528-р бүлэг : Хувийн хэв маяг

Хэд хоногийн дараа Санни зочны өрөөндөө сууж, Рэйн яг ижил цохилтыг дахин дахин давтаж байгааг ажиглаж байлаа. Түүний нүдэнд зөрүүд шийдэмгий байдал гэрэлтэж, дасгалын сэлэм нь дахин дахин дээш өргөгдөн бууж, агаарыг исгэрэх чимээ гарган зүснэ.

...Үнэндээ түүний байрлал муугүй байв.

Эффи энэ үед Цайзуудын хооронд аялж явсан тул хэсэг хугацаанд унтлагын капсулаасаа гараагүй байлаа. Санни, Рэйн хоёр л үлдсэн нь бэлтгэлийг хавьгүй нам гүм болгожээ.

'Эцэст нь нэг тайван амгалан байдал...'

Ингэж бодож байсан ч Санни сүүлийн үед гэр нь жаахан эзгүйрчихсэн мэт санагдахаас өөрийгөө барьж чадсангүй.

Тэр санаа алдав.

Түүний толгойд өөр зүйлс ч эргэлдэж байлаа.

Касситай хийсэн тохиролцооны өөрийн хэсгийг дуусгасан болохоор Хар дарсан зүүд рүү хийх аялал улам ойртож байв. Санни энэ бүхэнд аль болох хөндий хандахыг хүсэж байсан ч тэр сорилоос амьд эргэн ирэхгүй байх бодит магадлал байгааг ойлгож байлаа. Амьд гарсан ч Хар дарсан зүүдийг давахад хэр их хугацаа орохыг хэн ч мэдэхгүй.

Энэ нь Рэйнтэй хамт өнгөрүүлэх үлдсэн хугацаа нь хязгаартай гэсэн үг бөгөөд тэр үүнийг дэмий үрж болохгүй.

Тэр бэлтгэлийг нь хурдасгаж, жинхэнэ тулааны ур чадваруудыг зааж өгөх ёстой байлаа.

Хөлс нүүрээр нь урсан, дасгалын сэлмээ үргэлжлүүлэн далайж буй өсвөр насны охиныг ажиглангаа Санни гүн бодолд автжээ.

Тэр түүнд ямар хэв маяг заах ёстой вэ?

Рэйн бол түүний дүү. Тиймээс хамгийн түрүүнд өөрийн өв болох Сүүдрийн Бүжгийг түүнд өвлүүлэх бодол төрөв. Яг л тэд үнэхээр нэг овгийн гишүүд мэт...

Гэвч энэ тийм ч сайн санаа биш байлаа.

Түүний сэтгэлгээ хэлбэр дүрсгүй, далд зальтай энэ тулааны урлагт тохирохгүйгээс гадна биеийнх нь чадвар ч түүнийг сурахад хүрэлцэхгүй.

Хүн бүр сургуульд өргөн хүрээний тулааны сургалт авдаг болохоор сэрүүн ертөнцөд үнэхээр сул хүмүүс тийм ч олон байдаггүй. Гэхдээ Сүүдрийн Бүжиг бол жирийн хүмүүст зориулагдсан урлаг биш байв. Наад зах нь Сэрэгчийн биеийн чадавхыг шаарддаг.

Санни өөрийн өвөрмөц Аспект, Мартагдсан Эрэг дээр шингээсэн хэдэн зуун Сүүдрийн хэлтэрхий, мөн энэ хэв маягийг өөртөө зориулж өөрөө бүтээсэн учраас л эхний алхмыг Нойрсогч байхдаа эзэмшиж чадсан юм.

Тэгвэл өөр юу үлдэх вэ?

Нефисийн түүнд заасан урсгал шиг чөлөөтэй, урьдчилан тааварлах аргагүй тулааны урлаг мэдээж толгойд нь орж ирэв. Эцсийн эцэст энэ нь төгс суурь хэв маяг байхаар бүтээгдсэн. Гэвч Санни Рэйнд түүнийг заахыг хүссэнгүй. Зөвхөн өөрийгөө тийм эрхгүй гэж бодсондоо ч биш, бас тэр нь Үхэшгүй Дөлийн овгоос гаралтай учраас.

Санни энэхүү гайхамшигтайгаар дасан зохицдог тулааны урлагийг тулааны суут ухаантан Эвдэрхий Сэлэм өөрөө бүтээсэн гэж сэжиглэдэг байв. Мөн Эвдэрхий Сэлмийг хэн хөнөөснийг ч тэр таамаглаж байсан. Энэ хэв маягийг мэддэг байх нь ямар гай зовлон дагуулахыг хэн мэдэх билээ?

Энэ хугацаанд Санни Зүүдний Оронд олон янзын тулааны хэв маяг сурсан байлаа. Гэвч тэдгээрийн аль нь ч түүнд тийм ч их сэтгэгдэл төрүүлээгүй.

Тэгэхээр ганцхан сонголт үлджээ. Санамсаргүйгээр тэр нь хамгийн тохиромжтой нь ч байв.

Гэгээнтний бат бөх, суурьтай тулааны хэв маяг.

