Тэр нүдээ анивчин, сохор охиныг гайхшрал, үл ялиг түгшүүртэй харлаа. Түүний гэнэт хэлсэн үг Санниг үнэхээр балмагдуулсан байв. Ийм чухал зүйлийг яагаад нууцалсан юм бол? Бас яагаад яг одоо түүнд хэлж байгаа хэрэг вэ?

Будилсан хэвээр, тэр болгоомжтой асуув:

“Дахиад… зөгнөлүүд үү? Яагаад бидэнд өмнө нь хэлээгүй юм?”

Кассигийн нүүрэнд түр зуурын, ядарсан инээмсэглэл тодорлоо. Тэр толгойгоо доошлуулан хэсэг чимээгүй байв. Дараа нь нүдээ анингуут:

"Чи мэдэхгүй л дээ. Яаж мэдэх билээ? Гэхдээ мэдлэг гэдэг… мэдлэг гэдэг үнэхээр хүнд байж чаддаг юм. Дэлхий дээрх хамгийн хүнд зүйл шиг л хүнд.”

Түүний уруулд гунигтай инээмсэглэл тодров.

“Би чамд хэлбэл, өөрийн харсан зүйлсийг биелэхэд нь өөрөө түлхэц өгөх вий гэж айж байна.”

Түүний үгийн цаадах утгыг ойлгоод Санни биеэ чангаллаа. Хэрэв Касси зөгнөлүүдээ биелэхээс айж байгаа бол, тэнд харсан зүйл нь тун ч муухай байж таарна. Харин тэр нь үнэхээр аймшигтай бол…

Хэрэв тэдэнд ямар нэгэн гамшиг заяагдсан бол, Санни үүнийг урьдчилан мэдэх ёстой. Ингэвэл тэр бэлтгэл хийж, юу ч тохиолдсон даван туулах боломжтой. Бэлтгэлтэй байвал олон зүйл тийм ч аймшигтай санагдахгүй.

Гэхдээ… түүний бэлтгэл өөрөө тэр аймшигт ирээдүйг бий болгох шалтгаан нь болж, Кассигийн үзэгдлийг өөрөө биелдэг зөгнөл болгочихвол яах вэ?

Ирээдүйг мэдэхийн аюул энэ.

'Новш гэж… толгой өвдлөө. Ийм юмнаас бүр залхаж байна!'

Санни Кассиг шахаж, үзэгдлүүдийг нь сонсох ёстой эсэхээ шийдэх гэж нэлээд удаан тархиа гашилгав. Аль ч сонголт нь түүнд таагүй мэдрэмж үлдээх нь тодорхой тул, тэр үнэхээр яахаа мэдэхгүй байлаа. Эцэст нь шийдвэр гаргаж чадалгүй, зүгээр л чимээгүй болов. Касси ч мөн дуугарсангүй.

Нэг хэсэг хугацаа өнгөрсний дараа, эцэст нь тэр дуугарлаа:

“Чи… чи надад ганцхан зүйл амлаж өгч чадах уу?”

Энэ нь бүхнийг хэлэх, эсвэл огт юу ч хийхгүй байх хоёрын дундах буулт олох гэсэн оролдлого бололтой. Санни хөмсгөө атирууллаа.

“Юу вэ гэдгээс чинь л шалтгаална.”

Сохор охин хариулахаасаа өмнө эргэлзэв.

“Чи Нефист анхаарал тавина гэж амлаж чадах уу? Юу ч болсон бай.”

Өвдөлт нэмэгдэж, тэсэхийн аргагүй болох хүртэл Санни хариулахгүй саатуулав. Эцэст нь тэр дурамжхан хэлэв:

“Би чадахгүй ээ. Би өөрийгөө ч арай ядан л авч явж байна.”

Тэр Нефист хангалттай итгэдэггүй байлаа. Өөрчлөгдөж буй Одод муу санах зүйл түүнд байсангүй, бүр нэлээд таалагддаг ч тэд үнэндээ бие биеэ сайн мэдэхгүй. Тэдний холбоо бол сонголт бус, зайлшгүй хэрэгцээнээс үүдэлтэй. Нэг нэгэндээ хэрэггүй болох тэр мөчид юу болохыг хэн мэдэх билээ? “Юу ч болсон бай” гэдэг нь дэндүү хүнд шаардлага байв.

Мэдээж, тэр Кассиг хуурч “тийм” гэж хэлж болох байсан. Эцсийн эцэст асуулт нь амлалтаа биелүүлэх тухай биш, харин амлаж чадах эсэх тухай байсан шүү дээ. Гэхдээ тэр мөчид Санни яагаад ч юм сохор охиныг хуурахыг хүссэнгүй.

Магадгүй, тэр үнэнч байх гэдэг зүйлд аажмаар дасаж эхэлж байгаа ч юм бил үү.

Касси санаа алдаад, нүүрээ бурууллаа. Тэр агшинд түүний доторх үл үзэгдэх нэг зүйл өөрчлөгдсөн мэт санагдав.

“Ойлголоо. Тийм ээ… шударга хариулт байна.”

