Санни өмнө нь овоолсон номнуудыг хэсэг ширтэн, барайсан царайтай суулаа. Хэсэг хугацааны дараа тэр хүндээр санаа алдав.

Тэгэхээр хүн төрөлхтнийг бүхэлд нь далдуур удирдан нөлөөлдөг нуугдмал хүчнүүд үнэхээр байдаг байжээ. Тэдний эрх мэдэл харагддаггүй хэр нь айдас төрүүлэм байлаа. Одоо тэр тэдний нэрийг мэддэг болсон. Хаад дор хаяж Засгийн газартай эн зэрэгцэхүйц, магадгүй бүр түүнээс ч илүү хүчтэй.

Эдгээр хоёр ноёрхогч хүчний, нэг нь ил тод, нөгөө нь нууц байдлаар оршдог тэр харилцаа яг ямархуу болох нь тодорхойгүй байлаа. Гэхдээ одоохондоо Хаадын гарт төвлөрсөн эрх мэдэл ямар агуу болохыг бүрэн ойлгох нь тийм ч чухал биш.

Харин дэлхий түүний төсөөлж байснаас огт өөр гэдгийг ойлгох нь чухал байв.

Энэ нь хавьгүй аюултай ертөнц байжээ. Яагаад гэвэл эрх мэдэлтэй бүх хүмүүсийн нийтлэг нэг зан чанар байдаг.

Тэр нь өөрсдийн эрх мэдэлд халдах хүмүүсийг үзэн ядах явдал. Энэ бол хүний мөн чанар.

Хүчтнүүдийн дунд хамгийн хүчтэй нь ганцхан байдаг. Тиймээс тэр үргэлж өөрөөс нь илүү хүчирхэг болох гэж буй хүмүүсээс болгоомжилдог. Захын дүүргийн гэмт бүлэглэлийн толгойлогчид хүртэл өөрсдийн баруун гарууд нь эрх мэдлийг нь булаачих вий гэж үргэлж сэрэмжилдэг байсан бөгөөд хэтэрхий амжилттай болсон хүмүүсээ хүч хэрэглэн тоглоомоос зайлуулдаг байв.

Харанхуй хотод Ганлауг төмөр нударгаар ноёрхож, өөрт нь захирагдалгүйгээр хүчирхэг болохыг зориглосон хүн бүрийг устгадаг байсан.

Хаад ч мөн адил байх нь гарцаагүй.

Санни өөрийн насны хүний хувьд байж боломгүй хүчтэй болсон бөгөөд цаашдын боломж нь бүр ч аймшигтай байсан учраас Хаад түүнийг өөрсдийн хяналтаас гадуур оршин тогтнохыг хэзээ ч зөвшөөрөхгүй.

Аз болоход тэд түүний жинхэнэ хүч чадлыг хараахан мэдээгүй. Гэхдээ Саннигийн гол зорилго бол илүү хүчирхэг болох. Нефисээс хоцрохгүй байхын тулд аль болох хурдан, аль болох хүчтэй болох.

Тэгэхээр...

Энэ том асуудал болох нь гарцаагүй. Гэнэт Сэрэгсдийн нийгмийн зарим зүйл илүү ойлгомжтой болов.

Нэгэнтээ Мастер Жет хэзээ ч Гэгээнтэн болж чадахгүй гэдгийг Санни мэдэж авсан.

Гурав дахь Хар дарсан зүүдийг сорихын тулд онцгой хүчирхэг багийнхан, мөн асар их дэмжлэг шаардлагатай. Харин Жетэд "асуудалтай зан чанар"-ынх нь улмаас аль аль нь байгаагүй.

Хаад өөрсдийн эрхшээлээс гадуур хүнийг Гэгээнтэн болохыг зөвшөөрөх байсан гэж үү? Зүүдний ертөнцийн талаарх ихэнх мэдлэг, нөөц боломж Өв залгамжлагч овгуудын мэдэлд байсан. Ялангуяа өндөр Зэрэглэлтэй холбоотой бүх зүйл.

Харин тэр овгуудыг Хаад удирддаг.

Өөрөөр хэлбэл тэд дэмжлэг үзүүлэхээс татгалзах төдийд л хэнийг ч Гэгээнтэн болохоос сэргийлж чадна.

Жет шиг авьяастай хэчнээн олон Мастер Хамгийн Дээдүүдийн аль нэгэнд үйлчлэхээс татгалзсаныхаа төлөө дарагдан, цааш ахиж чадахгүй байгаа бол?

Ядаж Засгийн газарт үйлчилдэг хэдэн Гэгээнтэн байдаг. Гэхдээ тэд үнэндээ хэнд үнэнч байдаг юм бол?

'Үзэн ядаж байна... Би үүнийг үнэхээр үзэн ядаж байна...'

Мэдээж энэ бүхэн зөвхөн өөрийнх нь таамаг гэдгийг Санни мэдэж байлаа. Гэсэн ч нэг зүйл тодорхой байв.

Мастер Жетийн өмнө нь тавьсан сонголт түүний бодож байсан шиг энгийн байгаагүй. Үнэндээ тэр агуу овгууд, жижиг овгууд, Засгийн газар, эсвэл бие даасан байдлын хооронд сонголт хийж байсангүй.

Тэр Хаадад үйлчлэх эсэхээ сонгож байсан юм.

Мөн Өөрчлөгдөж буй Одтой холбогдсон холбоо нь энэ сонголтыг бүр ч төвөгтэй болгожээ.

'...Хараал ид!'

Санни санаа алдан эргэн тойрны номын тавиуруудыг хараад босов. Тэр дахиад хэдэн ном унших хэрэгтэй байлаа...

