Яг л урьдаас төлөвлөчихсөн байсан юм шиг, эсвэл хоёулаа нэгэн ижил бодолтой байсан юм шиг Ян Кай, Сү Янь хоёр яг ижилхэн үгсийг хэллээ. Ше Хун Чэн рүү хандан чангаар уулга алдахдаа гаргасан өнгө аяс, хандлага нь хүртэл яг ижил байв.

Ше Хун Чэн тэдний үгэнд бүрэн мэл гайхаж хоцров! Сү Янь руу шаналлаар дүүрэн харцаар хараад, тэрээр өрөвдөлтэйгөөр асуултаа давтан "Тэр яагаад хог шаар биш гэж? Түүний байр суурь нь ердөө л нэг Туршилтын шавь, бас түүний бясалгалын түвшин дөнгөж Анхдагч Элементийн 3 дугаар шатанд л байна. Иймэрхүү хүмүүс бол илт хог шаар шүү дээ. Номын эгч ээ, та түүнээс чухам юуг нь олж харсан юм бэ?" гэлээ.

"Бидний асуудалд чи санаа зовох хэрэггүй ээ!" Сү Янь үнэхээр гайхалтай жүжигчин байсан бөгөөд энэ олон жилийн турш амссан Ше Хун Чэнгийн олон юм ярьдаг байдлаас өөрийгөө салгах энэхүү боломжийг бүрэн дүүрэн ашиглаж байлаа. Тэр байтугай тэрээр ийм дотно сонсогдох үгсийг хүртэл ашигласан юм.

"Номын ах аа, юу болоо вэ? Та нэг л биш харагдаж байх чинь" гэж Ян Кай Ше Хун Чэнд бага зэрэг тохуурхангуй хэлэв.

"Чи дуугай бай!" Царай нь барайсан Ше Хун Чэн Ян Кай руу хашхирч, "Би Номын эгчтэйгээ ярьж байна, чи яаж дундуур нь орж ирж зүрхэлж байна аа?" гэлээ.

Ян Кайн нүд онийж, тэр чангаар хөхрөн инээлээ.

"Хог шаар бол хог шаар шүү дээ!" Ше Хун Чэн түүнийг аль эрт бурхан л мэдэх байх хаашаа ч юм бэ чулуудаад хаячихсан байв. Түүний царайлаг төрх муруйж, хараад барамгүй муухай болсон бөгөөд, "Би чиний насан дээр байхдаа хэдийнээ Чи Хувиргах шатанд хүрчихсэн байсан, харин чи одоо хүртэл Анхдагч Элементийн 3 дугаар шатанд л явж байна. Харин одоо бол би Салах, Нийлэх Хязгаарын оргилд хүрсэн. Бидний хооронд бүхэл бүтэн хоёр хязгаарын зөрүү байна, ийм байхад чи яаж надтай эн тэнцэх юм бэ?"

"Номын ах аа, түр хүлээгээд харж л бай!" Ян Кай дэмий үг үрж цаг алдсангүй, учир нь зарим зүйлийг үгээр тайлбарлаж болдоггүй бөгөөд зөвхөн хийж байж л бусдад ойлгуулдаг шүү дээ.

"Ше Хун Чэн, би чамтай дахиж зууралдмааргүй байна. Зам тавь, танай Сахилгын танхимын халамжинд тэр багагүй зовлон амслаа. Би түүнийг буцааж авч яваад шархыг нь эмчлэх хэрэгтэй байна!" Сү Янийн хүйтэн хоолой цуурайтлаа.

"Өнөөдөр эндээс хэн ч явахгүй ээ!" Ше Хун Чэнгийн хоолой сүртэйгээр гарлаа. Сү Янь руу нүдэндээ шаналал тээсээр харах түүний хамаг бие чичирхийлж, тушаал буулгав. "Сахилгын танхимын шавь нар аа, сонсоцгоо! Хэн ч байсан эндээс дайрч гарахыг оролдох л юм бол алж устга! Номын эгч Сү байсан ч хамаагүй, та нар түүнд өршөөнгүй хандаж болохгүй шүү."

