Анделийн тасдсан толгойноос цус дусалсаар байхад тэд цайзыг орхин гарлаа. Нефис үснээс нь барин авч явж, урьдын адил ямар ч сэтгэл хөдлөгүй байв. Хүний толгой барьж явах нь түүний нүүрний хувиралыг өөрчлөх ч зүйл биш мэт.

Тэр мөчид Санни Өөрчлөгдөж буй Одыг өөр өнцгөөс харлаа. Тэр сүүлд хэзээ түүнийг болгоомжлон харж байснаа ч санахгүй. Гэтэл одоо бол…

Тэр өмнө нь яг хэчнээн хүнийг хөнөөсөн бол?

Бусдын царайд бол гайхшрал, айдас ээлжилнэ. Уг нэгийн эсрэг нэг тулааныг харсан хүмүүс Нефисийг яг өшөө авагч тэнгэрийн элч мэт ширтэнэ. Харин бусад нь түүнийг аймшигт ад зэтгэр мэт хүлээн авчээ.

_Энэ аллагаар тэр хэчнээн сүнсний мөн чанар шингээсэн юм бол? Их л байх ёстой доо…_

Гэхдээ энэ бол зөвхөн цайзын оршин суугчдын хариу үйлдэл. Гадаад суурингийн хүмүүсийнх харин хачин даруухан, гэхдээ бүр илүү гүн байв. Тэд өөрсдийнх нь нэг нөхөр эртний цайз руу нэвтрэн орж, Замчны тасарсан толгойг барьсаар чөлөөтэй гарч ирэхийг хэзээ ч харж байгаагүй биз. Одоо тэд бүгдээрээ чимээгүй ширтэж, нүдэнд нь тэсвэрлэшгүй, бараан, халуун мэдрэмж дүрэлзэнэ.

Энэ бүхэн Саннид маш эвгүй байдалд аваачина.

Нефис энэ үйлдэл нь хүмүүсийн зүрхэнд ямар шуурга босгосныг мэдэж байгаа болов уу? Ийм мэдрэмж аюултай, бараг хянах боломжгүй. Хэрэв мэдэхгүй бол байдал маш хурдан хяналтаас гарч мэднэ.

…Харин мэдэж байсан, бүр цаашлаад санаатай хийсэн бол бүр ч аймшигтай. Неф ийм нарийн, үр дүнтэй тархи угаалт хийх чадвартай гэж үү? Энэ бүхэлдээ түүний төлөвлөгөө байсан юм биш биз?

Санни Өөрчлөгдөж буй Одын энэ талыг ерөөсөө мэддэггүй юм санж.

Ер нь тэр Нефисийн талаар үнэхээр ихийг мэддэг гэж үү?

Эдгээр эргэлзээнд дарагдсан Санни тэд аль хэдийн Эффигийн овоохойн өмнө ирснийг ч анзаарсангүй. Тэр тэнгэр өөд харвал нар Улаан цамхгийн бараан сүүдэрт нуугдсан байлаа.

Орой болчихсон байлаа. Яг л Нефисийн амласанчлан.

_Аймшигтай хүүхэн…_

Догшин анчин бүсгүй тэднийг тогшихоос ч өмнө хаалгаа онгойлгож нүдэнд нь бага зэрэг дургүйцэл дүүрнэ.

"Энэ их шуугиан юу вэ? Хүн нэг өдөр тайван…"

Урд нь зогсох гурвыг хараад тэр шууд гацав.

Нефис нүдээ ч цавчилгүй Анделийн толгойг Эффигийн хөл рүү шидээд:

"Одоо ярьж болох уу?" гэж асуулаа.

Анчин бүсгүй Нефийн жигшүүрт бэлгийг доош ширтэн, нүдээ нарийсгана. Нүүр нь шуудхан барайв.

Хэдэн хоромын дараа дээш харж, бараан хоолойгоор:

"Дотогш ор." гэлээ.

