Нүднийх нь доогуур хөхөрсөн Чэнь Гө хүүхэлдэйнүүдээ тэвэрсээр толины өмнө зогсож байлаа. Шөнө дунд болоход дахиад ганцхан минут дутуу байв.

Угаалгын өрөөний гэрэл унтраалттай байх бөгөөд Чэнь Гө толинд тусах өөрийнхөө тусгал руу ширтэнэ. Ямар нэгэн нарийн ширийн зүйлийг орхигдуулчих вий гэж айсандаа Чэнь Гө угаалтуур дээр тулж, нүүрээ толинд ойртуулан нүд ч цавчихгүйг хичээж байлаа.

Тэр хамаг анхаарлаа толинд төвлөрүүлэв. Шөнө дунд болоход ердөө хэдхэн секунд дутуу байх үед Чэнь Гөгийн халаасанд утас нь чичирхийллээ.

[Дуудлага? Ийм орой хэн залгадаг байна аа?]

Гэнэтийн дуудлага Чэнь Гөг цочоов. Тэр яаран утсаа гаргаж ирвэл залгаж буй хүн нь Ли байцаагч байх нь тэр.

[Ямар нэгэн муу зүйл тохиолдоо юу?]

Чэнь Гө утсаа аваад чихэндээ наалаа. "Санбао ах аа, шинэ мэдээ байна уу?"

Утасны нөгөө үзүүрт Ли байцаагчийн дуу сүртэй бөгөөд нилээн яарсан байдалтай сонсогдов. "Жан Пөн одоог хүртэл сул чөлөөтэй хэвээр байна, гэхдээ бид түүнийг Баруун Жюжян орчимд л байгаа гэсэн дүгнэлтэд хүрсэн! Чи болгоомжтой байх хэрэгтэй шүү! Тэр хүн бол маш аюултай бөгөөд зальтай. Түүний үйлдэл болон сэтгэхүй энгийн хүнээс өөр байгаа тул тэр чиний араас буцаж ирэх магадлалыг үгүйсгэх аргагүй!"

"Гэхдээ цагдаа нар өчигдөр Шинэ Зуун цэцэрлэгт хүрээлэнгийн эргэн тойронд хамгаалалт гаргасан биз дээ? Хоёр гар нь хоёулаа гэмтэлтэй байхад тэр холдож чадахгүй л баймаар юм." Чэнь Гөгийн бодлоор бол Жан Пөнг баригдах нь гарцаагүй зүйл гэж бат итгэж байсан юм.

"Нэг гэнэтийн зүйл тохиолдлоо. Одоохондоо би чамд нарийн ширийн зүйлийг нь хэлж чадахгүй ч, миний хэлж чадах зүйл гэвэл, өнгөрсөн шөнө сэжигтнийг зогсоох гэж оролдсон нэг цагдаа маань ямар нэгэн цочролд орсон. Тэр одоо гүн комд орчихсон, эмнэлэгт эмчлүүлж байгаа."

"Юу гэнэ ээ‽" Чэнь Гөгийн царай хувьсхийж, ямар нэгэн зүйл хэлэх гэж байтал нүднийх нь булангаар ханан дээрх толь харагдлаа. Түүнийг анзаараагүй байх хооронд толин дээр цусаар бичсэн Араб 1-ийн тоо гарч ирсэн байв.

"Гэхдээ санаа зоволтгүй ээ, цагдаа нар түүн рүү ойртож байгаа. Шударга ёс үргэлж ялдаг юм."

Ли байцаагч утсаар үргэлжлүүлэн ярьсаар байсан ч Чэнь Гөгийн ухаан санаа аль хэдийн өөр газар одсон байлаа. Тэр утсаа доош буулгаад толь руу гөлрөн ширтэв.

[Энэ хэзээ гараад ирэв? Толин доторх мангас аль хэдийн явчихсан байхад яагаад энэ тоо толин дээр гарч ирсээр байгаа юм бэ‽]

Чэнь Гөд өмнөх өдөр нь угаалгын өрөөнд харсан зүйл нь санаанд нь оров; толин доторх мангасын биеийн тэн хагас нь толины гадна байж, Жан Пөн тэр амьтантай нэгдэхийн тулд сайн дураараа урагш алхсан дүр зураг.

[Энэ тоо үнэндээ ямар утгатай юм бол? Өчигдөр 2 байсан, харин өнөөдөр 1 болчихож. Маргааш тэг болно гэсэн үг үү?]

Буурч буй тооноос болж санаа зовсон Чэнь Гөгийн нүдэнд гуниг төрлөө.

