Орой болоход Санни Нефисийн анхааралтай харцны дор сэлэмний бэлтгэлээ үргэлжлүүлэв. Шинэ ойлголтоо олж авснаас хойш хөдөлгөөн бүр нь өмнөхөөсөө огт өөр мэдрэмж төрүүлж байлаа. Мянган удаагийн цавчилт дуусмагц тэр суун амарч, Цэнхэр Сэлмийг ширтэн, Мартагдсан Эргийн элдэв нууцын талаар дахин дахин бодох хүслээ арай ядан дарж байв.

Хэсэг хугацааны дараа Санни асуув:

“Чи намайг сэлэм барихад тохиромжтой гэж бодож байна уу? Цаашдаа өөр зэвсэг сонгох хэрэгтэй болов уу?”

Нефис мөрөө хавчив.

“Чиний зорилгоос шалтгаална. Гэхдээ сэлмийг зэвсгүүдийн хаан гэж нэрлэдэг нь учиртай.”

Санни инээмсэглэв.

“Яагаад?”

Тэр толгойгоо үл ялиг хазайлгаад, хэдэн хором бодов. Дараа нь асуув:

“Байгалийн шалгарал гэж юу болохыг мэдэх үү?”

Санни хөмсгөө өргөлөө.

“Хүчтэй нь амьд үлдэнэ? Хамгийн хүчирхэг төрөл зүйл давамгайлна?”

Өөрчлөгдөж буй Од түүн рүү харав.

“Зарим талаар зөв. Гэхдээ үнэндээ амьд үлддэг нь хамгийн хүчтэй нь биш, харин хамгийн дасан зохицох чадвартай нь. Тэгэхгүй байсан бол хүмүүсийн оронд арслан, бар, баавгай нар дэлхийг захирах байсан.”

Санни арслан, баавгайг архивын бичлэгээс харж байсан ч “бар” гэж юу болохыг огт мэдэхгүй байв.

'Магадгүй бас нэг мөхсөн махчин амьтан байлгүй.'

Нефис үргэлжлүүлэн ярив. Энэ удаа тэр ердийнхөөсөө тэс өөр, тун уран яриатай харагдана. Өөртөө итгэлтэй сэдвийн тухай ярих үедээ тэр ингэж өөрчлөгддөг бололтой.

“Тулаанд ч мөн адил. Сэлэм бүх нөхцөлд хамгийн үр дүнтэй зэвсэг биш. Урт хүрээтэй дайсанд жад илүү ашигтай. Хуягт дайсанд байлдааны алх хавьгүй дээр. Ташуур арчлахад мөн авч явахад амар. Гэхдээ сэлэм бол хамгийн олон талт.”

Тэр Цэнхэр Сэлмийг харлаа.

“Сэлмээр хатгаж болно, огтолж болно, цохиж ч болно. Олон янзын зайд үр дүнтэй ашиглагдана. Хурдан, эвсэлтэй. Үзүүрээсээ эхлээд бариулын төгсгөл хүртэлх бүх хэсэг нь довтолгоонд ашиглагдана. Сэлэм барьсан үедээ чи бүх зүйлд хамгийн шилдэг нь байж чадахгүй. Гэхдээ чи хамгийн дасан зохицох чадвартай нь байна.”

Нефис түүн рүү хараад:

“Ойлгож байна уу?”

Санни хэсэг бодоод:

“Тийм байх.”

Тэр толгой дохин, харцаа буруулав.

“Гэхдээ эцэст нь нэг зүйлийг санах ёстой. Чиний гарт юу байгаагаас тийм ч их зүйл шалтгаалахгүй. Сэлэм ч бай, жад ч бай, бороохой ч бай энэ бүхэн зүгээр л багаж. Харин зэвсэг нь чи өөрөө.”

Санни санаа алдаад Цэнхэр Сэлмийг буцаан алга болгов. Өөрчлөгдөж буй Одын хичээлүүд түүнд үргэлж бодох юм үлдээдэг.

'Зэвсэг нь чи өөрөө.'

Тэр энэ үгийг дотроо давтан хэлэхэд, эвлүүлж явсан тааврын бас нэгэн хэсэг байрандаа орсон мэт санагдав.

Тэд хамтдаа нар жаргахыг чимээгүйхэн харлаа. Шөнө ойртох тусам далай буцаж ирж, улаан Шүрэн ойг харанхуй мэт дүүргэж байв. Тэднээс доор, Сэгээр хооллогчид нуугдах газар хайж сандарч гүйлдэнэ. Зарим нь шөнийг өнгөрөөхөөр хад асга руу авирч байлаа.

Саннигийн сүүдэр тэднийг ажиглаж байв.

“Удахгүй зочид ирэх нь” гэж тэр хэлэхэд, богинохон амралт нь дуусах гэж байгаад сэтгэл нь гундуурав.

Нефис санаа алдав.

“Зүгээр ээ. Өндөрлөгийн давуу талтай тул тэдэнтэй амархан л харьцана.”

