40-р бүлэг : Хар дарсан зүүдний шинэ даалгавар
Нэвтэрч орсныхоо дараа Чэнь Гө өөрийнх нь хэрэглэгчийн нэр нил ягаан өнгөтэй болж өөрчлөгдсөнийг анзаарав.
(Орч: Хятадын интернэт орчинд хэрэглэгчийн нэрний өнгө нь тухайн хүний зэрэглэл, идэвх, хандалт эсвэл дагагчдын тоог илтгэдэг уламжлалтай.
Энгийн хэрэглэгч: Ихэвчлэн саарал эсвэл хар өнгөтэй байдаг.
Нил ягаан (эсвэл улаан, алтан) өнгө: Энэ нь тухайн платформ дээр маш их хандалт авсан, олон дагагчтай контент бүтээгч (influencer), эсвэл өндөр түвшний VIP хэрэглэгч болсныг баталгаажуулж буй хэрэг юм.
baidu, tieba, douyin, bilibili зэрэгт хэрэглэдэг систем юм)
Бүртгэлийнхээ профайл руу орж үзвэл, хэд хоногийн өмнө нийтэлсэн гучин минутын бичлэг нь аль хэдийн хэдэн мянган удаа хуваалцагдаж, үзэгдэж, санал болгогдож, сэтгэгдэл бичигдсэнээс болсон гэдгийг тэр ойлголоо. Гүйлгэн харахад Чэнь Гөд хэрэгтэй зүйл нэг ч байсангүй; ихэнх хүмүүс зүгээр л сониуч зандаа хөтлөгдөн орж ирсэн байв.
[Хэн мэдлээ, магадгүй энэ бүтэж ч магадгүй, интернэтэд мэргэжилтнүүд нуугдаж байж болох шүү дээ?]
Чэнь Гө толин доторх мангасын талаар илүү их мэдээлэл өгөхөөр шинэ сэдэв нээж бичиж эхэлсэн бөгөөд Нил ягаан бүртгэлтэй хэрэглэгчдэд олгогддог онцгой эрхийг ашиглан шагналын сантай сэдэв нээлээ.
"Бичлэг дээрх тоглоомыг тоглосныхоо дараа би толин доторх амьтанд эзэмдүүлж байгаагаа ойлголоо! Энэхүү аюулыг хэрхэн устгах талаар тусламж хүсэж байна!"
Хэдхэн секундын дараа хариунууд цуварч эхэллээ.
"Бичлэг Нийтлэгч ээ, чи амьд байгаа юм уу?"
"Хар нохойн цус бол хамгийн шилдэг шийдэл, эсвэл азарган тахиа тэжээ, домогт гардаг шиг бүх муу муухай зүйлс азарган тахианаас айдаг юм."
"Нийтлэгч ээ, намайг сонс, энэ дугаар руу залга. Тэдэнд тусламж хэрэгтэй байна гээд хэлчих, чи надад дараа нь талархах болно."
"Сүнс гэдэг бол бодит ертөнцөд үлдсэн дурсамжаас өөр юу ч биш. Түүнийг устгах нь чамд муу үйлийн үр л авчирна. Сайхан сэтгэл бүхнийг ялдаг юм."
"Нийтлэгч ээ, чи түүнтэй учраа ололцох гээд үзсэн үү? Мэдлэг бол хамгийн сайн шийдэл шүү!"
"Хэрэв чиний хөршүүд дунд ямар нэг хачирхалтай зүйл болоод байвал, чи хэн рүү залгах вэ? Сүнсний ангуучид руу!"
"Хэрэв ямар нэг эвгүй, хачирхалтай зүйл тохиолдоод байвал, чи хэн рүү залгах вэ? Сүнсний ангуучид руу!"
"Шар буурцаг, цагаан будаа, бэх гурвыг холь. Тэднийгээ давстай усанд арван таван минут дэвтээ. Газар цацаж, тэд хэрхэн хүчирхэг буурцагны дайчид болон хувирахыг хар."
"Би өмнө нь нэг эмэгтэй сүнсэнд даруулсан залуугийн түүхийг харуулсан бичлэг үзэж байсан юм. Түүнтэй тооцоо бодохын тулд тэр буу худалдаж аваад, тэр шөнө эмэгтэй сүнсийг буцаж ирэхэд нь өөрийгөө буудаж, дараа нь сүнсийг унтлагын өрөө рүүгээ чирч оруулаад..."
"Нийтлэгч ээ, үнэхээр нухацтай хэлж байна, намайг сонс, энэ арга гарцаагүй үр дүнгээ өгнө! Очоод төмөр сэлэм ол, өмнө нь цус амталж байсан сэлэм байвал бүр сайн. Сүнс гэдэг бол тусгай соронзон энергиэс өөр юу ч биш, харин ийм сэлэм тэднийг гэмтээж чадна!"
