Давчуухан эмэгтэйчүүдийн унтлагын өрөөнд хачин эвгүй үнэр түгжээ. Гар чийдэнгийн гэрэл тусах хязгаараас цаана байх орны даавуу яг л доороос нь ямар нэгэн зүйл мөлхөн гарч ирж байгаа мэт зөөлөн хөдөлнө. Цонхны шилийг борооны дуслууд тогших аж. Гадаа шуурга шуурч байсан ч, дотуур байрны өрөөн дотор жихүүдэс хүрмээр чив чимээгүй байлаа.

Цагаан цаасан дээгүүр гараа унжуулан барьсан Чэнь Гө өөрийгөө тайвшруулахыг хичээв. Үзэгний сүнсийг дуудах тарни уншсаны дараа, хэн нэгэн гарыг нь давхарлаж барьсан мэт гарынх нь ард илт даралт мэдрэгдлээ. Чэнь Гө бүр нөгөө хүнийхээ хурууны үзүүрээс хүйтэн жихүүдсийг хүртэл мэдэрч чадаж байв.

"Үзэгний сүнс, Үзэгний сүнс, чи миний өмнөх амьдралын сүнс, би чиний энэ амьдралын сүнс. Хэрвээ чи бидэнтэй хамт байгаа бол цаасан дээр тойрог зураач."

Чэнь Гө дахин тарни уншихад гарынх нь ард мэдрэгдэх хүйтэн оргих мэдрэмж улам хүчтэй болов. Гэвч түүний гайхшралыг төрүүлж, гарт нь байх үзэг босоо хэвээр л байлаа. Тэр ямар ч тойрог зурсангүй, бүр ямар ч хөдөлгөөн хийсэнгүй.

[Үзэгний сүнс миний дуудлагад хариулахаас татгалзаад байгаа хэрэг үү?]

Өрөөн доторх уур амьсгал нүдэнд харагдаж, гарт баригдам хүнд дарамттай болж, гарынх нь ард мэдрэгдэж байсан жихүүдэс одоо гар руу нь тэр чигтээ тархжээ.

[Ямар нэг шалтгаанаар, энэ өрөөнд надтай хамт дахиад хэд хэдэн 'хүн' нэмэгдээд ороод ирчихсэн юм шиг санагдаад байх чинь.]

Чэнь Гө анхаарлаа төвлөрүүлэхэд харанхуйд түүний нүдний хүүхэн хараа томорч эхлэв. Магадгүй Инь Ян харааны нөлөөгөөр тэрээр эргэн тойронд нь зогсож буй бүдэг бадаг гурван сүүдрийг олж харлаа. Тэд гараа сунган Чэнь Гөгийн алган дахь үзгийг атгахыг оролдож байв.

[Гурав гэж үү?]

Чэнь Гөгийн зүрх зогсох шахсан ч, нүдээ цавчих төдийд л өнөөх харсан дүр зураг нь тэр дороо алга болов. Гэвч тэднийг явчихлаа гэсэн үг биш гэдгийг Чэнь Гө мэдэж байлаа. Чэнь Гөгийн алга яг л мөстэй хүйтэн усанд дүрчихсэн мэт болжээ. Гарт нь байгаа үзгийг түүнээс гадна дор хаяж өөр гурван гар давхарлаж барьж байгаа гэдэгт тэр бүрэн итгэлтэй байлаа.

[Миний дуудлагад гурван 'хүн' хариу өгчихлөө. Энэ миний 'Сүнснүүдийн ивээл' цолны нөлөө юм болов уу?]

Чэнь Гө үүний учрыг олохыг хичээж байх зуур, цаасан дээгүүр тогтож байсан үзэг гэнэт хөдлөв. Маш бага зэрэг хөдөлсөн ч Чэнь Гө үүнийг гарцаагүй тод мэдэрсэн юм.

[Эхэлж байна уу?]

Хажуудаа тавьсан гар чийдэнгийнх нь гэрэл бүдгэрэх шиг болж, Чэнь Гөг анхааралтай ширтэх зуур түүний гарт байх үзэг хөдөлж эхэллээ. Үзэгний үзүүр цаасны гадаргуу дээр хүрч, цаас үзэг хоёрын үрэлцэх чимээтэй хамт удалгүй улаан өнгийн тойрог зурагдлаа.

