361-р бүлэг : Зорилго

Өрөөнийхөө хаалганд нуруугаараа налан суусан Санни хоосорч, үгүй болсон зүрхээ тэврэн урагш ширтэнэ.

Тэр амьдралынхаа ихэнх хугацааг ганцаараа өнгөрөөсөн. Нэг жилийн өмнө тэр Зүүдний ертөнцөд ч мөн ганцаараа хөл тавьсан. Харин одоо тэр дахин ганцаараа үлджээ.

Гэвч анхнаасаа ямар нэгэн зүйлгүй байх, нэгэнт олсон зүйлээ алдах хоёр тэс өөр байлаа. Жинхэнэ нөхөрлөл, халамж ямар үнэ цэнтэйг мэдэрсний дараа тэдгээргүйгээр оршин тогтнох нь тарчлаан мэт санагдана. Касситай өөрийг нь холбож байсан холбоог өөрийн гараар хэрцгийгээр тасалсны дараа сэтгэл дээр нь цус алдаж буй шарх үлдсэн мэт санагдана.

Энэ хорвоод үнэхээр санаа тавьдаг байсан цөөхөн хүнийх нь нэг тэр шүү дээ...

Түүнийг шархлуулах нь зөв ч юм шиг, сэтгэл ханамжтай ч юм шиг санагдсан. Гэвч тайвшралын оронд түүнд улам их шаналал л авчирахаас цаашгүй ажээ.

Гэсэн ч тэр хийсэн зүйлдээ харамссангүй. Заримдаа хүн зовлонг тэвчихээс өөр аргагүй байдаг. Заримдаа өвдөлт зайлшгүй хэрэгтэй.

Одоо Санни үнэхээр ганцаараа болсон. Касси ч мөн адил.

Тэгээд Зүүдний ертөнцийн хаа нэгтээ Нефис ч бас ганцаараа байлаа.

Тэд гурав боломжгүйг боломжтой болгосон ч, үүнийхээ төлөө асар хүнд үнэ төлжээ.

'Ямар аймшигтай бүтэлгүйтэл вэ.'

Нэг өдөр Мартагдсан Эргээс зугтаж чадна гэж, тэр бүү хэл урьд нь мөрөөдөж байснаасаа ч хамаагүй хүчирхэг болно гэж хэн төсөөлөх билээ. Гэтэл эцэст нь харанхуй өрөөний шалан дээр суучихаад өөрийгөө өрөвдөн зовж байх гэж.

Санни хорсолтой ярвайж, толгой сэгсрээд санаа алдлаа.

'Өөрийгөө өрөвдөхөө боль.'

Түүнд хийх ажил их байв. Төлөвлөх зүйл бүр ч их байлаа. Мартагдсан Эргийн аймшгууд ард хоцорсон ч шинэ аюулууд аль хэдийн алсад хүлээж байв.

Юуны өмнө тэр одоо өөр хүний эрхшээлд орсон байлаа. Эзэн нь өөр ертөнцөд төөрч, буцаж ирэх магадлал бараг байхгүй байсан ч Санни тэд дахин уулзах нь хувь тавилан гэж мэдэрч байв.

Тэр энэ талаар юу гэж бодохоо ч ойлгохгүй байлаа. Эсвэл бүр зөв хэлбэл, Нефисийг буцаж ирээсэй гэж цөхрөн хүсэн мөрөөддөг мөртлөө, бас үхээсэй гэж хүсдэг байв. Түүнд төрөх мэдрэмжүүд нь хүчтэй, бүхнийг эзэмдсэн, үнэхээрийн замбараагүй.

Гэсэн ч Санни түүнийг үхнэ гэж бодсонгүй.

Яагаад ч юм тэр Нефис Зүүдний ертөнцөд амиа алдахгүй, эцэстээ энд эргэн ирнэ гэдэгт итгэлтэй байлаа. Магадгүй хэдэн сарын дараа, магадгүй хэдэн жилийн дараа. Гэхдээ тэр дахин нэг удаа боломжгүйг боломжтой болгож, бодит ертөнцөд эргэн ирэх нь гарцаагүй.