Чэнь Гө сэтгэгдлүүдийг гүйлгэж үзвэл, зөвхөн төмөр сэлэмний арга л арай үнэмшилтэй санагдлаа; бусад нь зүгээр л тоглоом хийсэн эсвэл хэрэгжүүлэх боломжгүй зүйлс байв. Тэрээр хар нохойн цус болон азарган тахианы чөтгөр зайлуулах хүчний талаарх уламжлалт домгуудыг мэдэж байсан ч, шөнө дөлөөр тийм зүйлсийг хаанаас олох билээ?
Форумаас гарсны дараа Чэнь Гө утсаа хажуу тийш шидээд, сандал дээрээ гөлрөн суулаа. Толин доторх мангастай тэмцэх нь амь насаараа дэнчин тавина гэсэн үг байсан тул тэр эдгээр дутуу дулимаг интернэтийн зөвлөгөөнүүдэд гарцаагүй найдаж болохгүй байв.
Хэсэг эргэлзсэний эцэст Чэнь Гө хар гар утсаа дахин гаргаж ирлээ. Энэ л цорын ганц итгэж болохуйц зүйл байсан тул тэр хар гар утсанд найдах ёстойгоо мэдэж байв.
Гэвч хар гар утас нь ' солилцооны дүрэм'-ийн дагуу ажилладаг байлаа; ямар нэгэн зүйл олж авахын тулд ижил үнэ цэнтэй зүйлээ алдах ёстой байв.
Хэдэн өдрийн туршилт, алдааныхаа үр дүнд Чэнь Гө хар гар утасны ажиллах , зарчим , нууц дүрэм, тухайлбал түүний даалгаврын шагналын бүтцийн талаар бага сага ойлголттой болсон байлаа.
Хялбар болон Хэвийн Даалгаврууд нь Аймшгийн байшингийн үйл ажиллагаанд нэмэр болох эд зүйлсээр шагнадаг байсан бол; зөвхөн Хар дарсан зүүдний Даалгаврууд л Чэнь Гөд шууд ашиг тусаа өгөх тусгай чадвар гэх мэт шагналуудыг өгдөг байв.
Өөрөөр хэлбэл, толин доторх амьтантай тэмцэхийн тулд Хялбар болон Хэвийн Даалгавруудыг биелүүлэх нь ямар ч утгагүй байв; түүнд Хар дарсан зүүдний Даалгаврын шагнал хэрэгтэй байлаа.
Гэвч Хар дарсан зүүдний Даалгавар ямар аюултайг мэдэх тул Чэнь Гө тээнэгэлзэж байв; тэр толин доторх мангасан дээр нэмээд дахиад нэг аюултай сүнсийг амархаан дуудаад авчирч мэднэ.
[Би яах ёстой вэ? Эрсдэл хүлээх үү, эсвэл дахиад жаахан хүлээх үү?]
Тэр үед Чэнь Гө аль хэдийн шинэ өдөр эхэлж, Өдөр тутмын Даалгаврууд шинэчлэгдсэнийг анзаарлаа.
Хялбар Даалгавар: Хэрэв та үйлчлүүлэгчдэд аймшигтай мэдрэмж төрүүлэхийг хүсэж байвал, эхлээд Аймшгийн байшин доторх тэдний хэмнэл, хурдад анхаарлаа хандуулах хэрэгтэй. Хэт эрт айлгах нь үйлчлүүлэгчдийн сонирхлыг бууруулж болзошгүй тул, үйлчлүүлэгчдийнхээ явцыг хянахын тулд Аймшгийн байшиндаа дуу мэдрэгч эсвэл хяналтын камер суурилуулахыг зөвлөж байна.
Энгийн Даалгавар: Та Аймшгийн байшингийн анхны өргөтгөлийг идэвхжүүлэх шалгуурыг хангасан байна. Тохиромжтой байршлыг яаралтай хайж олоорой! Одоогийн орон зайн хязгаарлалтаас шалтгаалан, та үзвэр нээх ямар ч Туршилтын Даалгавар гүйцэтгэх боломжгүй байна!
Хар дарсан зүүдний Даалгавар: Шөнө дунд бүр угаалгын өрөөнөөс хачирхалтай чимээ гардаг. Хэрэв та яагаад гэдгийг нь мэдэхийг хүсвэл миний зааврыг дагана уу.
Өдөр тутмын даалгаврууд өдөр бүр шөнө дунд шинэчлэгдэнэ. Хэрэглэгч өдөрт зөвхөн нэг даалгавар хүлээн авах боломжтой бөгөөд шагнал нь даалгаврын хүнд хөнгөнөөс хамаарна.
(Анхааруулга! Даалгавар хэцүү байх тусам илүү аюултай байх болно, тиймээс сонголтоо анхааралтай хийнэ үү!)
Чэнь Гө даалгавруудын тайлбарыг уншлаа. Тэр энгийн даалгаврыг түр хугацаанд биелүүлэх боломжгүй байсан тул түүнийг алгасав. Ингээд түүнд Хялбар эсвэл Хар дарсан зүүдний Даалгавар гэсэн хоёр сонголт үлдлээ.
