Түүний нүдний өмнө харагдаж буй дүр зураг Аймшгийн байшингийн эзэн Чэнь Гөг хүртэл гайхшрууллаа. Мү Ян ахлах сургуулийн үзүүлбэрийн хэмжээ 'Шөнө дундын аллага' үзүүлбэрээс хамаагүй том байв. Түүнийг дотогш нэг алхам хийх төдийд л Чэнь Гөгийн шилэн хүзүүгээр хүйтэн салхи үлээх шиг болов. Энэ нь хэзээ мөдгүй харанхуйгаас ямар нэгэн зүйл түүн рүү үсрэн гарч ирэх гэж байгаа мэт түүнд тавгүй мэдрэмж төрүүлж байлаа.

Дөрвөн анги, хонгил, угаалгын өрөөнүүд, бас багш нарын оффис...

Мү Ян ахлах сургуульд байсан бүхнийг Чэнь Гөгийн Аймшгийн байшинд төгс хуулбарласан байсан ч, бүгдийг нь хооронд нь илүү ойрхон байхаар зохион байгуулалтыг нь өөрчилсөн байв.

Бүдэг гэрэлтэй хонгилоор алхах зуураа Чэнь Гө хоёр талын ангиуд руу өөрийн эрхгүй эргэж харж байлаа. Цонхны цаадах хана нь цементэн хана байсан бөгөөд газар доор салхи үлээх ямар ч боломжгүй байсан ч, цонхнууд яг л салхинд цохигдож байгаа мэт тасралтгүй хяхтнан дуугарч байв.

Эхний хэдэн анги аймшигтай байсан ч тэвчиж болохоор байв; харин Чэнь Гө хонгилын төгсгөлд байх битүүмжлэгдсэн ангид хүрч ирэхэд түүний хамаг биеийн үс босох шиг боллоо. Тэр өөрийнхөө Аймшгийн байшинд анх удаа л ийм хүчтэй айдас мэдэрч байсан нь энэ байв.

Энэ анги түүнд Мү Ян ахлах сургуулийн битүүмжлэгдсэн ангийг санагдуулсан ч бүрэн ижилхэн биш байлаа. Ширээ болгон дээр улаан будгаар сараачин бичсэн байсан бөгөөд хамгийн аймшигтай нь сандал бүр дээр нэг нэг дүрэмт хувцас байрлуулсан байв.

Эдгээр дүрэмт хувцас нь Фань Юйгийн аавтай хамт авахуулсан ангийн зураг дээрх дүрэмт хувцастай яг ижилхэн байв. Цорын ганц ялгаа нь, зураг дээр бүх сурагчид камераас буруу харан зогссон байсан бол, энэ ангид байх бүх дүрэмт хувцас үүдэнд зогсох Чэнь Гө рүү харсан байлаа.

Чэнь Гө гүнзгий амьсгаа аваад өөрийгөө хүчлэн анги руу орлоо. Индэр дээр зогсоод анги руу харахад, эгнэн байрласан сандлууд дээр сурагчид сууж байгаа мэт сэтгэгдэл төрүүлж байв.

[Яагаад зөвхөн энэ анги л дүрэмт хувцастайгаа ирсэн юм бол? Эдгээр дүрэмт хувцаснууд энд хоргодсон сүнснүүдийг төлөөлж байгаа юм болов уу?]

Чэнь Гө дүрэмт хувцаснуудыг дотроо тоолов; нийт хорин дөрвөн дүрэмт хувцас байлаа.

['Шөнө дундын аллага' Туршилтын даалгаврыг биелүүлсний дараа Аймшгийн байшингийн тэрхүү үзүүлбэр Сяосяогийн гэр бүлийн шинэ гэр нь болсон шүү дээ. Хэрвээ би яг энэ логикоор бодоод үзвэл...]

Чэнь Гөгийн царай эвгүйрхэн татвалзлаа. Энэ нь түүний Аймшгийн байшинд нийт хорин дөрвөн тэнүүчлэгч сүнс нүүгээд ирчихсэн гэсэн үг байв.

[Нөгөөтээгүүр, миний буруу ч байж мэднэ.]

Чэнь Гө ангиас гарч хаалгыг нь хаагаад, цааш үргэлжлүүлэн алхлаа.

Хонгилын төгсгөлд угаалгын өрөө байх бөгөөд тэндээс хэдхэн алхмын дараа Чэнь Гө эхний уулзвар дээр ирэв. Зүүн тийш эргэвэл багш нарын оффисын хэсэг рүү, харин баруун тийш эргэвэл эмэгтэйчүүдийн дотуур байр руу хөтөлж байлаа.

Чэнь Гө баруун тийш эргэлээ. Түүнийг хэдхэн алхам хийх төдийд хонгил нарийсаж эхлэв. Хоёр талд байх өрөөнүүд түүн рүү шахаж байгаа мэт санагдах бөгөөд хонгилын төгсгөлд дахин нэг уулзвар гарч ирлээ.

