"Чи дахиад л нэг хүн амины хэрэг илрүүлсэн гэж үү?" Утасны нөгөө үзүүрт байх Ли байцаагчийн дууны өнгөнөөс түүний маш их гайхсан нь илт мэдрэгдэж байв.

"Дөрвөн жилийн өмнө Жан Я гэдэг эмэгтэй оюутан барилгаас үсэрч амиа хорлосон, гэхдээ түүний үхэл амиа хорлолт төдий байхааргүй цаанаа илүү нарийн учиртай юм байна!" гэж Чэнь Гө баттай хэлэв.

"Түр хүлээгээрэй, би эхлээд хавтаст хэргүүдийг үзээдэхье. Хэрэв хохирогчийн гэр бүл задлан шинжилгээ хийлгэхийг хүссэн бол бидэнд хаа нэгтээ тэмдэглэл байх ёстой." Ли байцаагч утсаа таслалгүй архивын өрөөний гэрлийг асааж, хавтаст хэргүүдийг хайлаа. Таван минутын дараа тэр эцэст нь нэг зүйл олов. "Байз, Баруун Жюжян хотын Хувийн Академи гэдэг яагаад ийм танил сонсогдоод байна аа? Чэнь дүү, одоо тэр сургуулиас яаралтай гар!"

"Би аль хэдийн хаалга руу явж байна, яасан бэ?"

"Тэр сургууль зүгээр л хачирхалтай; би чамд хэдхэн өгүүлбэрээр тайлбарлаж чадахгүй ч, нэг тоо хэлж чадна. Тэр сургуульд хоёр долоо хоногийн дотор зургаан хүн амиа хорлосон бөгөөд тэдний үхэл бүгд маш сэжигтэй байсан."

Ли байцаагч хавтаст хэргийг эргүүлэх үед утасны цаанаас цаас шажигнах чимээ сонсогдож байв.

"Яг зөв байх нь ээ! Наад тоо чинь миний бодож байгаа зүйлтэй яг таарч байна." Чэнь Гөгийн хараанд сургуулийн хаалга өртлөө—тэр удахгүй тэндээс гарах болно.

"Чиний бодож байгаа зүйлтэй таарч байна гэнэ ээ? Тэнд яг юу болоод байгаа юм бэ?"

"Үүнийг түр орхиод, хамгийн анхны амиа хорлосон хохирогчийн нэр нь Жан Я мөн эсэхийг шалгаад өг дөө." Чэнь Гө өөрийн сэжиг таамгаа баталгаажуулахаар маш их яарч байлаа.

Ли байцаагч хариулахаасаа өмнө тэмдэглэлийг дахин шалгав. "Үнэхээр, нэр нь Жан Я юм байна, гэхдээ тэр унаж нас барсан шүү дээ. Цогцос шинжээч түүний биеэс өөр ямар ч шарх олоогүй учраас үүнийг амиа хорлолт гэж үзсэн. Олдсон өдөр нь цагдаа нар хэргийн газарт очиж мөрдлөг явуулсан.

Охин дөрөвдүгээр давхрын бүжгийн заалнаас унасан; унасан цонх нь ямар ч эвдрэлгүй, эргэн тойронд нь байсан дуу тусгаарлагч хөөсөнцөр дээр ямар нэгэн цэвэрлэсэн ул мөр байгаагүй. Тиймээс, үүнээс үндэслээд бид Жан Яг гадны нөлөөгүйгээр барилгаас үсэрсэн гэж баталсан юм."

"Гадны нөлөөгүй гэнэ ээ? Ли байцаагч аа, та нар түүнийг ингэхээс өөр аргагүйд хүрсэн байх вий гэж бодож үзсэн үү? Хэрвээ тэр үсрээгүй бол хүчиндүүлэх байсан юм!" Чэнь Гө толинд харсан дүр зурагнуудаа дамжуулан хэлэв.

"Бид үүнийг ч гэсэн авч үзсээн, тэмдэглэлд Жан Ягийн өрөөний охидын мэдүүлэг байгаа. Тэр таван охин бүгд юу ч мэдэхгүй гэж хэлсэн. Жан Я хичээл тарсны дараа барилгаас үсэрсэн тул тэр үед зааланд ганцаараа байсан. Тэдний мэдүүлгээс үзэхэд, Жан Я үргэлж өндөр стресстэй, ганцаардмал хандлагатай байсан бөгөөд магадгүй сэтгэл зүйн хувьд ч тогтворгүй байсан бололтой. Тэдний мэдүүлгийг баталгаажуулахын тулд тухайн үед цагдаа нар ангийнх нь охидоос давхар мэдүүлэг авсан бөгөөд бүгд санал нийлсэн байдаг."

"Жан Я бол яавч тэдний дүрсэлсэн шиг хүн биш; тэд бүгд нийлж түүнийг гүтгэсэн байна!" Чэнь Гө Жан Ягийн өмнөөс уурсаж, хилэгнэж байлаа. Бүхэл бүтэн ангиараа нийлж Жан Яг дээрэлхэнэ гэж тэр огтхон ч төсөөлөөгүй байв; тэр охин ямар ч буруу зүйл хийгээгүй шүү дээ.

