Санни сүйрч сүйдсэн театр луу эргэн тойрноо харснаа бүтэн үлдсэн нэгэн суудлыг олж очин суулаа. Зөөлөн хилэн дэрэнд тухлан хөлөө ачиж, эвдэрч сүйдсэн тайз руу ээдрээтэй харцаар ширтэв.

Шилний хэлтэрхий болон хоосон сэргээшний савнууд түүний анхаарлыг хэсэгхэн зуур татлаа. Санни эдгээр сэргээшийг таашаал төрүүлдэг төрлийнх байх гэж бодсон ч, гайхалтай нь тэд Мартагдсан Эргээс буцаж ирснийхээ дараа бүтэн долоо хоног унтахгүй байхад хэрэглэж байсан сэргээштэй бараг ялгаагүй байв.

Түүний хөмсөг үл ялиг атирлаа.

'Битгий хэлээрэй... энэ залуу Зүүдний ертөнцөөс айдаг байсан юм гэж үү?'

...Курт Саннигийн бодож байснаас ч илүү эвдэрч сүйдсэн нэгэн байж. Мастер Жет хуучин танилаа дүрсэлж ярихдаа түүнийг нэгэн цагт зориулалтын тулаанч, мэргэшсэн мэргэжилтэн байсан гэсэн... гэтэл өөрийнхөө мэргэжлээс айдаг мэргэжилтэн гэж бас байдаг юм гэж үү?

Санаа алдан Санни алсыг ширтээд Бичээсийг дуудлаа.

Тэгээд л тэнд, түүний өмнөх агаарт эртний тэмдэгтээр дараах зүйл бичигдсэн байв.

Сүүдрийн хувилбар: [Сүүдрийн ир Курт].

Сүүдрийн хувилбарын төрөл: Араатан.

...Бүх хүн ердөө ганцхан сүнсний цөмтэй учраас Хар дарсан зүүдний Хараал тэднийг Араатан гэж үздэг байлаа. Тиймээс энэ нь гайхах зүйл биш.

Яахав, Санни, Нефис хоёроос бусад бүх хүн.

Чөтгөр болох тухай бодол нь толгойд нь хөвөн орж ирэхэд Санни цааш уншив.

Сүүдрийн хувилбарын зэрэг: Сэрсэн.

Сүүдрийн хувилбарын Шинж чанарууд: [Хурдан Гар], [Сүүдэрт Тангаргалсан], [Үхлийн Тэмдэг].

[Хурдан Гар] Шинж чанарын тайлбар: "Чиний ир хурдан бөгөөд алдалгүй цохилно."

[Сүүдэрт Тангаргалсан] Шинж чанарын тайлбар: "Сүүдрүүд чамайг мэднэ."

[Үхлийн Тэмдэг] Шинж чанарын тайлбар: "Чи Үхлийн тэмдгийг тээдэг. Учир нь Үхэлтэй адилхан чи ч бас зэвсэг байхаар бүтээгдсэн."

Санни үл ялиг толгойгоо гилжийлгэлээ.

Тэгэхээр нэг нь мэдрэхүй болон авхаалж самбааг нь нэмэгдүүлдэг Шинж чанар, нөгөө нь Куртад сүүдэртэй ойр дотно холбоо өгдөг ч өөрийнхөөс нь хавьгүй сул Шинж чанар, харин гурав дахь нь... үнэндээ гурав дахь Шинж чанар юу хийдгийг Санни огтхон ч ойлгосонгүй.

Гэхдээ тайлбар нь маш сонирхолтой байлаа. Үхлийг Сүүдрийн Бурхан бүтээснийг тэр мэддэг байсан, харин одоо Үхлийг зэвсэг болгон бүтээсэн гэдгийг мэдэв... гэхдээ хэний эсрэг? Ямар дайсан тийм аймшигтай зүйлийг бүтээхийг шаардсан юм бол?

Магадгүй үхэшгүй нэгний эсрэг... үгүй, энэ нь утгагүй. Хэрэв Үхлийг зохион бүтээхээс өмнөх цаг үе байсан бол тэр үед бүх зүйл үхэшгүй, мөнх, төгсгөлгүй байсан гэсэн үг... тийм биз?

