[Дотогшоо орж ойроос шалгадаг юм билүү?]

Чэнь Гөгийн дотор давчдаж байлаа. Гарт байгаа алхаараа хаалгыг нь эвдэж ороод, тэр цаасан дээр юу бичсэнийг унших хүсэл нь түүнийг эзэмдэнэ.

Сургуулийн форумын мэдээллээр бол нэгэн удаа таван сурагч бие биетэйгээ мөрийцөн Мү Ян ахлах сургуульд нэвтэрч, хамгийн сүүлд байрлах ангид 'Үзэгний сүнс' дуудах тоглоом тоглосон гэдэг. Энэ үзэг цаасыг тэд үлдээгээд явсан юм болов уу? Чэнь Гө энэ талаар бодож үзээд үүнийг боломжгүй гэдгийг ойлгов. Нийтлэл дэх тайлбараас үзвэл, ангид гэнэт хоёр хүн илүү гарч ирэхэд өнөөх таван сурагч үхтлээ айж, амь тэмцэн зугтсан байдаг. Зугтах гэж сандрахдаа тэд ямар нэгэн тавилга унагаах нь гарцаагүй. Гэтэл одоо өрөөнд байгаа бүх ширээ сандал маш эмх цэгцтэй байрласан байна шүү дээ.

Мэдээж хэрэг, тэднийг явсны дараа тавилгыг буцааж байранд нь байрлуулсан байх магадлалтайг, эсвэл тавууланд нь сүнс шүглэсэн байсан гэх таамгийг үгүйсгэх аргагүй юм.

Чэнь Гө алхаа буулгаад энэ ангийг хамгийн сүүлд үлдээхээр шийдэв. Хичээлийн байрнаас гарсныхаа дараа тэрээр дотуур байр руу чиглэлээ.

Энэхүү хуучирч муудсан намхан барилга дотор хуруу дарам цөөхөн өрөө байх бөгөөд тэр нэлээн удаан алхсаны эцэст өнгө нь гандсан төмөр хаяг олж харав. Дээрх үсгүүд нь баларч муудсан байсан ч Чэнь Гө үүнийг 'Хоёрдугаар давхарт эмэгтэйчүүдийн өрөө. Эрэгтэй хүн орохыг хориглоно' гэж бичсэн байсан байх гэж таамаглав.

[Энэ сургууль үнэхээр ядмаг юм даа.]

Борооны цуваа тайлсныхаа дараа Чэнь Гө захаар нь нэвчсэн борооны усыг арчаад цааш явах гэтэл утас нь дуугарав. Тэр дуудлага ирж буй нэрийг хараад шууд л утсаа авлаа. "Хө Сань?"

"Дарга аа, би дээд курсийнхээ эгчид таны утасны дугаарыг өгчихсөн. Тэр аавыгаа гэртээ ирэхээр нь тантай холбогдуулъя гэж байна лээ."

"Баярлалаа, өөр ямар нэг зүйл болоо юу?"

"Бас өнөөх Чинь Гуан чинь шууд дамжуулалтаа дөнгөж сая эхлүүллээ. Та үнэхээр орж харахгүй юм уу? Тэр хажуу өрөөний алуурчны дүрд тоглох жүжигчин хөлсөлсөн байна лээ. Бүр түүний нээлт, хийж байгаа дүгнэлтүүд нь хүртэл таныхыг тэр чигт нь хуулбарласан байсан. Би бүр хаанаас нь эхэлж гомдоллохоо ч мэдэхгүй байна."

"Түүнийг зүгээр орхи доо. Харин намайг удахгүй шууд дамжуулалтаа эхлэхээр орж ирж дэмжээрэй."

"Та шууд дамжуулалт хийх гэж байгаа юм уу?!" Хө Санийн дуу хэд хэдэн өнгөөр өндөрсөв. Ийм үнэнч үзэгчтэй байгаадаа Чэнь Гө дотроо баярлаж байлаа. "Миний өмнөх дамжуулалтаас хойш нэлээн удаж байгаа болохоор энэ удаад би нэг сэтгэл хөдлөм зүйл төлөвлөсөн юм."

Утасны цаана нам гүм боллоо. Хэдэн секундийн дараа Чэнь Гөд шаахайн чимээ дуугарах нь сонсогдов. Хө Сань унтлагын өрөөгөөрөө гүйж өрөөнийхөө бүх найзуудыг сэгсэрч сэрээж байгаа бололтой. "Шууд дамжуулалт үзэх цаг боллоо! Өнөө шөнө бас дахиад л үхэлтэй нүүр тулах нь!"

