"Хүүхэд аливааг ямар нэгэн далд утгаар дүрслэхээс илүүтэй, харсан зүйлээ шууд л буулгадаг шүү дээ. Тэгвэл энэ зураг түүний нүдээрээ харсан аймшигт хэргийн газрын бодит дүр зураг байж болох юм биш биз?"

Байшин тас хар өнгөтэй байгаа нь хэрэг шөнө гарсан гэдгийг илтгэнэ. Харин доторх хүмүүс нь улаан өнгөтэй байгаа нь түүний эцэг эх, буюу хохирогчдыг төлөөлж байж болох юм. Энэ бол зургийг тайлах хамгийн шууд бөгөөд энгийн арга байлаа.

Чэнь Гө энэ зургийг олон өнцгөөс судалж үзэхийг хичээв. Хүү маш яарсан мэт хурдан зурдаг бөгөөд зурсан бүх хүний дүрсүүд нь яг л ижилхэн, ямар ч онцлог шинжгүй байлаа. Чэнь Гө бүр тэдний хүйсийг ч ялгаж таньж чадсангүй.

[Байз, улаанаар зурсан хүмүүс түүний эцэг эхийг илэрхийлээгүй байж магадгүй. Зураг дээр тэд дэндүү олуулаа байна шүү дээ.]

Чэнь Гө улаан хүмүүсийн тоог тоолохыг оролдсон боловч тоолох бүрд өөр тоо гарч байв. Зураг хэтэрхий замбараагүй аж. Хүү үүгээрээ яг юуг илэрхийлэхийг зорьж байгаа юм бол оо?

Өрөөндөө Фань Юй нэг л зүйлээ дахин дахин зурсаар байв. Тэдгээр нь бүгд л тас хар байшин болон олон жижигхэн улаан хүмүүсийн тухай байлаа. Гэсэн хэдий ч тэр зурж дуусах бүрдээ өөрийн бүтээлдээ сэтгэл дундуур байгаа мэт цаасаа базаж шидээд байсан юм.

Ямартай ч энэ зураг маш чухал сэжүүр байлаа. Чэнь Гө тэр зургийг удаан судалсан ч ямар нэг шинэ зүйл олж мэдсэнгүй. Тэр өнөөх зургийг халааслаад, ард нь хоцорсон барилга руу эргэж харав. Түүний онгорхой орхисон хаалга одоо хаагдсан байлаа.

Авга эгч, хүү хоёр хоёулаа л өөрсдийн гэсэн асуудалтай юм байна. Хамгийн гол асуулт нь... хэнийх нь асуудал илүү ноцтой вэ? Чэнь Гө төөрдөг байшин мэт ээдрээтэй нарийн гудамжнуудаас мултарч гараад автобусанд суулаа. Тэр удахгүй болох даалгавартаа санаа зовж байв. Хэрэв өнөөх эмэгтэй түүнд худлаа хэлээгүй л бол тэр шөнө түүний нүүр тулах Туршилтын даалгавар төсөөлшгүй их хэцүү байх болно.

Аюулгүй байдлаа бодолцон Чэнь Гө, Мү Ян ахлах сургуулийн талаар интернэтээс илүү их мэдээлэл хайхаар гар утсаа гаргалаа. Тэр нэлээд их хэмжээний мэдээлэл олсон бөгөөд ихэнх нь сургуулиудын янз бүрийн форумаас эх сурвалжтай байв.

Цаг хугацааны хувьд авч үзвэл нийтлэл бичсэн хүмүүс өмнө нь Мү Ян ахлах сургуулийн сурагчид байсан бололтой. Сургууль хаагдсаны дараа тэд өөр сургууль руу шилжихээс өөр аргагүй болсон бөгөөд ингэхдээ Мү Ян ахлах сургуулийн домог яриануудыг өөрсөдтэйгөө хамт авч явжээ.

Гүйлгэн харах зуур тэдгээрээс хэд хэд нь Чэнь Гөгийн анхаарлыг гойд татав. Жил орчмын өмнө таван сурагч бие биетэйгээ мөрийцөн Мү Ян ахлах сургууль руу нууцаар нэвтэрчээ. Тэд адал явдлаа утасныхаа камерт буулгахын оронд хэдэн минут тутамд форум дээр шинэ нийтлэл оруулж байсан байв.