Асуулт нь... яаж?

Тэр Хөндий уулсаар дамжин хүн төрөлхтний нутагт хүрэх үү, эсвэл өөр зүгийг сонгох уу? Мартагдсан Эргийн зүүн, баруун, хойд талд юу байдгийг тэд бараг мэддэхгүй байлаа. Гэхдээ тэдгээр газар нь манангаар бүрхэгдсэн аймшигт уулсаас дээр байна гэдэгт тэр итгэсэнгүй.

Энэ эргэлзээ нь энгийн нэг шалтгаантай. Тэр газруудын талаар ямар ч мэдээлэл байгаагүй.

Өөрөөр хэлбэл, Зүүдний ертөнцийн тэр бүсүүдээс эргэн ирж түүхээ ярьсан хүн нэг ч байгаагүй гэсэн үг.

Хэдийгээр үхлийн аюултай ч Хөндий уулс ядаж хүн төрөлхтөнд танил байлаа. Өөрчлөгдөж буй Од үл мэдэгдэх газар луу сохроор орохоос илүүтэйгээр тэнд азаа үзэхийг сонгох магадлал өндөр.

Эцсийн эцэст, огт мэдэхгүй зүйлээс илүү аюултай зүйл гэж үгүй.

'Үл мэдэгдэхүүд...'

Санни хөмсгөө зангидлаа.

Энэ бас түүний шийдэх ёстой өөр нэг асуудал байв. Эсвэл илүү зөвөөр хэлбэл, ашиглаж болох боломж.

Өөрийн [Хувь тавилантай] Шинж чанарын ачаар Санни Нэхэгч хэмээх оршихуйн өвтэй учирч, бурхдын нууцын өчүүхэн хэсгийг олж харсан.

Тэнд үзсэн зүйл нь түүнийг айлгаж, бас амьсгаа нь давчдуулам болгосон. Мөрөөдөл, хар дарсан зүүдээр дүүрэн сүйрсэн тэр нутагт хэмжээлшгүй их нууц оршиж байлаа. Үхсэн бурхад, Үл мэдэгдэхүүд, Хагас Бурхад, Хар дарсан зүүдний Хараалыг хооронд нь холбосон аварга том хээ угалз.

Зүүдний ертөнцийн эртний ноёрхогчид аль хэдийн үгүй болсон.

Гэвч Хар дарсан зүүдний Хараал үлдсэн.

Харин хүн төрөлхтөн, тэр дундаа Санни өөрөө ч гэсэн түүгээр дамжин тэр хээ угалзын нэг хэсэг болохоос өөр аргагүй болжээ.

Саннигийн хамгийн агуу хүсэл бол өөрийн хувь тавиланг өөрөө захирах явдал. Гэвч үүнийг мэдлэггүйгээр хийж чадахгүй.

Одоо юуг хайхаа мэддэг болсон тул тэр бурхдын хувь тавилан, Хар дарсан зүүдний Хараалын үүслийн талаарх ойлголтоо улам гүнзгийрүүлэх ёстой.

Хэн мэдлээ. Магадгүй эрх чөлөөнийх нь түлхүүр тэнд нуугдаж байгаа ч юм билүү.

...Тэгээд бас Хаад байлаа.

Үүний тухай бодоход л царай нь барайв.

'Яагаад бүх юм ийм төвөгтэй байдаг юм бэ...'

Яагаад зүгээр л Дурсамжийн дэлгүүр нээгээд, баян цатгалан амьдраад, тайван байж болохгүй гэж?

Анхнаасаа энэ л түүний төлөвлөгөө байсан. Гэвч сүүлийн үед ил болсон үнэнийг сонссоныхоо дараа Санни тэр төлөвлөгөөнийхөө бодит байдалд эргэлзэж эхэлжээ.

