4-р бүлэг : Гэнэтийн шагнал
Угаалгын өрөөний цонх хаагдаагүй бололтой, Чэнь Гөд өрөөнд хүйтэн салхи үлээж байгаа нь мэдрэгдэв. Энэ нь яг л ямар нэгэн үл үзэгдэх гар нүүрийг нь илээд өнгөрөх шиг санагдана.
Угаалгын өрөөний бүхээгний хаалганууд салхинд хөдлөн хяхтнах чимээ гарна. Таазны буланд хурсан ус шалан дээр дуслах үед шавжнууд тал тал тийш бутран гүйлдэх ажээ. Энэ чимээ Чэнь Гөд тэдгээр шавжнууд яг л өөрийнх нь арьсан дээгүүр мөлхөж байгаа мэт мэдрэмж төрүүлж байв.
Энэхүү нам гүм орчинд бүхий л төрлийн чимээ шуугиан хэд дахин чангарч сонсогдох нь жирийн хүний хувьд айдас түгшүүрийг нь дээд цэгт нь хүргэхээр байсан ч, Чэнь Гөгийн хувьд байдал арай өөр байлаа. Тэрээр багаасаа л зоригтой байхаар дасгалжуулагдсан бөгөөд юмсыг мэдэрч хүлээж авах чадвар нь энгийн хүмүүсээс бага зэрэг удаан байсан юм.
Тэрээр цаг тоолохдоо анхаарлаа төвлөрүүлэхийн тулд толгойд нь эргэлдэх бүх бодлоосоо саллаа.
Хорин минут орчим өнгөрөхөд яагаад ч юм өрөөний температур эрс буурч, яг л түүний эргэн тойронд хэд хэдэн том мөсөн блок байрлуулсан мэт санагдан, тэрээр өөрийн эрхгүй чичирч эхлэв.
[Тайвшир! Хэтрүүлж бодоод өөрийгөө айлгаад хэрэггүй ээ! Одоо ердөө арван минут л үлдлээ; Чэнь Гө, чи чадна аа!]
Түүний чихний хажуугаар ямар нэгэн зүйл тойрон эргэлдэж байгаа мэт сонин сэржигнэсэн чимээ сонсогдоно. Тэрээр гараа маш чанга атгасанд гарынх нь шуун дээрх судаснууд нь товойн гарч ирсэн ч, түүний бие яг л хөдөлшгүй чулуу мэт хөшсөн байлаа.
"Чэнь Гө, Чэнь Гө, Чэнь Гө..."
Тэрээр өөртөө бувтнасаар байв. Ердөө тавхан минут үлдэх үед, Чэнь Гөгийн өмнө сүүмэлзэн асаж байсан лааны гал унтарч, харанхуйд өөр нэгэн хүн түүний нэрийг дуудах шиг санагджээ.
[Цуурай юу? Байж боломжгүй юм!]
"Чэнь Гө..." Энэ хоолой түүнийг дуудаж байгаа мэт бөгөөд ямар нэгэн маш чухал зүйлийг яаралтай хэлэх гэсэн мэт сандруу сонсогдож байв.
[Энэ хоолой хаалганы гаднаас гарч байх шиг байна, очоод харах уу?]
Гэвч Чэнь Гө маш хурдан энэ бодлоосоо татгалзлаа. Дүрэм маш тодорхой байсан; тэр толины өмнө зогсоод өөр юу ч хийж болохгүй.
Тэрээр дотроо цагаа тоолсоор байсан бөгөөд чихнийх нь хажууд дуугарах хоолой улам бүр гажуудаж эхлэв. Хэн нэгэн өөрийнх нь нэрийг дуудаж байгааг, бас тэр хүн угаалгын өрөөний хаалганы гадна талд зогсож байгаа гэдэгт тэр одоо бүрэн итгэлтэй байлаа.
[Тэр хүн маш их сандарсан сонсогдож байна, гэхдээ би энэ тоглоомыг тоглож байгаа хүн шүү дээ, тэгэхэд тэр хүн яагаад ингээд яараад байгаа юм бэ? Энэ бол гарцаагүй занга байна, ёстой луйварчин юмаа.]
Чэнь Гө дурамжхан уруулаа унжуулав.
[Орчин болон уур амьсгал нь дажгүй юм, гэхдээ даанч айлгах арга нь хэтэрхий шууд бас энгийн юм аа.]
Сүүлийн гурван минутын хугацаанд угаалгын өрөөний хаалганаас яг л хэн нэгэн хумсаараа маажиж, эсвэл шүдээрээ мэрж байгаа юм шиг чихарсан дуу гарч эхлэв. Хаалга хэзээ мөдгүй онгойх гэж байгаа мэт үл ялиг хяхтнана.
