Санни өөрийнхөө сүүдрийг зүгээр л дуугүй дагагч байхаас илүү чадвартай гэдэгт бараг итгэлтэй байлаа. Эцсийн эцэст, Хараал түүнийг үнэлж баршгүй туслагч хэмээн тодорхойлсон шүү дээ. Одоо харин Сүүдрийн Удирдлага нь яг яаж тус болохыг өөрөө олж мэдэх л үлдэв.

Аспекттэй холбоотой олон зүйлийн адил, энд ч гэсэн ухамсрын гүнд нуугдсан, зөнгөөрөө ойлгогдох мэдлэг байлаа. Энэ ойлголт Хараалаас өгөгдсөн үү, эсвэл бүх Сэрэгсэд угаасаа байдаг зүйл үү — тэр нь тодорхойгүй. Харин Саннигийн хийх ёстой зүйл бол тэр далд мэдрэмжээ олж мэдээд, бодит байдал дээр хэрэгжүүлж сурах явдал байв.

Тэр дахин бие, сүнсээ анхааралтай мэдэрч, сүүдэртээ энгийн хөдөлгөөнүүдийг дараалан гүйцэтгэхийг тушаалаа. Хөдөлгөөн бүрийн хамт сүүдрээ удирдах мэдрэмж улам бүр танил болж байв.

Удалгүй энэ нь амьсгалах, алхахтай адил байгалийн зүйл мэт санагдлаа. Сүүдэр нь яг л биеийнх нь нэг хэсэг шиг.

Эхний үр дүндээ сэтгэл ханасан Санни болгоомжтойгоор дараагийн тушаалыг өглөө. Сүүдэр нь эргэлзэлгүйгээр гутлынх нь улыг орхин салж, өрөөний нөгөө үзүүр хүртэл алхсаар очоод, эргэж харж, үл ялиг ёжилсон мэт чимээгүй ширтэв.

Санни сүүдэргүй болов.

'Энэ чинь шинжлэх ухааны ямар ч логикгүй юм аа' гэж тэр инээмсэглэн бодов.

Гэхдээ Хараалтай холбоотой зүйлд шинжлэх ухаан угаасаа хэзээ ч тохирч байгаагүй.

Сүүдэр холдох тусам, түүний оюун ухаанд нь нэгэн этгээд хуваагдал үүсэж буйг мэдрэв. Яг л мэдрэхүй нь хоёр тусдаа эх сурвалжид салсан мэт. Нэг нь өөрийнх нь бие, нөгөө нь сүүдэр.

Жаахан оролдсоны эцэст тэр хоёр дахь эх сурвалжид анхаарлаа төвлөрүүлж чадлаа. Тэр даруйд хараа нь бүдгэрэв.

“Воа!” гэж Санни гайхан уулга алдав.

“Воа!" гэж сүүдэр нь өрөөний нөгөө талаас сонсов.

Санни нүдээ ирмэв. Түүний толгойд одоо хоёр өөр дүр зураг зэрэгцэн оршиж байлаа.

Нэг нь өрөөний хаалганы өмнө хайхрамжгүй зогсох сүүдэр.

Нөгөө нь сандал дээр суусан, царай нь цонхийж, нүд нь томорсон залуу.

“Энэ чинь… би...”

Тэр гараа өргөн, агаарт даллав. Үүнтэй зэрэгцэн цонхийсон залуу ч мөн адил хөдөлгөөн хийв.

“Би ертөнцийг сүүдрээрээ дамжуулж харж чаддаг юм уу?”

Санни хэсэг суун бодолд автлаа. Ийм чадвар маш олон боломж нээж өгч байв. [Сүүдрийн хүүхэд ] гэх шинж чанар нь түүнд харанхуйд чимээгүйхэн харах, хөдлөх боломж олгодог. Харин [Сүүдрийн Удирдлага] нь нууц тагнуул болгон сүүдрээ илгээх боломж өгнө. Ингээд бодоход, тэр бараг л төгс тагнуул болж байна.

