Даалгавар биелсэн тухай зурвасыг уншаад Чэнь Гө сая нэг уужуу амьсгаа авав. Хоёр одтой айлгах түвшинтэй энэхүү Туршилтын даалгавар түүний төсөөлж байснаас хамаагүй амархан байлаа. Гэхдээ энэ нь магадгүй Мү Ян ахлах сургууль доторх сүнснүүд түүнд хор хөнөөл учруулах санаагүй байсантай холбоотой байх.

Даалгаврынхаа талдаа орох үедээ л Мү Ян ахлах сургуулийн оршин суугчид хорон санаат сүнснүүд биш болохыг тэр аль хэдийн анзаарсан байлаа. Үзэгний сүнсийг хүртэл оруулаад тэдний хэнд нь ч муу санаа байсангүй. Фань Юйгийн аавд тохиолдсон зүйл бол ердөө л үйлийн үр нь байсан юм.

Хамгийн хэцүү нэмэлт даалгаврууд нь гарцаагүй анги болон гүн худаг хоёр байв. Тэр одоо ч Битүүмжлэгдсэн ангийн нууцыг бүрэн тайлж чадаагүй л байлаа. Тэр нэг удаа дотогш орж үзсэн бөгөөд аз болоход доторх сүнснүүд түүнд нэг их төвөг удсангүй. Гүн худгийн даалгаврын хүндрэл ч мөн өндөр байсан. Цагдаа нарын тусламжтайгаар бүхэл шөнийн турш ухаж байж үүр цайхаас өмнө сая нэг худгийг олсон шүү дээ. Хэрэв тэр ганцаараа үүнийг оролдсон бол даалгавраа гарцаагүй бүтэлгүйтүүлэх байсан биз.

Чэнь Гө шагналууддаа сэтгэл хангалуун байлаа. Нээгдсэн нууц эд зүйлийн тухайд тэр нэг их санаа зовсонгүй. Домогт өгүүлснээр Үзэгний сүнснүүд ирээдүйг зөгнөж чаддаг гэдэг ч, түүний Үзэгний сүнс юуны ч талаар мэдлэггүй, ямар ч зарчим, ёс суртахуунгүй бололтой байв.

Шөнөжин үргэлжлэн орсон бороо эцэст нь зогслоо. Цагдаа нар Чэнь Гөгийн оруулсан хувь нэмрийг магтаж сайшаахаа ч мартсангүй. Түүнээс мэдүүлэг авсныхаа дараа тэд түүнийг гэрт нь хүргэж өгчээ. Онцгой байдлын дуудлага, мөн шөнөжин ухсан ажил нь цагдаа нарыг бүрэн туйлдуулсан байв. Машин дотор Чэнь Гөгийн хажууд суусан цагдаа зүүрмэглэж байлаа. Чэнь Гө цагдаад зай гаргаж өгөхийн тулд биеэ хаалга руу шахав. Гэрийн зүг буцах зам нам гүм байлаа.

Чэнь Гө өглөөний 6 цагт Шинэ зуун цэцэрлэгт хүрээлэнд ирэв. Инь Ян хараа эсвэл сүнснүүдтэй байнга харьцсанаас болсон уу, ямартай ч Чэнь Гө маш их даарч жихүүдэс нь хүрч байлаа. Тэр орондоо орж хэвтсэн ч нойр нь огт хүрсэнгүй. Утсаа эргүүлж үзтэл арав гаруй хариулаагүй дуудлага, уншаагүй зурвас байгааг хараад цочлоо.

Тэдгээрийн ихэнх нь Хө Саниас ирсэн байсан бөгөөд голчлон түүнийг аюулгүй байгаа эсэх, цагдаа дуудах шаардлагатай юу зэргийг асуусан байв. Шуудангийн хайрцгийн хамгийн доор Гао эмчээс ирсэн зурвас байлаа. Сайхан сэтгэлт эмч Фань Юйгийн шинж тэмдэг нь түүний эргэн тойрны хүмүүстэй холбоотой байж магадгүй гээд, хүүгийн амьдрал дахь тиймэрхүү хүмүүст илүү анхаарал хандуулахыг Чэнь Гөд зөвлөсөн байв.

Зурвас шөнийн 12:30 цагт илгээгдсэн байлаа. Тэр үед Фань Юйгийн авга эгч Чэнь Гөд бүх үнэнээ хэлж байсан цаг. Хө Сань болон Гао эмч хоёрт хариу бичсэнийхээ дараа Чэнь Гө видео хуваалцдаг аппликэйшнээ нээж, хувийн хуудас руугаа орлоо.