[1,798 секунд, 1,799 секунд, 1,800 секунд!]
Хагас цагийн хугацаа дуусахад бүх чимээ нэгэн зэрэг алга болж, дахин нам гүм байдал ноёрхсоор л байв.
Цагаа буруу тооцоолохоос сэргийлж, Чэнь Гө шууд нүдээ нээсэнгүй. Тэрээр дахин гурван зуу хүртэл тоолсныхоо дараа нэг алхам ухарч, хоёр гараа цээжиндээ аваад, нүдээ аажмаар нээлээ.
Угаалгын өрөөнд асаж байсан лаа унтарсан тул эргэн тойрон тэр чигтээ харанхуй байв. Яагаад ч юм, Чэнь Гөд ямар нэг зүйл өөрчлөгдсөн мэт санагдана. Тэрээр гар чийдэнгээ асаахад, энэхүү давчуу орчинд дахин гэрэл тусахад тэрээр мэл гайхаж орхилоо.
Түүний өмнөх толь хагарч цуурсан байх бөгөөд өөрийнх нь хэд хэдэн дүрсийг өөдөөс нь ширтэж байгаа мэт харагдуулна. Энэ нь үнэхээр хий үзэгдэл мэт харагдах боловч, үүнээс ч илүүтэйгээр түүнийг айлгасан зүйл бол толины өмнө нэгэн эвдэрхий хүүхэлдэй гарч ирсэн явдал байлаа!
Товчоор хийсэн нүд нь гялалзаж, энд тэндгүй зүйж оёсон бие нь хөвөнгөөр дүүрэн байв. Энэ хүүхэлдэй огтхон ч шинэ биш байсан ч Чэнь Гөгийн хувьд онцгой утга учиртай зүйл байлаа; энэ бол түүний хамгийн анхны бүтээл бөгөөд эцэг эхийнх нь алга болсон хэргийн газраас олдсон зүйл юм.
Толин доторх зүйлийг гарч ирэхээс нь сэргийлж байгаа мэт тэрхүү хүүхэлдэй толийг налан зогсож байв.
"Байз, угаалгын өрөөний хаалга түгжээтэй байхад, чи яаж орж ирэв ээ? Цонхоор уу? Үгүй ээ байз, хамгийн гол асуудал бол чи яаж өөрөө хөдөлсөн бэ гэдэг л байна шүү!" Чэнь Гөд түүний ертөнц тэр чигтээ нуран унаж байгаа мэт санагдаж; нөхцөл байдлыг боловсруулж ойлгохын тулд түүнд багагүй хугацаа хэрэгтэй байлаа. Тэр болон хүүхэлдэй хоёр бие биенээ ширтэн гурван минут орчим зогссоны эцэст Чэнь Гө арай л гэж ухаан орж, өөрийнхөөрөө сэтгэж эхлэв. Тэрээр хүйтэн хуруунуудаа хөдөлгөн хүүхэлдэй рүү аажмаар дөхлөө.
Яагаад ч юм, хүүхэлдэйний товчин нүд өөрийг нь дагаж хараад байгаа мэт түүнд мэдрэгдэнэ. Чэнь Гө өөрийн энэ хүүхэлдэй рүүгээ харах үед өөрийн эрхгүй уруул нь татганав. Тэрээр хүүхэлдэйг тойрон гарч хажууд нь байсан утсыг авав. "Үүнд бэлдсэн нь миний ухаантайгийнх л байлаа даа."
Утас хэдийнээ бичлэгээ хийж дууссан байв. Чэнь Гө видеог үзэж эхлэхээсээ өмнө хуулбарлаж авлаа.
Бичлэгийн чанар тийм ч сайн байсангүй. Харанхуйд ганц лааны гэрэл бүжиглэх бөгөөд толины өмнө зогсож буй Чэнь Гө нэлээд болгоомжтой харагдах бол, толин доторх Чэнь Гө харин хачирхалтай нь маш тайван байх шиг харагдана.
Эхний арван минут зүгээр байсан ч, арван нэг дэх минутаас эхлэн бүх зүйл хачин болж эхлэв.
Салхины чимээ утсанд бичигдээгүй боловч бичлэгээс угаалгын өрөөний бүхээгний хаалга хөдөлж байгааг харж болохоор байлаа.
