ маш олон удаагийн бүтэлгүйтэл дагалддаг. Түүгээр ч барахгүй Эмийн мастерууд эм боловсруулахдаа зуух, гал гэх мэт тусгай хэрэгслүүдийг заавал ашигладаг шүү дээ.

Гэтэл Номын эгч Шя зөвхөн хоёр гараа л ашигласан бөгөөд Гурван Нарны Жимснээс өөр ямар ч нэмэлт материал ашиглалгүйгээр тэр гурван эмийг ийм амархан бүтээчихлээ.

"Энэ чамд!" Гараа Ян Кайн урд сунгаад тэрээр эмнүүдээ түүнд сарвайв.

Ян Кай гүнзгий амьсгаа авч, сандарч догдолсон зүрхээ тайвшруулаад түүнээс эмнүүдийг нь авлаа. Тэгээд тэр эм тус бүрийг анхааралтай шалгаж үзээд, тэдгээр нь анхны жимснээсээ хамаагүй баялаг, илүү нягт Ян Чи агуулж байгааг олж мэдэв. Эцсийн эцэст, Шя Нин Чан эмнүүдийг боловсруулахдаа Хориотой луугийн хавцлаас Ян Чи нэмж оруулсан шүү дээ.

"Номын эгч ээ, хэрэв та эм боловсруулаад эхлэх юм бол одоо байгаа эм зардаг хүмүүст нэг ч үйлчлүүлэгч үлдэхгүй нь ээ" гэж Ян Кай гашуунаар инээмсэглэх аядан хэлэв. Эм боловсруулах үйл явцыг ийм хэмжээнд хүртэл хялбаршуулсан хүнийг тэр хэзээ ч харж байсангүй.