[Жан Пөн толин доторх мангаст эзэмдүүлсний дараа тоо буурч эхэлсэн. Ли байцаагч цагдааг комд орсон гэж хэлэх үед тоо дахиад л буурчихлаа. Энэ тоо хохирогчдын тоог илэрхийлээд байгаа юм болов уу? Толин доторх мангаст гурван амьд хохирогч хэрэгтэй хэрэг үү?]

Тооны жинхэнэ утга учир нь юу ч байлаа гэсэн, энэ нь гэм зэмгүй хүмүүсийн амь настай холбоотой болсон тул Чэнь Гө дахиж хүлээж чадахааргүй болов. Түүний зүрхэнд маш их яарсан, сандарсан мэдрэмж төрлөө.

[Толин доторх мангас улам бүр л хүчирхэг болж байна; маргааш шөнө миний хамгийн эцсийн боломж ч байж магадгүй юм.]

Чэнь Гө бохир алчуур авч толин дээрх тоог арчиж арилгав; тэр үүнээс цааш аюулгүй байдлаа сахиад суугаад байж чадахгүй нь тодорхой болов. Ли байцаагчтай дахиж хэдэн үг сольсныхоо дараа тэр дуудлагаа таслаад, хар гар утсаа барьсаар агуулахын өрөө рүү орлоо.

(Орч: эд хэрэглэлийн өрөөг хойшид агуулахын өрөө гэж орчуулахаар боллоо)

[Одоо ингээд шинэ өдөр эхэллээ; Өдөр тутмын даалгаврууд аль хэдийн шинэчлэгдсэн байгаа. Одоо надад тусалж чадах ганцхан зүйл бол Улаан сүнсний 'Цуст хүслийн даалгавар' эсвэл шинэ Хар дарсан зүүдний даалгавар л байна.]

(Орч: өмнө нь цуст зүрхний даалгавар гэж орчуулсан байсан бол одоо цуст хүсэл гэж орчуулж явна, Зохиолын хятад эх дээрээ энэ үг нь "血色心愿" (Xue Se Xin Yuan) буюу шууд орчуулбал "Цуст хүсэл" гэж орчуулагддаг . Харин англи руу орчуулахдаа "Bloody Heart" гээд "Зүрх" гэдэг үг оруулчихсан нь ингэж гажих шалтгаан болсон тул ингэж өөрчиллөө )

Чэнь Гө аппликэйшний Өдөр тутмын даалгаврын цэс рүү орлоо.

"Хялбар даалгавар: Аймшгийн байшин нь үйлчлүүлэгчдэд байнгын сэтгэцийн болон биеийн гэмтэл учруулах ёсгүй; чи энэ энгийн дүрмийг ойлгож байгаа гэж найдаж байна. Аймшгийн байшингийн эргэн тойронд нуугдсан аюул заналуудыг шалгаж, Аймшгийн байшингийн аюулгүй байдлыг сайжруулна уу."

"Энгийн даалгавар: Та Аймшгийн байшингийн анхны өргөтгөлийг хийх шалгуурыг хангасан тул, удахгүй тохиромжтой байршил хайж олно уу! Орон зайн хязгаарлалтаас шалтгаалан, та шинэ үзвэрүүдийг нээх ямар ч Туршилтын даалгавар гүйцэтгэх боломжгүй байна!"

"Хар дарсан зүүдний даалгавар: Таны өрөөнд үргэлж хоёр дахь оршин суугч байсаар ирсэн, та тэр хүнтэй уулзахыг хүсэхгүй байна уу?"

"(Анхаар! Даалгавар хэдий чинээ хэцүү байна, төдий чинээ аюултай байх тул анхааралтай сонгоно уу!)"

Гурван даалгаврыг уншсаныхаа дараа Чэнь Гөгийн нүд Хар дарсан зүүдний даалгавар дээр тогтов.

[Миний өрөөнд байгаа нөгөө хүн гэнэ ээ? Зөвхөн тайлбарыг нь уншихад л надад эвгүйцмээр санагдаж байна.]

Чэнь Гө Хар дарсан зүүдний даалгавар ямар их аюултай байж болохыг маш сайн мэдэж байлаа. Удаан эргэлзсэний эцэст тэр үүний оронд Улаан сүнсний хуудсыг нээхээр шийдэв.

"Та Жан Ягийн 'Цуст хүслийн даалгавар'-ыг хүлээн авахдаа итгэлтэй байна уу? Анхааруулга! Энэ даалгавар нь тодорхой хэмжээний аюул дагуулна!"