[Дөрвөн цаг үргэлжилсэн шууд дамжуулалт, гэхдээ чатаар ганц ч үг солилцоогүй, бүр дундуур нь хэд хэдэн удаа ямар ч сануулгагүйгээр дамжуулалтаа хаачихсан шүү дээ. Миний нэр хүндэд хэр их хохирол учирсныг төсөөлөхөд ч бэрх байна.]

Фань Юйгийн авга эгчийг саатуулсныхаа дараа Чэнь Гө хүүгийн хувийн нууц болон ирээдүйг бодолцон шууд дамжуулалтаа хаасан билээ. Түүнд үзэгчиддээ нөхцөл байдлыг тайлбарлах цаг байсангүй; түүний анхаарал шал өөр зүйлд төвлөрсөн байсан юм.

Нүүр хуудасруугаа орсны дараа Чэнь Гө дэлгэц рүү хяламхийхэд шууд дамжуулалтынх нь дагагчид 39,000 болж өссөнийг хараад мэл гайхлаа.

[Шууд дамжуулалт эхлэхээс өмнө би 10,000 хүрэхгүй дагагчтай байснаа маш сайн санаж байна. Өнгөрсөн шөнө шууд дамжуулалтын үеэр юу болсон юм бэ?]

Тэр нэмэлт даалгаварт хэт их анхаарлаа хандуулснаас болоод шууд дамжуулалтыг өөрөөр нь орхисон байсан. Тэр энэ талаар нэг их зүйл бодоогүй тул ийм гэнэтийн шагналыг хараад үнэхээр их гайхширч байлаа.

Чэнь Гөг яг юу болсныг ойлгохыг хичээж байтал Хө Санийн дуудлага ирэв. Утсаа авах үед цаана нь хүмүүсийн шуугилдах чимээ сонсогдож байлаа. "Дарга аа! Би таныг амьд байгаа гэдгийг мэдэж байсан юм аа!"

Чэнь Гө, Хө Санийн баяр хөөрийг үл тоон шууд л асуулаа. "Өнгөрсөн шөнө миний шууд дамжуулалтын үеэр юу болсон юм бэ? Миний дагагч болон үзэлтийн тоо яагаад ийм хурдацтай өсчихөв?"

"Таныг өнгөрсөн шөнө шууд дамжуулалтаа эхлүүлснээс хойш үзэлт нэмэгдэж байсан ч, таныг Үзэгний сүнс тоглож эхлэх хүртэл маш удаан байсан юм. Нэг хүн аппликэйшний форум дээр Чинь Гуаныг хулгайч болохыг илчлэн нийтлэл оруулж, бүр таны эхний шууд дамжуулалтыг хүртэл хавсаргасан байсан." Хө Санийн дуу уурандаа өндөрсөж ирэв. "Чинь Гуаны шууд дамжуулалт таны дүгнэлт, орчин, тэр ч байтугай жүжигчний тоглосон алуурчныг хүртэл тэр чигт нь хуулбарласан байсан!

Нотлох баримт нь нүдэн дээр нь илхэн байхад Чинь Гуаны шүтэн бишрэгчид үүнийг хүлээн зөвшөөрөхөөс татгалзсан. Тэд форум дээр таны нэрийг гутааж, харин ч эсрэгээрээ таныг тэдний шүтээнийг хуулбарлаж байна гэж гүтгэж эхэлсэн."

"Тэд магадгүй зүгээр л хөлсний арми байх, тийм ч ер бусын зүйл биш байна. Тэгээд дараа нь юу болсон юм бэ?"

"Олон үзэгчид Чинь Гуаны шууд дамжуулалт руу орж тайлбар нэхсэн боловч Чинь Гуан тэднийг хараагүй мэт дүр эсгэсэн. Түүгээр ч зогсохгүй таны нэрийг дурдсан ямар ч үзэгчийг блоклож байсан. Гэхдээ түүний өндөр нэр хүнд болон платформоос хийж буй идэвхтэй сурталчилгааны ачаар шууд дамжуулалт эхлэх үед 800,000 үзэгчтэй байсан бөгөөд чат маш хурдан гүйж байсан тул түүний багийнхан таны нэрийг дурдсан зарим сэтгэгдлүүдийг алгассан байх. Ингээд л сониуч зан нь хөдөлсөн түүний нэлээд хэдэн үзэгч таны шууд дамжуулалт руу ороод ирсэн хэрэг." Хө Сань улам их догдлов.