[Ердөө хоёрхон одтой үзүүлбэр л гэхэд ийм нарийн төвөгтэй болсон байдаг?. Хэрэв би дахиад хэд хэдэн үзүүлбэр нэмж нээвэл, энэ газар доорх зогсоол гарцаагүй маш том Аймшгийн төөрдөг байшин болох нь ээ.]

Тэр таарсан нэг хаалгаа түлхэж онгойлгоход, дотоод засал нь яг л хэргийн газар шиг засагдсан байлаа.

Хамгийн сүүлээсээ хоёр дахь унтлагын өрөөнд Чэнь Гө зэрэгцүүлэн тавьсан эгнээ сандал байхыг олж харсан бөгөөд тэдгээрийн нэгэн дээр хэдэн хэсэг цаас, маш ихээр эвдэрч гэмтсэн үзгэн бал тавьсан байв.

[Мү Ян ахлах сургуулийн үзүүлбэрийг нээсний далд шагнал нь энэ юм байх даа?]

Чэнь Гө үзгэн балыг маш болгоомжтойгоор авав. Үзэг хэзээ мөдгүй бутарч унах нь уу гэлтэй маш хэврэг болсон байлаа.

[Нууц эд зүйлс өөрсдийн гэсэн зорилготой байдаг бололтой. Ван Чигийн 'Ор сураггүй алга болсон хүний зар' надад Сяосяогийн гэр бүлтэй найзууд болоход тусалсан бөгөөд одоо тэд 'Шөнө дундын аллага' үзүүлбэрийг ажиллуулахад надад тусалж байгаа. Энэ үзэг надад битүүмжлэгдсэн ангид байгаа сурагчдын тааллыг олоход туслах юм болов уу?]

Чэнь Гө үүнийг яаж ашиглахаа ойлгосонгүй. Эцэст нь тэр үзгийг гартаа барьсаар үзүүлбэрийн хэсгээс гарлаа. Тэр ажилчдын амралтын өрөөнд буцаж ирээд үзгийг наалдамхай туузаар ороож засав.

"Үзэгний сүнс, Үзэгний сүнс, чи надад өс санасан гэдгийг би мэднэ ээ. Гэхдээ би үзгийг чинь засаж өглөө шүү. Хэрвээ чи намайг уучилсан бол цаасан дээр тойрог зураарай."

"Үзэгний сүнс, Үзэгний сүнс, чи миний өмнөх амьдралын сүнс, би чиний энэ амьдралын сүнс. Хэрвээ чи бидэнтэй хамт байгаа бол цаасан дээр тойрог зураач..."

Битүүмжлэгдсэн ангитай холбоотой нууцыг тайлахын тулд Үзэгний сүнснээс асуух нь хамгийн зөв гарц байлаа. Гэвч Чэнь Гө хэчнээн хичээж тарниа уншсан ч, Үзэгний сүнс хариулахаас татгалзсан хэвээр л байв.

"Яагаад ийм чимээгүй байгаа юм бэ? Би ч гэсэн энэ хэрэгт хохирогч шүү дээ, за юу?"

Чэнь Гөд үзгийг эмэгтэйчүүдийн дотуур байранд буцааж тавихаас өөр сонголт байсангүй. Тэр нэгдүгээр давхарт буцаж ирэхээсээ өмнө тэр хавиар нэг тойрч үзэв.

[Битүүмжлэгдсэн ангид байгаа хорин дөрвөн дүрэмт хувцас аймшигтай байсан ч, нөлөө нь хангалтгүй байлаа. Надад цаг гарах үед, 'Амьд үхдэлүүдийн шөнө"' үзүүлбэр дэх манекенуудыг сайжруулаад, эдгээр дүрэмт хувцсыг өмсгөн ангид байрлуулах хэрэгтэй юм байна. Тэгвэл үзэгчдийг айлгах хүч нь нэлээд ихсэх байх.]

Чэнь Гө газар доорх зогсоол руу ордог нүхээ тагладаг модон хавтангуудаа буцааж тавиад, орондоо орохоор завдаж байтал түүний утас дуугарлаа.

Тэр эргэж утсаа хартал Ли байцаагч залгаж байгааг хараад ихэд гайхав.

"Сан Бао ах аа? Би танд юугаар туслах вэ?" Чэнь Гөг, Мү Ян ахлах сургуулиас буцаж ирэх үед Ли байцаагч тэндээ үлдсэн байв. Тэрээр хотын төвөөс ирсэн мөрдөн байцаах багийн цагдаа нартай ярилцаж байх шиг санагдсан.

"Хэрвээ чи тийм ч завгүй биш бол, дүүргийн цагдаагийн хэлтэс дээр хүрээд ирж чадах уу? Алуурчин чамтай ярилцахыг хүсэж байна."