Эх нийтлэл нь аль хэдийн устгагдсан байсан тул Чэнь Гө зөвхөн хүмүүсийн хуваалцсан бичвэрийг л уншиж байлаа. Цуу яриагаар бол тэд өнөөх битүүмжлэгдсэн цоожтой ангид орж, Үзгээр сүнс дуудах тоглоом тоглож эхэлжээ.

(орч: тийм үгүй гэсэн хариултын дунд үзгэн бал маш амархан хөдлөхөөр байрлуулж тавиад энд сүнс байвал тийм гэсэн хариултыг сонгоно уу гэж тоглодог)

Тэр тав ширээ тойрч суугаад Үзэгний сүнсийг дуудсан боловч тоглоом дуусах үед ангид долоон хүн зогсож байсан гэдэг. Нэмэгдсэн хоёр хүн хаанаас гарч ирснийг хэн ч мэдээгүй бөгөөд өнөөх таван хүүхэд ухаангүй орилж хашхичсаар сургуулиас зугтан гарчээ.

Аз болоход тэд тавуулаа амьд үлдсэн ч хоёр нь энэ явдлаас болж сэтгэцийн гүн хямралд орсон бололтой байв. Нэг нь ямар ч шалтгаангүйгээр маш догшин түрэмгий болсон бол, нөгөөх нь өдрийн гэрлээс үхтлээ айдаг болжээ. Эцэст нь тэр хоёр Жюжян хотоос нүүсэн байна.

Чэнь Гө нийтлэлийн доорх зарим сэтгэгдлийг уншлаа. Нэгэн хэрэглэгч тоглоомын үеэр хоёр хүн нэмэгдэж гарч ирсэн бөгөөд эцэст нь хоёр сурагч сэтгэцийн асуудалд орсон гэдгийг онцолсон байв. Тэрээр амьд гарсан тэр хоёр сурагч аль хэдийн өөр хүн болчихсон, харин жинхэнэ хоёр сурагч нь тэр ангидаа гацаж үлдсэн байх гэж таамаглажээ.

Энэ таамаглал олон хүнд таалагдсан ч үүнийг эсэргүүцэх хүмүүс бас байлаа. Зарим нь тавууланд нь сүнс шүглэсэн боловч өнөөх хоёрынх нь биеийн эсэргүүцэл сул байсан тул тийм хачирхалтай авир гаргасан гэж тайлбарлаж байв.

Мү Ян ахлах сургуулийн талаар цаашид ямар нэгэн хэлэлцүүлэг өрнүүлэхийг хориглосон нэгэн багшийн анхааруулга хамгийн дээр бичигдсэн байлаа. Чэнь Гө сэдвийг гүйлгэж байгаад нуугдмал нэг нийтлэл байгааг анзаарав.

Чэнь Гө түүнийг нээгээд агуулгыг нь уншин ихэд гайхширлаа. Нийтлэл бичигчийн аавын компани нь Мү Ян ахлах сургуулийн байрлаж байсан газрыг хямд үнээр худалдаж авахаар төлөвлөж байжээ. Эхэндээ бүх зүйл хэвийн байсан боловч гэрээ бараг бэлэн болох дөхөх үед аав нь шөнө бүр нэг л зүүдээ зүүдлэх болсон гэнэ. Мү Ян ахлах сургуулийн дүрэмт хувцас өмссөн маш олон сурагч тэдний гэрт ирж хичээл хийдэг байсан гэжээ.

Хамгийн хачирхалтай нь, тэднийг өглөө сэрэхэд нь гэрт нь хэн нэгэн хүчээр орж ирсэн ул мөр үлдсэн байдаг байв. Аав нь маш их айснаасаа болж өвдөөд эцэст нь ажлаасаа гарсан аж. Үүгээр энэ түүх төгссөн байв.

Бүх нийтлэлийг уншиж дууссаныхаа дараа Чэнь Гө, Мү Ян ахлах сургуулийг Баруун Жюжян хотын Хувийн академитай харьцуулахгүй байж чадсангүй. Хоёулаа л сургууль учраас тэр нэгэн хачирхалтай дүгнэлтэд хүрлээ.

Интернэтэд Мү Ян ахлах сургуулийн талаар маш олон ер бусын цуу яриа байсан боловч тэдгээр түүхүүдийн аль нь ч хүн нас барсан эсвэл бэртэж гэмтсэн тухай дурдаагүй байв. Үүнтэй харьцуулахад, цахим орчинд Баруун Жюжяны Хувийн академийн талаар тийм ч их мэдээлэл байхгүй хэдий ч цагдаагийн газрын тэмдэглэлд тус сургуульд нэг бус хүн нас барсан хэрэг бүртгэгдсэн байдаг шүү дээ.