Үхэлгүй ертөнц гэдэг ойлголтыг Санни бүрэн ойлгож чадсангүй. Гэхдээ түүний мэдэж байсан нэг зүйл гэвэл үхэл шиг аймшигтай зүйл ямар ч шалтгаангүйгээр бүтээгдээгүй.

Тэр хөмсгөө зангидан анхаарлаа дахин Бичээс рүү хандуулав.

Сүүдрийн хувилбарын Чадварууд: [Сүүдрийн Нөлөөлөлт], [Сүүдрийн Цохилт], [Сэрсэн].

[Сүүдрийн Нөлөөлөлт] Чадварын тайлбар: "Чи сүүдрийн хөдөлгөөнд нөлөөлж, тэдгээрээр үл үзэгдэн алхаж чадна."

[Сүүдрийн Цохилт] Чадварын тайлбар: "Чи сүүдрийг цохиж чадна. Мөн чиний сүүдэр амьд биетүүдийг цохиж чадна."

'...Таамагласанчлан.'

Санни Куртын Аспектийн Чадварууд ямар байсан талаар бараг таамаглачихсан байв. Тэд өөр боловч нэгэн зэрэг түүнийхтэй төстэй байлаа. Гэхдээ аль аль нь түүний өөрийн чадвартай харьцуулахад хавьгүй сул, хэрэглээ багатай байсан ч сүүдрээрээ дамжуулан шууд хохирол учруулах чадвар бол Саннигийн үнэхээр хүсдэг зүйл байв.

Ялангуяа [Сүүдрийн Нөлөөлөлт] нь түүний идэвхгүй Шинж чанар болох [Сүүдрийн Хүүхэд]-ийн арай өөр хувилбар төдий байлаа.

...Гэсэн ч Курт шиг Сүүдэртэй болбол түүний тулааны чадварт шинэ өнгө нэмэх нь гарцаагүй.

Бас хамгийн сүүлчийн Чадвар байсан.

[Сэрсэн] Чадварын тайлбар: "Энэхүү Сүүдрийн хувилбар Хар дарсан зүүдний Хараалыг тээдэг нэгний төрөлх чадварыг эзэмшинэ."

Тэгэхээр... Дурсамж ашиглаж чадна гэсэн үг үү? Энэ бол үнэхээр хэрэгтэй чадвар байлаа. Чулуун Гэгээнтэн хүртэл зөвхөн зэвсэг болон сахиус ашиглах боломжтой байсан.

Бодолд автан Санни хамгийн сүүлийн мөрийг ширтэв.

Сүүдрийн хувилбарын тайлбар: [Би чамд үзэсгэлэнт нэгэн ирийг даатгасан. Гэтэл чиний бүтээсэн зүйл бол зөвхөн жигшүүрт хар дарсан зүүд байлаа.]

Тэр хэд хэдэн удаа нүдээ цавчив.

'...Энэ ямар тайлбар вэ? Эсвэл би андуураад байна уу, Хар дарсан зүүдний Хараал... гомдсон юм шиг сонсогдоод байна уу?'

Ямар хөгжилтэй бодол вэ.

Санни сандал дээрээ налан хэсэг хүлээсний дараа ярвайж, Сүнсний Тэнгис рүү шумбан орлоо.

'Харъя даа...'

Тэр чимээгүй сүүдрүүдийн эгнээгээр алхаж, тэдний дунд хөдөлгөөнгүй зогсох Сүүдрийн ир Куртын бараан дүрийг ажиглав. Түүн рүү ганцхан харц шидээд Сүүдрийн Цөмүүдийнхээ хар нарнуудын хооронд очиж, нэгийг нь тойрон эргэлдэх аварга гэрлийн бөмбөлгийг олмогц Сүүдрийн хувилбарыг доош дуудлаа.

Гэрлийн бөмбөлөг тогтуун усны гадаргуу дээр хөвөн гарч ирээд аажмаар бүдгэрэхэд дотор нь туранхай нүцгэн эр зогсож байлаа.

Саннигийн арьс арзайх шиг болов.