───

Хаалга хаагдмагц Эффи ууртай шивнэн асуув:

"Чи юугаа хийчихэв ээ, гүнж ээ?!"

Нефис толгойгоо ялимгүй хазайлгаж, бага зэрэг хөмсгөө зангидлаа.

"Чи намайг хүчээ нотол гэж хүссэн. Тийм биз?"

Дуу хоолойд нь үнэхээрийн эргэлзээ мэдрэгдэнэ.

Анчин бүсгүй итгэж ядан тас ширтлээ. Түүний чимээгүй байдлыг буруу ойлгосон Неф нүдээ анивчаад:

"Аан. Тэр толгой…"

"Хэний толгой гэдгийг би мэднэ! Чи хаанаас олж авсан юм бэ?!"

Санни санаа алдан, бат бөх авдрын нэг дээр лагхийтэл суугаад дараа нь бараан инээмсэглэл гарган:

"Аан тийм… Чи магадгүй Харанхуй хотын үүний талаар хамгийн сүүлд мэдсэн хүн байх. Чиний өмнө зогсож байгаа хүн бол Үхэшгүй Дөл овгийн Өөрчлөгдөж буй Од, шударга ёсны баатар. Тэр цайз руу орж, тэр новшийг тулаанд сорьж, бүгдийнх нь нүдэн дээр ганц цохилтоор алчихсан. Одоо хот даяарх хүмүүс түүнээс өөр зүйл ярьж байгаа гэж бодохгүй байна."

Түүний өнгөнд огт хөгжилтэй зүйл байсангүй. Харин ч амнаасаа асар их хараал урсгамаар байгаа мэт.

Яагаад… яагаад асуудал түүний хаа явсан газар дагах ёстой юм бэ?

Неф, Касси хоёр Эффигийн хариуг түгшин хүлээж байхад Санни сүүдрээ ширтэн, бага ч гэсэн өрөвдүүлэх харц хайв. Даанч олдсонгүй. Сүүдэр нь харин ч баясан доромжилсон харцаар буцаан ширтэнэ.

Эффи хэд хэдэн удаа анивчиж, тэднийг хачин харцаар харлаа.

_Тийм ээ. Чадаж байгаа дээрээ зугтаа гэж хэл…_

Дараа нь тэр толгойгоо гэдрэг шидэн чангаар инээлээ.

"Өө! Өө, бурхад минь! Үнэхээр үү?! Ямар сайхан хэрэг вэ! Тэдний царайг би харсан ч болоосой!"

Санни амаа ангайсан чигтээ ширтсэн нь тэр ийм хариу хүлээгээгүй юм.

_Галзуу, бүгд галзуу! Би галзуучуудаар хүрээлэгдсэн юм байна!_

Эффи инээж дуусаад Өөрчлөгдөж буй Од руу бараан, гэхдээ баяссан харцаар харлаа.

"За за, чи хүчээ нотоллоо. Гэхдээ нэг зүйл мэдэх хэрэгтэй. Би Цэргүүдэд нэгдэхээс татгалзахад Ганлауг надад тодорхой хэлсэн. Хэрэв тэр намайг авч чадахгүй бол, хэн ч авч чадахгүй. Тэр цагаас хойш намайг багтаа урих зориг гаргасан бүлгүүд бүгд шийдвэртээ харамссан. Намайг замчлагчаар хөлслөвөл чи түүний байнд орно. Үүнийг үнэхээр хүсэж байна уу?"

Тэгэхээр түүний түүх үүгээр дуусахгүй байж. Тиймээс л ганцаардмал байдаг байсан байх.

Чимээгүйд Санни түрүүлж дуугарав. Дуу нь гашуун, ядмаг.

"Бидэнд одоо санаа зовох арай л оройтсон юм биш үү?"

───

Маргааш өглөө нь тэд ан хийхээр бэлдэж байлаа. Ядуусын хорооллын хэсэг хүмүүс тэднийг үдэн зогсоно. Нүдэнд нь найдвар, зовлон холилдсон бараан гал асна.