[Сайтар бодоод үзвэл, Баруун Жюжяны Хувийн академи хамаагүй илүү аймшигтай сонсогдож байна.]

Энэ бол Чэнь Гө өөрийгөө тайвшруулж чадах цорын ганц шалтгаан байлаа.

Автобусанд суугаад цонхоор ширтэн явж байтал Чэнь Гөгийн утас гэнэт чичирхийлэн дуугарав. Тэр доош харвал Хө Сань залгаж байлаа.

[Энэ хүүхэд шинэ үзүүлбэр нээгдэж магадгүйг гадарлачихаад урьдчилж захиалга өгөхөөр залгаж байгаа юм байх даа?]

Чэнь Гө утсаа аваад чихэндээ наав. "Байна уу?"

"Дарга аа, хурдан видео аппликейшн рүүгээ ороорой! Хэн нэгэн таны хоолыг булаах нь байна!"

"Юу? Хэн нэгэн шинэ Аймшгийн байшин нээх гэж байгаа юм уу?" Чэнь Гө аппликейшн руу ороход нүүр хуудас руу шилжихээс нь өмнө утсан дээр нь нэгэн сурталчилгаа гарч ирэв—'Хөтлөгч Чинь Гуан та бүхнийг жинхэнэ аймшгийн байшингаар аялуулах болно!'

Чэнь Гө дэлгэцэн дээр дарахад дэлгэрэнгүй мэдээлэл гарч ирлээ.

Чинь Гуан бол тус платформ дээрх алдартай шууд дамжуулалтын стример байв. Тэрээр 600,000 гаруй дагагчтай бөгөөд түүний богино бичлэгүүдийн ихэнх нь хошин сэдэвтэй байлаа. Түүний хувийн танилцуулгад ХХ студид харьяалагддаг гэж бичсэн байсан ба энэ нь Чэнь Гөг , Пин Ан апартментэд байх үед түүнтэй дотносохыг оролдож байсан өнөөх студи мөн байв.

Чинь Гуаны хамгийн сүүлийн үеийн ээлжит адал явдал нь шууд дамжуулалтын цоо шинэ чиглэл рүү орж, бодитоор байдаг сүнстэй байшинд нууцлаг стрим хийх тухай уг сурталчилгаанд тайлбарласан байлаа.

Чэнь Гө эхлээд энэ талаар нэг их зүйл бодоогүй ч Чинь Гуаны очих эхний нууцлаг газрыг хараад хэлэх үггүй болов. Чинь Гуаны баг Баруун Жюжян хотын Пин Ан апартментэд шууд дамжуулалт хийхээр зэхэж байжээ.

"Дарга аа, та харсан уу? Таныг анхны шууд дамжуулалтаараа арван мянга гаруй үзэлт авсныг тэр хүн мэдчихээд, таны санааг шууд хуулбарлахыг оролдож байна шүү дээ!" гэж Хө Сань унтууцан бувтналаа.

"Санаа зоволтгүй дээ, зарим зүйлийг хуулбарлах ямар ч боломжгүй байдаг юм."

Чэнь Гө , Хө Санийг ямар нэгэн ноцтой мэдээ дуулгах нь гэж бодож байсан тул бага зэрэг урам хугарав. Тэрээр Чинь Гуанд тийм ч их санаа зовохгүй байсан бөгөөд Чинь Гуан ч бас өөрийг нь өрсөлдөгч гэж харахгүй гэдгийг мэдэж байлаа.

Утасны цаанаас Хө Сань сандрангуй өнгөөр, "Тэр маш олон дагагчтай шүү дээ. Тэр өөрийгөө ер бусын үзэгдлийн стример гэдгээрээ танил болсны дараа, харин ч эсрэгээрээ тэд таныг хуулбарласан гэж хүмүүс ярих вий гэхээс л би айж байна!" гэлээ.

"Зүгээр ээ, бүх зүйл сайхан болно. Дашрамд хэлэхэд, чи хүүхдийн сэтгэл зүйн талаар хэр мэдэх вэ? Надад чамаас асуух хэдэн зүйл байна."

"Дарга аа, цаг орой болж байхад танд ийм зүйл асуугаад сууж байх зав бас байна аа? Тэгээд ч би шүүх эмнэлгийн эмч шүү дээ. Сэтгэл зүйтэй холбоотой асуултаа сэтгэл судлаач эсвэл сэтгэцийн эмчээс асуусан нь дээр байх аа!"