Чэнь Гө, Хө Санийн ийнхүү үнэгүй сурталчилгаа хийж өгч байгаад талархаж байсан хэдий ч түүний үгс Чэнь Гөд жаахан хачирхалтай санагдаж байв.

Утсаа тасалсныхаа дараа Чэнь Гө видео нийтлэдэг аппликейшнээ нээв. Чинь Гуаны ер бусын шууд дамжуулалт аппын нүүр хуудсанд хүчтэй сурталчлагдаж байв. Тэр гүйлгэж харахаар дээр нь дарлаа. Энэхүү нэвтрүүлгийн ард бүтэн баг ажиллаж байгаа нь илт байв.

Мэргэжлийн зураглаач байх ба Чинь Гуан зөвхөн дүгнэлт хийж, сэжүүр хайх үүрэгтэй байлаа. Зөвхөн бичлэгийн чанарыг нь харьцуулахад л Чэнь Гөг бясаа шиг няц гишгэхээр байлаа. Өрсөлдөгчөө илүү сайн бэлтгэлтэй байна гэж түүнийг буруутгах аргагүй юм.

[680,000 үзэлт. Хэрвээ надад Аймшгийн байшингаа сурталчлахад ийм олон үзэлт байсан бол маргааш нь гэхэд л цэцэрлэгт хүрээлэн тэр чигтээ хүнээр дүүрэх байсан байх даа?]

Шууд дамжуулалт болон богино бичлэгүүд бол Чэнь Гөгийн цорын ганц сурталчилгааны арга байсан бөгөөд Чинь Гуаны энэ дамжуулалт нь Чэнь Гөд ирээдүйн замыг нь зааж өгсөн юм. Хэрэв тэр Чинь Гуаны нэр хүндийн түвшинд хүрч чадвал магадгүй хэзээ нэгэн цагт тус платформ түүнийг дэмжихийн тулд ийм их нөөц бололцоо гаргахыг хүсэх ч юм билүү.

[Чэнь Гө, одоохондоо хэтэрхий хол мөрөөдөөд хэрэггүй ээ. Эхлээд өнөө шөнө амьд үлдэх гэсэн одоогийнхоо зорилгод л анхаарлаа төвлөрүүл.]

Тэр Чинь Гуаны дамжуулалтаас гарч өөрийнхийгөө эхлүүлэв. Хөдөө бөглүү газар гацсан тул сүлжээ маш муу байлаа. Шууд дамжуулалтын дүрс нь бүрэлзэж, байнга хар дэлгэц гарч, гацаж байв. Тэр бүр чатаа ч харж чадахгүй байлаа.

[Миний бичлэгийн чанар Чинь Гуаных шиг сайн биш байж магадгүй ч, контент маань гарцаагүй түүнийхээс илүү дээр...]

Чатаа харж чадахгүй байсан тул Чэнь Гө үзэгчидтэйгээ харилцаж чадсангүй. Мү Ян ахлах сургуулийн талаар товчхон танилцуулсныхаа дараа тэрээр шууд дамжуулалтаа анхаарахаа болив. Чэнь Гө дотуур байрны нэгдүгээр давхрыг нэгд нэгэнгүй нэгжсэн боловч юу ч олсонгүй тул хоёрдугаар давхар руу гарлаа.

"Эмэгтэйчүүдийн дотуур байрны өрөөнүүд эрэгтэйчүүдийнхтэй бараг л ижилхэн харагдаж байна."

Өрөөнүүд сурах бичиг, хог новшоор дүүрсэн байв. Сургууль хаагдах үед доторх эд зүйлсийн ихэнхийг нь цэвэрлээгүй бололтой. Чэнь Гө гар чийдэнгээ тусган өрөөнүүдийг тэвчээртэйгээр нэгжин шалгаж байлаа. Хоёрдугаар давхрын дөрөв дэх унтлагын өрөөгөөр дайран өнгөрөхдөө тэрээр өрөөн дотор дөрвөн сандлыг эгнүүлэн маш нямбай тавьсан байхыг, мөн нэг сандал дээр хэд хэдэн цагаан цаас, бас нэг бал үзэг тавьсан байхыг олж харав.

"Цаас үзэг хоёр цоо шинэ харагдаж байна. Сургууль хаагдсаны дараа л хэн нэгэн энд үлдээсэн байх нь."

Энэ нь Чэнь Гө цаас, үзэгний хослолтой таарч буй хоёр дахь тохиолдол байлаа. Зэвэрсэн цоож нь ердөө л гоёл байв. Чэнь Гө хэдхэн удаа угзран татахад л цоож унаад өгөв.