Түүний өмнө хүн... үгүй, харин хүний сүнсгүй хуулбар зогсож байлаа. Куртын Сүүдрийн хувилбар бараг жинхэнэ хүн шиг харагдаж байсан ч нүдэнд нь орших амьгүй хоосрол нь ямар нэгэн гүн гүнзгий, жигшүүрт бурууг орилон илтгэж байв. Үнэхээр сэтгэл сэрдхийлгэм.

Энэ Сүүдрийн хувилбар эх хувилбарынхаа Хоосон хохирогчидтой маш төстэй байсан ч бүр ч илүү хоосон, амьд бүхний эзэмшдэг тайлбарлахын аргагүй очийг бүрэн алдсан байв. Энэ бол хүнийг хүн болгодог хамгийн чухал зүйлийг үгүй хийсэн хиймэл хуулбар байлаа.

Аймшигтай дүрс.

...Энэ зүйл үнэхээр сэжиг төрүүлэм байв.

Санни эргэлзсэн ч бүхнийг логикоор бодохыг хичээлээ.

Одоогийн байдлаар энэ Сүүдрийн хувилбар түүнд бараг хэрэггүй байсан ч [Сэрсэн] Чадварынхаа ачаар Дурсамж ашиглах төрөлх чадвартай байлаа. Энэ нь Санни Куртын Сүүдрийн хувилбарт хуяг, зэвсэг өгч чадна гэсэн үг.

Асуулт нь... тэр үнэхээр тэгэхийг хүсэж байсан уу?

Өнгөц харахад энэ асуулт маш энгийн. Хүчирхэг Сэрэгчтэй эн тэнцэх амьтныг өөрийн албанд байлгахыг хэн хүсэхгүй гэж? Гэхдээ бодит байдал дээр асуудал үүнээс хавьгүй төвөгтэй байлаа.

Санни хөмсгөө зангидан гараа сунгаж аймшигт амьтны мөрөн дээр хуруугаараа хатгав.

Түүний дэргэд шинэ мөр Бичээс гарч ирэв.

[Сүүдрийн хувилбарыг Сүүдэр болгон хувиргах уу?]

Тэр хөдөлгөөнгүй хөшив.

Хүний Сүүдэртэй байх нь мэдээж давуу талтай. Гэхдээ ямар ч Сүүдэр асар их нөөц шаарддаг. Чулуун Гэгээнтнийг өсгөж бойжуулах нь Саннид, ялангуяа түрийвчинд нь маш хүнд туссан. Үүнээс арай бага ч гэсэн бас чухал асуудал нь хувиргалтыг дуусгахад зуун Сүүдрийн хэлтэрхий шаардагдах явдал байв.

Санни гурав дахь цөмөө бүтээхэд тун ойрттол маш их цаг хугацаа, хүчин чармайлт зарцуулсан бөгөөд гэнэт бүтэн зуун хэлтэрхийгээр ухрах бодол огтхон ч дур булаам санагдсангүй.

Гол нь тэр дурын Сүүдрийн хувилбарыг Сүүдэр болгохыг хүсэхгүй байлаа.

Тэгвэл Курт үнэ цэнтэй Сүүдрийн хувилбар мөн үү?

Чимээгүй сүүдрүүдийн аль нэгийг хүний Сүүдрийн хувилбарт байрлуулбал юу болохыг Санни маш их сонирхож байсан ч хариулт нь... үгүй.

Тэр тийм биш гэдэгт итгэлтэй байв.

Үүнд хоёр шалтгаан байлаа.

Эхнийх нь энгийн боловч хангалттай үнэмшилтэй биш.

Мастер Жет тэд бүгд олон тулаан үзсэн Сэрэгсэд галзуурлаас ердөө ганц алхмын зайд явдаг гэж хэлсэн. Өөрийн алсан хүний амилуулсан хуулбарыг дагуулж явах нь өөрийг нь тэр алхамд улам ойртуулна гэж Санни мэдэрч байлаа. Түүний хүн чанар, үнэнийг хэлэхэд ухаан санаа ч мөсний нимгэн давхарга дээр тогтож байв.

Гэхдээ энэ нь гол шалтгаан биш.

