Сандал хонгилын яг голд байсан тул Чэнь Гө хоёрдугаар давхар руу орохын тулд заавал хажуугаар нь өнгөрөх хэрэгтэй байв. Охидын дотуур байранд харсан зүйл нь Чэнь Гөгийн ой ухаанд тодхон хэвээр байлаа. Эдгээр сандлууд амьд хүмүүстэй ойртох хандлагатай бололтой.

Шатны дэргэд нуугдаж байхдаа тэр эргэлзэж эхлэв.

[Тэр хүн налах зориулалттай түшлэгтэй юм байна, бас энэ барилга дотор харсан бусад сандлуудаас өөр харагдаж байна шүү. Түүнийг өөр газраас энд авчирсан бололтой, гэхдээ яагаад хэн нэгэн ингэдэг байна аа?]

Илүү сайн ажигласны дараа, сандал нь Чэнь Гөгийн охидын дотуур байранд харсантай төстэй байв; энэ нь сургуулийн удирдлагаас дотуур байрны өрөөнүүдэд хуваарилсан сандлуудын нэг байх магадлалтай байлаа.

Чэнь Гө утасныхаа камерыг ашиглан нэг хаалган дээрх хаягийг томруулж харлаа; түүн дээр дуулаачийн сургалттай холбоотой ямар нэгэн зүйл бичсэн байв.

[Бүжгийн заал хоёрдугаар давхарт байдаггүй бололтой— би зүгээр л гуравдугаар давхар руу гарчих уу? Гэхдээ гуравдугаар давхрын хонгилд дахиад нэг модон сандал байвал яах вэ? Хэрвээ тэр миний араас хөөж эхэлбэл би хоёр талаасаа хавчигдах юм биш үү?]

Энэхүү жихүүцмээр дүр зураг толгойд нь зурсхийх үед Чэнь Гө хоёрдугаар давхрын хонгил руу орохоор шийдэв. Хонгил үнэхээр харанхуй байсан тул Чэнь Гө төгсгөлийг нь харж чадахгүй байлаа. Хоёр талын хаалгууд хаалттай байх бөгөөд цонхнууд нь зузаан тоосонд дарагдсан тул Чэнь Гөд доторхийг нь харах ямар ч боломж байсангүй.

Чэнь Гө маш анхааралтай алхлаа. Модон сандлаас ирж болох болзошгүй аюулаас болоод тэр яарах талаар огтхон ч бодсонгүй. Үнэндээ Чэнь Гөгийн хувьд, хоёр талд байх хаягдсан ангиуд сандлаас ч илүү аймшигтай санагдаж байлаа.

[Энд амьд хүн хөл тавилгүй хэр удаж байгаа юм бол оо. Шалан дээрх тоос маш зузаан байна, бас надад үлдээсэн хөлийн мөрнүүдээ арилгах ямар ч арга алга. Хэрвээ намайг дагаж байгаа хүн энэ барилга руу бас орж ирвэл, би гарцаагүй баригдана.]

Ийм нөхцөлд ч гэсэн Чэнь Гө гуравдагч этгээдийн далд аюулын талаар мартсангүй.

[Би үүнийг аль болох хурдан дуусгах хэрэгтэй!]

Гар нь хөдлөх тусам Чэнь Гөгийн утасны гэрэл савчина. Тэр модон сандал руу бага багаар дөхлөө.

[Үнэндээ, үүнд тэгж их айгаад байх зүйл байхгүй л баймаар юм? Зүгээр нэг модон сандал юу л хийж чадав гэж?]

Чэнь Гө сандлыг тойрон алхахад түүнд энэ нь зүгээр л нэг модон сандал бөгөөд өөр юу ч биш юм шиг санагдав.

[Магадгүй би үүнийг арай ойроос харах хэрэгтэй байх...]

Энэ бодол Чэнь Гөгийн толгойд орж ирэх үед тэрээр үүнийгээ аль хэдийн үйлдэл болгож байлаа. Тэр сандлыг хажуу тийш нь унагахад, сандлын доорх гар бичмэлийг олж харав.

[Чянь Южяо? Охины нэр шиг сонсогдож байна шүү.]

