Дахин гурван удаа оролдож, гурвууланд нь бүтэлгүйтсэнийхээ дараа Чэнь Гө бууж өгөхөөр шийдэв. Тэр Аймшгийн байшиндаа буцаж очсоныхоо дараа л энэ судалгаагаа үргэлжлүүлэхээр болов. Хачирхалтай нь, түүнийг Жан Ягийн хувийн хуудаснаас гарах үед хар гар утсан дээр дахин нэг уншаагүй мэдэгдэл ирсэн байлаа.

[Би Цуст хүслийн даалгаврыг аль хэдийн дуусгачихаагүй бил үү?]

Чэнь Гө нэг их зүйл бодолгүйгээр хоёр дахь зурвасыг нээлээ.

"Сүнснүүдийн ивээлийг хүртэгч ээ, Ховор түвшний сүнс, Улаан сүнсний 'Цуст хүслийн даалгавар'-ыг амжилттай биелүүлсэнд баяр хүргэе. Энэхүү даалгавар нь Дөрвөн одтой үзвэр болох 'Хойд насны сургууль'-ийн нэмэлт даалгавруудын нэг хэсэг юм!

"Санамж: Цуст хүслийн даалгаврын гүйцэтгэл зуун хувьд хүрэх үед 'Хойд насны сургууль'-ийн Туршилтын даалгаврыг нээх болно (Даалгаврын хүчинтэй хугацаа гурван сар).

Бүх Туршилтын даалгаврыг гүйцэтгэснээр тухайн үзвэр нээгдэнэ!

"Хойд насны сургууль—Айлгах түвшин 4 Од!

"Нэмэлт даалгавар 1: Улаан бүжгийн гутал (Шөнө дөлөөр эзгүйрсэн сургууль бол Улаан хунгийн тайз юм. Тэр бол улаан балетчин, бас харгис сүнс). Даалгаврын байршил: Баруун Жюжян хотын Хувийн Академи."

"Нэмэлт даалгавар 2: Дүүжлэгдсэн хүн (Би хэзээ ч наргиан хийдэггүй, амьддаа ч тэр, үхсэн хойноо ч тэр). Даалгаврын байршил: Баруун Жюжян хотын Хувийн Академи."

"Нэмэлт даалгавар 3: Өмхий үнэр (Тэр хэнд ч хэлэх боломжгүй аймшигт нууцаа нуухын тулд л унтлагын өрөөндөө хамаг хог новшоо цуглуулдаг байжээ). Даалгаврын байршил: Баруун Жюжян хотын Хувийн Академи."

"Нэмэлт даалгавар 4: Буцаж Явахаас татгалзсан Үзэгний сүнс (Үзэгний сүнс, Үзэгний сүнс, дараа нь хэн үхэхийг чи надад хэлж өгөөч?) Даалгаврын байршил: Мү Ян ахлах сургууль."

(Орч: Сүнс дуудах тоглоомын үед сүнс буцаж явахаас татгалзсан сүнс, тийм үгүй гэсэн 2 үг бичээд үзэгний сүнсээ , үзэгний сүнсээ гэж дуудаад асуулт асуудаг тоглоом)

"Нэмэлт даалгавар 5: Ариун цэврийн өрөөний тав дахь хаалга (Өдөр бүр шөнө дунд, хүмүүс угаалгын өрөөнд улаан сүүдэр гарч ирэхийг хардаг гэж тангарагладаг байв. Түүнийг барихын тулд би угаалгын өрөөний тав дахь хаалганд нуугдсан). Даалгаврын байршил: Мү Ян ахлах сургууль.

"Нэмэлт даалгавар 6: Гүн худаг (Нэг ах, нэг дүү хоёр сургуульдаа явсан ч, яагаад хэн нь ч эргэж ирсэнгүй вэ?) Даалгаврын байршил: Мү Ян ахлах сургууль.

"Нэмэлт даалгавар 7: Битүүмжлэгдсэн анги (Хонгилын төгсгөлд үргэлж битүүмжлэгсэн байдаг нэг анги бий. Тийшээ хэн ч ордоггүй ч, шөнө бүр тэр анги хөл хөдөлгөөн орж амьд болдог). Даалгаврын байршил: Мү Ян ахлах сургууль.

"Нэмэлт даалгавар 8: Мөнхийн амьдрал (Нэгэн тодорхойгүй газар доорх цогцос хадгалах газарт, мөнхийн амьдралыг хайж буй хэсэг бүлэг хүмүүс байдаг). Даалгаврын байршил: Баруун Жюжян хотын Анагаахын Их Сургууль.

