"Хүүгийн ирээдүйн эдгэрэлт болон өөрийнхөө аюулгүй байдлын төлөө болгоомжтой байгаарай."

"Ойлголоо."

Утсаа тасалсныхаа дараа Чэнь Гө угаалгын өрөөний ханыг наллаа. Түүний толгойд түмэн бодлууд ээдрэлдэн бужигнана. Хэрвээ алуурчин нь Фань Юй биш юм бол түүний авга эгч нь байж таарна. Тэд гол сэжигтнүүд мөн боловч бас хохирогчдын хамгийн ойр дотнын хүмүүс шүү дээ.

[Ямартай ч Фань Юйгийн авга эгч надаас ямар нэг зүйл нууж байгаа нь гарцаагүй. Хэдэн жилийн өмнөх тэр бороотой шөнө өөр ямар нэгэн зүйл тохиолдсон байх ёстой.]

Хамгийн ойр дотнын хүн нь тэдний алуурчин болж хувирсан гэдэг нь Чэнь Гөгийн толгойг хамгийн их гашилгасан оньсого байлаа.

[Гэмт хэрэг гарсан газар нь Мү Ян ахлах сургууль байсан, магадгүй би эндээс ямар нэгэн сэжүүр олж чадах байх.]

Чэнь Гө шууд дамжуулалтаа дахин нээв. Чат гацсан хэвээр байсан ч ядаж л дүрс нь хамаагүй тодорхой болсон байлаа. Үзэгчдээсээ хурдхан уучлалт гуйсныхаа дараа Чэнь Гө гартаа алхаа барьсаар хоёрдугаар давхрын угаалгын өрөөнөөс гарлаа. Тэр хаалган дээр зогсоод гар чийдэнгээ шал руу тусгаж үзэв—тэнд хөлийн мөр гэхээр зүйл огт байсангүй.

[Түрүүн угаалгын өрөөний хаалганы ард нуугдаж байхад хөлийн чимээ үнэхээр сонсогдсон шүү дээ. Тэд угаалгын өрөөний үүдэнд ирээд зогссон, гэхдээ ямар ч хөлийн мөр байхгүй байгаа нь тэр хөлийн чимээний эзэд амьд хүмүүс биш гэдгийг харуулж байна.]

Чэнь Гө шат руу доош хяламхийв. Хамгийн сүүлд сонсоход хөлийн чимээ доошоо буусан.

Тэр хөлийн чимээ даалгаварт дурдсан улаан сүүдрийнх мөн эсэх нь Чэнь Гө итгэлтэй биш байсан ч, аюулгүй байдлаа бодолцон одоохондоо түүнээс зайлсхийхээр шийдлээ. Гар чийдэнгээ барьсаар Чэнь Гө гуравдугаар давхар руу өгсөв. Гэвч түүнийг хоёр болон гуравдугаар давхрын хоорондох шатны талбай дээр гараад ирэх үед, өнөөх хөлийн чимээ чихэнд нь дахин цуурайтах нь тэр.

Нэгдүгээр давхраас гарч байх шиг санагдлаа. Хоёр 'хүн' зэрэгцэн алхсаар дээшээ өгсөж байв.

[Тэд намайг олчихсон юм байх даа?]

Чэнь Гө гар чийдэнгээ тэр даруй унтрааж, хананд нуруугаа наагаад, шатны ам руу нүд салгалгүй ширтлээ.

Хөлийн чимээ зогссонгүй, тэд хоёрдугаар давхарт гарч ирлээ.

[Тэд хоёрдугаар давхрын угаалгын өрөө рүү орж байх шиг байна уу?]

Энэ бодол Чэнь Гөгийн толгойд зурсхийхтэй зэрэгцэн угаалгын өрөөний бүхээгийн хаалганууд онгойх чимээ чихнийх нь хажууханд сонсогдох шиг болов.

Бүхээгийн хаалганууд ар араасаа нийт зургаан удаа онгойв. Тэд угаалгын өрөөний бүхээгүүдийг нэгд нэгэнгүй шалгаж байгаа бололтой. Чэнь Гө шатны хашлага руу улам наалдаж, толгойгоо цухуйлган хоёрдугаар давхарт юу болоод байгааг илүү сайн харахыг хичээлээ.

