Кастер, Эффи, Кай гурвын нүүрэн дээрх илэрхийлэл үнэхээр үнэлж баршгүй байлаа. Санни чангаар инээхээ арайхийн тэвчив.

…Харин түүний сүүдэр тэгээгүй. Аз болж дууны хөвч байхгүй учраас хийж чадах зүйл нь гэдсээ барин чимээгүй татганах л байв.

'Хөөе, чи! Хүмүүжилтэй бай!'

Харин энэ хооронд Нефис зүгээр л түүн рүү ширтэж байлаа. Уруулынх нь булан ялимгүй дээшилсэн байв.

Хэсэг хугацааны дараа Кастер эцэст нь хэлж чадлаа:

"Зүгээр л Нүгэлт Ад зэтгэр гэнэ ээ? Чи сая з..."

Гэвч Өөрчлөгдөж буй Од түүнийг таслав. Сүм рүү нэг харснаа мөрөө хавчин:

"Энэ боломжтой л юм."

Бүгд чимээгүй болов. Тэд зүгээр л Нефис рүү гайхсан харцаар ширтэцгээв.

Санни сэтгэл хангалуун толгой дохив.

"Яаравчлан дүгнэх хэрэггүй. Бид тэр тулаанд бэлтгэлгүй орохгүй. Би тэр новшийг хэдэн сар судалсан. Түүний бүх чадвар, бүх арга мэх, бүх сул талыг мэднэ. Түүнээс гадна... хэрвээ чи тийм нэгнийг ч дийлж чадахгүй бол Ганлаугтай яаж тулалдах юм бэ? Энэ аяллын зорилго чинь тэр биз дээ?"

Үнэндээ тэр Хар Хүлэгт баатрыг одоо дайрах уу, эсвэл аяллын дараа юу гэдгийг удаан бодсон. Эцэст нь, одоогоор тэд хэт сул гэж дүгнэсэн. Гэхдээ Шүрэн ойд өнгөрүүлэх сарууд бүхнийг өөрчилөх нь лавтай.

Тэнд илүү олон Хар дарсан зүүдний амьтад бий. Тэдний ихэнхийг алах боломжтой. Аяллын төгсгөлд багийн гишүүн бүрийн цөмд одоогоос хавьгүй их сүнсний мөн чанар хуримтлагдсан байх болно. Мөн тэд илүү олон Дурсамж ашиглах боломжтой.

Хамгийн чухал нь, тэд багийн ажиллагаагаа төгс болтол нь сайжруулах хугацаа олох байв. Хар Хүлэгт баатартай тулалдахад энэ зүйл хамгийн чухал.

Нефис толгой дохив.

"Саннигийн зөв. Нүгэлт амьтныг алах боломжгүй биш. Үнэндээ Гемма, Тессай хоёр өмнө нь ийм зүйл хийж байсан. Ганлауг ч мөн адил. Зүгээр л маш их бэлтгэл, бага зэрэг аз хэрэгтэй. Энэ аяллын төгсгөлд бид ганц ад зэтгэртэй тулалдаж ялж чадна, хэрвээ түүний нууцыг урьдчилан мэдэж чадваас."

Санни инээмсэглэнэ.

"Яг тийм! Аан тийм, бэлтгэлийн тухайд..."

Бүгд түүн рүү гайхсан харцаар харж... мэдээж Кассигаас бусад нь...байхад тэр мөрнөөсөө үүргэвчээ авч газар тавив. Дараа нь онгойлгож, доторх олон сүнсний хэлтэрхийн зөөлөн гэрлийг ил гаргав.

"Саннигийн Гайхамшигт Дэлгүүрт тавтай морил! Энд ойролцоогоор тавин сүнсний хэлтэрхий байна. Бүгд Сэрсэн зэрэглэлтэй. Бид Шүрэн ой руу явах гэж байгаа болохоор та нарт тэр аймшигт газартай нүүр тулахаас өмнө бага зэрэг хүчээ нэмэгдүүлэх боломж олгохоор шийдлээ. Мэдээж, гэр бүлийн хямдралтай..."

Тэр нууц өрөөнөөс явахынхаа өмнө эрдэнэсийн авдраа хоосолсон. Одоо үлдсэн бүх хэлтэрхий нь үүргэвчинд байв.

Мэдээж, тэр үүнийг сайхан сэтгэлээсээ хийгээгүй. Санни хэзээ ч мөнгөтэй байгаагүй учраас түүнийг хэрхэн удирдах талаар сайн мэддэггүй. Гэхдээ нэг зүйлийг мэддэг байлаа. Баян хүмүүс хөрөнгөө зүгээр хэвтүүлдэггүй. Мөнгө өөрөө мөнгө бүтээх ёстой.

Үүнийг тэд хөрөнгө оруулалт гэж нэрлэдэг.

Хэлтэрхийгээ багийнхандаа өгснөөр Санни амьд буцах магадлалаа өсгөж байлаа. Үүнээс илүү үнэ цэнтэй зүйл тэр бодож олж чадахгүй нь лавтай.