"Эцсийн даалгавар: Одоогийн байдлаар түгжээтэй."

Хар гар утсан дээрх энэ олон зурвасыг уншаад Чэнь Гө бүрмөсөн гайхширалд орлоо.

[Дөрвөн одтой үзвэр гэнэ ээ‽ Нэг одтой үзвэр хүртэл шүүх эмнэлгийн оюутнуудыг ухаан алдуулж чадаж байхад, дөрвөн одтой үзвэр ямар аймшигтай байх болж байна аа?]

Хүн бүрд айдсын хязгаар гэж байдаг; тэр хязгаараас хэтэрвэл хүний эрүүл мэндэд хортой байж болзошгүй. Чэнь Гө янз бүрийн Нэмэлт даалгавруудыг дахин уншиж үзтэл, зөвхөн даалгаврын тайлбар нь л түүний арьсыг арзайлгаж байлаа. Хамгийн гол нь эдгээр нь зүгээр л Нэмэлт даалгаврууд; төгсгөлийн даалгавар нь одоо хүртэл түгжээтэй байв. Логикоор бодвол, Чэнь Гө эцсийн даалгаврыг нээхийн тулд эхлээд эдгээр найман Нэмэлт даалгаврыг дуусгах ёстой байлаа.

[Дөрвөн одтой үзвэр одоогийн надад хэтэрхий хэцүүдэх байх. Магадгүй би дараа нь оролдож болох ч, одоохондоо лав биш.]

Чэнь Гө ирсэн зурвасыг хааж, нээх боломжтой үзвэрүүдийн цонх руу орлоо. 'Гуравдугаар тасаг' болон 'Сүнстэй шарил зөөгч тэрэг'-ээс гадна одоо 'Хойд насны сургууль' гэсэн шинэ үзвэр нэмэгдсэн байв, гэхдээ өмнөх хоёроосоо ялгаатай нь энэ үзвэрийн нэрийг цусан улаан бэхээр бичсэн байлаа.

[Тэгэхээр энэ ганцхан үзвэр сүнстэй сургуулийн бүх түүхийг нэг дор цуглуулдаг байх нь ээ. Тийм бол, энэ үзвэрийг нээсний дараа ч гэсэн олон нийтэд шууд нээлттэй болгох боломжгүй байх.]

Янз бүрийн үзвэрүүдийн Айлгах түвшнийг ажиглах зуур Чэнь Гөгийн толгойд нэгэн санаа зурсхийв. Нэг одтой үзвэр хэнд ч нээлттэй байх ёстой бол, гурав эсвэл түүнээс дээш одтой үзвэрүүдэд зөвхөн нэг болон хоёр одтой үзвэрүүдийг амжилттай давсан хүмүүс л орох боломжтой байх хэрэгтэй. Өөрөөр хэлбэл, үүнийг нэг төрлийн үйлчлүүлэгчдийг хамгаалах арга гэж үзэж болох юм.

[Ингэснээр Аймшгийн байшинг ньтоглох сонирхол ч нэмэгдэх болно. Нэг удаа ирсэн хүмүүс бүх үзвэрийг төгс давж гартлаа илүү аймшигтай үзвэрт хүчээ сорихоор буцаж ирэх болно. Энэ нь тэд ирэх болгондоо өөр өөр мэдрэмж авна гэсэн үг бөгөөд миний Аймшгийн байшингийн нэр хүндийг гарцаагүй өсгөх болно.]

Гэнэт Чэнь Гөгийн санаанд Хө Сань буулаа. Техникийн хувьд тэр л Аймшгийн байшингийн нэгээс олон үзвэрт орсон цорын ганц үйлчлүүлэгч байлаа.

[Тэр хүү нэг бодлын Аймшгийн байшингийн сахиус юм даа. Шинэ үзвэр нээгдэх үед би түүнийг дахиад урьсан нь дээр байх...]

Түүний толгойд үйлчлүүлэгчид тодорхой түвшнийг давсны дараа нэмэлт шагнал, гэрчилгээ олгох гэх мэт олон шинэ санаанууд орж ирж байлаа. Ингэвэл үйлчлүүлэгчдэд илүү аймшигтай үзвэрүүдийг даван туулах урам зориг өгөх болно.

[Энэ яг л намайг ямар нэгэн мөрийтэй тоглоомын зохион байгуулагч шиг мэдрүүлж байна шүү.]

Чэнь Гө өөрийн эрхгүй инээмсэглэв. Ирээдүйд магадгүй айдас гэж чухам юу болохыг жинхэнэ утгаар нь мэдрэхийн тулд мэргэжлийн багууд хүртэл түүний Аймшгийн байшинд ирэх биз ээ.

