[Лун Зай Тянь яагаад түүний эсрэг зогсоно гэж?]

Ян Кай гуниглаж, ичсэн Ху Мэй Эр рүү зэрвэс харахад шалтгаан нь тодорхой болов.

[Зарим зүйлийг хэлэлгүй үлдээсэн нь дээр бололтой...]

Ху Мэй Эр ч бас сэргэлэн, ухаалаг охин тул Ян Кай түүн рүү ганц л зэрвэс харсан ч, харцны цаадах учрыг тэр даруй ойлгожээ.

"Өвөө чамайг уурхай руу орохыг хориглочихлоо, би түүний нүүрийг харахгүй байж чадахгүй нь. Ингэвэл яаж байна, би чиний өмнөөс явж тэр үрнүүдийг худалдаж авъя. Тэгэхээр чи намайг энд хүлээж байж чадах уу?" гэж Ху Мэй Эр санал болгов.

"Ойлголоо." Ян Кай үүнээс өөр аргагүйг мэдэн, өөрт байсан бүх үнэт зүйлсээ түүнд даруй өгөөд, үрийг эзэмшиж буй шавийн нэрийг хэлж өгөв. Хар Салхит худалдааны бүсэд байхдаа тэрээр лангууны эзнээс шаардлагатай бүх мэдээллийг олж авсан байлаа.

Ху Мэй Эрийг газар доорх уурхай руу орох зуур Ян Кайн нүд газар дээрх нүхнүүдийг гүйлгэн харав. Лун Зай Тянь явахдаа тэндхийн нэг байшин руу орсон бөгөөд тэр байшин дотроос хэн нэгний хос нүд түүний байгаа зүг рүү ширтэж буйг Ян Кай мэдэрч байв.

Тэр харц саяхан Лун Зай Тянь Ян Кай руу дайрах үед ч ажиглаж байсан юм; харцны эзэн бол Ян Кайтай ойролцоо насны хүү буюу Лун Зай Тяний ач хүү Лун Хуэй байлаа!

Лун Хуэй Ян Кай руу хүйтнээр харж, үл тоосон шинжтэй: "Өвөө, та яагаад түрүүн түүнийг алчихаагүй юм бэ?" гэлээ.

Лун Зай Тянь хүйтнээр инээв. "Мэй Эр хамгаалж байхад би яаж түүнийг алах юм бэ?"

"Тэр тусмаа л түүнийг алах ёстой шүү дээ! Би Ху Мэй Эр дүүг өмнө нь ямар нэгэн эрийн төлөө ингэж их хичээж байхыг огт харж байсангүй, тэр муу жаал Мэй Эр хоёрын харилцаа ч тийм энгийн биш байна. Түүнийг амьд үлдээвэл цаашид асуудал л тарих болно!"

"Мм, Ху Мэй Эр хэн нэгнийг тэгж хамгаалж байхыг бид өмнө нь харж байсангүй. Тэгээд ч түүний төлөө миний эсрэг зогсож зүрхэлнэ гэдэг маш ер бусын хэрэг юм" Лун Зай Тян хөмсөг зангидлаа.

Лун Хуэй үнэхээр их атаархаж байв. "Одоо Мэй Эр уурхай руу орчихсон юм чинь, өвөө та дахиад дайрвал яасан юм бэ?"

Лун Зай Тянь, Лун Хуэй руу унтууцсан байртай харлаа, тэр зөвшөөрөхийг хүссэн ч үр дагаврыг нь мэдэж байв. "Түүнийг алах тийм ч хэцүү биш ээ. Гэхдээ тэр үхчихвэл, Мэй Эр чамайг үзэн ядах болно. Энэ нь үнэ цэнтэй гэж чи бодож байна уу?"

Лун Хуэй гөлрөн харж байснаа толгой сэгсрэв. "Тийм ч үнэ цэнтэй биш байх, гэхдээ бид үнэхээр түүнийг Ху Мэй Эртэй үргэлжлүүлэн уулзахыг нь зөвшөөрөх хэрэг үү? Би үүнийг тэвчиж чадахгүй."