Бүхээгийн хаалганууд хөдлөхөө болиход хөлийн чимээ ч мөн тасарлаа. Түрүүхэн Чэнь Гөгийн сонссон бүхэн зүгээр л түүний төсөөлөл байсан мэт. Тэрээр шатан дээр таван минут хэртэй хүлээсэн боловч хоёрдугаар давхрын угаалгын өрөөнөөс дахиж ямар ч хачирхалтай чимээ гарсангүй.

[Хөлийн чимээ тасарсан нь тэнүүчлэгч сүнснүүд угаалгын өрөөн дотор байгаа гэсэн үг. Тэд бүхээгүүдийн аль нэгэнд нь нуугдаад, намайг отож байх магадлалтай.]

Чэнь Гө хэдийгээр хатуу чанга зүрхтэй ч, айдасгүй гэсэн үг биш байлаа. Угаалгын өрөөний бүхээгээс гэнэт гарч ирэх ямар нэг зүйл түүнийг үхтэл нь айлгах байв.

[Сүнснүүд одоо хоёрдугаар давхрын угаалгын өрөөнд нуугдаж байгаа юм чинь гуравдугаар давхрыг шалгах төгс боломж байна.]

Чэнь Гө гар чийдэнгээ асаасангүй. Хар дарсан зүүдний даалгаврыг биелүүлээд авсан шагнал болох Инь Ян харааны ачаар түүний хараа хар гар утасны тайлбарласан шиг тийм айхтар ид шидийн биш ч гэлээ, шөнийн харанхуйд энгийн хүнээс хамаагүй илүү сайн харах боломжийг олгож байлаа.

Харанхуй шөнөд хааяахан тэнгэрт аянга цахилах үед эргэн тойрон нь Чэнь Гөд зурвасхан харагдаж байв. Энэ нь нуруугаар хүйт даалгам уур амьсгалыг бүрдүүлнэ. Аянга гялсхийх тэрхэн мөчид харахыг хүсээгүй зүйлээ харчих вий гэхээс тэр айж байлаа.

Чэнь Гө гуравдугаар давхрын угаалгын өрөөний үүдэнд зогсохдоо баруун зүүн тийш хэд хэдэн удаа харлаа. Нүдэнд тусах юу ч байсангүй тул Чэнь Гө угаалгын өрөө рүү алхан орлоо.

Гуравдугаар давхрын угаалгын өрөө нэг болон хоёрдугаар давхрынхаас ч илүү хачирхалтай байв. Цонхыг нь банзаар хадаж битүүлсэн бөгөөд хананд нь ямар ч толбо байсангүй. Энэ газар сургууль хаагдахаас ч өмнө аль хэдийн орхигдсон байсан мэт санагдана.

Зургаан бүхээг бүгд хаалттай байсан нь Чэнь Гөд бүхээг нэг бүрд аймшигтай нууц отож байгаа мэт хачин сэтгэгдэл төрүүлэв.

[Нэгдүгээр давхрын угаалгын өрөөний тав, зургаа дахь бүхээгүүд цэвэрлэгээний хэрэгслийн агуулах байсан учраас л хаалттай байсан. Энэ удаад ч бас тийм байгаа юм болов уу?]

Чэнь Гө эхний бүхээг рүү очиж хаалга руу нь чихээ наалаа. Дотроос нь ямар ч чимээ гарсангүй, түүний төсөөлж байсан шиг хүүхэд уйлах, эсвэл охидын инээлдэх чимээ огтхон ч байсангүй. Тэгээд тэр улам ч зоригтой үйлдэл хийлээ. Тэр шалан дээр өвдөглөж суугаад хаалганы доогуурх завсраар дотогш шагайж харав.

[Хов хоосон байна?]

Тэнд шүүр, шалны мод гэх мэт хөглөрөх зүйл байсангүй, бас ямар нэгэн хөл ч харагдсангүй; ердөө л энгийн нэг бүхээг байлаа.