Дараа нь бичлэг цагаан шуугианаар (white noise) тасалдаж эхлэв. Энэ нь тийм ч сүртэй биш, бага зэрэг л хачин бичлэг байсан боловч яагаад ч юм нэг л сэртхиймээр аймшигтай байлаа. Магадгүй энэ нь хүн төрөлхтний харанхуй, мөн үл мэдэгдэх зүйлсээс айх төрөлхийн айдастай холбоотой байж болох юм.
Бичлэг үргэлжлэх тусам Чэнь Гөгийн царай улам бүр цонхийн цайж байв. Тэрээр нүдээ аниастай байхдаа огт хөдлөөгүй гэдгээ маш сайн санаж байсан ч, бичлэг дээр түүний бие урагш аажмаар бөхийж, яг л толь руу налахыг оролдож байгаа мэт харагдаж байлаа.
Хорин тав дахь минут гэхэд түүний цээжин бие нь хэдийнээ далан хэмийн өнцгөөр бөхийж, хамрынх нь үзүүр толины гадаргууд бараг л шүргэж байв.
Хэдэн секундын дараа ямар ч анхааруулгагүйгээр толин дээр аалзны шүлс мэт хагарал үүсэж эхлэв. Үүнийг хараад Чэнь Гөгийн зүрх зогсох шахлаа. Тэгтэл хамгийн итгэмээргүй зүйл болох нь тэр. Толин доторх Чэнь Гөгийн царайны хувирал өөрчлөгдөв. Тэрээр чөтгөр мэт инээмсэглэж, толийг галзуу юм шиг хүчтэй мөргөж эхлэв!
Яг тэр мөчид лаа унтарч, бичлэг дууслаа.
Камерын өнцгөөс болоод бичлэгт хүүхэлдэйтэй холбоотой ямар ч дүрс бичигдээгүй бөгөөд Чэнь Гө өөрөө ч тэр сүүлийн таван минутад яг юу болсныг огтхон ч мэдэхгүй байлаа.
"Эндээс харахад, толин доторх зүйл гарч ирэхийг хүссэн ч энэ хүүхэлдэй түүнийг зогсоосон хэрэг үү? Тэгэхээр энэ хүүхэлдэй намайг аварсан гэсэн үг үү?" Чэнь Гө тавиур дээрээс хүүхэлдэйг авч, маш ноцтой өнгөөр, "Чи намайг ойлгож байна уу? Миний эцэг эхэд юу тохиолдсоныг чи мэдэх үү?" хэмээн асуув.
Мэдээж хүүхэлдэй хариулсангүй, гэхдээ түүний товчин нүд харанхуйд гэрэлтэх мэт санагдана.
Тэрээр хүүхэлдэйг энгэртээ тэврээд угаалгын өрөөний хаалга руу эргэж харав. Гадагш гарахаасаа айсан тэрээр нэг цонхны дор шигдэж суугаад утсаа гаргаж ирлээ. Даалгавар амжилттай болсон тухай зурвас түүнийг хүлээж байв.
"Та үнэхээр гайхалтай азтай юм гээч. Хар дарсан зүүдний даалгаврыг амжилттай биелүүлсэнд баяр хүргэе! Даалгаврын шагнал — Анхан шатны ур чадвар: Цогцос будагчийн нүүр будалт.
Цогцос будагчийн нүүр будалт: Та энэхүү авьяасандаа хүндэтгэлтэй хандана гэж найдаж байна. Гоо сайхны нүүр будалтаас ялгаатай нь, цогцос будагч зөвхөн үхэгсдийн нүүр будалтыг хийдэг. Таны гар үхдлийн царайнд амь оруулж, тэдэнд мөнхийн гоо үзэсгэлэнг бэлэглэнэ.
Анхны Хар дарсан зүүдний даалгавар биелсэн тул: 'Хар дарсан зүүдний хотын шинэхэн гишүүн' цол нээгдлээ. Нэмэлт шагнал: 'Шөнө дундын аллага' хэмээх 1 Одтой үзүүлбэрийн туршилтын даалгавар нээгдлээ! Энэхүү туршилтын даалгаврыг биелүүлснээр уг үзүүлбэрийг Аймшгийн байшиндаа нэмэх боломжтой!"
Дэлгэцэн дээрх зурвасуудыг хараад Чэнь Гө дотроо ингэж бодлоо: [Аймшгийн байшингийн амжилт сайн нүүр будагчтай салшгүй холбоотой байдаг. Жүжигчид ч бай, тайзны хэрэгсэл ч бай, тэднийг амьд мэт харагдуулахын тулд сайн нүүр будагч хэрэгтэй бөгөөд сайн нүүр будагч бол ерөнхий аймшгийн уур амьсгалыг нэмэгдүүлэх бодит үр нөлөөг маш амархан бий болгож чадна.]