Ямартай ч энэ нэр гарч ирсэн нь Чэнь Гөгийн өмнөх таамгийг батлав. Сандал нь угтаа Үйл ажиллагааны төвийнх биш, харин тодорхой нэг хувь хүнийх байжээ. Сургуулиас томоохон үйл ажиллагаа зохион байгуулах үед удирдлага оюутнуудад өөрсдийн сандлыг авчрахыг даалгадаг байсан байж таарна. Будилахаас сэргийлж ихэнх нь сандлынхаа доор өөрсдийнхөө нэрийг бичсэн хэрэг.

[Тэгэхээр охидын дотуур байранд байгаа сандлын доор ч бас нэр байгаа гэсэн үг үү?]

Чэнь Гө нэрийг нь цээжлээд авав. Бага зэрэг эргэлзсэний эцэст тэрээр сандлыг эвдэхгүйгээр хоосон ангиудын нэгэнд нь оруулаад тавьчихав.

[Би энд удах тусмаа улам л тавгүй болоод байх юм. Эртхэн гуравдугаар давхар руу гарсан нь дээр байх.]

Тэрээр ирсэн замаараа буцан алхаж, шатаар өгсөн гуравдугаар давхарт гарлаа. Энэ удаад хонгилд юу ч байсангүй. Чэнь Гө зарим ангиудын хаалгыг түлхэж онгойлгов. Ширээ, сандлуудыг ангийн ар руу түрсэн байх бөгөөд хананы зарим хэсгийг дахин будсан байв—хана хоёр өөр өнгөтэй байсан тул энэ нь маш тодорхой харагдаж байлаа.

[Сургууль хаагдах гэж байж яагаад хана дахин будахад мөнгө үрсэн юм бол? Энэ юуны тулд хийгдсэн зүйл юм бол?]

Пин Ан апартментэд болсон явдал Чэнь Гөд нэгэн таамаг дэвшүүлэхэд хүргэв.

[Магадгүй ямар нэг зүйл нуухын тулд байх.]

Тэр алхаараа шинэ будганд тулган хуулсан боловч, хачирхалтай нь шинэ будгийн цаадах хана нь бүхэлдээ хэвийн байлаа; ямар ч цусны толбо эсвэл хачирхалтай мөр байсангүй.

[Үгүй ээ, үүний цаана үүнээс өөр ямар нэгэн зүйл байж л таараа.]

Чэнь Гө ангиудаар үргэлжлүүлэн явж үзэв. Бүх ангиудын ханыг шинээр будаагүй байгааг тэр анзаарлаа. Зөвхөн тодорхой хэдэн хэсгийг л дахин будсан байх бөгөөд зарим хэсэг нь ханан доторх шугам хоолойтой сэжигтэйгээр ойрхон байв.

[Энэ барилгын ус зайлуулах системийг сургууль хаагдахаас нь өмнө шинэчилсэн бололтой.]

Чэнь Гө дээш усны хоолой руу харан,

[Нэг болон хоёрдугаар давхрын ангиудад ашиглагдаж байсан шинж тэмдгүүд тодорхой байсан ч, гуравдугаар давхрын ангиудыг сургууль хаагдахаас ч өмнө хаячихсан юм шиг байна] хэмээн дүгнэлээ.

Ширээ, сандлуудыг бие биен дээр нь овоолсон байх ба багшийн ширээн дээр нэг ч ширхэг шохой үлдээгүй байв. Зарим ангиудыг бүр цоожилсон байлаа.

[Сүнс шүглэсэн үү? Хүн амины хэрэг үү? Эсвэл нууцлагдмал аюулгүй байдлын асуудал байв уу?]

Энэ газрыг битүүмжлэхэд маш олон өөр шалтгаан байж болох ба Чэнь Гө чухам аль нь болохыг нь яг таг тодорхойлж чадсангүй. Тэр ангиас гарч, дөрөвдүгээр давхар руу өгслөө.

Эхний алхмаа хийхдээ Чэнь Гө эргэж харан, өнөөх модон сандал араас нь дагаж байгаа эсэхийг шалгалаа.

Тэр байсангүй.

Түүнийг гурав болон дөрөвдүгээр давхрын хоорондох шатны тэгш талбайд хүрэх үед, шатны хоёр бариулын дундуур уясан олс түүний замыг хааж байв. Түүн дээр модон самбар өлгөсөн байх бөгөөд урд хаалган дээрхтэй адилаар 'ОРОХЫГ ХОРИГЛОНО' гэж бичсэн байлаа.