"Чи нээрээ!" Лун Зай Тянь өөрийн эрхгүй санаа алдаад, "Ахаасаа илүү ихийг сурч, тэр эмэгтэй хүнтэй яаж харьцдагийг нь ажигла. Хэрэв чи Мэй Эрийг хүсэж байгаа бол тархиа илүү ажиллуулах хэрэгтэй.

Өвөө нь чамд хүн алахад тусалж чадах ч эмэгтэй хүний зүрх сэтгэлийг эзэмдэхэд чинь тусалж чадахгүй биз дээ? Ху Манд хүү байхгүй, Жяо Эр, Мэй Эр гэсэн хоёрхон охин бий. Хэрэв чи ахтайгаа нийлээд энэ хоёрыг өөрийн болгож чадвал, ирээдүйд Цуст тулааны бүлгэм манай Лун овогтынх болно! Манай Лун овогтын гурван үе Цуст тулааны бүлгэмийн төлөө хэдэн арван жилийг зориулсан болохоор бид Бүлгэмийн толгойлогч байхын амтыг мэдрэх эрхтэй!"

Үүнийг сонсоод Лун Хуэйн цус нь буцлан толгой дохив. "Манай Лун овогтон тэргүүлэгч гэр бүл болох цаг нь иржээ! Тайван бай даа өвөө, Мэй Эр хаашаа ч зугтаж чадахгүй, харин ахын хувьд бол Ху Жяо Эр гарцаагүй олзлогдох болно."

(орч: мөрөөдөхөд мөнгө төлөх бишдээ!)

"Мм, чамд шийдэмгий байдал байгааг харах таатай байна." Лун Зай Тянь түүн рүү инээмсэглэлээ.

Лун Хуэй хорсолд автсан байв; тэрбээр холоос Ян Кайг буруутган харж байлаа. Бага зэрэг тавгүйтэнгээ тэр санаа зовж буй зүйлээ хэлэхийг оролдов. "Өвөө, нөгөө хүн..."

"Өөрөө боломж хай. Түүний хүч тийм ч их биш болохоор чи аргалж чадах байх."

"Ойлголоо!" Лун Хуэй ёжтойгоор инээв.

Хэдийгээр Ху Мэй Эр удахгүй буцаж ирэх тул тэр одоохондоо юу ч хийж чадахгүй байсан ч, Ян Кай Өндөр Тэнгэр Асрын шавь хэвээрээ тул холдож чадахгүй нь тодорхой байв.

Ян Кай гадаа хэсэг хүлээсний эцэст Ху Мэй Эр хөлсөндөө норчихсон гарч ирэв. Царайнд нь инээмсэглэл тодрох тэрээр Ян Кайн гарт дөрвөн ширхэг үр атгуулаад "Аз болоход, аминд халтай зүйл байсангүй ээ" гэлээ.

Цуст тулааны бүлгэмийн залуу авхай юм худалдаж авахыг хүсэж байхад ямар шавь нь худалдахгүй гэж зүрхлэх билээ?

"Маш их баярлалаа!" Ян Кай тэр дөрвөн үрийг энгэрийнхээ халаасанд маш болгоомжтой хийв.

Байрандаа хэсэг зогссоноо, хэлэх үгээ дотроо цэгнэсний эцэст Ян Кай, "Энэ удаад чи надад тусаллаа, тиймээс би чамд нэг өртэй боллоо" гэлээ.

Ху Мэй Эр хачирхсан байртайгаар Ян Кай руу ширтэв. "Чи юу гэсэн үг вэ?"

Ян Кай гараараа даллаад, "Намайг дагаад явахгүй юу?" гэж тайлбарлав.

Хэдийгээр Ху Мэй Эр түүнийг юу хийх гэж байгааг мэдээгүй ч дуулгавартай нь аргагүй түүнийг дагав.

Гучин тохой орчим алхсаны дараа Ян Кай гэнэт зогсоод хөлөө газар дэвсэв. "Энэ газрыг сайн тогтоогоод ав. Эндээс доош 35 метр орчмын гүнд ямар нэгэн хэвийн бус зүйл байх ёстой."

Ху Мэй Эрийн нүд эргэлзэнгүйгээр томров. "Чи яаж мэдэж байгаа юм?"