"Жан Я яг ямар хүн байсныг чи бид хоёр хэзээ ч мэдэхгүй ч, нотлох баримт худал хэлдэггүй юм." Ли байцаагч Чэнь Гөг яагаад ингээд бухимдаад байгааг нь ойлгосонгүй. "Ямартай ч чи тэр сургуулиас аль болох хурдан гар. Бид чамайг авахаар хүмүүсээ явуулж байна."

"Тэд бүгд худал хэлж байсан юм! Жан Ягийн нас барсан цагийг сайн хараад өгөөч, хичээл тарахаас өмнө байх ёстой доо! Тэд нас барсан цагийг нь худал хэлсэн байна, тэгэхээр тэр таван охин чинь гэмт хэргийн хамжигчид байжээ!" Чэнь Гөгийн дуу өөрийн эрхгүй чангарав.

"Наана чинь л чи буруудаад байна даа. Жан Ягийн нас барсан цаг нь оройн 6-аас 8 цагийн хооронд байсан. Тэр таван охин оройн 5:30-ын үед буюу ихэвчлэн явдаг цагтаа сургуулиас гарцгаасан байсан." Ли байцаагч Чэнь Гөд сургууль дээр юу тохиолдсоныг мэдэхгүй тул, хөндлөнгийн байр сууринаас нөхцөл байдалд дүн шинжилгээ хийж байв.

"Боломжгүй юм!"

"Үнэхээр боломжтой шүү. Цогцос шинжээч хүүрийн толбо болон хүүрийн хөшилтөд үндэслэн нарийвчилсан шинжилгээ хийсэн. Жан Ягийн нас барсан цаг үнэхээр 6-аас 8 цагийн хооронд байгаа. Үхлийн шалтгаан нь нурууны хугарал байсан. Үүнээс гадна гавлын яс, өсгийний яс болон аарцагны ясанд шарх байсан бөгөөд эдгээр нь барилгаас үсэрч амиа хорлосон хохирогчдод түгээмэл илэрдэг гэмтлүүд юм."

Чэнь Гөд хариу хэлэх үг олдсонгүй. Тэр зогсож байсан газартаа таг гөлөрлөө. "Хэрвээ Жан Я тэр таван охиныг явахаас нь өмнө барилгаас үсэрсэн юм бол, энэ нь тэр унасныхаа дараа шууд үхээгүй гэсэн үг. Гэвч хугарсан яс нь түүний биеийг хөдлөх боломжгүй болгосон тул, тэр 6-аас 8 цагийн орчимд жинхэнээсээ амьсгал хураах хүртлээ өөрийнхөө цусан дунд хэвтэж, өвдөлт болон шаналалдаа тамлуулсаар үхлээ хүлээхээс өөр аргагүй байжээ."

"Чиний энэ таамаглал боломжтой ч гэлээ, чи нэг зүйлийг мартсан байна. Хэрвээ охин барилгаас унасныхаа дараа амьсгалтай байсан юм бол, тэнд байсан таван охин яагаад түүнийг аврахгүй байсан юм бэ? Хэдийгээр тэдэнд түүнийг аврахгүй байх өөрсдийн гэсэн шалтгаан байсан ч гэсэн сургуулийн бусад хүмүүс түүнийг олох л байсан шүү дээ."

"Тухайн үед амралтын өдөр байсан, удахгүй болох улсын чанартай тэмцээнд бэлтгэл хийхээр ирсэн зургаан охиноос өөр хүн сургууль дээр байгаагүй юм. Тэдний багш нь аль эрт яваад өгсөн байсан, бас хэдийгээр хамгаалагч эсвэл өөр хэн нэгэн байсан ч, тэднийг муу санаатай хүмүүс зориуд явуулчихсан байх боломжтой биш гэж үү?" хэмээн Чэнь Гө өөр санал дэвшүүлэв.

"Би чамтай энэ талаар маргалдахгүй ээ; эцсийн эцэст Жан Я амиа хорлосон уу эсвэл бусдын гарт амь үрэгдсэн үү гэж маргалдах нь ямар ч ач холбогдолгүй зүйл. Чи тэр таван охиныг Жан Ягийн үхлийн жинхэнэ алуурчид бөгөөд хоорондоо хуйвалдан худал мэдүүлэг өгсөн гэж итгэж байгаа байх, гэхдээ үүнээс хойш хоёр долоо хоногийн дараа эдгээр таван охин ар араасаа нас барцгаасан шүү дээ. Чиний таамагласан жинхэнэ алуурчид одоо үхчихсэн байхад, бид энэ хэргийг яаж мөрдөх юм бэ?" Ли байцаагч Чэнь Гөгийн аюулгүй байдалд илүү санаа зовж байлаа.