Ингээд тэр таягаа дуудан гаргаж ирээд, эргэж харалгүй явчихав. Санниг гунигтай, тайван бус байдалд үлдээв. Яг л түүний таамагласнаар.

***

Тэр хичнээн тайвшрахыг хичээсэн ч, бодлууд нь байнга өөр тийшээ сарнина. Эцэст нь Санни Одгүй Хоосон эсвэл Цэнхэр Сэлмийн тайлбарт дурдагдсанаар Мартагдсан Эргийн талаарх янз бүрийн мэдээллүүдийг хооронд нь холбох гэж оролдож байгаагаа анзаарлаа.

Ядаж л энэ нь Касситай хийсэн ярианы төгсгөлийн хэсгийг бодохоос сатааруулж байв.

Түүнчлэн, яагаад ч юм орчин тойрноо ойлгох хэрэгцээ гэнэт маш чухал санагдаж эхэлсэн байлаа.

Түүний сэлэм, Оддын Гэрлийн Легионы хуяг, хуягт араатан мангасууд, мөн толгойгүй аварга хөшөө. Эдгээр нь бүгд ямар нэгэн байдлаар хоорондоо холбоотой мэт. Гэвч тэр яг яаж гэдгийг нь ойлгож чадсангүй. Тэр хөшөө нь Оддын Гэрлийн Легионыг үндэслэсэн долоон хүний нэгэнд зориулсан дурсгал байсан юм болов уу?

Хуягны бичээс дээр тэдний нэр, нүүр царай цаг хугацаанд уусан алга болсон гэж бичсэн байсан. Харин хөшөө толгойгүй байгаа нь энэ тайлбарт тун ч тохирч байв.

Сэгээр хооллогчийн Сүүдрийн хувилбараас харахад, хуягт араатан мангасууд нь сүйрсэн легионы хараагдсан цэргүүд ажээ. Тэр сүйрсэн легион нь үнэхээр Оддын Гэрлийн Легион байсан юм болов уу? Хуягт араатны центурионыг хөнөөсөний дараа Оддын Гэрлийн хуягийг авсан нь энэ онолыг бараг баталж байлаа. Хэрэв тийм бол… тэд яагаад хараагдсан юм бол?

Одгүй Хоосон, Оддын Гэрлийн Легион… энэ бүхэн юуг илэрхийлнэ вэ? Долоон баатар “бүхнийг залгигч харанхуйд” төрсөн гэж бичигдсэн байсан. Тэдний тангараг нь хараагдсан нутагт гэрлийг эргүүлэн авчрах явдал. Тэд ямар гэрлийг эрж байсан юм бол? Оддын гэрэл үү? Харин бүхнийг залгигч харанхуй нь яг юу байсан бэ?

Энэ нь тэдний нутагт буусан хараалын илрэл байсан юм болов уу? Хэрэв тийм бол, тэр хараал нь эцэстээ Оддын Гэрлийн Легионы цэргүүдийг хуягт араатан мангас болтол нь өөрчилсөн хэрэг үү?

Хэрэв тэр хараал одоо ч оршсоор байгаа бол… Санни нэг өглөө сэрэхдээ арьсан дээр нь хуяг ургаж байгааг харах юм биш биз?

“Ямар жихүүдэс хүрэм бодол вэ.”

Долоон баатар мартагдсан ч, тэдний тангарагийн дурсамж нь ямар нэгэн байдлаар үлдсэн бололтой. “Энэ мартагдсан эрэг дээр, зөвхөн ган л бүхнийг санадаг…” энэ нь Цэнхэр Сэлэмний тайлбар байв. Эдгээр үгэнд далд утга байгаа юм болов уу? Мартагдсан Эрэг дээр олдсон Дурсамжууд ямар нэгэн нууц нууж байгаа хэрэг үү?

Санни дотроо ёолон санаа алдав.

'Ийм олон асуулт байхад ганц ч хариу алга!'

Тэгээд хамгийн том нууц Кассигийн зөн байлаа… түүний тэдэнд хэлэхээр сонгосон зөгнөл. Тэр хязгааргүй харанхуй долоон лацаар түгжигдсэн байхыг харсан. Лацууд эвдэрмэгц, харанхуй суллагдсан. Мөн долоон түгжээг хамгаалж зогсох, долоон тасархай толгойтой улаан цамхгийг харжээ. Эдгээр түгжээ нь лацтай холбоотой байсан болов уу?

Харин аварга баатрын алга болсон толгой нь тэдний нэг байсан юм болов уу?

Эсвэл тэр зүгээр л хий хоосон дүгнэлт хийж, огт холбоогүй зүйлсийг хүчлэн холбож байгаа юм болов уу?

Санни санаа алдав. Түүний сониуч зан удалгүй ханахгүй гэдгийг тэр мэдэж байлаа. Зөв онол дэвшүүлэхэд мэдээлэл нь дэндүү бага. Тийм байхад одоо өөрийгөө ингэж зовоох ямар ч хэрэггүй…

Магадгүй, ирээдүйд бүх зүйл илүү тодорхой болох биз.

“Ирээдүй” гэх үг түүний хөмсгийг зангирууллаа.