Тагнуул гэдэг бол өөрийгөө их эрсдэлд оруулахгүйгээр мэдээлэл цуглуулдаг хүн. Энэ бол Саннигийн зан ааш, амьд үлдэх философид яг тохирсон үүрэг байлаа.

Мэдээж, тагнуулууд сүүдрээс гэнэтийн, үхэлд хүргэх цохилт өгч чадна. Мэдээллээр зэвсэглэсэн тэд отолтоор дайрахдаа гаргууд. Дайсны сул талыг урьдчилан мэдэж байвал довтолгоо нь мэс заслын нарийвчлалтай, үхэлтэй байдаг.

Гэхдээ шууд тулалдаанд орох нь өөрийгөө аюулд оруулна гэсэн үг. Тиймээс Санни алуурчин болох хүсэл төдийлөн байсангүй. Эцсийн эцэст, түүний Аспект одоогоор тулааны чадварыг нь шууд нэмэгдүүлэх боломжгүй байлаа.

“Туршаад үзэх үү дээ?”

Тэр сүүдэр рүүгээ хараад тушаал өглөө. Сүүдэр хэтрүүлсэн маягаар санаа алдаад, бөхийж, хаалганы доогуур шалмагхан шурган орлоо.

Тэр даруйд Санни өрөөгөө ч, гаднах хонгилыг ч зэрэг харж эхлэв. Тэр нүдээ анин, сүүдрээс дамжиж ирж буй дүр зурагт төвлөрлөө.

Сүүдрээс сүүдэр рүү чимээгүйхэн гулсаж, хонгилоор урагшлав. Цагийг нь олж, болгоомжтой хөдөлж чадвал түүний тагнуул бараг үл үзэгдэгч байв. Санни хэд хэдэн Нойрсогчийн хажуугаар өнгөрч, яриаг нь чагнав. Сонирхол татах зүйл олдсонгүй тул цааш явлаа.

Эцэст нь сүүдэр нэгэн буланд зогсов.

Зүүн гар талд цахилгаан шат,

баруун гар талд охидын дотуур байр руу явах зам.

Саннигийн толгойд тэр даруйд элдэв өдөөн хатгасан дүр зургууд орж ирэв.

'Өө бурхан минь!' гэж тэр улайран бодов.

Тийм ээ, ийм чадвартай бол ёс суртахууны гүн доройтол руу унахад ч тун амархан! Гэхдээ үгүй. Үгүй, үгүй. Тэр тийм зүйл хийхгүй. Яагаад гэвэл өндөр ёс суртахуунтайдаа биш…

Харин түүний гаж донтон гэсэн нэр хүндийг бодоход, "чи ёс бус зүйл хийсэн үү?” гэж асуух магадлал маш өндөр.

Тиймээс тэр чин сэтгэлээсээ “үгүй” гэж хэлж чадах хэрэгтэй.

“Тэгэхээр… хийхгүй байсан нь дээр биз дээ?”

Тийм ээ?

“Мэдээж зөв! Бүр бодох ч хэрэггүй!”

Өрөө дотроо Санни гүнээ санаа алдав. Энэ нь харамсал дүүрэн санаа алдалт байлаа. Дараа нь тагнуулч сүүдрээ нэгэн өнгөрч яваа Нойрсогчийн сүүдэрт нуугдахыг тушааж, түүнийг дагуулан цахилгаан шат руу явуулав.

Хэсэг хугацааны дараа, Саннигийн сүүдэр том доожогийн буланд нуугдан байлаа. Тэр багш Рокийн удирдлага дор анхан шатны тулааны хичээлийн хөдөлгөөнүүдийг давтаж буй Нойрсогчдыг ажиглаж байв.

Өнөөдрийн хичээл голчлон тэдний ерөнхий чадвар, биеийн чадамжийг шалгахад зориулагджээ. Үүний дараа Нойрсогчдыг түвшнээр нь — шинэков, ахисан, мэргэжлийн — гэж ангилж, мөн сонгосон зэвсгээр нь хуваах байв.