"Таны шууд дамжуулалтын хамгийн өндөр үзэлт нь 50,000 байсан ч, энэ нь зүгээр л ямар нэг юм сонирхсон хүмүүс, Чинь Гуаны шүтэн бишрэгчид, бас таны өөрийн чинь шүтэн бишрэгчдийн холимог байсан болохоор жинхэнэ бужигнаан болсон!

Таны шууд дамжуулалтад модератор байхгүй болохоор дамжуулалт зогссоны дараа ч гэсэн чат дахиад хагас цаг гаруй үргэлжилсэн шүү. Дашрамд хэлэхэд, энэ бужигнааны ачаар таны шууд дамжуулалт шөнө дундын 'Трэнд' жагсаалтад орсон байна лээ. Баяр хүргэе, шинэхэн хөтлөгчдийн хувьд ийм эрт тэр жагсаалтад орно гэдэг ховор шүү."

Чэнь Гө өнгөрсөн шөнийн өөрийнх нь шууд дамжуулалт дахь эмх замбараагүй байдлыг төсөөлж чадаж байсан ч, дагагчдынх нь тоо асар их өссөн тул энэ нь нэг талаараа азтай хэрэг байлаа. Эцсийн эцэст түүнд шинэлэг контент дутагдаагүй, харин олон нийтэд танигдах л хэрэгтэй байсан юм.

"Тайвшир даа. Энэ чинь ердөө л миний хоёр дахь шууд дамжуулалт шүү дээ." Чэнь Гө , Хө Саньтай дахин хэдэн минут ярилцсаны дараа утсаа тасаллаа.

Тэр аппликэйшний бусад хэрэглэгчдээс ирсэн хувийн зурвасуудыг харлаа. Ихэнх нь хараал байсан ч, Чинь Гуаны дээрэлхүү занг тэвчиж чадалгүй Чэнь Гөд урам өгөхөөр шийдсэн хүмүүс ч цөөнгүй байв.

Шуудангийн хайрцгийнх нь хамгийн доод талд Чэнь Гө нэгэн танил хэрэглэгчийн нэрийг танив. Профайл зураг нь түүнийг өмнө нь залхааж байсан өнөөх студийнхтэй төстэй байлаа. Зурваст түүнийг бохир арга хэрэглэхгүй байхыг анхааруулаад, эс бөгөөс Чэнь Гөг энэ платформ дээр оршин тогтнох аргагүй болгоно гэж бичсэн байв.

Хэрэв өөр хөтлөгч үүнийг харсан бол айж магадгүй байсан ч Чэнь Гө бол өөр байв. Шууд дамжуулалт хийх болон богино бичлэг оруулах нь түүний хувьд зөвхөн Аймшгийн байшингаа сурталчлах л арга байсан шүү дээ. Энэ хаягийг блоклосныхоо дараа Чэнь Гө аппликэйшнээс гарч хар гар утсаа авав.

"Мү Ян ахлах сургууль (Айлгах түвшин 2 од): Үзүүлбэрийн тохиргоо дууссан тул та одоо газар доорх давхар руу орж үзэх боломжтой.

"Анхааруулга: Мү Ян ахлах сургууль нь дөрвөн одтой үзүүлбэр болох 'Хойд насны сургууль'-ийн нэг хэсэгт тооцогддог бөгөөд талбайн хэмжээ нь ердийн үзүүлбэрээс хоёр дахин том байдаг. Үүнийг ашиглаж эхлэхээсээ өмнө дотоод зохион байгуулалттай нь сайтар танилцана уу."

Утсан дээрх зурвасыг хараад Чэнь Гө орон дээрээ өндийж суув.

[Хэмжээ нь ердийн үзүүлбэрээс хоёр дахин том гэнэ ээ? Байз... Мү Ян ахлах сургуулийг тэр чигт нь энд нүүлгээд ирчихсэн юм биш биз дээ?]

Тэр гутлаа өмсөөд нэгдүгээр давхар руу гүйж, модон хавтангуудыг хуулаад доош шагайж харав.

Хаягдсан газар доорх зогсоол цоо шинэ өнгө төрхтэй болсон байлаа. Шатан дээр түймэрт өртсөн хөө тортог харагдах ба харанхуйлсан хонгилд дуусгаагүй шалгалтын цааснууд хөглөрч, ангиудын хаалга харанхуйд хяхтнан дуугарч, хөмөрсөн ширээнүүдийн дунд сүүдэр сүүтгэнэх нь үзэгдэнэ.