Чэнь Гө өөрөө огт хөдлөөгүй гэдгээ мэдэж байсан ч цаасан дээр үнэхээр л зураас гарсан байв. Чэнь Гө тэрхүү тойрог руу ширтэхдээ энэхүү нэмэлт даалгаврын нэрийг саналаа—'Явахаас татгалзсан Үзэгний сүнс'.

Үзэгний сүнс тоглоомд гурван том цээрлэл байдаг. Нэгдүгээрт, чи хэрхэн үхэх тухайгаа асууж болохгүй; хоёрдугаарт, чи хэр урт наслах тухайгаа асууж болохгүй; гуравдугаарт, тоглож дууссаныхаа дараа сүнсийг заавал буцааж явуулах ёстой. Эдгээрийн аль нэгийг л зөрчвөл аймшигт үр дагаварт хүргэдэг.

Гурав дахь нь хамгийн ноцтой нь юм. Учир нь хэрэв сүнсийг буцааж явуулахгүй бол, тэр сүнс өөрийг нь дуудсан хүний хажууд үүрд хорогдож, эцэстээ хорлонт сүнс болон хувирч тоглосон бүх хүмүүсийг хөнөөдөг байна.

"Ямар нэг муу зүйл болохгүй гэж найдъя" хэмээн Чэнь Гө бувтнаад, анхаарлаа цагаан цаас руу буцаан хандууллаа. Улаан тойргийг цаасны чаг голд нь зурсан байв.

[Миний дууг сонсчихсон бололтой. Одоо асуулт асуух цаг боллоо.]

Чэнь Гө зөвхөн хар гар утасны даалгаврыг биелүүлэхээр л энд ирсэн. Тэр сүнсийг уурлуулах ямар нэгэн тэнэг зүйл хийхийг огтхон ч хүссэнгүй.

Үзэгний сүнсийг амжилттай дуудах нь ховор тохиолдол байлаа. Чэнь Гө хэсэг бодсоны эцэст хамгийн их мэдэхийг хүсэж байсан асуултаа асуув. "Үзэгний сүнс, Үзэгний сүнс, чи миний аав ээжийг хаана байгааг мэдэх үү?"

Усанд ордог онгоцон дахь Хар дарсан зүүдний даалгаврыг хийж байх үедээ Чэнь Гөгийн хамгийн их уулзахыг хүссэн хүмүүс нь түүний эцэг эх байсан боловч түүний хүсэл биелээгүй юм. Гэсэн хэдий ч энэ нь түүний эцэг эх ядаж л амьд байгаа гэдгийг түүнд баталж өгсөн. Тэд зүгээр л ор сураггүй алга болсон байв.

Чэнь Гө энэ асуултын хариуг мэдэхийг үнэхээр их хүсэж байв. Гэтэл түүнийг энэ асуултыг асуух үед гарт нь байсан үзэг гэнэт чичирхийлж эхэлсэн бөгөөд үзэгний гадаргуу дээр бүдэгхэн цууралт үүсэхийг хараад тэрээр ихэд гайхлаа.

[Түүний төсөөлж байснаас тэс өөр зүйл болчихлоо. Миний асуулт тийм хэцүү байсан юм байх даа?]

Хоёр минутын дараа өрөө арай гэрэлтэй болчихсон юм шиг хачин мэдрэмж Чэнь Гөд төрөв. Гарт нь байсан үзэг дахин хөдөлж өөр нэгэн тойрог зурлаа.

[Энэ одоо юу гэсэн үг вэ? Алгасъя гэсэн үг үү?]

Чэнь Гө цаасан дээрх хоёр тойргийг хараад Үзэгний сүнсний эвгүйрхсэн байдлыг мэдэрч байлаа. Сүнс хүртэл түүний асуултын хариултыг мэдэхгүй байв.

[Хачирхалтай юм, гэхдээ миний эцэг эхийн алга болсон хэрэг харагдаж байгаагаасаа ч илүү төвөгтэй бололтой.]

Чэнь Гө нэлээд удаан чимээгүй суулаа. Энэ асуултаас өөр түүнд үнэхээр мэдэхийг хүссэн сонирхолтой зүйл байсангүй.

[За яах вэ, энэ нэмэлт даалгаврыг л дуусгахын тулд зүгээр л ямар нэгэн хамаагүй асуулт асуучихъя.]