Зарим нь хувийн багштай болж, зарим нь хосоороо сургуулилна.

Одоогоор Нойрсогчид ээлжлэн тусгай хэмжилтийн машинд бэхлэгдсэн том хавтгай руу хамгийн хүчтэй гэсэн цохилтоо өгч байлаа. Цохилт бүрийн дараа машин нь тухайн Нойрсогчийн биеийн хүчийг илтгэх тоог гаргана.

Онолын хувьд ийм машин бүтээх тийм ч хэцүү биш. Гэхдээ олон Нойрсогчид хүч чадлаа элдэв байдлаар нэмэгдүүлдэг тулаанд чиглэсэн Аспектүүдтэй гэдгийг бодолцвол, энэ машин бол инженерчлэл, бат бөхийн жинхэнэ гайхамшиг байлаа.

Тэдний техник, бэлтгэл нь эцсийн дүнд гарч буй тоонд мөн нөлөөлж байлаа.

Ихэнх хүмүүс арваас арван дөрвийн хооронд үзүүлэлт авч байв. Энэ нь сайн үр дүн гэж тооцогдож, зөвхөн хамгийн бие бялдар сайтай хүмүүс л хүрч чаддаг түвшин байлаа. Гэхдээ Аспект нь биеийн чадварыг нэмэгдүүлдэг нь илт харагдах зарим Нойрсогчид арван тав, бүр арван зургаа хүрч чадна.

'Би бол арваас арван нэг орчим л авах байх даа'

Тэгтэл гэнэт тэр сэргэж, дараагийн ээлж энэ үеийн хамгийн өндөр үнэлгээтэй Нойрсогч Нефисийнх болсныг анзаарлаа.

Нарийхан биетэй охин машин руу дөхөж очоод, бараг бэлтгэл ч хийлгүйгээр гэнэтийн, сүйрлийн цохилт өглөө. Санни тулааны урлагт тийм ч сайн биш ч гэлээ, гүйцэтгэлийнх нь хэмнэлттэй хөдөлгөөн, хурдыг хараад биширч орхив.

"Тэр үнэхээр их бэлтгэл хийсэн юм байна.'

Нефис улам их сонирхол татахуйц болж байлаа. Түүний жинхэнэ гарал угсаа, өнгөрсөн амьдрал нь ямар байсан бол?

Түр азнасны дараа машин үр дүнг харууллаа.

Арван зургаа.

Санни үл ялиг сэтгэл гонсойв.

'Тийм ч гайхалтай биш юм. Илүүг хүлээж байсан юмсан.'

Эцсийн эцэст, тэр чинь Жинхэнэ Нэртэй шүү дээ!

Үүний дараа зөвхөн Кастер л үлдэв. Энэ удаа Санни нисэн ирэх нударгыг нь бүр олж харахын завдалгүй, хэтэрхий хурдан байлаа. Машин чичирч, тооцоололд илүү хугацаа зарцуулна. Эцэст нь хоёр гэсэн цифр гарч ирэв.

Хорин нэг.

Бүгд дэлгэцийг алмайран ширтэх ба Кастер луу биширсэн харцнууд цөөнгүй шидэгдсэн ч тэр зүгээр л бөхийж, ухраад зогсов. Рок багшийн нүүрэнд инээмсэглэл тодроно.

“Муугүй. Одоо бид тулааны бэлтгэл рүү шилжиж, та нарын ерөнхий бэлтгэлийн түвшинг үнэлнэ. Эхлэх сайн дурын хоёр хүн хэрэгтэй.”

Нефис хамгийн түрүүнд урагш алхаж, рингийн төвд очлоо. Хэдхэн хормын дараа өндөр нуруутай, асар булчинлаг нэгэн Нойрсогч түүний өөдөөс гарч ирэв.