[Маргааш өглөө Шюй авга надад мөнгө өгөх үед шаардлагатай бүх камерыг худалдаж авахад нэг өдөр ч хүрэхгүй хугацаа орно, гэхдээ тэднийг бүгдийг нь суурилуулахад түүнээс илүү хугацаа шаардагдана. Тайлбараас нь харвал, Хар дарсан зүүдний Даалгавар нь угаалгын өрөөтэй холбоотой бололтой... аймшигтай сонсогдож байна.]
Чэнь Гө хоёр галын дунд орчихлоо. Тэрээр Хялбар Даалгаврыг дуусгаж чадна гэдэгтээ итгэлгүй байсан бөгөөд биелүүллээ ч гэсэн шагнал нь тийм ч гайхалтай байхгүй байв. Гэвч Хар дарсан зүүдний Даалгавар дэндүү аюултай байлаа; эцсийн эцэст, бүх зүйл угаалгын өрөөн дотор эхэлсэн шүү дээ.
Тэрээр эд хэрэглэлийн өрөөнд гүн бодолд дарагдан суув. Түүнийг шийдвэр гаргаж амжаагүй байтал хөрөөдөх чимээ дахин гарч, энэ удаад өмнөхөөсөө ч илүү анхаарал сарниулам байлаа. Чэнь Гө толгойгоо гэдийлгээд чимээний эх үүсвэр нь дахиад л гуравдугаар давхар гэдэгт итгэлтэй болов.
[Би аль хэдийн тэр дөрвөн хүүхэлдэйг гаргаад ирчихсэн байтал тэр одоо юуг хөрөөдөж байгаа юм бол?]
Чэнь Гөд энэ амьтан улам бүр зэвүүцмээр санагдаж эхлэв. Оёсон хүүхэлдэйнүүдээ халаасандаа буцааж хийснийхээ дараа тэрээр найдвартай алхаа атгаад гуравдугаар давхар руу яаран өгслөө. 'Шөнө дундын аллага' үзвэрийн үүдэнд ирээд тэр харсан зүйлдээ цочролд оров.
Үүдээр нэг толины хэлтэрхийнүүд хэвтэж байх ба модон хаалган дээр маажсан мөрнүүд байлаа.
[Энэ амьтан хаалгыг маажиж байж! Тэр юу хийх гээв‽]
Чэнь Гөгийн нуруугаар хүйтэн хөлс цутгав. Тэр унтаж байх үед нь толины хэлтэрхий барьсан мангас барилгаар нэг гүйж байна гэж төсөөлж байлаа. Тэр ийм аюултай оршихуйг өөртэйгөө нэг дээвэр дор амьдруулахыг хэзээ ч зөвшөөрч чадахгүй!
Ердийн үед сайхан ааштай байдаг Чэнь Гөгийн царай энэ мөчид үнэхээр баргар болсон байлаа. Тэр 'Шөнө дундын аллага' үзвэрийн хаалгыг ардаа түгжээд, алхаа чанга атган хонгилоор алхав. Тэр өрөө бүр рүү орж, гуравдугаар давхарт олж болох бүх толийг хагалж эхэллээ.
Шил хагарах чимээ шөнийн харанхуйд цуурайтна. "Гуравдугаар давхрын хонгилын төгсгөлд хүрэх үед л Чэнь Гө сая нэг тайвшрах шиг болов."
[Анхны Хар дарсан зүүдний Даалгаврын үеэр толины өмнө сууж байсан хүүхэлдэй тэр амьтныг тогтоон барьж байсан. Тэр Хө Сань руу дайрч байхдаа Сяо Ванийг өрөө рүү орж ирэх үед ухрахаас өөр аргагүй болсон. Гэвч Хө Фөн рүү халдсаныхаа дараа тэр толиноос гарах чадвартай боллоо! Тэр томорч байна, бас маш хурдан томорч байна!]
Чэнь Гө үүнээс цааш хүлээж чадахгүй гэдгээ ойлгов. Түүний Аймшгийн байшин эцэст нь нэг сэргэж эхэлж байхад, тэр үл мэдэгдэх нэг амьтанд үүнийгээ сүйтгүүлэхийг зөвшөөрч чадахгүй байлаа.
Үзвэрээс гарч хаалгаа дахин түгжсэнийхээ дараа Чэнь Гө үхсэн ч хамаагүй гэх шийдвэрт хүрэн хар гар утсаа нээж Хар дарсан зүүдний Даалгаврыг хүлээж авлаа.
[Энэ даалгаврын шагнал хангалттай хүчирхэг байна гэж найдахаас.]
"Та Хар дарсан зүүдний Даалгаврыг хүлээн авахдаа итгэлтэй байна уу? Хүлээн авсны дараа үл мэдэгдэх нөхцөл байдал үүсэж болзошгүй."
"Тийм."
Дэлгэц гэрэлтэж, Хар дарсан зүүдний Даалгаврын жинхэнэ тайлбар гарч ирж эхэллээ.