Өөрчлөгдөж буй Одын ухаалаг арга мэх, харгис Замчин Анделийн эсрэг баатарлаг тулалдааны тухай яриа хот даяар тарж, дамжих бүрдээ улам улам дэвэрч байв. Одоо хүмүүс түүнийг өөрийн нүдээр харахаар иржээ.

Ялангуяа Оддын Гэрлийн Легионы Хуяг болон цээжин дээрх бэлгэдлийг сонирхоно. Энгийн Хуягт Центурионы Дурсамж Харанхуй хотын оршин суугчдад ийм нөлөө үзүүлнэ гэж хэн санах билээ?

Саннид бол энэ огт таалагдсангүй.

Өчигдөр орой тэд хоноглох газар луугаа буцсаны дараа Санни Нефист хэдэн асуулт тавих боломж гарсан. Гэхдээ ихэнхийг нь дотроо хадгалжээ. Сэтгэлээ яаж илэрхийлэхээ мэдэхгүй байв. Эцэст нь тэр зөвхөн нэгийг нь асуусан. Биеийн хүчээр хавьгүй илүү хүний өрсөлдөгчийг яаж тийм амархан ялсан тухай.

Өөрчлөгдөж буй Од энгийнээр мөрөө хавчаад:

"Өв залгамжлагчдын хуучин арга." гэсэн.

Бүхнийг тайлбарласан мэт хэрнээ, юу ч тайлбарлаагүй хариулт.

Одоо бол тэд Харанхуй хот руу, мангас агнахаар явж байна.

Тэр дөрөв бэлэн болоод хөдлөх гэж байтал гэнэт шивнээ нэмэгдэв. Ядуус зам тавьж, нэгэн өндөр залууг дундуур нь алхуулахад Санни хөмсгөө зангидлаа.

_Гайхалтай. Энэ л дутаж гэнэ..._

Кастер ойртон ирж, хэдэн метрийн зайд зогсоод хүндэтгэлтэй бөхийв.

"Хатагтай Нефис, Анчин Афина, Кассия, Санни. Өглөөний мэнд. Би Хан Ли овгийн Кастер. Танай ангийн багт нэгдэхийг хүсэж байна. Намайг авна уу?"

Хэсэг хугацаанд бүгд дуугүй болов. Санни энэ царайлаг Өв залгамжлагчидад дургүй ч, түүнийг өөрсдийн талд авах нь асар их ашигтай. Кастер шиг суут тулаанч Мартагдсан Эрэг дээр олдоц муутай. Гэсэн ч тэр дотроо эргэлзэнэ.

Олон хүн шивнэлдэх нь цайзын дайчин гадаад суурингийн багт сайн дураараа нэгдэнэ гэдэг цочирдом хэрэг. Тэгээд ч ийм нэр хүндтэй хүн!

Хэсэг хугацааны дараа Өөрчлөгдөж буй Од мөрөө хавчаад:

"Чи хүсч байвал...." гэлээ.

Ингээд Хан Ли овгийн бардам угсаатан тэдний ангийн багийн тав дахь гишүүн болов. Шүрэн ойн олон хүнд саруудыг гуравхан л хүн өнгөрүүлсний дараа багийн тоо өсөх нь нэлээд хачин санагдана. Гэхдээ энэ бол зайлшгүй зүйл байсан биз.

Санни өөр юу хүлээсэн юм? Насан туршдаа гуравхан хүн байх уу?

_Тэнэг юм…_

Таван Нойрсогчид хамтдаа гадаад суурингийн ядуусын хорооллыг орхин, хараалт балгас руу хөтлөх цагаан чулуун зам дээр алхлаа.

…Ингээд Харанхуй хот дахь хүн бүрийн хувь заяа тамгалагдав.

Төгсгөл аль хэдийн эхэлчихсэн байлаа.