Санни Нефисийг өмнө нь хэзээ ч айж байхыг хараагүй. Жинхэнээсээ айж, бүр цочирдтлоо балмагдсан байдал бол бүр ч үгүй.

Тэр даруйд түүний биеийн бүх булчин чангарч, хүйтэн жихүүцэл нуруугаар нь гүйв.

_Байж боломгүй... байж боломгүй!_

Чөтгөрүүд, аймшигт жигшүүрт амьтдыг ч нүдээ ч цавчилгүй угтаж чаддаг хүн шүү дээ. Тэгвэл яг юу түүнийг ингэтлээ айлгаад байна вэ?

Тэр андуурсан гэж үү? Кай үнэхээр ямар нэгэн эртний муу ёрын хувилгаан байсан юм гэж үү? Яаж тийм зүйл байж болох вэ?!

Сандарсан Санни эргэн харж, дур булаам залуу руу гараа сунган, Шөнө Дундын Хэлтэрхийг дуудах гэж бэлдэв. Хэрэв бүр Өөрчлөгдөж буй Од хүртэл айж байгаа бол энэ нь тус болохгүй нь ойлгомжтой ч...

Гэтэл гайхмаар нь Кай эртний Аюул шиг харагдсангүй. Харин ч Санни руу өхөөрдөм будилсан харцаар ширтэж байлаа.

"Өө, Санни? Найз чинь хэн юм бэ?"

Үгүй, энэ утгагүй байлаа. Санни өөрийн дүгнэлтдээ итгэлтэй байсан. Түүнчлэн Найтингэйлтэй олон хүн мэндчилж, таньж, дуртай нь илт байсан. Тэр яаж Хар дарсан зүүдний мангас байж чадах вэ?

Тэгвэл Нефист юу болоод байна?

Сүүдрийнхээ харааг Кай дээр тогтоосон чигээрээ Санни аажмаар эргэж, Өөрчлөгдөж буй Од руу харлаа. Тэр одоо ч айдаст хөшсөн мэт зогссоор.

Юу болоод байна аа?

"Хөөе... Неф?"

Тэр цочин, харцаа Кайгаас хүчээр салгав. Хэдэн хоромын дараа Нефис болгоомжтой урагш тонгойн шивнэлээ.

"Санни... Найт энд юу хийж байгаа юм?"

Санни хөмсгөө зангидлаа.

"Миний чамд хэлсэн найз минь шүү дээ."

Нефис хэсэг чимээгүй байснаа толгой сэгсрэв.

"Үгүй ээ, би тэрийг хэлээгүй. Тэр яагаад энд байгаа юм бэ?"

Онцолсон нь “энд” гэсэн үг.

_Өөр хаана байх юм?_

Санни бүр төөрөлдөв. Магадгүй тэр хулгайлагдсан явдлын талаар мэдэж байгаа юм болов уу? Үгүй, энэ утгагүй.

Эцэст нь тэр хэлэв:

"Би нурангид түүний амийг аварсан. Тэгээд тэр хариуд нь надад тус болж байгаа."

Нефис түүнийг цөхөрсөн харцаар ширтээд дахин толгой сэгсрэв.

"Биш ээ. Би тэрийг хэлээгүй. Найт яагаад энд, Мартсан Эрэг дээр байгаа юм бэ?"

Санни уцаарлав.

"Та хоёр бодит ертөнцөд бие биенээ таньдаг байсан юм уу?"

Нефис хачин царайлав. Амаа нээгээд, буцааж хаалаа.

Эцэст нь өөрийгөө хүчлэн:

"Чи... чи түүнийг хэн гэдгийг мэдэхгүй юм уу?"

Энэ бүх хачин ярианы турш эелдгээр чимээгүй зогсож байсан Кай гялалзсан инээмсэглэл тодруулан хэлэв:

"Тэр үнэхээр мэдэхгүй байгаа. Гайхалтай биш гэж үү?"

Санни түүнийг бараан харцаар ширтэв.

"Би яаж мэдэх юм? Утга учиртай юм ярь л даа."

Нефис хэсэг дуугүй байснаа чанга шивнэлээ.

"Тэр чинь Найт шүү дээ, тэнэг минь! Найтингэйл хамтлагийн Найт! Тэр бол Найт!"

Санни юу ч ойлгосонгүй. Тэр нүүрээ илж:

"Юу яриад байгаа юм бэ? Найтингэйл гэж юу юм вэ?"

Нефис Кай руу харж, бүр ч цайж:

"Сүүлийн арван жилийн хамгийн алдартай, шилдэг айдол хамтлаг. Гурван удаагийн Орфей шагналын эзэд. Бүх чартын тэргүүнд дараалан зуун долоо хоног. Зургаан алтан-алмаазан цомог. Тэр бол Найтингэйл. Тэр бол Найт. Гол дуучин..."