Энэ нь Рэйний дөлгөөн, бодлогошронгуй, нямбай зан чанарт маш сайн тохирох мэт санагдав. Бас энэ бол Саннигийн мэдэх хамгийн нарийн, хамгийн дэс дараатай арга техник бөгөөд хамгийн сайн хамгаалалтыг өгдөг нь байлаа. Түүний зорилго бол Рэйнг аль болох удаан амьд байлгах. Харин үхэхгүй байхыг хүсвэл өө сэвгүй хамгаалалт асар их давуу тал болдог.

Үүнээс гадна дүү нь Гэгээнтэнтэй ямар нэгэн холбоотой мэт санагддаг байлаа. Хэрэв тэр тэрхүү эрхэмсэг чөтгөрийн тийм үнэнч шүтэн бишрэгч юм бол ямар нэгэн шалтгаан байгаа биз. Ямартай ч өөрийн шүтээний тулааны хэв маягийг сурах нь тийм ч муу зүйл биш.

...Санни өөрийг нь бараан царайлан ширтэж байгааг анзаарсан Рэйн зогсоод түүн рүү асуусан харцаар харав.

"…Юу болсон бэ? Би алдаа гаргачихсан уу?"

Санни аажуухан толгой сэгсэрлээ.

"Үгүй. Үнэндээ сүүлийн зуун цохилтын чинь байрлал төгс байсан."

Ердөө тайван, өөрийгөө барьж явдаг байсан өсвөр насны охины нүүрэнд гэнэт гайхалтай гэрэлтсэн өргөн инээмсэглэл тодров.

"Аха! Харж байна уу! Чамайг аяллаар явсан хугацаанд би өдөр бүр бэлтгэл хийсэн. Ангийнхан бүгд намайг галзуурчихсан гэж бодож эхэлсэн. Тэр тэнэгүүд юу мэдэх юм!"

Саннигийн уруулын булан татвалзав.

'...Тэр хэзээнээс хүмүүсийг тэнэгүүд гэж дууддаг болсон юм бэ? Надтай уулзахаас өмнө ямар эелдэг охин байсан билээ... өө... надтай уулзахаас өмнө гэж үү?'

Рэйн хэд хэдэн удаа нүдээ ирмэснээ асуулаа.

"Гэхдээ би зөв хийж байсан юм бол чи яагаад нөгөө дандаа хараал урсгасан юм шиг царайгаараа ширтээд байсан юм?"

'Юу гэнэ ээ?! Би тийм царайтай биш...'

Санни хоолойгоо засав.

"Тэр... аан... чамайг одоо ганцхан цохилтоос илүү зүйл сурахад бэлэн болсон гэж бодсон."

Рэйн нүүр дүүрэн инээмсэглэв.

"Тийм ээ! Эцэст нь!"

Тэр зочны өрөөг тойруулан харснаа хэлэв.

"Тэгэхээр чи одоо надад жинхэнэ тулааны арга техникүүдийг үзүүлэх үү? Эффи чамайг сэлэмтэй харьцахдаа боломжийн гэж хэлсэн. Ядаж л тэгж хэлэх гэсэн байх. Тийм үү?"

Санни хэсэг тээнэгэлзсэний эцэст мөрөө хавчаад босов.

"Тийм ээ. Би сэлэмтэй яаж харьцахаа мэднэ. Харин... үнэндээ энд хэтэрхий давчуу юм байна. Надтай хамт яв."

Эргэн хараад хонгил руу алхаж, хананы нэгэн самбар дээр дармагц тэр нь хажуу тийш гулсаж, цахилгаан шатны хаалга ил болов.

Рэйн тэр бүхнийг хөгжилтэй царайлан ширтэв.

"Аан... чи гэртээ нууц хаалгатай юм уу?"

Санни инээмсэглэлээ.

"Тийм ээ. Үнэндээ хоёр байгаа. Нэг нь шатан дээр, нөгөө нь цахилгаан шатанд."

Охин хэсэг бодсоноо ойлгосон мэт толгой дохив.

"Аан. Чи газар доорх хоргодох байртай юм байна. Ухаалаг юм... манайхд ийм юм байдаггүй, үүнийг барих маш үнэтэй шүү дээ."

Санни түүн рүү хачирхсан харцаар харав.

"Эцэг эх чинь чинь баян биш гэж үү?"

Рэйн инээд алдав.

"Ингэж амжилтад хүрсэн залуу бизнес эрхлэгч байж чи мөнгөний талаар нэг их зүйл мэддэггүй юм байна, тийм үү Санни? Тийм ээ, манай гэр бүл ядуу биш. Гэхдээ баян гэж бий... бас үнэхээр баян гэж бий. Харин бид тэр хоёр дахь нь биш."

Санни сая сонссоноо ойлгохыг хичээн толгойгоо хазайлгав.

'Ямар утгагүй юм бэ? Баян л бол баян биз дээ... тийм биш гэж үү?'

Тэр хөмсгөө зангидав.

"Би мөнгөний талаар зөндөө юм мэднэ, жаал минь! Яаж олохоо, яаж үрэхээ мэднэ. Өөр юу мэдэх хэрэгтэй юм?"

Рэйн түүн рүү хэдэн хором ширтээд чимээгүйхэн толгой сэгсэрлээ.

Тэд хамтдаа цахилгаан шатанд орж, газар доорх дожо руу уруудан буув.