Мэдээж тэр хэлтэрхийг зүгээр өгөхгүй.

"Дэлгүүрийн дүрэм энгийн. Та нар надад Дурсамж өгнө, би та нарт хэлтэрхий өгнө. Дурсамж хэр хүчтэй, хэрэгтэй нь надад хамаагүй. Үнэндээ, муу байх тусмаа сайн! Та нарын Сүнсний тэнгист тоосонд дарагдсан хэрэггүй хог байхад л болно. Байхгүй бол асуудалгүй. Дараа нь Шүрэн ойд олсон Дурсамжаа өгнө гэж амлаж болно."

Тэр Нефисийн багийнхан руу инээмсэглэв.

"Муу биш байгаа биз дээ? Надад талархах хэрэггүй..."

Кай хэлтэрхийг ширтэж байснаа толгой өргөн Санни руу харлаа.

"Санни... найз аа... шулуухан асуусанд уучлаарай. Чамд яагаад ийм олон Дурсамж хэрэгтэй байгаа юм бэ?"

Ямар сайхан асуулт вэ? Санни инээмсэглэв.

"Аан, юу л даа... яаж тайлбарламаар юм дээ? Нэг гоо үзэсгэлэнт бүсгүй байдаг юм. Тэр Дурсамжаас хэзээ ч ханаж чаддаггүй. Ойлгож байгаа биз дээ..."

Ингээд тэр нумчин руу нүдээ ирмэв. Кай сонин царай гарган харцаа буруулж, толгой сэгсэрлээ.

Үүний дараа хэн ч асуулт асуусангүй.

Эцэст нь Санни хэлтэрхийгээ таван Дурсамжаар сольж чадлаа. Нефис хэлтэрхийг таван гишүүнд хувааж, тус бүрд нь арван ширхэг өглөө.

Энэ нь арван Сэрэгч араатныг устгасантай дүйцэхүйц ашиг байлаа. Хэлтэрхийг шингээсний дараа тэд бүгд хүч чадлаа мэдэгдэхүйц нэмэгдүүлэх болно.

Үхлийн аюултай аяллын хувьд энэ бол хамгийн сайн эхлэл. Цаг алдалгүй Нефис, Касси, Эффи, Кай, Кастер нар сүнсний хэлтэрхийн мөн чанарыг шингээв.

Тэднийг завгүй байхад Санни чимээгүйхэн Сүнсний тэнгистээ шумбан, авсан Дурсамжуудаа Чулуун Гэгээнтэнд өглөө.

[...Чулуун Гэгээнтэн улам хүчирхэг боллоо.]

[...Чулуун Гэгээнтэн улам хүчирхэг боллоо.]

[...Чулуун Гэгээнтэн улам хүчирхэг боллоо.]

Сэтгэл хангалуун тэр бичээсийг дуудан харлаа.

Сүүдэр : Чулуун Гэгээнтэн

Сүүдрийн хэлтэрхий : [27/200]

Дараа нь өөрийгөө харлаа.

Нэр : Санлесс

Жинхэнэ нэр : Гэрлээс Төөрөгч

Зэрэг : Зүүдлэгч

Сүүдрийн цөм : Идэвхгүй

Сүүдрийн хэлтэрхий : [318/1000]

…Муугүй шүү.

Тэр өмнө зүг рүү харан, харанхуй инээмсэглэв.

'Буцаад Харанхуй хотод ирэхэд энэ тоо хэр их нэмэгдэх бол?'

Мэдээж маш их байх ёстой. Бүгд хэлтэрхийг шингээж, шинэ өөрчлөлтдөө дасмагц баг хөдөлгөөнд орлоо. Зургаан хүн өмнө зүг рүү, хараалтай хотыг болгоомжтой гэх чинь туулан хөдөллөө.

Нефис багийн урд алхаж байв. Түүний хар цагаан хуяг эртний балгасын саарал чулуутай тод ялгарна. Түүний араас баруун талд нь мөнгөн луугийн арьс мэт гялалзах хуяг өмссөн Кастер алхаж байлаа. Зүүн талд нь эртний хүрэл хуягтай, доороо цагаан даавуун хувцас өмссөн хүчирхэг Эффи явна.

Хэдэн алхмын зайд бор арьсаар давхарласан хуяг өмссөн Кай явж байв. Нуруун дээр нь хүнд сумтай саадаг байлаа. Харин Касси түүний хажууд алхана. Түүний хөнгөн хувцас, тод нөмрөг хэвээр ч, бүсэлхийгээр нь гоёмсог илдний хуяг өлгөгджээ.

Хамгийн ард нь, дургүйцсэн царайтай, цайвар залуу хар үстэй, саарал даавуу, хар арьсан хуяг өмссөн нэгэн алхаж байлаа. Тэр үе үе доош харж, нарны гэрэлд дасахгүй байгаа мэт ярвайна.

Мэдээж, тэр бол Санни.

Тэдний Мартагдсан Эргийн захын бүс рүү хийх аялал ийнхүү эхэллээ.