"Ли байцаагч аа, би тэр таван охиныг алуурчин гэж хэзээ ч хэлээгүй шүү; тэд бол ердөө л хамжигчид! Жан Ягийн үхэлд хүргэсэн жинхэнэ алуурчин нь 1.8 метр өндөртэй, бөгтөр нуруутай тарган эр байна!"

"Наадах чинь үнэхээр нарийн дүрслэл байна шүү, чи яаж ийм дүгнэлтэд хүрснээ надад хэлж болох уу? Дөрвөн жилийн өмнө Баруун Жюжян хотын Хувийн Академийн аюулгүй байдлын систем бүрэн хийгдээгүй байсан, бас бүх гэрчүүд нь одоо нас барчихсан байна. Тэгтэл чи надад сул чөлөөтэй яваа жинхэнэ алуурчин байгаа гэж хэлж байна... чи намайг өөрт чинь итгэнэ гэж найдаа юу?"

Пин Ан апартментийн хэргээс болоод Ли байцаагч сүүлийн хэдэн өдөр аль хэдийн илүү цагаар ажиллаад байлаа. Тийм учраас л тэр шөнийн 2 цагт ч хэлтэс дээрээ байсан юм. Түүний үгнээс ядарч сульдсан нь илт мэдрэгдэж байв.

Чэнь Гө ,Ли байцаагчийн хоолойноос сэжиглэж байгааг нь ялгаж танив. "Бид дөрвөн жилийн өмнө Баруун Жюжян хотын Хувийн Академитай холбоотой байсан хүмүүсийг шалгахаас эхэлж болно шүү дээ; бид энэ хүнийг олох ёстой! Тэр хэргийн газар байсан!"

"Чэнь Гө, цагдаагийн мөрдлөг эхлүүлнэ гэдэг тоглоом биш шүү. Дөрвөн жилийн өмнө хаагдсан хэргийг дахин нээх ямар хэцүү байдгийг чи мэдэх үү? Чи намайг итгүүлж чадлаа ч гэсэн, миний дарга нарыг итгүүлж чадахгүй бол энэ нь ямар ч утгагүй хэрэг болно. Бидэнд хэрэгтэй зүйл бол бодит нотлох баримт — сэжиг таамаг биш, төсөөлөл биш."

"Миний хэлсэн бүхэн үнэн."

"Тэр чинь чиний л бодол шүү дээ." Ли байцаагч хавтаст хэргүүдийг буцааж байранд нь хийхээр цэгцэлж эхэллээ. "Чи яагаад гэнэт энэ хэргийг ингэтлээ сонирхох болсноо надад хэлээч? Чи надад шударга ёсоор бялхсан залуу шиг сэтгэгдэл огт төрүүлдэггүй дээ."

[Би яагаад ингэтлээ зүтгээд байгаа юм бэ?]

Чэнь Гө ,Ли байцаагчийн энэхүү гэнэтийн асуултад цочирдов. Түүнийг модон овоохойд түгжигдсэн байхад Жан Ягийн үзүүлсэн тусламж, мөн бүжгийн заалны дотор Жан Я ард нь зогсох үед нуруунаас нь мэдрэгдсэн хүйтэн ганцаардал нь түүний санаанд буулаа.

"Юу ч биш ээ. Одоогийн нөхцөл байдлыг бодоход түүнд тусалж, түүнийг аварч чадах цорын ганц хүн нь би л байна." Чэнь Гө хар гар утас руугаа харлаа.

"Би чамайг юу яриад байгааг одоо хүртэл ойлгохгүй л байна" хэмээн Ли байцаагч удаан чимээгүй байсны эцэст үргэлжлүүлэв. "Гэхдээ шударга ёсыг сахиулах нь хууль сахиулах байгууллагын үүрэг. Нэгэнт чи ийм сэжиг таамаг гаргаж ирсэн болохоор, Пин Ан апартментийн хэрэг дууссаны дараа би өөрийн биеэр чамд энэ хэргийг судлахад чинь туслах болно оо."

"Баярлалаа, Санбао ах аа!" Чэнь Гө санаа амарсан байдалтай гүнзгий амьсгаа авав. "Жинхэнэ алуурчинг барих нь, Жан Яд ямар нэгэн байдлаар тайвшралыг өгөх байх гэж бодож байна. Энэ хараал идсэн газрын хувьд гэвэл, би дахиж хэзээ ч буцаж ирэхийг хүсэхгүй байна."

Тэр утсаа таслаад Баруун Жюжян хотын Хувийн Академи руу хамгийн сүүлчийн удаа эргэж харлаа.

Гэтэл түүнийг цочролд оруулах мэт, Улаан сүнс Жан Я яг ард нь зогсож байлаа!

Тэдний хооронд гурван метр орчим зай байв. Сургуулийн дүрэмт хувцаснаас нь шинэхэн цус дуслан байх Жан Я толгойгоо хазайлган Чэнь Гө рүү харж байлаа. Энэ удаад тэр ойртсонгүй, бас түүний царайны хувирал нэг л хачирхалтай байв.