Хоёр дахь бөгөөд хамгийн чухал шалтгаан нь Сүүдрийн мөн чанар байлаа. Сүүдрүүд эх хувилбарынхаа сүнсгүй хоосон хуулбар биш. Тэд тодорхой хэмжээний ухамсар, өөрийн гэсэн зан чанартай байдаг. Чулуун Гэгээнтэн үүний амьд нотолгоо.

Тийм ээ, тэр хүчирхэг Хар дарсан зүүдний мангасаас бүтээгдсэн. Гэхдээ түүнийг хүчирхэг болгосон зүйл нь түүний Шинж чанар, Чадварууд биш. Чулуун Гэгээнтэн өөрөө хэн байсан нь түүнийг хүчирхэг болгосон юм. Түүний хүсэл зориг, ухаан, хэзээ ч хугаршгүй шийдэмгий зан нь түүнийг тулааны талбар дээр үхлийн аюултай оршихуй болгож, Саннигийн үнэ цэнтэй хамтрагч болгосон.

Тиймээс л тэр Куртын Сүүдрийг бүтээхийг хүсээгүй. Тийм ээ, Курт Саннигийн Аспекттэй нийцэх хүчирхэг Чадваруудтай байсан ч.

Гэхдээ Курт өөрөө... сул дорой.

Түүний сул дорой байдал л түүнийг архи, жигшүүртэй зугаа цэнгэлд живүүлж, эцэст нь Хар дарсан зүүдний Хараалын дарамтад бууж өгч, солиорлын дайралтаар хамгаалалтгүй хүмүүсийг хоморголон хядсан.

Хэчнээн хүчирхэг байсан ч Санни тогтворгүй алуурчны Сүүдрийг эзэмшихийг хүсээгүй. Гэхдээ түүнээс ч илүүтэй сул дорой нэгний Сүүдрийг эзэмшихийг хүсээгүй. Тийм нэгэнд яаж найдах билээ?

Түүний алхаж буй замд сул дорой байдалд зориулсан зай байхгүй. Ядаж ийм төрлийн сул дорой байдалд бол бүр ч байхгүй.

Санаа алдан тэр Чулуун Гэгээнтнийг дуудлаа. Хар дөлний эргүүлэг дунд тэр Куртын нүцгэн дүрийн дэргэд гарч ирэв.

Дуу цөөтэй чөтгөр бадмаараг мэт улаан нүдээрээ түүн рүү хайхрамжгүй ширтэн, хүний Сүүдрийн хувилбар луу өчүүхэн ч анхаарал хандуулсангүй. Тэднийг зэрэгцүүлэн харах нь Саннигийн шийдвэрийг улам баталгаажуулав.

Тэр хэсэг чимээгүй байснаа Курт руу дохив.

"Чи... магадгүй түүнийг идмээр байна уу?"

Чулуун Гэгээнтэн хэсэг хөдөлгөөнгүй зогссоноо дуугүйхэн Сүүдрийн хувилбар руу эргэж нэг гараа өргөв. Түүний бээлий үхсэн алуурчны цээжийг төвөггүй нэвт хатгаж, хэдхэн мөчийн дараа бие нь цагаан очны урсгал болон задарлаа.

Тэдгээр оч гурван гэрэлт урсгал болон хувирч, Сүүдрийн доторх харанхуй руу шингэн орж, дараа нь түүний гурван цөмийн үлдэгдэл рүү урсан орлоо.

[Таны Сүүдрийн хувилбар устгагдлаа.]

Саннигийн зүрхийг гашуун мэдрэмж нөмөрсөн ч удалгүй алга болов.

Тэр Чулуун Гэгээнтнийг дүрсэлсэн Бичээс дээрх Сүүдрийн хэлтэрхийн тоолуурыг ширтэж байлаа.

...Сүүдэр Сүүдрийн хувилбараар хооллох нь хамаагүй илүү тэжээллэг бололтой. Тэр нэгдүгээр түвшний Сэрсэн Дурсамжаас авах байснаасаа хавьгүй олон Сүүдрийн хэлтэрхий авчээ.

Яг одоо тоолуур дээр энгийн нэгэн тоо харагдаж байв.

Сүүдрийн хэлтэрхий: [200/200].

Саннигийн уруул дээр ялалтын инээмсэглэл тодров.