“Дүрэм энгийн. Өрсөлдөгчийнхөө нурууг газарт хүргэх, эсвэл рингнээс гаргах. Та нарт тохиромжтой гэж үзсэн ямар ч чадвар, техник ашиглаж болно.”

'Өө, тоглолт эхэллээ!'

Нойрсогчид хоорондоо тулалдахыг харах нь зугаатайгаас гадна тэдний чадварын талаар үнэт мэдээлэл өгдөг байв. Санни өрөөндөө ажиглалтын байрлалд суун, урагш тонгойж, эрүүгээ алгандаа туллаа.

'Урагшаа Нефис!'

Өндөр залуу огт цаг үрэлгүй дайрлаа. Булчин нь цагаан өмсгөлийн зөөлөн даавууг урах шахан овойж, зогсоохын аргагүй уул мэт урагшлаж аймшигтай өшиглөлт нисэн ирэв.

… Гэтэл нэгхэн агшны дараа, тэр залуу газар хэвтэж, цочирдсон харц нүдэнд тодров. Харин Нефис байрлалаа ч өөрчилсөнгүй.

Рок Нефис рүү мишээл дүүрэн харж, инээмсэглэв.

“Дараагийнх.”

Үүний дараах үйл явдлуудыг өөр үгээр хэлбэл хядлага гэж л нэрлэж болохоор байлаа. Нэг нэгээрээ, Нефис доожод байсан бараг бүх Нойрсогчийг ялж дийлэв. Тэр тэднээс илүү хурдан ч биш, илүү хүчтэй ч биш мэт санагдана. Гэвч хэн ч түүнтэй тулалдахаар рингэнд орсон бай, зайлшгүй ялагдаж, газарт шидэгдэнэ.

Санни эхэндээ баяр хөөр, зугаа цэнгэлтэй харж байлаа. Гэвч нэг мөчөөс эхлэн, түүнд хүртэл бага зэрэг таагүй мэдрэмж төрж эхлэв.

Нефис тулааны машин шиг тайван, ягштал нарийн хөдөлж байв. Түүний техник цэвэрхэн, уян хатан хэрнээ өршөөлгүй. Ямар ч төрлийн довтолгоо ирсэн бай, тэр аль хэдийн таамагласан мэт эсвэл агшин зуур хариу үйлдэл үзүүлж, довтолгоог няцаагаад, хамгийн бага хөдөлгөөнөөр сөрөг довтолгоо болгон хувиргана.

Өрсөлдөгч нь ядуу ч бай, баян ч бай, Өв залгамжлагч ч бай бүгд хэдхэн секундын дотор ялагдана.

Түүнчлэн, бүх хугацаанд түүний нүүрэн дээрх төвлөрсөн дүр төрх огт өөрчлөгдсөнгүй. Яг л Нефис металаар хийгдсэн мэт.

'Тэр… үнэхээр хүн мөн үү?' гэж Санни гэнэт түгшин бодов.

Хэрэв энэ Өөрчлөгдөж буй Од нэг л өдөр түүний дайсан болбол яах вэ?

Хамгийн зөв шийдэл нь зугтах. Эсвэл бүр эхнээс нь түүнийг уурлуулахгүй байх. Гэхдээ миний нэр чинь Санни. Эцсийн эцэст, нар ч бас од шүү дээ, харин сүүдэр нарны гэрэлтэй нийцэхгүй юм даа.

Эцэст нь дахин нэг удаа Кастер л үлдлээ. Гэхдээ бусад бүх Нойрсогчийн доройтсон ялагдал түүнийг огтхон ч цочроогоогүй бололтой. Уруулынх нь буланд зөөлөн инээмсэглэл тодрон, тэр рингэнд орж ирэв.

Кастер, Нефис хоёр бие биенээ ширтэн хэдэн хором зогслоо. Дараа нь Кастер үл ялиг бөхийв.

“Хатагтай Нефис. Урьдчилан уучлалт гуйя.”

'Тэр юу хийх гэж…?'

… Дараагийн агшинд, Санни цочролоосоо болж нүдээ том нээн орхив.