270-р бүлэг : Зугтагч

Мөнгөн сэлэмний гэрэл унтрахтай зэрэгцэн Өөрчлөгдөж буй Од хэсэгхэн агшин саатав. Түүний нүдэнд цагаан дөл асаж, дараагийн мөчид Оддын Гэрлийн Легионы Хуягны цав цагаан цээживч сохлом хурц цагаан гэрэлд бүрхэгдлээ.

Эртний сүмийн их танхим руу эргэн мөлхөж эхэлсэн харанхуй дахин ухран сарнив. Нефис гайхамшигт Аспект чадварынхаа чиглэлийг өөрчилж, сэлмийн оронд хуягаа дамжуулагч болгон ашигласан бололтой.

Хажуугаас нь харахад түүний цээжин дотор хилэнт цагаан од шатаж буй мэт санагдана.

Тэр өчүүхэн саатал бараг аминд нь хүрэх шахав.

Саннигийн хашгираан сүм даяар цуурайтахтай зэрэгцэн аймшигт хар ир дахин доош буув. Энэ удаа Нефист мултрах ямар ч боломж байхгүй мэт харагдсан.

Гэвч ямар нэгэн байдлаар тэр чадсан.

Гантиг шалан дээрээс өөрийгөө түлхэн босоод биеэ мушгин, Хар Хүлэгт баатарын том сэлмийн унах цаазын сүх мэт цавчилтаас хуруун чинээ зайтай бултав. Дараа нь тэр хурдан өнхөрч холдсоор, дараагийн мөчид аль хэдийн босчихсон байлаа.

Ад зэтгэр түүнийг бут цохихоор урагш дайрахад Өөрчлөгдөж буй Од Хэзээ ч Үхэшгүй Дөлийн овгийн бардам охиноос хэн ч төсөөлөхгүй зүйл хийв.

Тэр дайсандаа нуруугаа харуулаад... гүйж эхэллээ.

Шүрэн ой дахь эхний өдрүүдээсээ Санни Нефис хүсвэл гайхалтай хурдан хөдөлж чаддгийг мэддэг болсон. Үнэхээр ч ганцхан секундын дараа тэр аль хэдийн холдсон байв. Санни шүдээ зуун, намуухан хараагаад араас нь ухасхийв.

Нефис хэчнээн хурдан байсан ч Хар Хүлэгт баатар түүнээс хурдан байлаа.

Ад зэтгэр зугтаж буй олзоо аль хэдийн мөрдөн хөөж эхэлсэн бөгөөд түүний хөдөлгөөн ийм хэмжээний, тэр тусмаа тийм хүнд ган хуяг өмссөн амьтанд баймгүй хурдтай байв. Агшин өнгөрөх бүрд тэр Өөрчлөгдөж буй Одод улам ойртож, сэлэм нь түүний амийг хураахаар бэлэн байлаа.

Булчингаа дээд хязгаарт нь тултал чангалан Санни ч мөн хамаг чадлаараа гүйв. Эффи, Кастер хоёр түр хугацаанд тулаанаас гарч, Касси, Кай хоёр хажууд үлдсэн энэ үед ганц үлдсэн хүн нь тэр байлаа. Ямар ч байсан амжих ёстой.

Хэрэв амжихгүй бол...

'Хурдлаач!'

Шүдээ зуун Санни өөрийгөө бүр ч хурдлуулж чадлаа.

Нефис сүмийн их танхимын талыг аль хэдийн туулжээ. Алсад буй нэргүй бурхан эмэгтэйн хөшөө түүний хараанд орсон байх.

Яг тэр мөчид тэр гэнэт зогсож, эргэн харлаа. Хөдөлгөөний инерциэс болж гантиг шалан дээр хэдэн метр халтирсан ч тогтож чадсан байв. Мөнгөн сэлэм аль хэдийн буцаан цуцлагдаж, сүнсний тэнгисээс нь дахин дуудагджээ.

Цөхрөнгөө барсан мэт тэр хурдан ойртож буй ган аварга руу амиа үл хайрласан сүүлчийн дайралт хийхээр шийдсэн юм шиг харагдав. Эсвэл бүр галзуурсан ч байж болох.

Гэвч зөвхөн харахад л тийм байсан.

Саннигийн уруулын булан дээш татагдав.

'Энэ чинь л миний охин мөн дөө!'

Төлөвлөгөө С биелэх мөч иржээ. Өөрчлөгдөж буй Од өөрт ноогдсон үүргийг төгс гүйцэтгэсэн байв.