Санни зүгээр л ширтэв.

_Түр хүлээ... чи арай надад..._

Нефис ийм байдалд орсны шалтгаан нь Кай өмнө нь ямар нэгэн хөвгүүдийн хамтлагийн гишүүн байсан явдал гэж үү?

Өөрчлөгдөж буй Од айсандаа биш... харин шүтэн биширч балмагдсан уу?

Санни хэсэг дуугүй зогсов.

Тэгээд гэнэт тас хөхрөв.

_Бурхан минь... Нефис нэг муу хамтлагийн шүтэн бишрэгч байсан гэж үү? Хараал ид гэж, энэ дэндүү инээдтэй юм!_

Анх уулзахдаа Нефис чихэвч зүүчихсэн явдаг байсныг саналаа. Тэр хөгжим сонирхдог гэдгийг эртхэн ойлгох ёстой байж.

Хүчирхэг, тайван Өөрчлөгдөж буй Од... өхөөрдөм айдол хөвгүүнд балмагдана гэж хэн санах вэ!

Бүр атаархах ч сэтгэл төрсөнгүй. Харанхуй хотод өөрийн шүтээнтэйгээ таарна гэдэг ямар гээч магадлал вэ? Ийм тэнэг зүйл зохиож ч чадахгүй!

Санни хөхөрсөөр, бараг амьсгаа давчдан байж арай гэж зогсов.

"Уучлаарай, уучлаарай. Зүгээр л... чамайг ингэх байх гэж бодоогүй юм. Ха-ха! За, за асуултад чинь хариулъя. Найт энд хоёр жил хагас амьдарч байна. Гэрэлт Цайзад амьдардаг..."

Нефис хэсэг бодлогоширсноо Кай руу нүд нь томорсон чигээр харлаа.

"Хоёр жил хагас гэж үү? Гэтэл... Найтингэйл Гейлийн соло төслөөс болоод завсарлага авсан гэж бодож байсан..."

_Өө, Гейл ч гэж хүн бас байдаг юм байна_

Кай уучлалт гуйсан инээмсэглэл тодруулав.

"Харамсалтай нь тийм биш ээ. Би үнэхээр энэ бүх хугацаанд Харанхуй хотод байсан. Манай агентлаг ямар нэгэн халхавч түүх зохиосон байх. Одоогийн нөхцөлд намайг нас барсан гэж ч зарлаж чадахгүй. Би техникийн хувьд үхээгүй, бас Хоосон нэгэн ч биш. Зүгээр л... унтаж байгаа."

Нефис ичингүйрэн толгой дохив.

"Аан. Ойлголоо."

Эвгүй уур амьсгалыг сарниулахыг оролдож Кай дахин инээмсэглэв.

"Тэгэхэд Саннигийн бас нэг найзтай уулзсандаа баяртай байна. Гэнэтийн бэлэг боллоо! Түүнийг бүрэн... өө... ганцаардмал хүн гэж боддог байсан. Уучлаарай, таны нэрийг сонсож амжаагүй юм. Неф гэж байсан билүү?"

Санни инээмсэглэв.

"Өө тийм, танилцуулахаа мартчихаж. Миний буруу. Найт, энэ бол Нефис. Гэхдээ одоо өөр нэрээр алдаршсан. Чи сонсож байсан байх... Үхэшгүй Дөл овгийн Өөрчлөгдөж буй Од."

Одоо Кайгийн ээлж ирлээ.

Тэр Нефис рүү айсан харцаар ширтэж, нүдний булан нь таталзав.

Гэхдээ айдолын бэлтгэл нь нөлөөлсөн үү, гэнэт сэтгэл хөдлөлөө дарж чадлаа. Нүдээ хэд анивчаад, намуухан, сэтгэл татам хоолойгоор:

"Өө. Тантай уулзсандаа... баяртай байна, хатагтай. Би... таны тухай маш их сонссон. Нэр төрийн хэрэг боллоо."

Нефис хацар дээрх ялимгүй улайлтаа нуух гэж эргэж, гудамжны хана руу ширтэв.

Тэр тээнэгэлзэн:

"Тэгэхээр... найз чинь ирчихлээ, Санни. Одоо хамтдаа ярилцах уу?"

Тэгснээ бага зэрэг эргэлзэн нэмж хэлэв:

"Би чамтай маш чухал зүйл ярилцах хэрэгтэй байна. Энэ бол... амьдрал, үхэл хоорондын асуудал."