___

Олон цагийн дараа тэр хамгийн сүүлчийн номоо буцаан тавиад ядарсан янзтай нүүрээ илэв.

Одоо тэр Зүүдний ертөнцийн өнөөгийн газарзүй болон нөхцөл байдлын талаар хангалттай мэдлэг хуримтлуулсан тул толгойд нь төлөвлөгөөний үр соёолж эхэлжээ.

Гэхдээ түүнд илүү их мэдээлэл хэрэгтэй байв. Харин түүнийг эндээс олох боломжгүй. Үүний тулд тэр нэгэн хуучны танилтайгаа уулзах ёстой.

Гэсэн ч тэр Хаадын талаар арай илүү мэдээлэл олж чадсан байлаа.

Астерион.

Ки Сон.

Валор овгийн Дөш.

Эдгээрээс сүүлийнх нь хамгийн алдартай нь байж магадгүй.

Агуу овгийн өв залгамжлагч тэрээр хүн төрөлхтөн Зүүдний ертөнцийн хойд нутагт хэрхэн тэлсэн тухай болон Зүүдний ертөнцийн төв гурван Цайзын нэг болох Бэхлэлтийн түүхийг өгүүлсэн бичвэрүүдэд олонтоо дурдагджээ.

Үнэндээ Саннигийн яг одоо сууж байсан сандлыг хийхэд ашигласан Титаныг устгасан хүн нь хүртэл тэр байсан аж.

'Хүчирхэг...'

Гэвч үүнээс хойш Гэгээнтэн Дөш ор сураггүй алга болжээ.

Түүний үхлийн талаар хаана ч дурдсангүй. Харин Дөш овгийн удирдлага албан ёсоор түүний үеэлүүдийн гарт шилжсэн байлаа.

Ки Сон арай бага алдартай байсан. Дөшөөс ялгаатай нь тэр анх жижиг Өв залгамжлагч овгоос гаралтай байсан бөгөөд өөрийн хүчээр овгоо агуу овгийн зэрэгт хүргэжээ.

Сон овгийн түшиц газар болох Рейвэнхарт нь Зүүдний ертөнцийн хүн төрөлхтний хоёр дахь том суурин байлаа.

Түүний нөлөө бүхий бүс бусад хоёр нутгаас аймшигтай аюултай бүсүүдээр тусгаарлагддаг.

Ялангуяа Валор овгийн хил хамгийн үхлийн аюултай байсан ч харьцангуй нарийн зурвас байжээ.

Саннигийн олж мэдсэнээр Ки Сон одоо хүртэл овгоо удирдсаар байгаа ч олон нийтийн өмнө тун ховор гардаг аж.

Түүнийг энэрэнгүй, өгөөмөр хүн гэж мэддэг байсан ч олдсон мэдээлэл үүгээр бараг дуусчээ.

Түүний өргөмөл охид ихэнх ажлыг өмнөөс нь хийдэг бололтой.

Сейшан ч тэдний нэг байсан.

Гэвч тэр Мартагдсан Эрэг дээр хэтэрхий удаан гацсан тул ямар ч бичвэрт дурдагдаагүй байв. Харин хамгийн сүүлд Астерион.

Тэр гурваас хамгийн нууцлаг нь байлаа.

Түүнийг хаанаас гаралтай, Эвдэрхий Сэлмийн бүлэг тараад дараа нь хаашаа явсныг хэн ч мэддэггүй бололтой. Үнэндээ түүний тухай бараг юу ч бичигдээгүй байлаа.

Наад зах нь харахад Астерион гурав дахь агуу Өв залгамжлагч овогтой холбоогүй байв.

Ер нь ямар ч жижиг овогтой ч холбоогүй.

Санни түүнийг хэзээ, хаана төрснийг ч олж мэдэж чадсангүй. Амьд байгаа эсэхийг нь бүр ч үгүй.

Эвдэрхий Сэлэм болон түүний хамтрагчдын гавьяаг өгүүлсэн бичвэрүүдэд хүртэл Астерионы нэрийг зүгээр л хавчуурга маягаар дурдсан байв.

Тэр хэзээ ч онцгой хувь нэмэр оруулаагүй мэт. Санни толгой сэгсрэн ярвайв.

'Тааварлая... тэр гурвын хамгийн аймшигтай нь энэ байх.'

Ийм дүгнэлт хийх амархан байлаа.

Учир нь...

'Адилхан хүн л адилханыгаа танина.'

Санни өөрөө ч бараг хаана ч дурдагддаггүй, хийсэн зүйлээ үргэлж нуудаг хүн.

'Өө... толгой өвдөж байна...'

Хамгийн муу нь энэ бол түүний хийх ёстой судалгааны ердөө тал нь байв. Тэр Зүүдний ертөнц дэх хүн төрөлхтний байр суурь болон Хаадын талаар хангалттай зүйл сурсан.

Одоо түүнд Бурхад, Хагас бурхад, мөн Үл мэдэгдэхүүдийн талаар аль болох ихийг мэдэх хэрэгтэй байлаа.

...Жулиус багштай уулзах цаг болжээ.

Мэдээж Санни хуучин багш дээрээ хоосон гартай очиж болохгүй.

Номнуудыг хажуу тийш түлхэн, ширээнд суурилуулсан терминалыг идэвхжүүлээд хэсэг тээнэгэлзсэний эцэст ингэж бичив.

"...Мартагдсан Эрэг бүхэлдээ гурван хэсэгт хуваагддаг бөгөөд тэдгээрийн нэг нь..."