Кастерын хэлснээр бол хүн төрөлхтний ертөнцийг сүүдрээс удирддаг хэсэг хүмүүс байдаг аж.

Түүнээс ч илүү нь, Санни өөрөө ч мэдэлгүй тэдний төлөө ажиллаж байсан бололтой.

Нэгэн цагт Нефисийн өгсөн анхааруулга түүний санаанд орлоо. Зөвхөн оршин байдгийг нь мэдсэн төдийд амиа алдахад хүргэж болох үгс байдаг гэж тэр хэлж байсан.

Харин одоо...

Тэр тийм үгсийн маш олныг мэддэг болсон.

Хаад.

Ноёрхол.

Удамшлын Дурсамжууд...

Тэр юу ч мэдэхгүй дүр эсгээд, тэр хүчирхэг оршихуйнууд хэзээ ч өөр лүү нь анхаарлаа хандуулахгүй гэж найдах ёстой юу?

Эсвэл тэр өдөр ирэхээс өмнө ямар нэгэн бэлтгэл хийх ёстой юу?

Өөрчлөгдөж буй Одын хувь тавилантай салшгүй холбогдсон, зөвхөн төрснөөрөө л энэ нууц хуйвалдааны төвд орсон түүний хувьд өөр сонголт үнэхээр байсан гэж үү?

'Ямар төвөгтэй юм бэ...'

Тэр яг юу хийх ёстой байсан юм?

Төлөвлөгөө бий юу?

Санни санаа алдлаа.

Үнэндээ төлөвлөгөө маш энгийн. Хаадын талаар аль болох ихийг мэдэх. Гэхдээ хэзээ ч өөр лүү нь хараагаа тусгахгүй байдлаар.

Зүүдний ертөнцийн өнгөрснийг судалж, Хагас Бурхад, бурхад, Үл мэдэгдэхүүдийн талаар ойлголтоо гүнзгийрүүлэх.

Гэхдээ хамгийн чухал нь...

Илүү хүчирхэг болох.

Маш, маш их хүчирхэг болох.

Нефис эргэн ирэхэд тэр хамгийн муу нөхцөлд ч бэлэн байх ёстой.

Санни өөрийн мэдэх Өөрчлөгдөж буй Од өөрт нь байгаа эрх мэдлээ ашиглан түүнийг дарлахгүй гэж үнэндээ бодож байлаа. Бараг л итгэлтэй байсан.

Зөвхөн тэдний хоорондын холбооноос болоод ч биш. Харин Нефисийн гажуудсан сэтгэлгээнд ийм зүйл хийх нь өөрийнх нь хэмжээнд хүрэхгүй өчүүхэн хэрэг байх байсан.

Гэхдээ тэр энэ өчүүхэн найдвараас болж өөрийгөө хамгаалах арга хэмжээгээ орхихгүй. Хэрэв Нефис үнэхээр түүнийг боол болгохоор шийдвэл...

Тэдний нэг нь үхэх болно.

Босож зогссон Санни ширээ лүүгээ алхаж очоод нийлэг цаасан дээр:

[0/2000].

гэж бичив.

Дараа нь Бичээсээ дуудан харснаа доор нь өөр нэг мөр тоо нэмлээ.

[2749/3000].

Гэвч бичиж дуусахаас нь өмнө Бичээс гялалзан өөрчлөгдөв.

Сүнсний мөн чанарын хэмжээ өсжээ.

Санни хэдэн хором Бичээсийг ширтэж зогсоод, тоогоо засав.

Дараа нь үзгээ тавиад өмнөх цаасаа харлаа.

[0/2000] < [2773/3000].

"За."

Ингээд боллоо.

Энэ бол түүний төлөвлөгөө.

Өнөөдрөөс эхлээд энэ л түүний амьдралын зорилго байлаа.