"Чи яагаад балай юм шиг инээгээд байгаа юм? Ямар нэгэн муу зүйл сэдсэн бололтой дог шүү." Ли байцаагч өрөөнөөс гарч ирэв. Тэр анхан шатны үзлэгээ дуусгажээ. "Би 1 болон 2-р багтай холбогдсон; тэд Жан Пөнгийн ямар ч ул мөрийг олж чадсангүй. Энэ сургуулийн уур амьсгал нэг л эвгүй байна, бас орчин нь шөнөөр хайгуул хийхэд хэтэрхий нарийн төвөгтэй юм. Бид одоохондоо ухарч, мөрдөн байцаах багийг ирэхээр төлөвлөгөө боловсруулна."

"Ойлголоо." Чэнь Гө аль эрт л явахад бэлдсэн байлаа. Түүний энд ирсэн бүх зорилго биелсэн шүү дээ.

Ингээд бүгдээрээ сургуулийн хашаанаас гарцгаалаа. Цагдаа нар хаалгыг битүүмжилж, нэмэлт хүч ирэхийг хүлээв. Үүр цайх үед мөрдөн байцаах баг эцэст нь ирсэн бөгөөд тэд яг л Ли байцаагчийн багийнхантай адил ядарч туйлдсан харагдаж байлаа.

Товчхон мэндчилсний дараа Ли байцаагч Чэнь Гөг өөрийнхөө машинаар гэрт нь хүргэж өгөв.

"Дахиад л нэг нойргүй шөнө." Цагдаагийн машины арын суудалд суух үедээ л Чэнь Гө сая нэг тайвширлаа. Тэр залхуутайгаар суниагаад суудал дээр хэвтэв.

"Цагдаагийн машин дотор ингэж тухтай явж чаддаг чам шиг хүнтэй би анх удаа л таарч байна" гэж Ли байцаагч бага зэрэг дургүйцсэн өнгөөр хэллээ. "Дашрамд хэлэхэд, надад одоог хүртэл чамаас асуух боломж олдоогүй хэдэн асуулт байна."

"Тэгвэл, битгий асуу л даа." Чэнь Гө аль хэдийн ямар асуулт болохыг нь тааварлаж байлаа. Тэр үүргэвчээрээ нүүрээ бүтээж, унтсан дүр эсгэв.

"Чи яагаад шөнө дунд Баруун Жюжян хотын Хувийн Академи руу явах болов? Бас охины нас барсан цагийг чи яаж яг таг мэдсэн юм бэ? Энэ чинь дөрвөн жилийн өмнөх хэрэг, шүүх эмнэлгийн эмч хүртэл хавтаст хэргийг нь харахгүйгээр надад нас барсан цагийг нь хэлж чадахгүй байхад, чи үүнийг яаж чаддаг байна аа. Энэ зүгээр л дэндүү хэвийн бус байна." Ли байцаагч жолоочийн суудал дээрээ сууж, машинаа асаалаа.

Харин Азаар л таачихлаа." Чэнь Гө биеэ эргүүлэв. "Санбао ах аа, та кондишнээ асаачихаж болох уу?"

"Чи надад ёс алдаж эхэлж байна уу, үгүй юу?" Ли байцаагч кондишнээ асаах зуураа бувтналаа. Яг энэ үед түүний утас гэнэт дуугарав.

"Ах аа, таны утас."

"Дахиад хэдэн үг дуугарвал чамайг машинаас шидэх үү, болих уу гэдгээ шийднэ шүү?" Ли байцаагч утсаа авахаасаа өмнө хэн залгаж байгааг харлаа. Тэр нэг ч үг дуугарсангүй, бас утасны цаанаас ч ямар ч чимээ гарсангүй. Дуудлага гурван секундын дараа тасрав.

"Цагдаа руу тоглоом хийж залгадаг ийм зоригтой хүн хэн байдаг байна аа?" Чэнь Гө эргэж хартал Ли байцаагчийн царайны хувирал зөөлөрсөн байхыг хараад ихэд гайхлаа.

"Энэ манай эхнэр байгаа юм. Намайг онцгой даалгаварт явах бүрд, тэр миний аюулгүй байдлыг шалгахаар ингэж залгадаг юм. Зарим даалгаврын онцгой шинж чанараас болоод бид хоёр өөрсдийн гэсэн харилцах аргатай болсон. Үгээр ярихын оронд, намайг утсаа авах л юм бол, энэ нь намайг зүгээр байгааг илтгэдэг юм."