Чэнь Гө хаалгыг түлхэж үзтэл төвөггүйхэн онгойв. Бүхээг гайхалтай цэвэрхэн байлаа. Бүх гадаргууг бүрхсэн тоос л байгаагүй бол тэр энэ газрыг өдөр бүр цэвэрлэдэг юм байна гэж итгэхээр байв.

[Хичээлийн байр тэр чигтээ галд шатсан мэт харагдаж байхад, энэ угаалгын өрөөнд галын ямар ч ул мөр алга—энэ яг л нэгдүгээр давхрын тэр ангитай ижилхэн байна шүү дээ.]

Энэхүү ижил төстэй байдал Чэнь Гөгийн анхаарлыг татав. Энэ нь үндсэндээ түүний даалгаврын байршил мөн гэдгийг баталгаажуулж байлаа.

Тэр бусад бүхээгүүдийг түлхэж онгойлгосоор тав дахь бүхээгийн өмнө ирж зогсов.

[Надад маш муу совин төрөөд байна. Энэ хаалганы цаана намайг ямар нэгэн аймшигтай зүйл хүлээж байгаа юм биш биз?]

Чэнь Гө цамцныхаа халаасанд байх хүүхэлдэйг хөнгөн товшоод, гартаа барьсан алхаараа хаалгыг түлхэн онгойлголоо.

Хаалга савагдан онгойх үед Чэнь Гө бүхээг дотор юу байгааг хараад өөрийн эрхгүй нэг алхам ухарлаа. Тав дахь бүхээгийн доторх бүх гадаргууг нүдний зургуудаар дүүрэн бүрхсэн байх бөгөөд хэмжээ нь яг л жинхэнэ хүний нүдтэй ижилхэн байв.

Хаалгыг онгойлгохын өмнө Чэнь Гө хаалганы цаана юу гарч ирж болохыг төсөөлөхийг хичээсэн—магадгүй цонхигор царайтай охин, эсвэл цусанд будагдсан аймшигт мангас, аль эсвэл галзуу хүн байж болох юм—гэхдээ тэр үүнийг лав огтхон ч төсөөлөөгүй байв.

[Яагаад хана болон хаалган дээр ийм олон нүд зурсан байдаг билээ?]

Энэхүү сэртхиймээр олдвор Чэнь Гөгийн нуруугаар хүйт даалгав. Түүнд тоолж баршгүй олон нүд өөр рүү нь ширтэж байх шиг санагдана. Бүхээгийн гадаа зогсох түүний хөл чичирч байлаа; дотор нь ороход хэчнээн эвгүй байхыг төсөөлөхөд ч бэрх байв.

[Ямар галзуу солиотой хүн нь үүнийг, тэгээд яах гэж зурдаг байна аа?!]

Тэдгээр хос нүднүүд бүхээг доторх хүмүүсийг нууцаар ширтэж байгаа мэт санагдана. Хамаг бие нь арзайсан Чэнь Гө хаалгыг бушуухан буцааж хаалаа. Хэдийгээр тэд зүгээр л зураг байсан ч ийм олон хос нүдэнд ширтүүлнэ гэдэг үнэхээр дотор муухайрмаар мэдрэмж төрүүлж байв.

[Даалгаврын байршлаа олчихлоо, гэхдээ би энэ даалгаврыг яаж биелүүлэх юм бэ? Бүх нүдэнд ширтүүлээд бүхээг дотор нуугдаж, улаан сүүдэр гарч ирэхийг хүлээх хэрэг үү? Энэ чинь арай л хэтэрч байгаа юм биш үү?]

Чэнь Гө бүхээг рүү нэлээн удаан ширтэж зогссоны эцэст зургаа дахь бүхээг рүү шилжлээ. Тэр зургаа дахь бүхээгээс ч бас өнөөх нүднүүдийн зургийг олж харав.

Гэвч тав дахь бүхээгээс ялгаатай нь, зургаа дахь бүхээгийн нүднүүд зөвхөн тав дахь бүхээгтэй хуваалцдаг хана болон тусгаарлагч хаалт дээр л зурагдсан байлаа; харин бусад хана нь цэв цэвэрхэн байв.