Аппликэйшн Чэнь Гөд найрсагаар анхааруулга өгөв. Тэр шийдвэр гаргаж чадалгүй чамархайгаа илэн зогслоо.

[Энэ хоёр даалгавар хоёулаа тодорхой хэмжээний эрсдэл, аюул дагуулна. Гэхдээ Хар дарсан зүүдний даалгаврын шагнал нь санамсаргүй байдаг болохоор, дахиад л нэг туслах ур чадвар өгөх магадлал өндөртэй. Үүнтэй харьцуулахад Цуст зүрхний даалгавар...

Жан Яд Улаан сүнс гэсэн онцгой цол олгоод зогсохгүй, аппликэйшн дотор бүр өөрийн гэсэн хувийн хуудас хүртэл гаргаж өгсөн байна. Энэ нь түүнийг толин доторх мангасаас дор хаяж хэд хэдэн түвшнээр илүү хүчирхэг сүнс гэдгийг илтгэж байгаа хэрэг. Түүний тусламжтайгаар би энэ хямралыг даван туулж чадах ёстой доо.]

Нөхцөл байдлыг сайтар дүгнэж үзсэнийхээ дараа Чэнь Гө шүдээ зуун байж Жан Ягийн 'Цуст хүслийн даалгавар' дээр дарлаа.

"Та Жан Ягийн 'Цуст хүслийн даалгавар'-ыг хүлээн авахдаа итгэлтэй байна уу?"

"Тийм ээ!"

Улаан өнгийн дэлгэц өөрчлөгдөж, яг л хатсан сарнайн дэлбээ шиг хууларч эхлэх бөгөөд удалгүй дэлгэц дээр шинэ зурвас гарч ирэв.

"Андерсений үлгэрүүд Нэгдүгээр боть, Гуравдугаар ном — Улаан бүжгийн гутал:

(орч: Андерсен бол дэлхийн хамгийн алдартай хүүхдийн үлгэрийн зохиолч)

Эрт урьд цагт өмссөн бүжигчнийхээ хөлийг хөнгөн шингэн болгож, бүжгийг нь төгс төгөлдөр болгодог бадмаараг мэт улаан бүжгийн гутал байжээ. Гэвч тэдгээр нь шидэт гутлууд бөгөөд өмссөн бүжигчнээ ядарч туйлдан үхэх хүртэл нь зогсолтгүй бүжиглүүлдэг байсан тул ямар ч бүжигчин түүнийг өмсөж зүрхэлдэггүй байв.

"Даалгаврыг хүлээн авснаас хойш нэг цагийн дотор Баруун Жюжян хотын Хувийн Академид хүрч очин, үүр цайхаас өмнө Жан Ягийн улаан бүжгийн гутлыг олж авна уу.

"Анхааруулга: Анхны болзоондоо битгий хоцроорой, эс тэгвэл тэр маш их гомдох болно."

Даалгаврын дэлгэрэнгүйг уншсаныхаа дараа Чэнь Гөд ямар мэдрэмж төрж байгаагаа ч тэр өөрөө ойлгосонгүй. Тэрхүү Хувийн Академи нь хэдэн жилийн өмнө тодорхойгүй шалтгаанаар орхигдож, хаягдсан байлаа. Гэхдээ Чэнь Гө тэр сургуулийн талаарх маш олон аймшигтай цуурхлуудыг сонсож байсан юм.

[Эмэгтэй хүнтэй хийх анхны болзоо маань шөнө дунд, хаягдсан сургууль дээр болно гэнэ ээ, би хайр дурлалын тал дээр тийм азгүй юм байх даа?]

Даалгавар түүнийг нэг цагийн дотор Хувийн Академид очсон байхыг шаардаж байв. Чэнь Гө дотроо зайг нь тооцоолж үзээд түүнд бага зэрэг цаг байгааг ойлголоо.

[Хувийн Академи хотын энэ хэсэгт байдаг юм чинь надаас тийм ч хол биш юм байна. Хамгийн гол асуудал нь шөнө дунд өнгөрсний дараа тийшээ очих шүү дээ. Өө, би эхлээд усанд орчихсон нь дээр юм байна; яаж ч бодсон энэ чинь миний анхны болзоо шүү дээ.]

Хурдан шүршүүрт орсныхоо дараа Чэнь Гө цэвэрхэн хувцас сольж өмслөө. Тэр толины өмнө зогсонгоо өөрийнхөө дүр төрхийг шинжин харав.

[Тавин минут дутуу байхад, би яагаад гэнэт сандраад эхлэв ээ?]