Санни толгой дохин, алга болж буй нарыг ширтэв. Гэнэт түүний сэтгэл хүндэрч, эргэлзээ хэмээх муухай зүйл толгойд нь өндийлөө. Тэр алсыг ширтэн, хэсэг тээнэгэлзсэний эцэст асуув:

“Бид тэр цайзад хүрч чадна гэж чи бодож байна уу?”

Нефис түүн рүү илэрхий сэтгэл хөдлөлгүй харлаа.

“Тийм.”

Санни түүн рүү эргэж, хүчээр инээмсэглэв.

“Яагаад тэгтлээ итгэлтэй байна?”

Нар жаргахын цусан улаан гэрэлд Өөрчлөгдөж буй Одын тайван нүд тэнгэрлэг гал мэт асч байв. Баруун зүгийг ширтэн, тэр сэлмээ дуудан гаргаж ирээд:

“Хэрэв энэ бидний хүсэл бол, биднийг зогсоох зориг хэнд байна вэ?”

***

Авирч ирсэн Сэгээр хооллогчидтой учраа олох нь үнэхээр ч амархан байлаа. Санни, Нефис хоёр тэднийг отож байгаад, тогтвортой байрлал олохоос нь өмнө түлхэн хаднаас унагах л хэрэгтэй байсан юм. Санни бараг хүчин чармайлтгүйгээр дөрвөн сүүдрийн хэлтэрхий авч, нийт тоог гучин хоёр болголоо. Харамсалтай нь, сүнсний хэлтэрхийнүүдийг цуглуулж чадсангүй.

Тэд хад асган дээр дахиад нэг өдөр өнгөрүүлж, амарч, бэлтгэл хийв. Санни сэлэмтэйгээ давтлага хийж байхад, түүний сүүдэр Шүрэн ойн ойролцоох замуудыг судалж байлаа. Сүүдрийн хувилбар нь хараахан бүрэн сэргэж амжаагүй тул, тэдний бүлэг хамгийн сайн нөхцөлдөө байгаагүй. Иймээс одоогийн буудлаа яаран орхих ямар ч утгагүй байв.

Гэсэн ч удалгүй тэд баруун зүг рүү аяллаа үргэлжлүүлэх ёстой байлаа. Нэг өндөрлөгөөс нөгөөд шилжин, нууцлаг хүмүүсийн Цайзад хүрэх найдлага тээнэ.

Энэ удаад тэд хангалттай бэлтгэлгүйгээр хөдлөхгүй. Гэнэтийн шуурга хэзээ ч гарч, нар жаргахаас өмнө дэлхийг харанхуйгаар бүрхэн, далайг буцаан дуудах боломжтойг мэдэж байсан тул, гурван Нойрсогч дараагийн газар луу буудлаа шилжүүлэхээсээ өмнө замаа сайтар тандахаар шийдэв.

Нефис өдөржин бясалгал хийв. Нүд нь аниастай. Заримдаа түүний зовхины цаанаас зөөлөн цагаан гэрэл цацарч байгаа мэт санагдана. Гэвч Санни анхааралтай харах бүртээ, тэр гэрэл алга болж, өөрийнх нь төсөөлөл байсан болов уу гэж бодогдоно.

Тэр Өөрчлөгдөж буй Одыг Дутагдалынхаа өвдөлтийг тэсвэрлэх чадвараа сургаж байна гэж таамаглав.

Хэрэв тийм бол, тэр түүнд амжилт хүслээ.

Касси ердийнхөөрөө л хөгжилтэй, найрсаг хэвээр байв. Тэдний хооронд болсон хачин яриа огт болоогүй мэт. Гэсэн ч Санни түүний дотор ямар нэг зүйл өөрчлөгдсөнийг мэдэрч байлаа. Яг юунд өөрчлөлт орсныг тэр хэлж чадахгүй ч, сохор охин илүү шийдэмгий болсон мэт санагдана. Энэ нь муу зүйл биш байв.

Тэд хэсэг ярилцаж, Академид өнгөрүүлсэн өдрүүдээ дурслаа. Санни Багш Жулиустай хийдэг хичээлүүд, мөн хөгшин эрээс сурсан элдэв хачин зүйлсийнхээ талаар ярив. Зүүдний ертөнцийн үхмэл хэлнүүдийг судална гэдэг санаанд Кассигийн үзүүлсэн хариу үйлдэл нь Саннигийн анхны эсэргүүцэл, гайхшралтай яг адилхан байлаа.

Удалгүй дахин шөнө болов. Энэ удаа ямар ч Сэгээр хооллогч хад руу авираагүй тул, Санни, Нефис хоёр тайван байж чадлаа. Гэсэн ч тэд ямар нэгэн гэнэтийн зүйл тохиолдохоос сэргийлэн, ээлжлэн унтаж, харуул хийсээр байв.

Өглөө нь тэд центурионы махны үлдэгдлийг идэж дуусаад, Шүрэн ой руу доош буухад бэлдлээ.

Аяллаа үргэлжлүүлэх цаг иржээ.