Ян Кай бага зэрэг бүдэг дуугаар гүвтнээд "Миний бясалгаж буй Тулааны эрдмийн тусламжтайгаар би тодорхой зайд Ян шинж чанартай бүх зүйлийг мэдэрч чаддаг юм. Үүний доор Ян шинж чанартай эрдэнэ байх ёстой бөгөөд түүний Ян энергийн хэлбэлзэл нь Гэрэлт Ян чулуунаас хэд дахин илүү цэвэр байна." гэлээ.

Энд ирэхээсээ өмнө Ян Кай энэ хавийн газар бага зэрэг хэвийн бус байгааг аль хэдийн мэдэрсэн байсан бөгөөд сайн тунгаан бодсоны эцэст үүнийг Ху Мэй Эрт хэлэхээр шийджээ. Нэгдүгээрт, энэ газар Цуст тулааны бүлгэмийн мэдлийнх тул Ян Кай эдгээр эрдэнэсийг хүссэн ч авч чадахгүй байлаа. Хоёрдугаарт, тэр Ху Мэй Эрт нэг өртэй болсон бөгөөд өнөөдөр түүнд туслахын тулд хийсэн бүхнийг нь Ян Кай харсан юм.

"Аан?" Ян Кайн үгийг сонсоод Ху Мэй Эр бага зэрэг цочирдов.

"Чи надад итгэж байна уу?"

"Итгэж байна!" Ху Мэй Эр маш илэн далангүй хариулсан нь Ян Кайн сэтгэлийг бага зэрэг хөдөлгөв.

"Тэгвэл сайн байна." Ян Кай хөнгөн инээмсэглэлээ. "Доор яг юу байгааг мэдэхгүй ч үнэ цэн нь лав багагүй байх. Бас үүнээс гадна өөр нэг зүйл байгаа бололтой, яг юу гэдгийг нь тодорхой мэдэрч чадахгүй байна. Гэхдээ миний таамгаар, доор нуугдаж буй нууц бол танай Цуст тулааны бүлгэмийн тайлах гэж оролдоод чадахгүй байгаа уурхайн тэр хачирхалтай оньсого байх. Тэр зүйл тэнд байгаагаас л болоод энэ хүдрийн судал үүссэн байх өндөр магадлалтай."

Ху Мэй Эр өөрийн эрхгүй догдоллоо. Хэрэв Ян Кайн хэлсэн үнэн бол, тэр доор нуугдаж буй нууц маш чухал байх болно.

"Чи ухаантай охин болохоор юу хийх ёстойгоо мэдэж байгаа байх." гэж Ян Кай сануулав.

"Ойлголоо." Ху Мэй Эр толгойгоо тасралтгүй дохино.

"За тэгвэл, явцгаая даа." Тэр инээмсэглэн хөдөллөө.

Мм. Ойн дундуур алхахдаа Ху Мэй Эр, Ян Кай хоёр үг дуугарсангүй, харин ойн дулаахан илчийг хамтдаа мэдрэн алхлаа.

Ян Кай түүнд ийм чухал мэдээлэл хэлж өгсөнд Ху Мэй Эр үнэхээр их баяртай байв. Түүнийг зүгээр л үл тоомсорлон, зарц шиг ханддаг байсан өнгөрсөн үеийг бодвол, Ян Кайн түүнд хандах хандлага нь эрс өөрчлөгдсөн нь илэрхий байлаа.

Энэ удаад өөр байлаа, тэр түүнтэй хамаагүй зөөлөн бас эелдэг харьцаж байсан юм.

"Эндээс салъя даа." Гэнэт Ян Кай алхаагаа сааруулахад Ху Мэй Эр сатаарсан байртай, салах дургүй байгаагаа харуулав. Нүд ирмэхийн зуурт тэд дөрвөн замын уулзвар дээр ирсэн байлаа; [цаг хугацаа ямар хурдан өнгөрөө вэ!] Ху Мэй Эр бага зэрэг гуниглав.

"Баяртай." Ян Кай яаран ийн хэлээд Өндөр Тэнгэр Асар руугаа буцлаа.

[Тэр үнэхээр амархан найрагдчих эр хүн биш юм аа!]

Ху Мэй Эр сэтгэлээ тайтгаруулах гэж хичээн гашуунаар инээмсэглэв.