Хайр, үзэн ядалт ямар ч мэдрэмж байсан, тэр цаг мөчид Ше Хун Чэн өөрийн зорилгоо өдрийн гэрэл мэт маш тодорхой илэрхийлсэн юм.

сүн сүн сүн… хэсэг хугацаанд эргэлзсэний дараа зуу орчим Сахилгын шавь нар урагшлан дайрахад бэлэн боллоо. Дахиад л эдгээр шавь нар Сү Янийн бүлгийг бүсэлчихэв.

"Чи үүнийг үнэхээр хийхээр шийдсэн хэрэг үү?" Сү Янийн болор мэт тунгалаг хос нүднээс аюултай гэрлийн гялбаа тодров.

Ше Хун Чэн гашуунаар хүчлэн инээмсэглээд, "Номын эгч ээ, би таны өрсөлдөгч биш гэдгээ мэдэж байна. Гэхдээ хэрвээ та өнөөдөр үнэхээр миний урдуур хүчээр гарахыг хүсэж байгаа бол, миний хүүрийг давж гарах хэрэгтэй болно доо!" гэлээ.

Тэр нэгэнт ийм байдалд хүрсэн тул өөрийн зориг болон аргагүйдсэн байдлаараа Сү Янийн сэтгэлийг хөдөлгөхийг оролдов.

Сү Янь маш их уурласан бөгөөд түүний цээж тасралтгүй дээшилж, доошилж байлаа!

Тэр Сахилгын танхимын шавь нараас айхгүй байв, эцсийн эцэст түүний хүч Жинхэнэ Элементийн 3 дугаар шатанд байсан шүү дээ. Тэр Ше Хун Чэнгээс гурван жижиг шатаар дээгүүр байсан бөгөөд Мөсөн Зүрхний нууцаа ашиглах л юм бол хэн ч түүний замыг хааж чадахгүй байлаа.

Гэхдээ үүнийг Ян Кай болон Ли Юнь Тянь тэргүүтэй бүлгийн хувьд хэлж болохгүй байв, тэдэнд ийм амар байхгүй нь тодорхой байсан юм.

Эцсийн эцэст тэр зөвхөн ганц л хүн байсан бөгөөд өөрийн далавчин доорх бүх хүнийг хамгаалж чадахгүй нь лавтай.

Сү Янь өөрийн хүмүүсээ хүчээр авч гарахыг оролдож зүрхлэхгүй байсан бол Сахилгын шавь нар ч түрүүлж дайрч зүрхлэхгүй байсан тул тэд одоогоор мухардалд орсон байлаа. Ингээд тэд одоогийн байрлалдаа хөдөлгөөнгүй зогссоор байв.

Энэхүү залуу үеийнхэн ингэж их сүр дуулиан тарьж байх яг тэр үед Өндөр Тэнгэр Асрын Настангууд сургуулийн өөр нэг хэсэгт газар хөдлөм ширүүн маргаан өрнүүлж байлаа.

Настангуудын танхимд Өндөр Тэнгэр Асрын Их Настан Вэй Ши Тун, Хоёрдугаар Настан Сү Шүань Ү, Гуравдугаар Настан Хө Бэй Шүй, Дөрөвдүгээр Настан Жоу Фэй болон Тавдугаар Настан Ю Зи Зай нар бүгд цугларсан байв.

Таван гол Настангууд өөд өөдөөсөө харсан хоёр бүлэгт хуваагдан суусан бөгөөд нэг бүлгийг Их Настан Вэй Ши тэргүүлж, түүний ард Дөрөвдүгээр Настан Жоу Фэй болон Тавдугаар Настан Ю Зи Зай нар суужээ.