Мэдээж хэрэг Чэнь Гө энэ модон самбарт саатсангүй. Тэр түүнийг авч хажуу тийш тавиад, бөхийн олсон доогуур шурган гарлаа.

Дөрөвдүгээр давхарт гарах үедээ Чэнь Гө эсрэг талын өрөөний хаалган дээр өлгөөтэй гандсан хаягийг хамгийн түрүүнд олж харав.

Бүжгийн заал!

Үйл ажиллагааны төвд ингэж удаан хайсны эцэст тэр улаан бүжгийн гутал гарч ирэх хамгийн өндөр магадлалтай газрыг эцэст нь оллоо. Дөрөвдүгээр давхрын зохион байгуулалт бусад давхруудтайгаа харьцуулахад өөр байв; тусдаа ангиуд байхын оронд ханануудыг нь нурааж нэг том заал болгожээ.

Лацнуудыг урж, цоожийг нь эвдсэнийхээ дараа Чэнь Гө олон жилийн турш ашиглагдаагүй бүжгийн заалны хаалгыг түлхэж онгойлгов. Энэ газар цаг хугацаанд мартагдсан мэт санагдах бөгөөд бүх зүйл хэдэн жилийн өмнө ямар байсан яг л тэр чигтээ байлаа.

Гялгар шал нь нимгэн тоосонд дарагдаж, өрөөнд нэгэн хачирхалтай үнэр шингэсэн байлаа. Энэ үнэрийг хамгийн оновчтойгоор дүрсэлбэл олон жилийн турш битүү өрөөнд түгжигдэж чанараа алдсан хурц үнэртүүлэгч шиг л санагдана.

Чэнь Гө хана даган бүжгийн заал руу орлоо. Заалыг мэргэжлийн түвшинд тохижуулжээ; модон шалыг бүжгийн сургуулилтад зориулан өнгөлсөн бөгөөд хананд нь дуу чимээ бусад ангиудад саад болохоос сэргийлж дуу тусгаарлагч хавтангуудыг суурилуулсан байв.

[Ийм том бүжгийн заал харж байгаа нь миний хувьд анхны тохиолдол байна.]

Чэнь Гө камераа ашиглан өрөөний янз бүрийн өнцөг рүү томруулж харлаа. Хананд балетын хичээл дээр ихэвчлэн байдаг бариулуудыг зоосон байв. Бариулуудын өндрийг тохируулах боломжтой бөгөөд дор нь оюутнуудад амрахад зориулагдсан намхан суудал эгнүүлэн тавьжээ.

Өрөөний нөгөө захад хооронд нь яг таг нийлүүлсэн зургаан ширхэг шалнаас тааз хүрсэн том толь байлаа. Толь бүр нь нэг метр орчим өргөнтэй бөгөөд хоёр метр өндөр байв.

[Бүжгийн заал дотор толь зайлшгүй байх ёстой гэдгийг би бүр мартчихаж.]

Эгнүүлэн тавьсан толинуудыг хараад Чэнь Гө гүнзгий амьсгаа авлаа. Дараа нь тэр толинуудын яг голд байрлах гурван модон сандлыг олж харлаа.

[Нэг дор гурав гэж үү?]

Чэнь Гө уруулаа хазсаар сандлуудын зүг алхах ба түүний үйлдэл бүр толинд тусаж байлаа.

Шөнө дунд хов хоосон бүжгийн заал дотор толинд тусах өөрийнхөө тусгал руу ширтэх нь Чэнь Гөд улам л эвгүйцмээр санагдана.

Толийг хагалах гэсэн хүслээ тэвчиж, тэр гурван сандлыг хажуу тийш нь унагаахад, өмнө нь олсон сандалтай адил тэдгээр бүх сандлын доор охины нэр бичээстэй байхыг олж харлаа.

[Охидын дотуур байранд байсан сандлыг оруулбал, би аль хэдийн таван сандалтай таарчихлаа шүү дээ. Хэрэв сандал бүр нэг охиныг төлөөлж байгаа юм бол, энэ нь би таван охины сүнстэй нүүр тулж байна гэсэн үг. Тэгвэл энд яг юу тохиолдсон юм бэ гэдэг нь л гол асуулт болж байна даа.]