Гарт нь мэдрэгдэж байсан хүйтэн жихүүдэс мөр рүү нь тархсан байв. Тоглоом үргэлжлэх тусам Чэнь Гөгийн биеийн тал хэсэг нь мэдээ алдаж, өөрийнх нь удирдлагаас аажмаар гарч байгааг тэр мэдэрч байлаа.

"Тэгвэл би өөр асуулт асууя. Үзэгний сүнс, Үзэгний сүнс, миний ирээдүйн эхнэр хэн болохыг хэлж өгөөч?"

Үзэг чичирхийлж, ямар нэгэн зүйл ирж байгааг илтгэх мэт гар чийдэнгийн гэрэл анивчлаа. Өрөөн доторх уур амьсгал дахин түгшүүртэй болж эхлэв. Цонх нугасандаа харжигнан дуугарч, борооны дуслууд өрөө рүү нэвчиж байлаа. Тэнгэрт аянга цахилах тэрхэн мөчид, ханан дээр дөрвөн хүний сүүдэр тусах нь харагдав.

Чэнь Гөгийн гар суларч, гарт нь байх үзэг хөдөлж эхлэхийг тэр мэдэрлээ. Цагаан цаасан дээр цусан улаан үсгүүд гарч ирж, удалгүй эхний ханз бичигдэж дууслаа.

"Шюй? Шюй Вань юм уу?" Зүгээр л тоохгүй асуусан асуулт байсан хэдий ч Чэнь Гөгийн сонирхол гойд ихээр татагдав. Түүний гарт байх үзэг үргэлжлүүлэн хөдөлсөн боловч, хоёр дахь ханзыг бичиж эхлэх үедээ гэнэт таг зогсчихов.

"Юу болоод байна аа?"

Чэнь Гө энэ бүх үйл явцад ердөө л ажиглагч байлаа. Тэр ямар ч хүч гаргаагүй боловч, гарт нь байх үзэг хүчтэй чичирхийлж, гадаргуу дээр нь улам олон цууралт үүсэж эхлэв.

ТАС!

Харанхуй унтлагын өрөөнд маш олон хүч хоорондоо тэмцэлдэх шиг боллоо. Бал үзэг эцэстээ даралтыг тэсвэрлэлгүй бутран хагарчээ. Тэдгээр хүчнүүдийн нэг нь бууж өгсөн бололтой. Тэгтэл Чэнь Гө нэгэн цочирдом зүйлийг олж харлаа.

Түүний гарт байсан үзэг аль хэдийн бичигдсэн байсан "Шюй" гэх нэрийг дарж баллаад, хажууд нь шал өөр нэр бичиж орхилоо!

"Жан... Я?"

Энэ нэр цагаан цаасан дээр хэтэрхий төгс, тов тодорхой бичигдсэн байсан тул Чэнь Гө хэрхэн хариу үйлдэл үзүүлэхээ ч мэдсэнгүй. "Үзэгний сүнс, чи бүр анхнаасаа л энэ нэрийг бичих гэж байсан гэдэгтээ итгэлтэй байна уу?"

Ямар ч хариу ирсэнгүй бөгөөд гарт нь байсан жихүүдэс ч арилан одлоо. "Үзэгний сүнс, чи бидэнтэй хамт байна уу? Хэрвээ чи намайг сонсож байвал тойрог зураарай."

Инь энергийн мэдрэмж бүрмөсөн сарниж, өрөө хэвийн байдалдаа оров. Үзэгний сүнс салах ёс гүйцэтгэлгүйгээр яваад өгсөн бололтой. Гэсэн хэдий ч аюулгүй байдлын үүднээс Чэнь Гө, "Үзэгний сүнс, Үзэгний сүнс, чи миний өмнөх амьдралын сүнс, би чиний энэ амьдралын сүнс. Хэрвээ чи явахыг хүсэж байвал, тэгээд яв даа" хэмээн тарни уншлаа.

Тоглоом аль хэдийн дууссан тул Чэнь Гө сандлаас босож зогсов. Түүнийг атгалтаа сулруулах төдийд, гарт нь байсан бал үзэг хэд хэдэн хэсэг болон хугарч уналаа. Энэ бүх зүйл нэг л өрөвдмөөр харагдаж байв.

[Миний тоглосон Үзэгний сүнс тоглоом бусдынхаас гарцаагүй өөр юм аа.]

Чэнь Гө утсаа аваад шууд дамжуулалтынх нь үзэлт 20,000 давсныг хараад ихэд цочлоо—энэ нь түүний хувьд цоо шинэ дээд амжилт байв.