Үүнтэй адилаар нөгөө талд нь Хоёрдугаар Настан Сү Шүань Ү болон Гуравдугаар Настан Хө Бэй Шүй нар суусан байв.

Энэ нь Өндөр Тэнгэр Асар доторх одоогийн Настангуудын фракцуудыг төлөөлж байлаа.

Өмнө нь хоорондоо мөргөлдсөн Вэй Жуань, Сү Мү хоёр тус тусын талдаа газар өвдөг сөгдөн суусан байх бөгөөд өнөөдөр эрт юу болсон талаар ярьж байлаа.

Сү Мү хамгийн түрүүнд үг хэлсэн бөгөөд тэр хэрхэн эхэлж зам хаалгаж, хэрхэн эхэлж өдөөн хатгуулсан тухайгаа үнэнээр нь ярив. Мөн эрдэм солилцох үеэр хэрхэн доромжлогдсоноо ярьсан ч, хэчнээн чухал байсан ч тэр өөрийн хувийн үзэл бодлоо нэмсэнгүй.

Түүнийг ярьж дууссаны дараа таван Настан нэг ч үг дуугаралгүй суух бөгөөд зөвхөн Вэй Жуаний ярихыг хүлээж байлаа.

Гэвч түүний амнаас гарсан зүйлс Сү Мүгийн хэлсэнтэй нэг л сайн таарсангүй. Хэдийгээр эхлэл хэсэг нь бараг ижил байсан ч, Ян Кай гарч ирэх мөчөөс эхлээд тэр яриагаа өөр зүг рүү хазайлгаж эхлэв. Мөнгө шиг хурц хэлээ ашиглан, нус нулимстайгаа холилдон байж тэр Ян Кайг хэрхэн хэрээс хэтэрсэн үйлдэл гаргаж, Эрдэнэст зэвсэг ашиглан дайрч түүний Хатгамалт Үүлэн Торон Хуягийг сүйтгэж, хэрхэн түүнийг алахыг завдсан талаар нулимс дуслуулан хашхирлаа.

Ийм өрөвдөлтэй өнгөөр, зүрх шимшрэм ярьсан нь сонсож буй хүмүүсийн нулимсыг унагаахад хангалттай байв; яг л телевизийн олон ангит кино шиг сүртэй биеийн хэлэмжээрээ тэр болсон явдлыг зуу дахин хэтрүүлж ярилаа.

"Чи худлаа ярьж байна!" Үүнийг сонсоод Сү Мү дургүйцсэндээ өөрийн эрхгүй хашхирч орхив.

"Үнэн бол яг л ийм байгаа!" Вэй Жуань үйл явдал өрнөж байх үед Сү Мү ухаангүй байсныг далимдуулан өөрийнхөө үнэндээ бат зогсож, яриагаа улам хачирлаж байлаа.

"Үнэн гэж новшоо! Чи юу ч биш зүйлээс том сүр дуулиан болгож, цуу яриа дэгдээж бусдыг хуурдаг муу хог шаар! Чи худлаа ярихын тулд зохиол бичих ч шаардлагагүй амьтан байна."

"Бүгд дуугүй байцгаа!" Их Настан сандлаа тасралтгүй алгадлаа. Сү Мү түүний нүдэн дээр ач хүүг нь ингэж харааж зүрхэлж байхад тэр яаж тайван байж чадах билээ? Гэхдээ уур хилэн гэдэг зөвхөн уур хилэн л байх ёстой, учир нь түүний хувьд залуу үеийнхний хоорондох маргаанд хөндлөнгөөс оролцох нь тохиромжгүй хэрэг байв.

Хмм! Хоёрдугаар Настан хүйтнээр тургилав.

Их Настан асуув, "Хоёр тал хоёулаа өөр өөрийнхөө хэсгийг хэллээ, Настангууд аа, та бүхэн үүнийг юу гэж үзэж байна вэ?"