Хаалга онгойход хөгцний эвгүй үнэр өөдөөс нь цохих шиг болов. Чэнь Гө хамар амаа даран сандал руу дөхөж очоод цааснуудыг харав.

Нийт дөрвөн цагаан цаас байх бөгөөд эхнийх дээр нь—'Би хэзээ үхэх вэ?' гэж бичжээ.

Хоёр дахь дээр нь—'Би яаж үхэх вэ?'

Гурав дахь дээр нь—'Дараагийн үхэх хүн хэн бэ?' гэж бичсэн байв.

Харин дөрөв дэх нь цэв цэвэрхэн хоосон байлаа.

[Үзэгний сүнс тоглоом уу?]

Чэнь Гө өрөөний бусад хэсгийг нэгжиж нэмэлт мэдээлэл олохыг хичээсэн боловч ихэнх эд зүйлс нь цаг хугацааны эрхэнд ялзарч муудсан байлаа.

Хайгуул нь үр дүнд хүрээгүй тул Чэнь Гө анхаарлаа өрөөний голд байх цагаан цаас руу буцаан хандуулав. Хэн ч 'Үзэгний сүнс' тоглоомын цаад талын жинхэнэ тайлбарыг өгч чаддаггүй ч шинжлэх ухааны салбарынхан үүнийг амьсгал, зүрхний цохилт, цусны эргэлт зэрэг нь хүний биеийг чичирхийлэхэд хүргэдэг гэж тайлбарладаг.

Тусгай бэлтгэлгүй энгийн хүн гараа удаан хугацаанд тогтмол өргөлттэй байрлалд барихад гар нь аяндаа л хөдөлдөг байна. Энэ нь Үзэгний сүнсний домогтой ямар ч холбоогүй, бие махбодын л төрөлхийн хариу үйлдэл юм.

Чэнь Гө утсаа орны дээр байрлуулж, өөрөө болон өнөөх дөрвөн сандал бүгд камерт багтаж байгаа эсэхийг шалгав.

[Мү Ян ахлах сургуулийн дөрвөн нэмэлт даалгаврыг бүгдийг нь биелүүлэх ёстойгоос хойш, үүгээр л эхэлцгээе.]

Тэр эргэж хараад унтлагын өрөөний хаалгыг хаав. Тэр сандал дээр сууж, бал үзгийг гартаа авахынхаа өмнө дөрвөн минут хэртэй тээнэгэлзэн зогссон юм.

Тэр дотроо өөрийгөө битгий санаа зов хэмээн тайвшруулна. Чэнь Гө хүүхэлдэйгээ энгэрийнхээ халаасанд хийж, баруун гартаа үзгээ, зүүн гартаа алхаа барин Үзэгний сүнс тоглоомыг эхлүүллээ.

Тэрээр түрүүхэн уншсан нийтлэлээсээ аль болох олон нарийн ширийн зүйлийг санахыг хичээв. Тэр гараа бага зэрэг өргөж, үзэгнийхээ үзүүрийг цагаан цаасанд шүргэх төдий босоо барилаа. Тэгээд нүдээ анин тарниа шивнэж эхлэв.

"Үзэгний сүнс, Үзэгний сүнс, чи миний өмнөх амьдралын сүнс, би чиний энэ амьдралын сүнс. Хэрвээ чи бидэнтэй хамт байгаа бол цаасан дээр тойрог зураач."

Үүнийг хэлснийхээ дараа Чэнь Гө өөрийгөө тайвшруулахыг хичээлээ. Түүний гар цаасан дээгүүр дүүжлэгдсэн мэт байх бөгөөд бие нь хөшсөн мэт огт хөдөлсөнгүй.

Цонхны цаана бороо орсоор л байлаа. Харанхуйд залгигдсан сургуулийн орчин үл анзаарагдам байдлаар өөрчлөгдөж эхлэв.

Өрөөн дэх хөгцний үнэр арилж, хаанаас гарсан нь үл мэдэгдэх хүйтэн салхи сандал дээрх цагаан цаасыг бага зэрэг сэвэлзүүллээ. Удалгүй Чэнь Гөгийн нүд гэнэт томорч ирэв. Хэн нэгэн түүний гарыг атгах шиг түүнд сая мэдрэгджээ.

Чэнь Гө баруун гар руугаа гөлрөх зуураа зүүн гартаа алхаа чанга гэгч нь атгав. Байдал бишдвэл тэр тэрхэн мөчид л шууд цохиход бэлэн байлаа.