Түүнээс өөр юуг ч хүлээх билээ.

Одоо ганц үлдсэн зүйл бол Хар Хүлэгт баатрыг хэдхэн секунд саатуулах.

Ад зэтгэр мөнгөлөг үст охин руу сүйрэл дагуулсан хар ган сэлмийг шуурга мэт буулгав. Нефис урьдын адил тайван шийдэмгий байдалтай угтаж, цохилт бүрээс гайхамшигтай ур чадвараар бултав. Академийн дожод Кастертай тулж байсан тэр холын өдрүүд шигээ тэр тулааны урсгалыг ойлгох чадвараа ашиглан хурдны ялгааг нөхөж байлаа.

Тэр ад зэтгэрийн үхлийн цохилтуудад зүгээр л хариу үйлдэл үзүүлээгүй. Харин цохилт ирэхээс өмнө урьдчилан тооцоолж, хар том сэлмийн зам бүрэлдэхээс нь өмнө бултаж байв.

Мэдээж энэ үхлийн хөдөлгөөн удаан үргэлжлэх боломжгүй. Өчүүхэн алдаа л түүний төгсгөл болох байлаа. Алдаа гаргахгүй байсан ч ийм төвлөрлийг удаан хадгалах боломжгүй, дээрээс нь энэ аймшигт тулалдаан түүний тэсвэр, хүчийг асар ихээр сорьж байв.

Гэхдээ түүнд удаан тэсэх шаардлага байгаагүй.

Хэдхэн секунд л хэрэгтэй.

Тэр хэдэн секунд дуусахад...

Эртний сүмийн харанхуйд чулуу хагарах огцом дуу цуурайтлаа.

───

Бүх үймээн самууны дунд Чулуун Гэгээнтэн сонин байдлаар алга болсон байв. Санни Нүгэлт Ад зэтгэр бусдаас илүү Нефисийг онилж буйг баттай мэдсэний дараа тэдний хамгийн хүчтэй тулалдаанч, өөрийн Сүүдэр нь огт харагдсангүй.

Мэдээж энэ бүхэн зориудынх байлаа.

Бусад нь Хар Хүлэгт баатарыг сатааруулж байх зуур тэр төлөвлөгөө ажиллах суурийг бэлдэж байсан юм.

Гэхдээ төлөвлөгөө зөвхөн их танхимын тодорхой нэг цэг дээр л хэрэгжих боломжтой. Хар Хүлэгт баатар Нефист улайран төвлөрвөл түүнийг яг тэр газар луу авчрах ёстой байв. Саннигийн өгсөн тайлбарын дагуу Өөрчлөгдөж буй Од ад зэтгэрийг сүмийн гүн рүү татан оруулж, яг зөв цэг дээр зогсжээ.

Тэгээд Чулуун Гэгээнтэнд урхи бэлтгэх хугацаа өгөхийн тулд ширүүн тулаанд орсон юм.

Чулуун гэгээнтэн гүйж ирээд сүмийн дээврийг тулж байсан өндөр сүрлэг баганын нэг рүү бүх жингээрээ мөргөн жийв.

Яг энэ багана доод хэсгээрээ гэмтсэн тул бусдаасаа илүү тогтворгүй байлаа. Санни нурсан сүмийн булан бүрийг алган дээрээ байгаа мэт мэддэг учраас энэ гэмтлийг ч мэдэж байсан.

Төлөвлөгөө С үүн дээр л тулгуурласан байв.

Санни гүйж байхдаа дараа нь юу болсныг бүх сүр жавхлан, хэрцгийлэлтэй нь хамт харлаа.

Чулуу хагарах дуу эртний сүмийн уудам танхимд цуурайтав. Асар өндөр баганан дээр ан цавн судл үүсэж, тэр нь доод хэсгийн гүн ангал руу хурдан тархлаа. Чулуун хэлтэрхий бүх зүг рүү үсэрч, багана ганхаж эхлэв.

Эхэндээ удаан мэт санагдсан.

Гэвч үнэндээ тийм биш байлаа.

Танхимын төвд Хар Хүлэгт баатар тасралтгүй довтолгоогоо агшин зуур зогсоон, чулуу хагарах чимээг даган толгойгоо эргүүлэв.

Гэвч тэр нэг секундээр хоцорсон байлаа.

Нефис хажуу тийш огцом ухасхийхэд багана доош унан, ад зэтгэрийг тоо томшгүй тоннын жинтэй хатуу чулуун доор дарж орхижээ.