"Надтай юу?" Чэнь Гө гайхсан ч Ли байцаагчийн нүүрийг бодоод зөвшөөрлөө. "Ойлголоо, би одоохон очлоо."

Түүнийг очиход нэгэн танил цагдаа Чэнь Гөг байцаалтын өрөө рүү дагуулж явав. Фань Юйгийн авга эгч гартаа гавлуулчихсан сандал дээр сууж байлаа.

"Цогцоснуудын задлан шинжилгээ үргэлжилж байгаа. Сэжигтний сэтгэл санаа маш тогтворгүй байгаа бөгөөд ямар нэгэн зүйл хэлэхээс татгалзсаар байна. Түүний цорын ганц шаардлага нь чамтай биечлэн уулзах байсан тул би чам руу залгасан юм." Байцаалтын өрөөнд байсан дунд эргэм насны цагдаа босож ирээд Чэнь Гө-тэй гар барив. "Тэгвэл, би чамд даатгаад орхиё доо."

"Би чадах ядахаараа хичээх болно оо." Чэнь Гө, Фань Юйгийн авга эгч рүү алхлаа. Ердөө ганцхан шөнийн дотор тэр урьдынхаасаа ч илүү ядарч туйлдсан харагдаж байв. Тэр толгойгоо гудайлгасан бөгөөд үс нь нүүрийг нь халхалжээ.

Хэн нэгэн ойртож ирэхийг мэдрээд, түрүүхэн сатаарч байсан эмэгтэйн харц Чэнь Гө дээр төвлөрч эхэллээ. Түүний нүднээс маш ээдрээтэй сэтгэл хөдлөлүүд уншигдаж байв.

"Та надтай уулзахыг хүссэн юм уу?" Чэнь Гө түүн рүү ойртохыг оролдох үед, аюулгүй зай барихыг хүссэн цагдаа түүнийг зогсоов.

Фань Юйгийн авга эгч үл ялиг толгой дохив. Тэр нэлээд удаан чимээгүй байсны эцэст амнаас нь унасан эхний өгүүлбэр Чэнь Гөг гайхшрууллаа. "Гуравдугаар давхрын угаалгын өрөөнд миний чамд өгсөн тэр зураг чамд байгаа юу?"

Хэрэв тэр үүнийг сөхөөгүй бол Чэнь Гө аль хэдийн энэ талаар таг мартчихсан байх байв. Тэр халааснаасаа өнөөх зургийг гаргаж ирээд Фань Юйгийн авга эгчийн өмнө тавилаа. Энэхүү хачирхалтай зургийг хараад Фань Юйгийн авга эгч огтхон ч айсангүй. Үнэндээ тэр үүнийг яг л ямар нэгэн эрдэнэс мэт нандигнаж байгаа санагдаж байв. Гэхдээ энэ нь ч аргагүй биз ээ; эцсийн эцэст нөхөр болон хүүхдүүд нь нас барах үед тэр эдгээр зургуудын ачаар л цөхрөлөөсөө аажмаар гарч чадсан шүү дээ.

Эцэст нь Фань Юйгийн авга эгч ам нээлээ. "Би гурван жилийн турш Фань Юйгийн төлөө хийж чадах бүхнээ хийсэн байхад, түүний зураг дээр гарч ирсэн анхны амьд хүн нь чи байдаг. Энэ шударга гэж үү?"

"Асуудал таны бодож байгаа шиг тийм ч энгийн биш байж магадгүй. Фань Юй намайг өөртэйгөө ижилхэн гэж боддог байх." Чэнь Гө нүд рүүгээ заалаа. "Бид хоёр ижилхэн зүйлийг харж чаддаг юм."

"Тийм гэж үү?" Фань Юйгийн авга эгч дахин толгойгоо гудайлгаж, байцаалтын өрөөнд нам гүм байдал ноёрхлов.

"Үүнийг л асуух гэж та намайг энд дуудсан юм уу?" Чэнь Гө зургийг цэвэрхэн гэгч нь эвхэж далд хийлээ.

Арван минутын дараа Фань Юйгийн авга эгч биеэ цэгцэллээ; тэр ямар нэгэн шийдвэрт хүрсэн бололтой. Тэрээр Чэнь Гөд зөөлөн дуугаар: "Би бол Фань Юйгийн цор ганц үлдсэн гэр бүл нь, гэвч би удахгүй түүнийг орхиод явах нь. Хүү маань хачин зан авиртай, бас найз нөхөдтэй болж чаддаггүй юм. Би чамайг түүнийг өөр дээрээ ав гэж шаардахгүй ээ, харин чамд цаг гарах үедээ түүн дээр очиж байгаач гэж л гуйх гэсэн юм. Түүнтэй ярилцаж, бусад хүүхдүүдэд дээрэлхүүлэхгүй байгаа эсэхийг нь анзаарч өгөөч" гэлээ.