Тэр ингэж асуусан хэдий ч, түүний харц Хоёрдугаар Настан Сү Шүань Ү-гээс огт салаагүй бөгөөд түүний үзэл бодлыг л мэдэхийг хүсэж байлаа.

Сү Шүань Ү хариулав. "Юу гэж үзэх гэж? Энэ аль хэдийн маш тодорхой биш байна уу? Залуу үеийнхний хоорондох маргаан болон тэдний халз тулаан нь тэдний л дунд шийдэгдэх ёстой. Бид Настангууд яагаад үүнд хутгалдах ёстой гэж?"

Их Настан хөнгөхөн инээмсэглэж байх зуур Дөрөвдүгээр Настан Жоу Фэй Их Настанг дэмжихээр орж ирэв. "Хоёрдугаар ах аа, таны хэлсэн зүйл буруу байна. Уг нь бол энэ байдал залуу үеийнхний халз тулааны дунд л шийдэгдэх ёстой байсан, гэхдээ тэр Ян Кай гэдэг амьтан гарч ирж шуугиан дэгдээснээрээ бүх зүйлийг төвөгтэй болгочихлоо шүү дээ."

"Яагаад тэр гэж? Бүх хүмүүсийн нүдэн дээр тэр Вэй Жуанийг халз тулаанд ил тодоор дуудсан бөгөөд Үндсэн сургуулийн ямар ч дүрмийг зөрчөөгүй. Вэй Жуаний хувийн хүч чадал хангалтгүй байсан болоод ялагдсан юм бол тэр хэнийг буруутгах ёстой юм бэ?" Сү Шүань Ү өөрийнх нь ач хүү доромжлогдсонд маш их уурлаж байсан тул түүний ярианы өнгө мэдээж хэрэг тийм ч найрсаг байсангүй.

Дөрөвдүгээр Настан ам нээж, "Хэрэв тэр Вэй Жуанийг зүгээр л эрдэм солилцохоор халз дуудаад, тэгээд түүнийг ялсан бол ямар ч асуудал байхгүй байлаа! Гэхдээ тулааны үеэр тэр зэвсэг гаргаж ирээд, тэр зэвсгээрээ Вэй Жуаний Хатгамалт Үүлэн Торон Хуягийг эвдэлсэн шүү дээ. Тэргүүн Номын ах дүүсийн хоорондох тулаанд зэвсэг хэрэглэж болохгүй гэж хэлсэн! Тэр Ян Кай энэ дүрмийг илт зөрчсөн болохоор мэдээж хэрэг зохих шийтгэлээ хүлээх ёстой!" гэлээ.

Сү Шүань Ү ёжтойгоор инээж, "Дөрөвдүгээр дүү минь, Тэргүүн хэзээ ч тийм дүрэм тогтоогоогүй биз дээ? Тэргүүнийг эдгээр олон жилийн турш тусгаарлагдмал байх хугацаанд хэн нэгэн түүний дүрмийг өөрчлөхөөр зүрхлээ юу?" гэв.

Ингэж шууд нэр заахыг сонссон Их Настан маш их цочирдлоо. Вэй Ши Тун хэлэв. "Өө тийм үү? Тэгвэл Хоёрдугаар ах аа, Тэргүүн яг юу гэж хэлснийг бидэнд хэлээд өгөөч?"

Сү Шүань Ү хүйтнээр инээмсэглээд, "Тэргүүн, шавь нарын хоорондох халз тулаанд шавь нар зэвсэг хэрэглэхгүй, хүч нэмэгдүүлэх бэлдмэл эсвэл Нууц эрдэнэс ашиглаж болохгүй гэж хэлсэн! Халз тулаанд шавь нар зөвхөн өөрсдийн тулааны урлаг болон нударгаа л ашиглах боломжтой! Том ах аа, үүнийг би буруу хэлээгүй биз дээ?" гэлээ.

Их Настангийн царай баргар болж, толгой дохиод, "Тэр үнэн!" хэмээн хариулав.